ཡེ་ཤུ་ཆོས་དཔོན་ཌ་སི་མན་ཊའུ་ཊའུ་མཆོག་བཞུགས་སྒར་ངྷ་རམ་ས་ལར་ཕེབས་ཏེ་༧གོང་ས་མཆོག་ལ་མཇལ་འཕྲད་རྒྱུ་རེད།
སང་ཉིན་ལྷོ་ཨ་ཧྥི་རི་ཀའི་ཡེ་ཤུ་ཆོས་དཔོན་ཌ་སི་མན་ཊའུ་ཊའུ་(desmond tutu)མཆོག་བཞུགས་སྒར་ངྷ་རམ་ས་ལར་ཕེབས་ཏེ། ཐེག་ཆེན་ཆོས་གླིང་གཙུག་ལག་ཁང་དུ་ཕེབས་བསུའི་མཛད་སྒོ་ཞིག་གོ་སྒྲིག་ཞུ་རྒྱུ་ཡིན་པ་དང་། སྔ་དྲོའི་ཆུ་ཚོད་ ༡༠ ཡས་མས་ལ་༧གོང་ས་མཆོག་དང་ཡེ་ཤུ་ཆོས་དཔོན་རྣམ་གཉིས་ཀྱིས་ཡོངས་ཁྱབ་ཐོག་གསར་འགོད་པ་ཚོར་ཐུག་འཕྲད་གནང་རྒྱུ་རེད།
ཡེ་ཤུ་ཆོས་དཔོན་ཊའུ་ཊའུ་མཆོག་ནི་༧གོང་ས་མཆོག་དང་ཧ་ཅང་ཐུགས་ཐག་ཉེ་བའི་གྲོགས་པོ་ཞིག་ཡིན་ཞིང་། སྔར་ལོའི་ཕྱི་ཟླ་ ༡༠ ཚེས་ ༧ ཉིན་ཆོས་དཔོན་ཁོང་དགུང་གྲངས་ ༨༠ ལ་སོན་པའི་འཁྲུངས་སྐར་ཐོག་༧གོང་ས་མཆོག་མགྲོན་འབོད་གནང་ཡོད་ཀྱང་། རྒྱ་ནག་གཞུང་གི་གནོད་ཤུགས་འོག་ལྷོ་ཨ་ཧྥི་རི་ཀ་གཞུང་གིས་ཐོངས་ཆེན་མ་སྤྲད་པར་ཕེབས་མ་ཐུབ་སྟབས། སྐབས་དེར་ཆོས་དཔོན་ཁོང་གིས་ཐུགས་ཕམ་ཆེན་པོ་མཛད་དེ་བསྒྲགས་གཏམ་ཞིག་སྤེལ་བའི་ནང་། “ སྲིད་འཛིན་ཛུ་མ་ལགས་དང་ཁྱེད་ཀྱི་གཞུང་འདིས་ང་དང་ང་ཚོའི་མི་དམངས་ཀྱི་ངོ་བོ་མཚོན་ཐུབ་ཀྱི་མི་འདུག ད་ལྟའི་ཁྱེད་ཀྱི་སྲིད་གཞུང་ལས་འདས་པའི་ལོ་རྒྱུས་ཐོག་གི་མི་རིགས་དཀར་ནག་དབྱེ་འབྱེད་སྐབས་ཀྱི་གཞུང་དེ་ཡག་པོར་མཐོང་གི་ཡོད། གལ་སྲིད་སྐབས་དེའི་སྲིད་གཞུང་ཡིན་ན་དེ་རིང་༧གོང་ས་མཆོག་ལ་ཐོངས་མཆན་སྤྲད་ཡོད་པར་ངས་ཡིད་ཆེས་བྱེད་ཀྱི་ཡོད། ད་ལྟ་བོད་ནང་དཀའ་སྡུག་མྱོང་བཞིན་པའི་གནས་བབས་ལ་རྒྱབ་སྐྱོར་མི་བྱེད་པ་འདིས་ང་དང་མི་དམངས་ཡོངས་ཀྱི་འདོད་འདུན་ལ་རྡོག་རོལ་བཏང་སྟེ། གཞུང་གིས་མི་མང་གི་ཚབ་མཚོན་མ་ཐུབ་པའི་དན་རྟགས་རེད” ཅེས་སོགས་གསུངས་ཡོད།
ཌ་སི་མན་ཊའུ་ཊའུ་མཆོག་འཛམ་གླིང་གི་ཡེ་ཤུ་བ་ཡོངས་དང་ལྷག་པར་དུ་ལྷོ་ཨ་ཧྥི་རི་ཀའི་མི་མང་ཚོས་དགའ་མོས་ཆེན་པོ་བྱེད་ཡུལ་ཞིག་ཡིན་ལ། ཕྱི་ལོ་ ༡༩༨༤ ལོར་ཁོང་གིས་འཛམ་གླིང་ནོ་བྷེལ་ཞི་བདེ་གཟེངས་རྟགས་བཞེས་ཡོད།
གསར་འགོད་པ། དོན་འགྲུབ་བཀྲ་ཤིས།
ཆོས་ཀྱི་དབུ་འཁྲིད་རྣམ་གཉིས་མཇལ་འཕྲད་གནང་བ་རྗེས་སུ་ཡི་རང་ཡོད། དོན་ཆེན་འགྲུབ་པའི་བཀྲ་ཤིས་ཤོག
ཆོས་དཔོན་ལགས་ལ་གུས་འདུད་ཞུ། སྐུ་ཉིད་ནས་ཆོས་ལུགས་ཡོངས་ཀྱིས་མི་མང་གི་འདོད་བློ་སྒྲུབ་ཀྱི་ཡོད་པ་དང་། ཆོས་ལུགས་འདི་ཆབ་སྲིད་པ་ཚོར་མཚོན་ནའང་ཧ་ཅང་གལ་ཆེན་ཡིན་པ། གལ་སྲིད་ཆོས་ལུགས་ཀྱི་མི་མང་གི་བསམ་བློའི་གདུག་རྩུབ་ཀྱི་ཆ་དེ་འདུད་མ་ཐུབ་ན། འཛམ་གླིང་འདིར་ཧ་ཅང་དཀའ་ངལ་དང་། དྲག་རྩུབ་འབྱུང་བའི་སློབ་སྟོན་མུ་འཐུད་གནང་རོགས། ༸གོང་ས་མཆོག་དང་ཆོས་དཔོན་ལགས་རྣམ་གཉིས་ཡང་ཡང་ཞལ་ལྷན་འཛོམས་ཐོག་གསུང་གླེང་བགྱིད་པར་སྨོན།
ཡེ་ཤུའི་ཆོས་དཔོན་ཌ་སི་མན་ཊའུ་ཊའུ་(desmond tutu)མཆོག་བཞུགས་སྒར་ངྷ་རམ་ས་ལར་ཕེབས་པར་ཡིད་སེམས་སྤྲོ་དགས་ཕེབས་བསུ་བྱེད།
ཡེ་ཤུ་ཆོས་དཔོན་ཊའུ་ཊའུ་མཆོག་དང་། ༧གོང་ས་མཆོག་རྣམ་གཉིས་སྐུ་ཚེ་ཡུན་བརྟན་ཤོག །ཡུན་བརྟན་ཤོག ཡུན་བརྟན་ཤོག །