ཉེ་ལམ་༧གོང་ས་མཆོག་གིས་རྒྱ་གར་དུས་བབ་གསར་འགོད་པའི་བཅར་འདྲི་དང་ལེན་སྐབས། བོད་ལ་ནང་ཆོས་མ་དར་གོང་བོད་མིས་འཚེ་བའི་ལས་བྱེད་ཀྱི་ཡོད་ཀྱང་། ནང་ཆོས་དར་རྗེས་བོད་མིས་འཚེ་བའི་ལས་རྣམས་ཡོངས་སུ་སྤངས་ཡོད་སྐོར་གསུངས་འདུག
རྒྱ་གཞུང་གིས་དྲག་གནོན་བྱས་མིན་ལ་མ་ལྟོས་པར་བོད་ནང་གི་བོད་མི་ཚོས་གཅིག་རྗེས་གཉིས་མཐུད་ཀྱིས་རང་ལུས་མེར་བསྲེགས་བཏང་བཞིན་པའི་སྐབས་འདིར། རྒྱ་གར་དུས་བབ་ (The Times of India) གསར་ཁང་གི་གསར་འགོད་པ་ཧཱ་རེ་ལགས་བཞུགས་སྒར་ངྷ་སར་ཆེད་བཅར་གྱིས། ༧གོང་ས་མཆོག་ལ་ད་ལྟའི་བོད་ནང་གི་ཛ་དྲག་གནས་སྟངས་དང་བོད་མིའི་རང་ལུས་མེར་བསྲེགས་གཏོང་བཞིན་པའི་གནད་དོན་ཐོག་བཀའ་འདྲི་ཞུས་སྐབས། ༧གོང་ས་མཆོག་གིས་བོད་ནང་དུ་སངས་རྒྱས་པའི་ཆོས་མ་དར་གོང་། བོད་མི་ཚོས་མཚོན་ཆ་བེད་སྤྱོད་བྱས་ཏེ་འཚེ་བའི་ལས་སུ་ཞུགས་ཀྱི་ཡོད་ནའང་། བོད་ལ་སངས་རྒྱས་པའི་ཆོས་དར་བ་ནས་བོད་མི་ཚོས་སེམས་ཅན་གྱི་སྲོག་གཅོད་རྒྱུའི་འཚེ་བའི་ལས་རྣམས་ཡོངས་སུ་སྤངས་ཡོད་པ་མ་ཟད། ཐ་ན་འབུ་སྲིན་ཆུང་ཆུང་ཞིག་གི་སྲོག་གཅོད་རྒྱུར་ཡང་འཚེར་སྣང་བྱས་ཏེ། ཞི་བདེའི་ལམ་ཁར་འགྲོ་བཞིན་ཡོད། བྱམས་པ་དང་བརྩེ་བ། ཞི་བདེས་ཀུན་ནས་བསླངས་པའི་བཟང་སྤྱོད་དེ་བོད་མིའི་གོམས་གཤིས་དང་རིག་གཞུང་གི་ཉིང་བཅུད་དུ་གྱུར་ཡོད། ད་ལྟ་བོད་ནང་གི་བོད་མི་ཚོ་མི་འདོད་བཞིན་ཁོང་ཁྲོ་དང་འཇིཊ་སྣང་འོག་སྡོད་དགོས་བྱུང་ཡོད་ཀྱང་། བོད་མི་ཚོས་འཚེ་བའི་ལས་གང་ཡང་བྱེད་ཀྱི་ཡོད་པ་མ་རེད་ཅེས་གསུངས་འདུག
