ཁ་སང་ཕྱི་ཚེས་ ༦ ཉིན་བོད་མི་མང་སྤྱི་འཐུས་ལྷན་ཚོགས་ཀྱིས་ཉེ་ལམ་གསེར་རྟ་རྫོང་དུ་བོད་མི་གསུམ་གྱིས་རང་ལུས་མེར་བསྲེག་གིས་རྒྱ་ནག་གཞུང་ལ་ངོ་རྒོལ་བྱས་ཡོད་པའི་སྐོར་ལ་གསལ་བསྒྲགས་ཤིག་སྤེལ་ཡོད་པ་དང་། གསལ་བསྒྲགས་ནང་། ཟླ་འདིའི་ཕྱི་ཚེས་ ༣ ཉིན་གསེར་རྟ་རྫོང་ཕུ་འུ་ཤང་དུ་བོད་མི་གསུམ་གྱིས་རང་ལུས་མེར་བསྲེགས་ཀྱིས་རྒྱ་ནག་གཞུང་ལ་ངོ་རྒོལ་སྐད་འབོད་བྱས་རྗེས། རྒྱ་ནག་གཞུང་གིས་ས་གནས་གང་སར་དམག་མི་འགྲེམས་འཇོག་གིས་བོད་མིའི་འགྲུལ་བཞུད་དང་བརྒྱུད་ལམ་བཀག་སྡོམ་བྱས་ཡོད་པའི་སྐོར་དང་། ཕྱི་ཚེས་ ༤ ཉིན་སེར་ཤུལ་རྫོང་དབོན་པོ་ཤང་དུ་བོད་ཀྱི་རྒྱལ་དར་བསྒྲེངས་འཛུགས་དང་། ཡིག་ཆ་སྦྱར་འགྲེམས་གྱི་གནས་ཚུལ་བྱུང་བ་ནས་དགོན་གྲོང་གཉིས་ལ་དམ་དྲག་བཀམ་སྡོམ་བྱེད་ཀྱིན་པའི་སྐོར། དེ་བཞིན། ཉེ་ཆར་བོད་རང་སྐྱོང་ལྗོངས་དམར་ཤོག་དང་སྲིད་གཞུང་གིས་དཔྱིད་གསར་དུས་ཆེན་དང་། ཕྱི་ཟླ་ ༣ བཅས་སུ་འབྲེལ་ཡོད་གཏན་འབེབས་གཟབ་ནན་གྱིས་ལག་བསྟར་བྱེད་དགོས་པའི་ཛ་དྲག་བརྡ་ཐོ་དང་། ཀྲུང་དབྱང་དང་ལྗོངས་ཏང་ཨུད་ཀྱིས་བཀོད་སྒྲིག་བྱས་པའི་བརྟན་ལྷིང་སྲུང་སྐྱོབ་ཀྱི་ལས་དོན་ནུས་ཤུགས་ཡོད་རྒུས་ལག་ལེན་དོན་འཁྱོལ་དགོས་པའི་ཛ་དྲག་བརྡ་ཐོ་གཉིས་ཀྱི་ནང་།བརྟན་ལྷིང་སྲུང་སྐྱོབ་ཆེད་ལག་གང་སྔ་བརྩད་དེ། རང་འགུལ་གྱིས་ཕར་རྒོལ་བྱ་དགོས་ལུགས་དང་། བརྟན་ལྷིང་བཀོད་འདོམས་ཀྱི་འབྲེལ་ཡོད་ལས་ཁུངས་དང་། ལས་ཁུངས་ཁག གྲོང་གསེབ་བཅའ་སྡོད་ལས་དོན་རུ་ཁག དགོན་སྡེ་དོ་དམ་ཨུ་ལྷན་བཅས་ཀྱི་ལས་དོན་ལ་ལྟ་སྐུལ་ཞིབ་བཤེར་བྱས་ཏེ།གནད་དོན་བྱུང་མཚམས་འཕྲལ་དུ་ཐག་གཅོད་དང་སྙན་སེང་། བརྟན་ལྷིང་སྲུང་སྐྱོབ་ཀྱི་ལས་དོན་འཐུས་ཤོར་གཏོང་མཁན་རིམ་པའི་ལས་བྱེད་དག་འཕྲལ་མར་ལས་གནས་ཕྱིར་ཕུད་དང་། ཚབས་ཆེའི་རིགས་སྲིད་ཁྲིམས་ཚན་པས་ཉེས་དོན་འགན་ཁུར་བརྩད་ཞིབ་བྱ་རྒྱུ་ཡིན་ཚུལ་སོགས་ཞིབ་ཕྲར་བཀོད་འདུག
ཡང་གསལ་བསྒྲགས་ནང། རྒྱ་གཞུང་གིས། དུས་རབས་ ༢༡ ནང་ད་དུང་དྲག་ཤུགས་ཁོ་ནར་ཡིད་ཆེས་བྱས་ཏེ། དཀའ་རྙོག་རྣམས་འབུར་འཇོམས་དང་དམ་དྲག དྲག་གནོན་ཁོ་ནས་མེད་པར་བཟོ་ཐབས་བྱེད་པ་དང་། རྫུན་དང་ཧམ་པ། དཀར་ནག་གོ་ལྡོག་གི་དྲིལ་བསྒྲགས་སྤེལ་བཞིན་ཡོད་པ་དང་། སྔར་ལོ་བོད་ནང་སྐྱ་སེར་ཕོ་མོ་ ༡༩ ཡིས་རང་ལུས་མེར་བསྲེག་བཏང་བའི་ཁྲོད་སེར་སྐྱ་ ༡༣ འདས་གྲོངས་དང་། བོད་མི་ ༦ གར་སོང་ཆ་མེད་དུ་གྱུར་ཡོད་པ་མ་ཟད། ལོ་གསར་བའི་ནང་སྤྱི་བདེ་ལས་བྱེད་དང་དྲག་ཆས་ཉེན་རྟོག་པས་བོད་མི་ཞི་རྒོལ་བའི་སྟེང་གང་བྱུང་མེ་མདའ་བརྒྱབ་སྟེ། ཉུང་མཐར་བོད་མི་ ༥ དམར་གསོད་དང་བོད་མི་མང་པོར་རྨས་སྐྱོན། གཞན་མང་པོ་ཞིག་འཛིན་བཟུང་བཙན་ཁྲིད་སོགས་བྱས་ཏེ། ད་ཆར་ཞི་རྒོལ་བྱུང་ཡུལ་ས་ཁུལ་ཁག་ཏུ་མངོན་གསལ་མིན་པའི་དམ་དྲག་གནས་ཡོད། གལ་སྲིད། རྒྱ་གཞུང་གིས་མུ་མཐུད་བོད་མིའི་ཐོག་དྲག་གནོན་དང་བོད་དོན་འགྲིག་འཇགས་ལ་དུས་འགྱངས་བྱས་ཚེ། དེ་ལས་བྱུང་བའི་ངན་འབྲས་མཐའ་དག་རྒྱ་གཞུང་གིས་འགན་ཁུར་ལེན་དགོས། ཞེས་སོགས་བཀོད་འདུག
གསལ་བསྒྲགས་ཀྱི་མཇུག་ཏུ། ཉེ་ཆར་སྤྱི་ལྷན་གྱིས་སྲིད་འཛིན་ཧུའུ་ཅིན་ཐའོ་ལ་བསམ་ཚུལ་དང་དགོས་འདུན་ཁག་གསལ་སྟོན་བྱས་ཏེ། ལྡི་ལིར་རྒྱ་ནག་གཞུང་ཚབ་ལ་བོད་ནང་གི་ཛ་དྲག་གནས་སྟངས་ཞུ་སྐུལ་ཆེད་ཐུག་འཕྲད་དུ་བསྐྱོད་སྐབས། རྒྱ་ནག་གཞུང་ཚབ་ཀྱིས་སྤྱི་ལྷན་སྐུ་ཚབ་ལ་ཐུག་འཕྲད་མ་བྱས་པ་མ་ཟད། གཞུང་ཚབ་གཞན་དག་ལ་ཡི་གེ་བཏང་སྟེ་ཐུག་འཕྲད་མི་བྱེད་པའི་སྐུལ་སློང་བྱས་པ་མ་ཟད། རྒྱལ་སྤྱིའི་རྟོག་ཞིབ་ཚོགས་ཆུང་བོད་ནང་གཏོང་རྒྱུའི་འབོད་སྐུལ་རིམ་པར་སྣང་མེད་བཏང་ཡོད། གལ་སྲིད། རྒྱ་གཞུང་གིས་བོད་ནང་ཞི་བདེ་ལྷིང་འཇགས་ཀྱི་ཁོར་ཡུག་ཞིག་དགོས་གལ་མཐོང་ཚེ། དམག་དཔུང་ཕྱིར་འཐེན་དང་དྲག་གནོན་མཚམས་འཇོག གཞུང་ངོས་ནས་བོད་ནང་གི་དངོས་ཡོད་གནས་ཚུལ་ལ་སྒྲོ་སྐུར་གྱི་རྫུན་སྒྲོག་མི་བྱེད་པར། སྲིད་འཛིན་ཧུའུ་ལ་ཕུལ་བའི་སྙན་ཞུའི་ནང་དོན་ལྟར་བོད་མིའི་སྐུ་ཚབ་བོད་ནང་གཏོང་རྒྱུའི་སྐོར་ལ་ནན་སྐུལ་གནང་ཡོད་པ་དང་། རང་དབང་མང་གཙོའི་སྲིད་གཞུང་དང་གྲོས་ཚོགས་བཅས་ནས་རྒྱ་གཞུང་གིས་བོད་ནང་གི་འགྲོ་བ་མིའི་ཐོབ་ཐང་དང་། ཡོངས་ཁྱབ་རིན་ཐང་ལ་རྩིས་མེད་རྡོག་རོལ་གཏོང་བའི་བྱ་སྤྱོད་ཐད་གནོན་ཤུགས་སྤྲོད་ཐབས་ཀྱི་འགན་འཁུར་མང་ཙམ་ལེན་རྒྱུའི་རེ་སྐུལ་སོགས་གནང་འདུག
ཐེངས་གཅིག་གིས་ག་ལ་ཆོག རྦད་དེ་གཞུང་ཚབ་ཁང་ཁག་གི་སྒོ་འགྲམ་ནས་ཉལ་བཞག་དགོས་ཀྱི་རེད། བོད་གཞིས་བྱེས་གཉིས་ཀྱི་སྐུ་ཚབ་ཚོ་ད་འདུག་རན་ཞིག་མིན། འདི་དག་གི་སྐབས་དབྱིན་སྐད་མཁྱེན་མཁན་ཚོ་རྒྱུགས་དགོས་ཀྱི་འདུག སྤྱི་འཐུས་དབྱིན་སྐད་མི་མཁྱེན་ནི་ཚོས་ཀྱང་འཇོན་ཚད་ཀྱིས་རྒྱུགས་དགོས། སྐུ་མཁྱེན་ད་བཤད་བྱེད་ཀྱི་ལྕེ་ཁ་ནང་ལ་བཞག་འདུག་གཱ