དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ། ལྷོ་ཨ་ཧྥི་རི་ཀའི་ཡེ་ཤུ་ཆོས་དཔོན་ཌེ་སི་མོན་ཊའུ་ཊའུ་མཆོག་ལ་ཕེབས་བསུའི་མཛད་སྒོ་ཞིག་ཚོགས་སྐབས། ཊའུ་ཊའུ་མཆོག་གིས་ཁོང་གི་སྐྱེས་སྐར་བཞུགས་སྒར་ངྷ་སར་གཏོང་ཐུབ་པར་དགའ་སྤྲོ་ཆེན་པོ་སྐྱེས་ཡོད་ཚུལ་གསུངས་སོང་།
དེ་རིང་ཕྱི་ཚེས་ ༡༠ ཉིན་གྱི་སྔ་དྲོའི་ཆུ་ཚོད་ ༡༠ དང་ཕྱེད་ཀའི་སྟེང་། འཛམ་གླིང་ནོ་སྦེལ་ཞི་བདེ་གཟེངས་རྟགས་ཐོབ་མཁན་ལྷོ་ཨ་ཧྥི་རི་ཁའི་ཡེ་ཤུ་ཆོས་དཔོན་ཌེ་སི་མོན་ཊའུ་ཊའུ་ (ArchbishopDesmond Tutu) མཆོག ཀཱང་ར་གྷ་གྷལ་གནམ་ཐང་དུ་༧གོང་ས་མཆོག་དང་བོད་གཞུང་དམངས་གཉིས་ཀྱི་ཕེབས་བསུའི་འོག ཐེག་ཆེན་ཆོས་གླིང་གཙུག་ལག་ཁང་དུ་འབྱོར་ཡོད་པ་དང་། སྔ་དྲོའི་ཆུ་ཚོད་ ༡༡ སྟེང་གཙུག་ལག་ཁང་དུ་ཡེ་ཤུ་ཆོས་དཔོན་མཆོག་ལ་ཕེབས་བསུའི་མཛད་སྒོ་ཚོགས་རྒྱས་པ་ཞིག་གོ་སྒྲིག་ཞུས་འདུག མཛད་སྒོའི་ཐོག་༧གོང་ས་མཆོག་གིས་དབུས་བཀའ་བློན་ཁྲི་པ་བློ་བཟང་སེང་གེ་མཆོག་དང་ཁྲིམས་ཞིབ་པ། བོད་མི་མང་སྤྱི་འཐུས་ཚོགས་གཙོ་གཞོན་གཉིས་དང་སྤྱི་འཐུས་རྒྱུན་ལས་རྣམ་པ། ལྷན་ཁང་ཁག་གི་བཀའ་བློན་རྣམ་པ་དང་གཞུང་ཞབས་ལས་བྱེད་ཆེ་ཕྲ། ཡེ་ཤུ་ཆོས་དཔོན་མཆོག་དང་ཁོང་གི་སྐུ་ཟླ། ༧གོང་ས་མཆོག་གི་གྲོགས་པོའམ་དེ་རིང་ཡེ་ཤུ་ཆོས་དཔོན་མཆོག་ལ་གནམ་གྲུ་ཆེད་གཏོང་གནང་མཁན་གྱི་སྦྱིན་བདག རྒྱ་གར་བྱང་ཤར་ཕྱོགས་ཀྱི་ཡེ་ཤུའི་ཆོས་དཔོན་པཱར་ངྷི་ཀུ་མིར་སཱ་མན་ཊེ་རོ། ངྷ་ས་ཧིན་བོད་མཛའ་འབྲེལ་ཚོགས་པའི་ཚོགས་གཙོ་དང་མང་ཚོགས་བཅས་ཁྱོན་མི་མང་ ༣༠༠༠ ལྷག་འདུ་འཛོམས་བྱུང་ཡོད།