ཡང་གསར་འགོད་པས་༧གོང་ས་མཆོག་ལ་རྒྱ་གར་གྱི་ལྐོག་ཟ་རུལ་སུངས་སྐོར་བཀའ་འདྲི་ཞུས་སྐབས། རྒྱ་གར་ནི་ཆོས་དད་ཡོད་པའི་རྒྱལ་ཁབ་ཆེན་པོ་ཞིག་ཆགས་ཡོད་ཀྱང་། ལྐོག་ཟ་རུལ་སུངས་ཀྱི་དཀའ་རྙོག་ཁྱབ་བརྡལ་འགྲོ་བཞིན་པ་དེ་ཡ་རབས་བཟང་སྤྱོད་དང་རྒྱབ་འགལ་དུ་ཕྱིན་ཡོད་པ་རེད། ངོས་ཀྱི་བསམ་ཚུལ་ཡིན་ན། རྒྱ་གར་གྱིས་སྔོན་འགྲོའི་སློབ་གྲྭ་ནས་མགོ་འཛུགས་བྱས་ཏེ། གཞི་རིམ་མང་ཚོགས་དང་སྲིད་དོན་པ་ཚོའི་རྒྱུད་ལ་བདེན་རྫུན་གྱི་དབྱེ་བ་འབྱེད་ཐུབ་པའི་ཤེས་ཡོན་སྤྲོད་དགོས་ཀྱི་འདུག་ལ། ཤེས་ཡོན་དེའི་ཐོག་ནས་རང་ཉིད་ཀྱི་བཟང་སྤྱོད་ཡར་རྒྱས་གཏོིང་ཐུབ་པ་ཞིག་གནང་དགོས་ཞེས་གསུངས་ཡོད་འདུག
གསར་འགོད་པ། དཔལ་ལྡན།
ལུང་རྣ་ལྤགས་གཉིས་པོ་གར་འཐེན་མིན་ན། འཚེ་ཞེས་པའི་ངེས་ཚིག་ལ་སོམ་དང་། ངས་ནི་གནོད་པ་དང་འཚེ་བ་འདྲ་བོ་མཐོང་གི་འདུག རང་ཉིད་སྐད་འབོད་རྒྱག་པ་དང་མེ་བསྲེག་བཏང་བ་ལ་རྟེན་ནས་རང་གཞན་གཉིས་ཀ་ལ་གནོད་ཀྱིན་འདུག་མཐོང་ཆོས་མྱོང་གྱུར་འདི་ག་རང་རེད། འདི་ལ་གནོད་པ་དང་འཚེ་བ་མི་ཟེར་ན་འཚེ་བ་རྭ་ཅོ་ཅན་ཞིག་ཡོང་གི་མ་རེདསྙམ།
སྤྱི་ལོ་ ༡༩༥༩ ལོ་ནས་བཟུང་ད་བར་བོད་མདོ་དབུས་ཁམས་གསུམ་ནས་ཕྱི་ནང་བོད་རིགས་སུས་རྒྱ་ནག་གཞུང་ལ་ངོ་རྒོལ་བྱས་ནའང་དྲག་པོས་འཙེ་བའི་ཐོག་ནས་ནམ་ཡང་ད་བར་འགྲོ་མྱོང་མེད་པ་རེད།
གཅིག་ནས་མགོན་པོ་གང་ཉིད་ཀྱིས་གསུངས་པ་ལྟར་སངས་རྒྱས་ཀྱི་ཆོས་དར་ནས་བཟུང་འཙེ་བའི་ལས་སྤང་བ་རེད་ལ། གཉིས་ནས་བོད་རིགས་ཚོར་རླབས་ཆེན་གྱི་དབུ་འཁྲིད་བླ་ན་མེད་པ་༸ གོང་ས་ཡོད་བཞིན་ནོར་བུའི་བཀའ་དགོངས་འོག་ཤར་བསྐྱོད་བྱས་ཡོད་པ་རེད།
༸གོང་ས་སྐུ་འཚོ་བཞིན་བཞུགས་པའི་སྐབས་སུ་བོད་ཀྱི་གནད་དོན་དེ་འཚེ་མེད་ཞི་བདེའི་ཁོ་ན་རེད་ཅེས་བརྗོད་ཆོག ཡིན་ནའང་༸ གོང་ས་མཆོག་མེད་པའི་སྐབས་ཤིག་ནས་བོད་ཀྱི་གནད་དོན་དེ་འཚེ་མེད་ཞི་བའི་ལམ་ཁོ་ན་ཡིན་པའི་ངེས་གཏན་ནས་མེད།
