འཇར་མན་རྒྱ་ནག་གཞུང་ཚབ་ལ་ངོ་རྒོལ།

གཟའ་ལྷག་པའི་ཉིན་འཇར་མན་པ་ཇོ་ཧཱ་མེལ་ཊོན་ལགས་ཀྱིས་རྒྱ་ནག་གཞུང་ཚབ་ཁང་དུ་ངོ་རྒོལ་སྐད་འབོད་དང་རྒྱ་ནག་གི་རྒྱལ་དར་མེར་བསྲེགས་བཅས་བཏང་ཡོད་འདུག

ཉེ་ལམ་དབུས་བོད་མིའི་སྒྲིག་འཛུགས་དང་བོད་མི་མང་སྤྱི་འཐུས་ཐུན་མོང་ཐོག་གཞུང་འབྲེལ་གསལ་བསྒྲགས་སྤེལ་ཏེ། གཉིས་པའི་ཚེ་བརྒྱད་ཉིན་འཛམ་གླིང་ཡོངས་ཀྱི་བོད་མི་དང་བོད་དོན་རྒྱབ་སྐྱོར་བ་ཚོས་བོད་ནང་གི་བོད་མི་ཚོར་གདུང་སེམས་མཉམ་སྐྱེད་ཆེད། ཉིན་བརྒྱ་དུས་གཅིག་གི་ལས་འགུལ་སྤེལ་དགོས་པའི་བཀོད་ཁྱབ་བཏང་ཡོད་པ་ལྟར། ཟླ་འདིའི་ཕྱི་ཚེས་ ༨ ཉིན་འཇར་མན་གྱི་བོད་དོན་རྒྱབ་སྐྱོར་པ་སྐུ་ཞབས་ཇོ་ཧཱ་མེལ་ཊོན་ལགས་ཀྱིས་འཇར་མན་གྱི་གྲོང་ཁྱེར་མུ་ནེ་ཆི་(Munich) ནང་གི་རྒྱ་གཞུང་ཚབ་ཁང་དུ་ངོ་རྒོལ་སྐད་འབོད་དང་རྒྱ་ནག་གི་རྒྱལ་དར་མེར་བསྲེགས། མེ་ཏོག་ ༢༡ ཁྱེར་ཏེ་བོད་ནང་རང་ལུས་མེར་བསྲེགས་གཏོང་མཁན་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་ཞུས་ཡོད་འདུག

སྐུ་ཞབས་ཇོ་ཧཱ་མེལ་ཊོན་ལགས་སུ་དྲ་ལམ་བརྒྱུད་བཅར་འདྲི་ཞུས་དོན་ལྟར་ན། ཐེངས་འདིར་ཁོང་གིས་མེར་བསྲེགས་བཏང་བའི་རྒྱ་ནག་གི་རྒྱལ་དར་དེ་ནི་ཁོང་གི་གཟའ་ཟླས་ལག་འཚེམ་བྱས་པ་ཞིག་ཡིན་ཞིང་། རྒྱལ་དར་དེའི་སྟེང་དུ་རྒྱ་ནག་མཚོན་བྱེད་དུ་སྐར་མ་ཆེ་བ་གཅིག་གིས་གད་མོ་དགོད་བཞིན་ཡོད་པ་དང་། གྲངས་ཉུང་མི་རིགས་ཁག་མཚོན་བྱེད་དུ་སྐར་མ་ཆེ་བའི་མཐའ་འཁོར་དུ་ངུ་ཤུམ་རྒྱག་བཞིན་པའི་སྐར་མ་ཆུང་བ་ལྔ་བཅས་འཚེམ་སྒྲུབ་བྱས་ཡོད་འདུག  ཁོས་བརྗོད་དོན། “རྒྱ་ནག་གི་རྒྱལ་དར་མེར་བསྲེགས་བཏང་པའི་རྒྱུ་མཚན་ནི། རྒྱ་ནག་དམར་ཤོག་གཞུང་དང་དེའི་སྐར་མ་ལྔ་ཅན་གྱི་རྒྱལ་དར་བཅས་བཙན་ཤེད་ལས་བྱུང་པ་ཞིག་ཡིན་སྟབས།  ཁྲིམས་འགལ་དང་ངོས་ལེན་མེད་པའི་རྒྱལ་དར་དེ་མེར་བསྲེགས་བཏང་པ་ཡིན་”ཞེས་བརྗོད་བྱུང་།