མཛད་སྒོའི་ཐོག་མར་སྐུ་སྒེར་དྲུང་ཆེ་བསྟན་འཛིན་སྟག་ལྷ་ལགས་ཀྱིས། ཡེ་ཤུ་བླ་ཆེན་མཆོག་སྐུ་ངལ་མཛད་མེད་ཐོག་བཞུགས་སྒར་ངྷ་སར་ཆེད་ཕེབས་གནང་བར་དགའ་བསུ་དང་འབྲེལ། བོད་རིགས་མང་ཚོགས་ལ་བླ་ཆེན་ཁོང་གི་སྐུ་ཚེའི་ལོ་རྒྱུས་སྐོར་ངོ་སྤྲོད་དང་། དུས་ཡུན་རིང་པོར་བོད་ཀྱི་རྩ་དོན་ཐོག་རྒྱབ་སྐྱོར་གནང་བར་བསྟོད་བསྔགས་སོགས་གནང་རྗེས། ཧིན་བོད་མཛའ་འབྲེལ་ཚོགས་པའི་ཚོགས་གཙོ་དང་། རྒྱ་གར་བྱང་ཤར་ཁུལ་གྱི་ཡེ་ཤུ་ཆོས་དཔོན། དེའི་རྗེས་༧གོང་ས་མཆོག་དང་། མཇུག་ཏུ་ཡེ་ཤུ་བླ་ཆེན་ཊའུ་ཊའུ་མཆོག་བཅས་ཀྱིས་རིམ་པ་བཞིན་བཀའ་སློབ་གནང་སོང་ལ། དེའི་རྗེས་སུ་བོད་གཞུང་ཟློས་གར་ཚོགས་པ་དང་ཐང་སྟོང་ཟློས་གར་ཚོགས་པ། ས་གནས་ཡུལ་མིའི་སློབ་ཕྲུག་བཅས་ཀྱིས་ཡེ་ཤུ་ཆོས་དཔོན་མཆོག་ལ་དགའ་བསུའི་རྣམ་པའི་ཐོག་སྲོལ་རྒྱུན་གཞས་སྣ་ཁག་ཅིག་གཟིགས་འབུལ་ཞུས་སོང་། དེའི་རྗེས་༧གོང་ས་མཆོག་གིས་ཌེ་སི་མོན་ཊོ་ཊོ་མཆོག་གི་མཛད་རྗེས་ལ་བསྔགས་བརྗོད་གནང་སྟེ། ཁོང་ཉིད་ལ་ལག་སྐྱེས་ཀྱི་ཚུལ་དུ་སངས་རྒྱས་ཀྱི་ཐུགས་མཚོན་པའི་རྣམ་རྒྱལ་མཆོད་རྟེན་རྒྱུ་གསེར་ལས་བཞེངས་ཤིང་། མཐོ་ཚད་ཁྲི་གང་ཡས་མས་ཅན་ཞིག་ཕུལ་སོང་།
སྐབས་དེར་༧གོང་ས་མཆོག་གིས་གསུངས་དོན། “ དེ་རིང་གནམ་གཤིས་ཡག་པོ་དང་ཁོར་ཡུག་མཛེས་སྡུག་ལྡན་པ་ཞིག་གི་འོག འཛམ་གླིང་ནང་སྙན་གྲགས་ཡོད་པ་དང་སྙན་གྲགས་དེའང་གནས་ཚུལ་བྱེ་བྲག་པ་གཅིག་བྱུང་སྟེ། སྙན་གྲགས་ཆགས་པ་མ་ཡིན་པར། ལོ་ནས་ལོ་བསྟུད་དེ་མི་ཚེ་གཅིག་རིང་གཞན་ཕན་གྱི་བྱ་བ་རླབས་ཆེན་མཛད་མཁན་གྱི་མི་ཞིག་འདིར་ཕེབས་ཏེ་དགའ་བསུ་ཞུ་རྒྱུའི་གོ་སྐབས་བྱུང་བ་རེད། ང་ཚོ་ཚང་མ་སེམས་ནས་དགའ་སྤྲོ་སྐྱེ་དགོས་པ་དང་། སྤོབས་པ་སྐྱེ་དགོས་པ་ཞིག་བྱུང་སོང་། ཁྱེད་ཚོ་ཚང་མས་ཁོང་ལ་སྙིང་ཐག་པ་ནས་གུས་བརྩིའི་ཕྱག་བརྡབ་རོགས། ཁོང་མི་རྩ་ཆེན་པོ་ཞིག་ས་ཆ་ཆུང་ཆུང་འདིའི་སྒང་ལ་ཕེབས་འདོད་བྱུང་བ་རེད་ལ། ངས་ཀྱང་ཁོང་གདན་འདྲེན་ཞུས་པ་ཡིན། ལོ་མང་པོའི་རིང་ལུང་པ་འདྲ་མིན་གྱི་ཞི་བདེ་གཟེངས་རྟགས་བཞེས་མཁན་རྣམས་ལྷན་འཛོམས་ཡོང་སྐབས། ང་ཁོང་དང་མཇལ་རྒྱུའི་གོ་སྐབས་མང་པོ་བྱུང་སོང་། ཁོང་གིས་བྱམས་བརྩེ་དང་འབྲེལ་བའི་འཚེ་བ་མེད་པའི་ལྟ་སྤྱོད། དྲང་བདེན། འདྲ་མཉམ་སོགས་ཀྱི་དམིགས་བསལ་ཐུགས་འགན་བཞེས་ཀྱི་ཡོད་ལ། ལྷོ་ཨ་ཧྥི་རི་ཁར་ཆ་བཞག་ན། ནེལ་སིན་མན་ཌེ་ལཱ་དང་ཁོང་གཉིས་ཀྱིས་ཤུགས་བསྐྱོན་ཏེ། ལུང་པའི་ནང་འཚེ་བ་མེད་པའི་ལམ་ལ་བརྟེན་ཏེ། དམངས་གཙོའི་ཐོབ་ཐང་དང་འདྲ་མཉམ། དྲང་བདེན་བཅས་ཀྱི་ཐོག་ལ་བྱས་རྗེས་ཆེན་པོ་བཞག་ཡོད། ལྷག་པར་དུ་གནས་ཚུལ་བྱུང་སྟེ་མིའི་སེམས་ལ་འཁོན་འཛིན་གྱི་བློ་ཡོང་སྐབས། ཁོང་གིས་འཁོན་འཛིན་གྱི་བློ་སེལ་རྒྱུའི་ཐོག་དམིགས་བསལ་ནུས་པ་བཏོན་ཡོད་ ” ཅེས་གསུངས་སོང་།
༧གོང་ས་མཆོག་གིས་མུ་མཐུད་དུ་གསུངས་དོན། “ ཊའུ་ཊའུ་མཆོག་དགུང་ལོ་ ༨༠ སོན་པའི་འཁྲུངས་སྐར་དུས་ཆེན་ཐོག་ང་རང་སྐད་བཏང་བ་རེད་ལ། སྐབས་དེར་ང་ལའང་རེ་བ་ཆེན་པོ་བྱུང་། ཡིན་ནའང་སྐབས་མཚམས་ལ་བཅར་མ་ཐུབ་པ་རེད། བློ་ཕམ་གཅིག་དེ་སྐབས་དེར་བཅར་ཐུབ་པ་ཡིན་ན། ནེལ་སེན་མན་ཌ་ལཱ་མཆོག་ལ་ཐུག་ཐུབ་ན་བསམ་པ་རེད། ད་ལྟ་ཁོང་དགུང་ལོ་ ༩༣ ཙམ་བསླེབས་ཡོད། གང་ལྟར། ད་ཐེངས་ཊའུ་ཊའུ་མཆོག་གིས་སྐུ་ངལ་ལ་མ་འཛེམས་པར་ཆེད་མངགས་ངྷ་རམ་ས་ལར་ཕེབས་པ་རེད། སེམས་ལ་དགའ་སྣང་དང་བཀའ་དྲིན་ཆེ་བསམ་པ་ཞིག་དྲན་སོང་། དེང་ཕྱིན་ངའི་གྲོགས་པོ་ཊའུ་ཊའུ་མཆོག་གིས་ཏཱ་ལའི་བླ་མ་ཟེར་དུས། ངྷ་རམ་ས་ལ་སེམས་སུ་ཤར་ཡོང་གི་རེད། ངྷ་སའི་མེ་ཏོག་དང་སྔོ་ལྗང་ཁོར་ཡུག་དེ་ཁོང་གིས་མཐོང་ཐུབ་ཡོད་པ་མ་རེད། དེ་ཡིན་དུས། ངྷ་ས་ཟེར་དུས་གྲང་ཤུར་ཤུར་འདྲ་བོ་ཞིག་ཏུ་ཚོར་གྱི་རེད། ང་རང་སྒེར་ངོས་ནས་ཊའུ་ཊའུ་མཆོག་ངའི་བློས་ཐུབ་ཀྱི་གྲོགས་པོ་ཡིན་ལ། དེ་རིང་འདིར་ཕེབས་པར་ཧ་ཅང་དགའ་པོ་བྱུང ” ཞེས་གསུངས་བྱུང་།
