འབའ་སྡེ་མངའ་རིས་ཞིང་ཁམས་གཞིས་བྱེས་བརྟན་བཞུགས་གོ་སྒྲིག་ཚོགས་ཆུང་གི་ཡོངས་ཁྱབ་གསལ་བསྒྲགས

༄༅། །འབའ་སྡེ་མངའ་རིས་ཞིང་ཁམས་ཀྱི་ཁྱབ་ཁོངས་གཞིས་བྱེས་སེར་སྐྱ་མང་ཚོགས་སྤྱི་ལ་ཆེད་དུ་གསལ་བསྒྲགས་ཞུ་རྒྱུར།

            ཚང་མས་ལམ་ཙམ་མཁྱེན་ཆུབ་ཡོད་པ་ལྟར། གཞིས་བྱེས་འབའ་ཐང་སེར་སྐྱ་མི་མང་སྤྱི་མགྲིན་ནས་ཇི་ལྟར་གསོལ་བ་ཕུར་ཚུགས་སུ་བཏབ་དོན་ལྟར། ༸གོང་ས་༸སྐྱབས་མགོན་ཆེན་པོ་མཆོག་ཚུལ་བསྟན་༸སྐུ་གེགས་ཀྱི་མཚན་མ་ཕྲ་མོ་ཙམ་ཡང་མི་བཞེས་པར་བསྟན་འགྲོ་སྤྱི་དང། བྱེ་བྲག་བོད་གངས་ཅན་པ་རྣམས་ཀྱི་མགོན་དཔུང་དམ་པར་༸ཞབས་པད་བསྐལ་པ་ཁྲི་ཕྲག་ཏུ་བརྟན་ཅིང། རླབས་ཆེན་ཐུགས་བཞེད་མཐའ་དག་གེགས་མེད་ལྷུན་གྱིས་འགྲུབ་སླད། བོད་རྒྱལ་ལོ་ ༢༡༣༩ རབ་བྱུང་ ༡༧ པའི་ཆུ་འབྲུག་ཆོ་འཕྲུལ་ཟླ་བའི་ཚེས་ ༡༥ ཕྱི་ལོ་ ༢༠༡༢ ཟླ་ ༣ ཚེས་ ༨ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་བསྟར་འབུལ་རྒྱས་པ་ཞིག་འབུལ་རྒྱུའི་བསྐལ་བཟང་ཐོབ་པ་དེ་དོན་རང་རེའི་ཁྱབ་ཁོངས་སེར་སྐྱ་མང་ཚོགས་སྤྱི་ཡོངས་ལ་ནང་ཁུལ་གསལ་བསྒྲགས་ཕུལ་ཟིན་ཀྱང། ད་ལམ་༸བཀའ་འབྲེལ་བརྟན་བཞུགས་ཀྱི་དུས་ཚེས་ཕྲན་བུ་འགྱུར་བ་ཕྱིན་པའི་གནས་ཚུལ་དང་འབྲེལ་གལ་ཆེའི་དོན་གནད་ཁག་ཅིག་ཡོངས་ཁྱབ་གསལ་བསྒྲགས་ཞུས་ཡོད་ན། ཚང་མས་དེ་དོན་ཐུགས་སྣང་ཡོང་བ་རྣམ་མངའ་མཁྱེན་ཞུ།

༡༽        ཆོ་འཕྲུལ་ཟླ་བའི་ལོ་སར་ཚེས་ ༡༥ ཉིན་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་གསོ་སྦྱོང་དང། སྨོན་ལམ། འཁྲུངས་རབས་བཀའ་ཆོས་སོགས་མཛད་རིམ་སྣེ་མང་ལ་བརྟེན། ད་ལམ་༸བཀའ་འབྲེལ་འབའ་པའི་བརྟན་བཞུགས་ཆོ་འཕྲུལ་ཟླ་བའི་ཚེས་ ༡༤ ཕྱི་ལོ་ ༢༠༡༢ ཟླ་ ༣ ཚེས་ ༧ ཉིན་གྱི་སྔ་དྲོ་བཞུགས་སྒར་ཕོ་བྲང་ཚོམས་ཆེན་རྟ་མགྲིན་ཁང་དུ་འབུལ་གཏན་འཁེལ་བ་དང་།  ལོ་སར་ཚེས་ ༡༥ ཕྱི་ལོ་ ༢༠༡༢ ཟླ ༣ ཚེས་ ༨ སྔ་དྲོ་ཐེག་ཆེན་ཆོས་གླིང་གཙུག་ལག་ཁང་དུ་ཐུགས་རྗེ་ཆེན་པོའི་བཀའ་དབང་ཞིག་ཀྱང་ཞལ་བཞེས་བཟང་པོ་ཐོབ་ཡོད་ན། དེ་དོན་དགོངས་འཇགས་ཡོང་བ་ཞུ་རྒྱུ།