ཉིན་དེའི་ངོ་རྒོལ་སྐབས་ཇོ་ཧཱ་མེལ་ཊོན་མཉམ་དུ་བོད་མི་སྐོར་ཞིག་དང་བོད་དོན་རྒྱབ་སྐྱོར་བ་བཅས་ཡོད་ཀྱང་། རྒྱ་ནག་གཞུང་ཚབ་ཏུ་ཕྱིན་སྐབས་སྐོར་སྲུང་བ་ཚོས་ལས་འགུལ་བ་གཞན་རྣམས་བཀག་འགོག་བྱས་ཡོད་འདུག སྐབས་དེར་ཇོ་ཧཱ་མེལ་ཊོན་གྱི་ལག་ཏུ་མེ་ཏོག་བཟུང་ཡོད་སྟབས། ཉེན་རྟོག་པ་ཚོས་གཞུང་ཚབ་ཁང་ལ་མེ་ཏོག་སྐྱེལ་མཁན་རེད་བསམ་པ་ཡིན་ནམ་གང་ལྟར་ཇོ་ཧཱ་མེལ་ཊོན་གཅིག་པུ་གཞུང་ཚབ་ཁང་དུ་བཏང་ཡོད་འདུག ཇོ་ཡིས་ “ ང་དོན་གཅོད་ཁང་ནང་སླེབས་འཕྲལ་བོད་རང་བཙན་ཡིན། རྒྱ་ནག་གི་བྱ་སྤྱོད་ངོ་ཚ་རེད། བོད་མི་ཚོས་ནམ་ཡང་བློས་གཏོང་གི་མ་རེད་ཅེས་སྐད་འབོད་བྱས་པ་དང་མཉམ་དུ་རྒྱ་ནག་གི་རྒྱལ་དར་མེར་བསྲེགས་བཏང་པ་ཡིན།”ཟེར།

ཁོས་རྒྱ་ནག་གཞུང་ཚབ་ཁང་ནས་སྐད་འབོད་བྱས་མ་ཐག་ཉེན་རྟོག་པ་དེར་སླེབས་ཡོད་ཀྱང་། ཁོང་ལ་ཅུང་ཙམ་རིང་ངོ་རྒོལ་བྱེད་དུ་བཅུག་ཡོད་པ་མ་ཟད། ཉེན་རྟོག་པ་གཅིག་གིས་རྒྱ་དར་ལ་མེ་སྒྲོན་རོགས་ཀྱང་བྱས་འདུག གནད་དོན་དེའི་ཐད་ཇོ་ཧཱ་མེལ་ཊོན་གྱིས་ “ད་སྔ་ངས་ལས་འགུལ་འདི་འདྲ་ཐེངས་མང་སྤེལ་བ་ཡིན། དོན་དངོས་ཐོག་འཇར་མན་ཉེན་རྟོག་པ་ཚོས་བོད་དོན་ལ་གདུང་སེམས་མཉམ་སྐྱེད་ཡོད་པ་རེད” ཅེས་བརྗོད་བྱུང་། སྐབས་དེར་རྒྱ་ནག་གཞུང་ཚབ་ཀྱི་དཔོན་རིགས་ཚོས་ཐོག་ཁང་ནས་མར་ལྟ་བཞིན་ཡོད་པར། ཇོ་ཧཱ་མེལ་ཊོན་གྱིས་ཁོང་ཚོར་ཁ་གཏད་དེ་ཁྱེད་རང་ཚོ་ངོ་ཚ་མེད་པར་བོད་མིར་དྲག་གནོན་བྱས་པ་ནི། ནམ་ཡང་རང་དབང་དང་འགྲོ་བ་མིའི་ཐོབ་ཐང་ལ་བརྩི་འཇོག་བྱེད་མཁན་གྱི་རྒྱལ་སྤྱིའི་སྤྱི་ཚོགས་དང་། ལྷག་པར་དུ་བོད་མི་ཚོས་དུས་ནམ་ཡང་གུ་ཡངས་སུ་གཏོང་གི་མ་རེད་ཅེས་སྐད་བརྒྱབ་ཡོད་འདུག