མཐར་༧གོང་ས་མཆོག་གིས་ཆོས་ལུགས་མཐུན་སྒྲིལ་སྐོར་ལ། “ འཛམ་གླིང་སྟེང་ཡེ་ཤུ་ཆོས་ལུགས་དང་ཁ་ཆེའི་ཆོས་ལུགས་ནང་ཁུལ་དུ་རྙོག་དྲ་འདྲ་མིན་འབྱུང་བཞིན་པའི་སྐབས་འདིར། རྒྱ་གར་གྱི་ལོ་ངོ་སྟོང་ཕྲག་རིང་སྦྱང་ཞིང་གོམས་པའི་ཆོས་ལུགས་མཐུན་སྒྲིལ་དེ་ཧ་ཅང་རྩ་ཆེན་པོ་ཆགས་ཡོད། དེ་རིང་ཡེ་ཤུ་བླ་མ་སྙན་གྲགས་ཡོད་པ་ཞིག་འདིར་ཕེབས་པ་དང་། ཕེབས་བསུའི་ཞུ་མཁན་ཡང་ས་གནས་ཡེ་ཤུ་བླ་མ་ཞིག་ཕེབས་ཏེ་ང་ཚོར་རུབ་རུབ་བྱེད་ཐུབ་པ་འདིས། ལྟ་གྲུབ་མི་འདྲ་བ་ཡོད་ཀྱང་ཆོས་ལུགས་ཚང་མས་གཞན་ལ་ཕན་པའི་སེམས་སྐྱེད་ཀྱི་ཡོད། འཛམ་གླིང་སྟེང་ཤེས་ཡོན་དང་འཕྲོད་བསྟེན་ཐོག་ཡེ་ཤུའི་ཆོས་ལུགས་ཀྱི་ཕན་ཐོགས་ཆེན་པོ་ཡོང་གི་ཡོད། ནང་པར་ཆ་བཞག་ལ་དེ་ཙམ་ཕན་ཐོགས་ཐུབ་ཀྱི་མེད་ལ། ཧིན་རྡུ་དང་ཆོས་ལུགས་གཞན་པ་ཚོའང་དེ་མཚུངས་རེད་ ” ཅེས་གསུངས་སོང་།
ལྷོ་ཨ་ཧྥི་རི་ཀའི་ཡེ་ཤུའི་ཆོས་དཔོན་ནམ་ནོ་སྦེལ་ཞི་བདེ་གཟེངས་རྟཊ་བཞེས་མཁན་ཌེ་སི་མོན་ཊོ་ཊོ་མཆོག་གསུངས་དོན། “ ངས་སྐྱབས་མགོན་ཏཱ་ལའི་བླ་མ་མཆོག་དང་བོད་གཞུང་ཡོངས་ལ་སྙིང་ཐག་པ་ནས་འཚམས་འདྲི་ཞུ་རྒྱུ་ཡིན། ང་རང་གིས་བཞུགས་སྒར་ངྷ་རམ་ས་ལར་རང་ལོ་ ༨༠ སོན་པའི་སྐྱེས་སྐར་གཏོང་ཐུབ་འདི་ལ་དགའ་སྤྲོ་ཆེན་པོ་སྐྱེས་སོང་། ན་ནིང་ངའི་སྐྱེས་སྐར་ཉིན་ཏཱ་ལའི་བླ་མ་མཆོག་ལ་གདན་ཞུ་ཕུལ་ཡོད་ཀྱང་། ལྷོ་ཨ་ཧྥི་རི་ཀའི་གཞུང་གིས་ཐོངས་མཆན་མ་སྤྲད་སྟབས། ཁོང་ཉིད་ཕེབས་ཐུབ་ཡོད་པ་མ་རེད། དེ་རིང་འདིར་འབྱོར་ཐུབ་པ་དེ་ཧ་ཅང་དགའ་བོ་བྱུང་། དེ་རིང་གནམ་གཤིས་གྲང་མོ་ཡིན་ནའང་། སྙིང་ནས་བརྩེ་བའི་བོད་རིགས་མང་ཚོགས་ཀྱིས་དགའ་བསུ་ཆེན་པོ་བྱེད་ཀྱི་འདུག