གང་ཡིན་ཟེར་ན་བཟོད་བསྲན་ཟེར་བའི་ཚིག་འདི་ལའང་ཚད་གཞི་གཅིག་ངེས་ཅན་ཡོད་པ་རེད། ཚད་གཞི་དེ་ལས་བརྒལ་ཟིན་ན་རང་ཉིད་ཤི་རྒྱུར་སྐྲག་སྣང་ཅི་ཡང་མེད་པར་གང་བསམས་པ་ལྟར་བྱ་སྤྱོད་སྤེལ་སྲིད་པ་རེད།
སྤྱི་ཟུར་ཆབ་བྲག་ལགས་ཀྱིས་གསུངས་འདུག དངོས་གནས་ང་ཚོས༸མགོན་པོ་མཆོག་གི་བཀའ་ལ་འབད་གང་ཐུབ་བྱེད་དགོས། གང་ལྟར་འཚེ་བའི་ལས་བྱེད་ན་སྦྱོར་དངོས་མཇུག་གསུམ་ཚང་དགོས་པས། བོད་མི་ཚོས་དངོས་གནས་དེ་ལྟར་བྱེད་ཀྱི་ཡོད་པ་མ་རེད་བསམ་གྱི། གང་ཅི་ཐད་ང་ཚོས་ཧ་ཅང་གཟབ་དགོས་པ་ནི་༸གོང་ས་མཆོག་གིས་ང་ཚོར་ཐུགས་རེ་ཇི་ལྟར་གནང་གི་ཡོད་མེད་ལས་ཤེས་ཐུབ། གཙོ་བོ་ཤེས་ཡོན་སྤྲོད་སྟངས་ཀྱི་ཆ་ནས་རེད། ནང་ཆོས་ཉམས་ལེན་རྒྱུད་སྦྱོར་ཡོད་ན་སྐོག་ཟ་རུལ་སུངས་ཀྱང་མེད་པ་རེད།
ང་ཚོའི་ཆབ་སྲིད་ཀྱི་ཁོར་ཡུག་ན་གླེང་བཞིན་པའི་འཚེ་བ་ཟེར་བ་འདི་རང་རྒྱལ་གཞན་ཕམ་གྱི་ཆགས་སྡང་དབང་གིས་གཞན་ལ་གནོད་པ་སྟེ། མེ་རྒྱག མི་གསོད། འཕྲོག་བཅོམ་རིགས་ལ་གོ་དགོས། དེ་བས་༸གོང་ས་མཆོག་གིས་སྐབས་བབ་བཀའ་ལན་ཡང་འདི་རང་ལས་གཞན་ལ་འཁྱོག་དགོས་དོན་མེད། བྱང་ཆུབ་སེམས་དཔར་ཁ་བཏང་ན་ངོ་མ་མནར་མེད་ལ་ལྷུང་ཡོང།
“མཉེས་གཤིན་བྱམས་བརྩེས་འགྲོགས་ཐབས་འཚེ་མེད་ལམ།”
འདི་ལ་མ་ནོར་འཇུག་རོགས་སྐལ་ལྡན་རྣམས།
འཚེ་བའི་མཚན་ཉིད་ཞིག་ཞོག་དང་འཚེ་བའི་གོ་དོན་ཤེས་ཡོང་། འཚེ་བ་ཡིན་ན་གཞན་ཁོ་ན་འཚེ་བ་ཡིན་པས་ཨེ་ཁྱབ།
དེང་སང་བོད་པའི་ནང་ན་ཡང་འཚེ་བ་བྱེད་དགོས་ཟེར་མཁན་ཡོང་གིན་འདུག ངོ་མ། བོད་པས་མུ་མཐུད་དེ་ཞི་བདེའི་དེད་དཔོན་ཆེན་པོའི་རླབས་ཆེན་དགོངས་དོན་ལྟར་དུ་འཚེ་མེད་ཞི་བདེའི་ལམ་བུ་ཁོ་ནར་སྙེག་ཐུབ་བམ། ཐུབ་བམ།
བྱང་ཆུབ་སེམས་དཔའི་ཐུགས་རྗེའི་སྨོན་ལམ་མཐུས”བདེན་པ་ཉིད་རྣམ་པར་རྒྱལ་གྱུར་ཅིག”