རྒྱ་ནག་གི་རྩ་ཁྲིམས་ནག་འདེད་བྱ་རྒྱུ་ནི་ཐབས་མཆོག་ཡིན།

ཤར་ཕྱོགས་ཁུག་རྟ།

དེ་རིང་བོད་ལ་ཐབས་ལམ་ཡག་ཤོས་གཅིག་ཡོད་ལ། དེ་ནི་རང་སྐྱོང་ཡོང་ཐབས་ཀྱི་༼ བསམ་འཆར༽ དེར་བོད་ཕྱི་ནང་གཉིས་ནས་ཐོབ་ཐབས་བྱ་རྒྱུ་དེ་རེད། རང་ལུས་གཞོམ་བསྲེགས་བྱུང་བ་དང་བསྟུན་ནས་མི་མང་པོ་འུར་གྱིས་ཁྱེར་ཞིང་། ཚོད་ཚོད་ལ་ཚོར་བས་འབར་ཏེ་སེམས་ལ་གང་དྲན་ཡིད་ལ་གང་ཤར་ཡིག་ངག་གཉིས་ཐོག་ནས་དམར་བཤད་བྱས་ཡོད། ང་ཚོས་ལྷོད་ལྷོད་བྱས་ཏེ་ནན་གྱིས་ལྟོས་པ་ཡིན་ན། རང་ལུས་གཞོམ་བསྲེགས་འདི་ལོ་རྒྱུས་ཆགས་འགོ་བརྩམས་པས་མ་ཚད། ད་ནི་ལུགས་སྲོལ་འདྲ་བོ་ཞིག་ཀྱང་ཆགས་ལ་ཤིན་ཏུ་ཉེ་བ་རེད། ང་ཚོ་རྡ་སའི་བོད་མི་ཆེ་ཕྲ་ཚང་མས་དང་པོ་གཞོམ་བསྲེགས་ཀྱི་གསར་འགྱུར་ཐོས་སྐབས། ཧད་ནས་ལུས་པ། ལངས་ན་འདུག་རྒྱུ་བརྗེད་པ། གཅིག་གིས་གཅིག་ལ་སྨྲས་ཏེ་བློ་ཡིད་དུ་མ་ཤོངས་པ་འདྲ་ཞིག་སྟོན་ཡང་། དེང་སྐབས། “ཨ་ལེ། ཡང་མེར་བསྲེགས་འདུག་གཱས་”ཞེས་པའི་སྐད་ཆའི་རིམ་པ་འདིར་སླེབས་ཡོད། དེ་བཞིན་བོད་ནང་ནས་ཀྱང་ངའི་གྲོགས་པོ་ཞིག་གི་རྩོམ་ཡིག་ནང་འཁོད་པ་ལྟར། བྱིས་པ་ལོ་དགུ་ཅན་གྱི་རྩེད་རྭ་དམིག་གིས་ཁེངས་ཤིང་། བྱིས་པའི་རྣ་རུ་གཞོམ་བསྲེགས་ཀྱི་གསར་འགྱུར་བླུགས་དྲགས་ནས་ཅུང་ཙམ་མིན་ན་ལོ་དགུ་ཅན་དེས་ཀྱང་མེར་བསྲེགས་གྲབས་བྱས་པའི་གནས་ཚུལ་བྲིས་འདུག གནས་ཚུལ་འདི་བདེན་ན་མི་བདེན་ན་གྲངས་ཀ་མང་བས་བར་ཁྱད་ཀྱིས་རང་ཅག་ལ་ཅི་ཙམ་གྱི་གྲུབ་འབྲས་ཐོབ་མིན་ནི་རྦད་དེ་བཤད་ཚོད་དཀའ་བ་ཞིག་དང་། དེའང་ལུགས་སྲོལ་ཞིག་ཏུ་གྱུར་ན་ཉེན་ཁ་དང་ཆུད་ཟོས་ཚད་མེད་ཡིན་པ་དེ་རེད།