ངས་ཚང་མར་ཐུགས་རྗེ་ཆེ་ཞུ་རྒྱུ་ཡིན། དེ་བཞིན། ཚོང་པ་བྷེ་ཨོ་མེ་དང་ཀེན་ལགས་གཉིས་ཀྱིས་ལམ་གྲོན་ཐོག་མཐུན་འགྱུར་གནང་བར་ཐུགས་རྗེ་ཆེ་ཞུ་རྒྱུ། ཏཱ་ལའི་བླ་མཆོག་ནི་འཛམ་གླིང་ཡོངས་ཀྱི་མི་དམངས་ཀྱིས་བརྩི་བཀུར་དང་དགའ་མོས་བྱེད་སའི་གང་ཟག་ཁྱད་པར་བ་ཞིག་རེད། ང་རང་གི་འདས་པའི་མི་ཚེ་ནང་ངས་ཏླ་ལའི་བླ་མ་ལྟ་བུའི་བྱམས་དང་སྙིང་རྗེ་ཅན་གྱི་གང་ཟག་ཅིག་མཇལ་མྱོང་མེད། གཞན། དེ་རིང་འདིར་ངས་རྒྱ་ནག་གཞུང་ལ་ནན་ཏན་གྱིས་འབོད་སྐུལ་ཞུ་རྒྱུ་ཞིག་ལ། ཏཱ་ལའི་བླ་མཆོག་ནི་འཛམ་གླིང་ཞི་བདེའི་དེད་དཔོན་ཞིག་དང་ཞི་བདེར་དགའ་བའི་གང་ཟག་ཅིག་ཡིན་པ་ལས། ཁོང་ནི་འཇིགས་སྐུལ་དྲག་སྤྱོད་པ་མ་རེད་ལ། ཁ་བྲལ་རིང་ལུགས་པའང་མ་རེད། ཁོང་ལ་དམག་མི་ཡོད་པ་མ་རེད་ལ། མཚོན་ཆའང་ཡོད་པ་མ་རེད། དེའི་སྟབས་ཀྱིས་རྒྱ་ནག་གཞུང་གིས་བོད་མི་ཚོར་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་ཡོད་པའི་ཐོབ་ཐོང་རྣམས་ངེས་པར་དུ་སྤྲོད་དགོས་པ་རེད། འཛམ་གླིང་ནང་གདུག་རྩུབ་དང་མནར་གཅོད་ཀྱིས་མཐའ་མའི་རྒྱལ་ཁབ་འཐོབ་ཀྱི་མེད་པ་གསལ་པོ་རེད། ཉིན་ཞིག་ང་ཚོ་བོད་ལ་མཉམ་དུ་ལོག་ཐུབ་པ་དང་རང་དབང་ལྡན་པའི་བོད་ནང་ལྷན་འཛོམས་ཡོང་བའི་རེ་བ་ཡོད་ ” ཅེས་གསུངས་སོང་།
ཌེ་སི་མོན་ཊོ་ཊོ་མཆོག་ནི་ལྷོ་ཨ་ཧྥི་རི་ཀའི་ཡེ་ཤུའི་ཆོས་དཔོན་དང་ནོ་སྦེལ་ཞི་བདེ་གཟེངས་རྟགས་ཐོབ་མཁན་ཞིག་ཡིན་པ་མ་ཟད། ༧གོང་ས་མཆོག་གི་བློས་ཐུབ་གྲོགས་པོ་དང་བོད་དོན་རྒྱབ་སྐྱོར་བ་ཞིག་ཀྱང་ཡིན་འདུག
གསར་འགོད་པ། དཔལ་ལྡན།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཆོས་དཔོན་མཆོག་གི་འཁྲུངས་སྐར་ལ་བཀྲིས་བདེ་ལེགས་ཞུ། ཁ་སང་དུས་དབང་སྐབས་བོད་པ་ཧ་ཅང་མང་བ་ཞིག་དགའ་ནས་ལོག་སླེབས་བྱུང་། དེ་ནི་༸གོང་ས་མཆོག་འདི་ལོར་སྐུ་གཟུགས་ཧ་ཅང་གི་བདེ་ཉམས་ཆེ་བས་རེད།