ཇོ་ཧཱ་མེལ་ཊོན་གྱིས་བརྗོད་པ་ལྟར་ན། ངོ་རྒོལ་སྐབས་འཇར་མན་གྱི་ཉེན་རྟོག་པ་ཚོས་ཁོ་རང་འཛིན་བཟུང་བྱས་སོང་བ་ཡིན་ན་ཡག་པོ་འདུག ཁོས་ཁྲིམས་ཁང་ནས་རྒྱ་ནག་གི་བྱ་སྤྱོད་ངན་པ་རིགས་གསལ་བཤད་དང་། བོད་ཐོག་དྲག་གནོན་བྱེད་ཀྱིན་པ་དེར་འཇར་མན་གཞུང་གིས་གནོན་ཤུགས་སྤྲོད་དགོས་པའི་སྐད་ཆ་བཤད་ཐུབ་གི་རེད་དྲན་ཡོད་ཀྱང་། ཉེན་རྟོག་པ་ཚོས་ཁོ་འཛིན་བཟུང་མ་བྱས་པར་ཕྱིར་འཕུད་བཏང་སོང་ཡང་། ཉེན་རྟོག་པ་ཚོར་སྐར་མ་ ༢༠ ཙམ་ལ་བོད་ནང་གི་གནས་སྟངས་ངོ་སྤྲོད་བྱས་ཡོད་ཟེར།

ཇོ་ཧཱ་མེལ་ཊོན་ལ་ཉིན་དེར་འཇར་མན་ནང་ཡོད་པའི་བོད་པ་དག་གིས་ལས་འགུལ་སྤེལ་ཐུབ་ཡོད་མེད་སྐོར་དྲིས་པར “འདིར་ཡོད་པས་བོད་པ་ཚོས་ལས་འགུལ་དེ་ཙམ་སྤེལ་ཐུབ་ཀྱི་མི་འདུག ཅུང་ཙམ་རེ་སྤེལ་སྐབས་ཀྱང་དང་པོ་ཉེན་རྟོག་ལས་ཁུངས་ལས་ཆོག་མཆན་ཞུས། གཞུང་ཚབ་ཀྱི་ཉེ་སར་འགྲོ་མ་ཐུབ་པར་རྒྱང་རིང་ནས་སྐད་འབོད་འདྲ་བྱེད་ཀྱི་ཡོད་པ་རེད། ཕྱོགས་གཅིག་ནས་ཁོང་ཚོར་ཁག་ཡོད་པ་མ་རེད། འདིར་ཡོད་མཁན་ཚོ་སྐྱབས་བཅོལ་བ་ཡིན་པའི་ཁར་ལས་ཀ་བརྟན་པོ་མེད་པ་དང་། དངུལ་འབབས་ཀྱང་ཉུང་ཉུང་ཡིན་སྟབས། ཆོག་མཆན་མེད་པར་ལས་འགུལ་སྤེལ་ཚེ་ཁོང་ཚོ་བཀག་ཉར་དང་། དངུལ་གྱི་ཉེས་ཆད་མང་པོ་སྤྲོད་དགོས་ཆགས་གི་རེད། ད་ཆར་ཁོང་ཚོས་ལས་འགུལ་རྒྱ་ཆེ་ཙམ་སྤེལ་ཐུབ་ཆེད་འཇར་མན་མི་དང་མཉམ་འབྲེལ་ལས་འགུལ་ཚོགས་པ་ཞིག་འཛུགས་ཐབས་བྱེད་ཀྱི་ཡོད”ཅེས་བརྗོད་བྱུང་།

ཇོ་ཧཱ་མེལ་ཊོན་(Joe Hamailton)ལགས་ཀྱིས་ཉེ་ཆར་གནས་མཆོག་རྡོ་རྗེ་གདན་ནས་མགོ་འཛུགས་ཀྱིས་ལྷ་རྒྱ་རི་རྣམ་རྒྱལ་སྒྲོག་དཀར་དང་མཉམ་དུ་བོད་ནང་ཞི་བདེ་དང་རང་དབང་ཆེད་དད་པའི་གོམ་བགྲོད་ཅིག་ཀྱང་གནང་ཡོད་པ་རེད།

གསར་འགོད་པ། བནྡེ་སྐྱབས།