བར་འདིར་དྲི་བ་ཞིག་སླེབས་པ་ནི། དེའང་དྲི་བ་འདི་ངའི་གྲོགས་པོ་གསར་འགོད་པ་ཞིག་ལ་མདོ་སྨད་མགོ་ལོག་ནས་ཁ་པར་ལམ་ནས་བཏང་བ་ཞིག་རེད། ཁོང་གིས་ཁ་པར་ནང་ “ བོད་ཕྱི་ལོག་ཏུ་མེར་བསྲེགས་ཀྱི་འདུག་གམ། ངས་མེར་བསྲེགས་བཏང་ཚུལ་མ་གོ གལ་སྲིད་མ་གོ་བར་མིན་པར་དངོས་གནས་མེད་པ་ཡིན་ན། ང་ཚོས་གཞོམ་བསྲེགས་བྱེད་པ་འདི་འགྲིག་གི་ཡོད་མེད་ཤེས་ཀྱི་མི་འདུག དེ་ག་རེ་ཡིན་ནམ།”ཞེས་བཤད་འདུག དྲི་བ་འདིས་ག་རེ་སྟོན་གྱི་འདུག་གམ། གཞོམ་བསྲེགས་བྱེད་དགོས་མིན་དང་། བྱས་པ་ཡིན་ན་དེའི་རེ་བ་ཡོད་ཚད་བོད་ཕྱི་ལ་ཉན་གྱི་ཡོད་པ་འདིས། ང་ཚོས་ད་བར་བོད་ནང་ལ་ང་ཚོས་གང་འཇོན་གསལ་བོ་མ་ཞུས་པ་དང་། ང་ཚོའི་གཞུང་ངོས་ནས་ཁོང་ཚོར་ལམ་སྟོན་མ་བྱས་པས་རེད། ད་ནི་ང་ཚོའི་གཞོམ་བསྲེགས་ཀྱི་གྲངས་ཀ་ངེས་ཅན་ལ་སླེབས་ཡོད། བོད་ཕྱི་ལོག་ནས་དུར་སྒམ་བཟོས་ནས་གྲལ་བསྟར་སྒྲིག་པ་ཡིན་ནའང་ས་ཆ་ཆེན་པོ་ཞིག་ལ་མ་གཏོགས་མི་ཤོངས་པའི་ཚད་དུ་སླེབས་ཡོད། ཡིན་ནའང་། གྲངས་ཀ་ཅི་ཙམ་མང་བ་དེ་ཙམ་གྱིས་དམིགས་ཡུལ་གསལ་འདོན་ག་ཚོད་བྱས་ཡོད་མེད་དང་། དམིགས་ཡུལ་དེ་བརྒྱུད་ནས་ཅི་ཙམ་བར་ལས་འགུལ་མི་མཐུད་མིན་ཐད་རྒྱ་བོད་གཉིས་ཀྱི་ཤེས་ལྡན་པར་དོགས་པ་འབྱུང་བཞིན་ཡོད། དེས་ང་ཚོའི་འཐབ་རྩོད་ནི་བསྐྱར་ཟློས་ཡིན་པར་བཤད་ཡོད་ལ། ལོ་རྒྱུས་ཆགས་རྒྱུའང་བཤད་ཡོད། ལོ་རྒྱུས་ཆགས་རྒྱུ་ཞེས་པ་དེ་འདས་པ་ཙམ་གྱི་ངོ་བོར་འགྲོ་རྒྱུ་དང་། བསྐྱར་ཟློས་ནི་ཡར་རྒྱས་དང་གྲུབ་འབྲས་ཀྱི་ཕྱོགས་ནས་དྲི་བ་གཏོང་སྟངས་ཤིག་རེད། ཡིན་ནའང་། བསྐྱར་ཟློས་སྨྲ་བ་དང་ལོ་རྒྱུས་སྨྲ་བ་གཉིས་ཀའི་ནང་བསྐྱར་ཟློས་ཕྱོགས་ཀྱི་ཐབས་ལམ་བཏོན་པ་ནི་རྣམ་དཔྱོད་ལྡན་པ་ཞིག་རེད། ངའི་གྲོགས་པོ་ཞིག་གིས་ཀྱང་ཉིན་འགའི་སྔོན་མེ་སྦར་དགོས་པའི་འུར་རྒྱབ་སོང་། སྐབས་དེར་ངའི་སེམས་པར། ང་ཚོའི་གཞོམ་བསྲེགས་ལས་འགུལ་འདི་ད་ནི་ལམ་ལུགས་འདྲ་བ་ཞིག་ཏུ་འགྱུར་ངེས་པར་ཐེ་ཚོམ་སྐྱེ་སོང་། གང་ལྟར་ལམ་ལུགས་དང་ལོ་རྒྱུས། བསྐྱར་ཟློས་གང་ཆགས་ཀྱང་ང་ཚོ་གྲུབ་འབྲས་ཤིག་འཕྲལ་དུ་ཐོན་གྱི་མེད་པ་ནི་གསལ་བོ་རེད་ལ། ང་ཚོའི་གཞོམ་བསྲེགས་ཀྱི་འབབ་ས་འདི་ལྟ་བུ་ཞིག་ཡིན་སོང་ན་དེ་བས་ཀྱང་ཕངས་སེམས་གཟུང་དུ་མེད་པ་ཞིག་རེད།

ང་ཚོའི་གཞུང་དང་དབུ་ཁྲིད་ཀྱི་ཕྱོགས་ནས་གཞོམ་བསྲེགས་ལས་འགུལ་ཐད་དེ་སྔར་ནུབ་ཕྱོགས་རྒྱལ་ཁག་ཁག་ཏུ་ཁྱབ་བསྒྲགས་བྱས་ཡོད། སྐབས་དེར་གཞོམ་བསྲེགས་མུ་མཐུད་དུ་ཡོང་མིན་ཐད་ཚོད་བགམ་ཡིན་ཞིང་། དེ་རིང་གི་གནས་སྟངས་དང་བསྡུར་ན་དབུ་ཁྲིད་མ་ཟད། བོད་མི་ཚང་མར་རེ་བ་ཡོད་ལ། སྤོབས་པའང་ཡོད། ཡིན་ནའང་། གཞོམ་བསྲེགས་གྲངས་ཀ་ཇེ་མང་དུ་ཕྱིན་པ་དང་། ང་ཚོའི་རེ་བ་འགྲིབ་འགོ་ཚུགས་ཤིང་། ཁྱབ་བསྒྲགས་ཀྱི་ནུས་བའང་ཇེ་ཞན་དུ་གྱུར་བས་མ་ཚད། གསར་འགོད་གསལ་བསྒྲགས་སྤེལ་རྒྱུའི་གནད་དོན་ཆུང་ཚགས་རིགས་ཀྱང་སྤེལ་ན་མང་དྲག་སྟེ་ངོ་ཚ་བ། མ་སྤེལ་ན་ལས་ཀ་མེད་པའི་ཟོལ་འདྲ་བོ་ཞིག་ཆགས་ཀྱིན་པས། ང་ཚོའི་ཁྱབ་བསྒྲགས་ཀྱི་འཇོན་ཚད་དང་གྲངས་ཀ་ཇེ་མང་དུ་ཕྱིན་པ་གཉིས་ཀ་རྦད་དེ་ཡང་ལྕི་ཚད་ལས་འདས་པ་ཞིག་ཤོར་བཞིན་ཡོད་པས། གོང་གི་བོད་ནང་གི་དྲི་བ་དེའང་བསྐོར་བ་ལན་གསུམ་རྒྱབ་ན་འདི་ལྟ་བུ་ཞིག་གིས་སླེབས་པ་ཡིན་པར་ཁོ་བོར་ཐེ་ཚོམ་མེད།