དེ་རིང་བོད་ཀྱི་དུས་བབ་ཀྱི་གསར་འགོད་པ་དཔལ་ལྡན་ལགས་ཀྱིས་བླངས་པའི་སྐུ་པར་ཤིན་ཏུ་ནས་གཞོན་མཚར་ཅན་འདི་མཇལ་བ་དང་ང་ཚོ་ཞེ་བློ་བདེ་སོང་།
ང་ཚོས་ཁྱེད་ཀྱི་བཀའ་སློབ་བཞིན་བོད་མི་ཡར་ཐོན་ཅན་ཞིག་ལ་འབད་དོ།།
༸གོང་ས་མཆོག་ཁྱེད་ནི།
མངོན་རྟོགས་རྒྱན་ནང་གི
སྒོམ་ལམ་གྱི་བྱས་པའི་སྐབས་སུ།
ཀུན་ནས་ཞི་དང་ཐམས་ཅད་ལ། །
དུད་དང་ཉོན་མོངས་ལས་རྒྱལ་དང་། །
གནོད་པས་བརྫི་བ་མེད་ཉིད་དང་། །
བྱང་ཆུབ་དག་ནི་རྟེན་ཆོས་ཉིད། །
ཅེས་གསུངས་པ་ལྟར་མི་འདུག་གམ། །
༸གང་སྐུ་༸སྐུ་ཚེ་ཡུན་བརྟན་ཤོག །
ཆག་བྲག་ལྷ་མོ་སྐྱབས་ལགས་ཀྱིས་རྨོངས་དད་ཀྱི་སྐད་ཆ་ཀྱང་ཀྱང་བཤད་ནས་བསྡད་ན་ཅི་ཕན་ནམ།་་་།་་།་་་།་་།་་ཾཾ++་་+ ་+ ++་ +++
ཡེ་ཤུའི་ཆོས་དཔོན་ཌེ་སི་མོན་ཊོ་ཊོ་མཆོག་ལ་རྟེན་འབྲེལ་ཞུ་བ་དང་ཆབ་གཅིག་རིག་འདོན་གསུམ་པ་ལ་ཞུ་རྒྱུ། མཆན་འདེབས་རྒྱུ་མེད་ན་མ་བཏབ་ན་འགྲིག་གི་རེད། ཁྱོད་ལ་སུ་གང་གིས་ཀྱང་བཙན་བཀའ་དང་ཞུ་བ་བྱེད་ཀྱི་མ་རེད་དོ།།
་གསུམ་ལ་
ཡིད་བཞིན་ནོར་བུའི་འོད་ཟེར་གྱིས་བཀུག་པའི་ཡེ་ཤུའི་ཆོས་དཔོན། ཞི་བདེའི་དེད་དཔོན། བླ་མ་དང་དཔོན་ཆེན་སུ་དག་ལ་འདི་ལྟར་འགུགས་ནུས་ཀྱི་བྱིན་རླབས་ལྡན་ནམ། ཡིན་ན་ཡང་ང་རང་ཚོའི་ནང་ན་ནོར་བུའི་འོད་ཟེར་གྱིས་ཀྱང་བློ་མུན་མི་སེལ་བའི་ལས་ངན་མང་པོ་ཞིག་ཡོད་རེད་ཨང།
ཆོས་ལུགས་མཐུན་སྒྲིལ་ནི་མི་རིགས་ཁག་གི་མཐུན་སྒྲིལ་གྱི་གཞི་མ་ཞིག་ཡིན་ལ། ཆོས་ལུགས་པའི་དྲང་བདེན་སྐྱོང་ཚུལ་ནི་འཛམ་གླིང་ཞི་བདེའི་ཕྱོགས་སྟོན་ཆེན་པོ་ཞིག་ཀྱང་ཡིན། དེ་བས་ཡེ་ཤུའི་ཆོས་དཔོན་དམ་པར་བཀའ་དྲིན་ཆེ་ཆེ་ལོས་ཞུ།
༸གོང་ས་མཆོག་དང་ཆོས་དཔོན་ཊུ་ཊུ་མཆོག་རྣམ་པ་གཉིས་༸སྐུ་ཚེ་ཡུན་བརྟན་ཤོག ཆོས་དཔོན་མཆོག་གིས་བདེན་པར་རྒྱབ་སྐྱོར་གནང་བར་བཀའ་དྲིན་ཆེ། རྒྱལ་འགྱུར་ཅིག བདེན་པ་རྒྱལ་འགྱུར་ཅིག བདེན་པ་ཉིད་རྒྱལ་འགྱུར་ཅིག །
ད་མཆན་འདེབས་ཀྱི་ཀྱང་མེད་ཁུ། ༼ཁོང་ནི་འཇིགས་སྐུལ་དྲག་སྤྱོད་པ་མ་རེད་ལ། ཁ་བྲལ་རིང་ལུགས་པའང་མ་རེད། ཁོང་ལ་དམག་མི་ཡོད་པ་མ་རེད་ལ། མཚོན་ཆའང་ཡོད་པ་མ་རེད། དེའི་སྟབས་ཀྱིས་རྒྱ་ནག་གཞུང་གིས་བོད་མི་ཚོར་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་ཡོད་པའི་ཐོབ་ཐོང་རྣམས་ངེས་པར་དུ་སྤྲོད་དགོས་པ་རེད། འཛམ་གླིང་ནང་གདུག་རྩུབ་དང་མནར་གཅོད་ཀྱིས་མཐའ་མའི་རྒྱལ་ཁབ་འཐོབ་ཀྱི་མེད་པ་གསལ་པོ་རེད། ཉིན་ཞིག་ང་ཚོ་བོད་ལ་མཉམ་དུ་ལོག་ཐུབ་པ་དང་རང་དབང་ལྡན་པའི་བོད་ནང་ལྷན་འཛོམས་ཡོང་བའི་རེ་བ་ཡོད་ ”༽འཁྲུངས་སྐར་ལ་ཁ་གཡང་ཞུ་འདོད་ལོས་ཡོད། ༸གོང་ས་མཆོག་གི་བློས་ཐུབ་ཀྱི་གྲོགས་པོ་རེད།
ཁོང་གི་འཁྲུངས་སྐར་ལ་རྟེན་འབྲེལ་ཞུ། ལྷག་པར་བཞུགས་སྒར་ངྷ་ས་ནས་འཁྲུངས་སྐར་ལ་རོལ་བ་དེ་བས་ཀྱང་བཟང་།
འཛམ་གླིང་ཞི་བདེའི་ཆེད་དང་འགྲོ་བ་མིའི་སེམས་ཀྱི་བདེ་སྐྱིད་ཀྱི་ཆེད་ཕྱག་ལས་གནང་མཁན་ཡེ་ཤུའི་ཆོས་དཔོན་ཌེ་སི་མིན་ཊའུ་ཊའུ་མཆོག་གི་སྐུའི་འཁྲུངས་སྐར་ལ་འཚམས་འདྲི་དང་བཀྲིས་བདེ་ལེགས་ཞུ་རྒྱུ་དང་༧གོང་ས་༧སྐྱབས་མགོན་ཆེན་པོ་མཆོག་དང་རྣམ་པ་གཉིས་སྐུ་ཚེ་སྐལ་རྒྱལ་བརྟན་པའི་སྨོན་འདུག་ཞུ།
ལྷོ་ཨ་ཧྥི་རི་ཀའི་ཡེ་ཤུ་ཆོས་དཔོན་ཌེ་སི་མོན་ཊའུ་ཊའུ་མཆོག་གི་སྐྱེས་སྐར་འ་འཚམས་འདྲི་བཀྲ་ཤིས་བདེ་ལེགས་ཞུ།
ཡེ་ཤུའི་ཆོས་དཔོན་ཌེ་སི་མོན་ཊོ་ཊོ་མཆོག་དྷ་རམ་ས་ལ་ཕེབས་པ་དགའ་བསུ་ཞུ།མ་འོང་བ་ན་ཡང་འཛམ་གླིང་གི་ཆོས་ལུགས་ཁག་གི་བླ་ཆེན་རྣམས་འདི་ལྟ་བུ་ཕན་ཚུན་ལ་གུས་བརྩི་དང་ཐུགས་མཐུན་ཡོང་བའི་སྨོན་འདུན་ཞུ།