ཡིན་ནའང་། ང་ཚོའི་གཞུང་སྒེར་སུས་ཀྱང་ཅི་ཡང་མི་སྨྲའི་རྟུལ་ཞུགས་འཛིན་བཞིན་པའི་སྐབས་འདིར། ང་ཚོས་བོད་ནང་དུ་ཐད་ཀར་བཤད་ཐུབ་པ་ཞིག་ནི། རྒྱ་ནག་གི་རྩ་ཁྲིམས་དང་བཅའ་ཁྲིམས་གཞིར་བཟུང་རང་དབང་དང་ཐོབ་ཐང་རྩོད་དགོས་ཞེས་པ་འདི་རེད། ང་ཚོའི་གཞུང་ཕྱོགས་ནས་ད་ལྟའི་རྒྱ་ནག་གི་རྩ་ཁྲིམས་དང་བཅའ་ཁྲིམས་ཀྱི་དགོངས་དོན་འོག་བོད་ཀྱི་འཚོ་བའི་ལམ་ཡིག་བཟོས་ཟིན་པས། ང་ཚོར་ལམ་ཁ་འདིར་ཤར་བསྐྱོད་བྱ་རྒྱུ་ལས་གང་ཡང་ལྷག་མེད། རྒྱ་ནག་གི་རྩ་ཁྲིམས་དང་བཅའ་སྒྲིག་ཁག་གི་འོག་ཐོབ་ཐང་རྩོད་རྒྱུ་ནི་ལས་སླ་བོ་ཞིག་མིན་ཡང་། རྒྱ་ནག་གིས་ཀྱང་ཐད་ཀར་ཁྲིམས་མེད་ལུགས་མེད་བྱ་ས་གཏན་ནས་མི་འགྲོ་བ་ཞིག་ཡིན། ང་ཚོ་བོད་མི་ཚོས་གཙོ་བོ་ལས་འགུལ་གྱི་དམིགས་ཡུལ་གཏན་འབེབས་བྱེད་དགོས་པ་དང་། ལས་འགུལ་སྤེལ་སྐབས་གྲངས་ཚད་ངེས་ཅན་གྱིས་སྡེབས་ལངས་བྱ་དགོས་ཤིང་། རྣམ་འགྱུར་ཀུན་སྤྱོད་གཏམ་བརྗོད་ཚུལ་དང་མཐུན་ཞིང་། འཐབ་རྩོད་བྱ་ཡུལ་ལ་གུས་བརྩིའི་རྣམ་པ་མངོན་གསལ་དོད་དགོས་པ་དེ་ཞི་བའི་འཐབ་རྩོད་གང་གིའང་ཀུན་སྤྱོད་གོང་ན་མེད་པ་དེ་ཡིན་སྟབས། མངོན་འདོད་དང་དམིགས་ཡུལ་གསལ་བརྗོད་བྱེད་པ། བོད་ས་ཡོངས་སུ་བརྡ་ལན་གཅིག་གྱུར་གྱིས་སྤྲོད་དགོས་ཤིང་། མི་དམངས་ཁྲོད་སྤྱིར་ལས་འགུལ་སྤེལ་ཕྱོགས་དང་། ལས་འགུལ་གྱི་ཀུན་སྤྱོད། དམིགས་ཡུལ་གསལ་རྟོགས་འབྱུང་ངེས་ཀྱི་གྲ་སྒྲིག་པང་རིམ་ཚད་དང་ལྡན་པ་ཞིག་བྱུང་ན། བོད་མི་ས་གཅིག་གཉིས་ཙམ་རྒྱ་ནག་གིས་ཅི་ལྟར་བཙོན་དུ་འཇུག་རྒྱུ་ཡིན་ནམ། ནུབ་ཕྱོགས་སྐྲ་སེར་རྒྱལ་ཁབ་ཁག་ཏུའང་རྒྱ་ནག་ལ་གོ་སྐབས་ངེས་ཅན་ཞིག་ཐོབ་རྒྱུར་སྒུག་མཁན་ག་ཚོད་མེད་དམ། དེ་ནི་ང་ཚོའི་བོད་མི་ཚོས་བོད་ས་ཡོངས་ནས་ཞི་བའི་སྒོ་ནས་རྒྱ་ནག་གི་རྩ་ཁྲིམས་དང་མཐུན་པའི་སྡེབས་ལངས་འཐབ་རྩོད་བྱ་མིན་ལ་རག་ལས་ཡོད་པ་ཞིག་རེད།

ཉིན་འགའི་སྔོན་རྣམ་དཔྱོད་ཀྱིས་འབར་ཞིང་སློབ་སྦྱོང་གི་མཁོ་ལག་རབ་ཏུ་རྫོགས་པའི་བོད་ཀྱི་བླ་མ་ཆེན་པོ་མཆོག་སྤྲུལ་ཀརྨ་པ་སྐུའི་ཕྲེང་བ་བཅུ་བདུན་པས། ཚེ་སྲོག་ལ་བདག་པོ་རྒྱབ་སྟེ་བོད་ཀྱི་དཀའ་ངལ་སེལ་ཕྱོགས་སྐོར་བཀའ་སློབ་དང་གསུང་འཕྲིན་རིམ་པར་ཕེབས་ཡོད། དེ་ནི་ངེད་ལ་མཚོན་ན་བོད་ཀྱི་མི་རབས་གསར་པའི་སྤོབས་པ་ཡིན་ལ།  བོད་ནང་གི་མི་རབས་གསར་པའི་སྡེས་ད་བར་བོད་ཀྱི་རིག་གནས་ཆབ་སྲིད་དང་བཅས་པར་མིའི་རྣམ་དཔྱོད་ཚད་མཐོའི་ལམ་ནས་འབད་སྒྲུབ་བྱ་བཞིན་པ་དང་ཆུ་ལ་ཆུ་བཞག་ལྟར་མ་ཟད། མི་རབས་གསར་བའི་འཐབ་རྩོད་ཀྱི་རྒྱུ་བ་ཡོད་ཚད་སློབ་སྦྱོང་དང་ཤེས་ཡོན་གྱི་ལམ་ནས་སྒྲུབ་རྒྱུར་ར་སྤྲོད་ཧ་ཅང་གསལ་བོ་བྱས་ཡོད། དེ་མ་ཟད། རྒྱ་རིགས་སྐུ་ཞབས་ཝང་ལི་ཞུང་གི་གྲོང་སྡེའི་རང་སྐྱོང་ནས་རིམ་པར་བགྲོད་སྟངས་ཀྱི་བསམ་ཚུལ་དེའང་མཐར་གཏུག་ན་སློབ་སྦྱོང་དང་ཤེས་ཡོན་གྱིས་རྩོད་དགོས་པར་མཐུན་ཕྱོགས་ཤིན་ཏུ་ཆེན་པོ་ཡོད། རང་གཞན་གཉིས་ཀྱི་བསམ་ཚུལ་འདི་དག་གིས་ང་ཚོའི་སྐབས་བབ་ཀྱི་སྒྲུབ་བྱ་རྣམ་དཔྱོད་ཀྱིས་རྩོད་དགོས་པ་དང་། དེའང་མི་རབས་གསར་པའི་དཔུང་སྡེང་གཅིག་ཏུ་སྦྲེལ་ནས་ཀླད་པ་ལ་ཀླད་པས་ཁ་གཏད་གཅོག་རྒྱུ་དང་། ཡི་གེ་ལ་ཡི་གེས་ཁ་གཏད་གཅོག་རྒྱུ་ནི་བོད་ལ་རེ་བ་ཧ་ཅང་ཆེན་པོ་ཡོད་པའི་རྟགས་ཡིན། དེ་བས་ཀྱང་གསལ་ཁ་ཞུས་ན་བཤད་ན། ནུབ་བྱང་མི་རིགས་སློབ་ཆེན་གཙོས་སློབ་ཆེན་པ་རྣམས་དང་ཟི་ལིང་མཁར་གྱི་ཤེས་ཡོན་པའི་སྡེ་ནི་ང་ཚོའི་རང་ལུས་གཞོམ་བསྲེགས་ཀྱི་ལས་འགུལ་འདི། རྣམ་དཔྱོད་འབར་བའི་ལས་འགུལ་ཞིག་ཏུ་བསྒྱུར་མཁན་ཀྱང་ཡིན་ལ། དེ་ནི་དུས་ཚོད་ཀྱི་ཆ་ནས་ཡོངས་སུ་འགོ་ཚུགས་ཟིན་པ་ཞིག་ཀྱང་རེད། འདི་དང་ཞོར་ནས་ཤེས་རྟོགས་བྱ་དགོས་པ་ཞིག་ནི་བོད་ཀྱི་བླ་ཆེན་རྣམས་གཙོས་བླ་སྤྲུལ་མིང་འཛིན་མཁན་རྣམས་ད་ནི་མདུན་དུ་ཐོན་དགོས་པ་དེ་རེད།

བཙན་བྱོལ་དུ་མི་རབས་གསར་པའི་བཀའ་ཁྲི་ཁྲི་འདོན་བྱས་ཡོད་ལ། བཀའ་ཁྲི་གསར་པའི་བཀའ་ཤག་ནི་ཤེས་ཡོན་དོ་ནན་བྱེད་པའི་བཀའ་ཤག་ཡིན་པར་ཐེངས་མར་གསལ་འདོན་བྱས་ཡོད། རྒྱུ་མཚན་དེས་བོད་ཕྱི་ནང་གཉིས་ཀྱི་མི་རབས་གསར་པའི་ཤེས་ཡོན་སྤེལ་རེས་དང་བསམ་ཚུལ་སྤེལ་རེས་ཐད་ལས་འཆར་མི་སྒྲིག་རང་སྒྲིག་ཆགས་ཡོད་ལ། མི་རབས་གསར་པའི་དཔུང་ཁག་ཕན་ཚུན་ཤེས་རྟོགས་རྒྱུས་ལོན་བྱུང་བ་ཡིན་ན། མི་རབས་གསར་པའི་འཐབ་རྩོད་ཀྱི་ནུས་བ་གོང་མཐོར་འགྲོ་ཞིང་། བཀའ་ཁྲིས་ཁས་བླངས་ཟིན་པའི་ཆིག་ཁྲི་ཆིག་འབུམ་ཀྱང་འཆར་སྣང་ལས་མངོན་སུམ་དང་གཟུགས་མེད་ལས་གཟུགས་ཅན་ཆགས་ཐུབ་སོང་བས། ང་ཚོའི་གཞུང་ཕྱོགས་ཀྱི་བྱེད་སྒོ་ཁག་ནི་མི་རབས་གསར་པའི་སྙིང་སྟོབས་དང་ངེས་པར་དུ་བསྟུན་ཐུབ་པ་དང་། མཉམ་འགྲོ་མཉམ་བསྐྱོད་བྱ་རྒྱུ་ལས་ཁྱོན་ནས་རྗེས་ལུས་ཐེབས་མི་རུང་།

ང་ཚོའི་རང་སྐྱོང་གི་གོ་དོན་གཙོ་བོའང་མཐར་གཏུག་ན་བོད་ཀྱི་རིག་གནས་ཐུག་ཡོད། བོད་ཀྱི་རིག་གནས་ཀྱི་གཞི་མ་མི་རབས་གསར་པས་འདེགས་དགོས་སྟབས། མི་རབས་གསར་པས་རྒྱ་ནག་རྩ་ཁྲིམས་ལ་དྲི་བ་དང་ནག་འདེད་བྱེད་དགོས་པའི་དུས་ཚོད་སླེབས་ནས་བསྡད་ཡོད་ལ། རང་རེའི་གཞུང་ཕྱོགས་ནས་ཀྱང་མི་རབས་གསར་པར་མཐུན་འགྱུར་གང་སྒོས་མྱུར་ཏུ་ཚོགས་ཆེན་ཞིག་གི་ལམ་ཁ་ནས་བསྡུ་རུབ་བྱ་དགོས་ཤིང་། དེའང་འཕྲལ་མར་ལག་བསྟར་བྱ་དགོས་པ་ཞིག་རེད། དེ་ལྟར་བྱས་ཚེ་མི་རབས་གསར་པས་རྒྱ་ནག་རྩ་ཁྲིམས་ནང་གི་བོད་ཀྱི་རང་སྐྱོང་༼ བསམ་འཆར་༽དེ་བཞིན་སང་ཉིན་བོད་མི་མང་ལོངས་སུ་སྤྱོད་དུ་འཇུག་ངེས་རེད།

 ༢༠༡༢། ༢། ༡༣། ཉིན།