༢༽       བརྟན་བཞུགས་ཀྱི་སྟ་གོན་དུ་རང་ཁོངས་བླ་སྤྲུལ་དགེ་བཤེས་བརྒྱ་ལྷག་ནས་ཆོ་འཕྲུལ་ཟླ་བའི་ལོ་སར་ཚེས་ ༡༡ ནས་ ༡༣ བར་ཉིན་གྲངས་གསུམ་རིང་ཕོ་བྲང་གི་ཚོམས་ཆེན་རྟ་མགྲིན་ཁང་དུ་བརྟན་བཞུགས་ཆོ་གའི་སྒྲུབ་ཞག་བསྒྲུབ་དགོས་པ་དང། དེ་བྱིངས་གྲྭ་བཙུན་རྣམས་ཀྱང་ལོ་སར་ཚེས་ ༡༡ ནས་ ༡༣ བར་ཉིན་གྲངས་གསུམ་རིང་བཞུགས་སྒར་རང་དུ་བསྙེན་བཀུར་སྐུ་འགྱེད་དང་བཅས་༸རྒྱལ་བའི་སྐུ་ཚེ་ཡུན་དུ་བརྟན་པའི་ཞབས་རིམ་སྒྲུབ་ཞག་གོ་སྒྲིག་ཞུ་རྒྱུ་ཡིན་པས། རིས་མེད་བླ་སྤྲུལ་དགེ་བཤེས་དང་དགེ་འདུན་པ་ཡོངས་ཆོ་འཕྲུལ་ཟླ་བའི་ལོ་སར་ཚེས་ ༩ ནང་ཚུན་བཞུགས་སྒར་དྷ་སར་ངེས་ཕེབས་ཡོང་བ་ཞུ།

༣༽       ད་ལམ་༸དཔལ་ལྡན་༸སྐུ་སྒེར་ཡིག་ཚང་ནས་སྒྲོལ་དཀར་ཡིད་བཞིན་འཁོར་ལོའི་ཆོ་གའི་སྒོ་ནས་བརྟན་བཞུགས་བསྟར་འབུལ་དགོས་པའི་བཀའ་བཟང་ཕེབས་ཡོད་ན། འདི་ནས་གཞིས་བྱེས་སེར་སྐྱ་མི་མང་སྤྱི་མགྲིན་ལ་དེ་སྔོན་ཡིག་དྲུག་སོགས་གཟུངས་སྔགས་གང་ཤེས་དུས་ཐུང་ཛ་དྲག་ནང་གྲངས་གསོག་དགོས་པའི་གསལ་བསྒྲགས་ཞུས་ཟིན་ལྟར། ད་ལམ་སྒྲོལ་དཀར་གྱི་གཟུངས་སྔགས་གང་མང་གྲངས་གསོག་གིས་སྒྲུབ་ཐོ་ཆོ་འཕྲུལ་ཟླ་བའི་ལོ་སར་ཚེས་ ༡༠ ཕྱི་ལོ་ ༢༠༡༢ ཟླ་ ༣ ཚེས་ ༣ ནང་ཚུན་འདི་ག་ཚོགས་ཆུང་དུ་ངེས་འབུལ་ཐུབ་པ་གནང་དགོས།

༤༽       བརྟན་བཞུགས་གོ་སྒྲིག་ཚོགས་ཆུང་ནས་བསྐལ་བཟང་གི་དུས་ཚེས་དེ་དང་བསྟུན་ཉ་ཆིག་འབུམ་ཐམ་པ་མི་འཇིགས་སྲོག་གི་སྦྱིན་པ་གཏོང་འཆར་ཡིན་ན། གཞིས་བྱེས་གཉིས་ཀྱི་དགོན་སྡེ་གྲྭ་ཚང་དང། སྒེར་པ་སྐྱ་སེར་སུ་ཡིན་ནས་ཀྱང་༸རྒྱལ་བའི་སྐུ་ཚེ་ཡུན་དུ་བརྟན་པའི་བརྟན་བཞུགས་དང། རང་རང་གི་བསོད་ནམས་གསོག་སླད་སྒོ་ཕྱུགས་སོགས་གསོད་ལ་ཉེ་བའི་སེམས་ཅན་ཚེ་ཐར་གང་ནུས་གཏོང་བའི་དགེ་བསྐུལ་ནན་ཏན་ཞུ་རྒྱུ།

༥༽       གྲྭ་བཙུན་རྣམས་ལ་བརྟན་བཞུགས་རིང་བཞུགས་གནས་དང་ཞལ་ལག་གོ་སྒྲིག་ཞུ་རྒྱུ་ཡིན་པས་རང་རང་སོ་སོའི་ཆོས་གོས་རྣམ་གསུམ་དང་ཚོགས་ཞྭ། ཁྱབ་ཁོངས་ཚོགས་སྡེ་གྲྭ་ཚང་གི་ངོ་སྤྲོད་ལག་འཁྱེར་དང་ཕྱེད་པར་བཞི་རེ་བཅས་མཉམ་འཁྱེར་དགོས་པ་དང༌། ཕྱོགས་མཐའ་ཁག་ནས་ཕེབས་པའི་སྐྱ་བོ་རྣམས་ལའང་བཞུགས་གནས་གོ་སྒྲིག་ཞུ་རྒྱུ་ཡིན་སྟབས་ཚང་མས་ཕ་ཡུལ་ཆས་གོས་ཡོད་ན་ངེས་པར་བསྣམ་རྒྱུ་དང། དེ་མིན་བོད་ལུགས་གཟབ་འཕྱོར་དང་ཕྱེད་པར་བཞི་རེ་བཅས་ངེས་པར་བསྣམ་ཕེབས་དགོས། 

༦༽       ཆོ་འཕྲུལ་ཟླ་བའི་ཚེས་ ༡༥ ཉིན་གྱི་སྨོན་ལམ་དང། འཁྲུངས་རབས་བཀའ་ཆོས་སྐབས་དགེ་འདུན་པར་བསྙེན་བཀུར་དང་སྐུ་འགྱེད། གསོལ་ཇ་བཞེས་བག འབྲས་སིལ། དགུང་ཚིགས་བཅས་ཀྱི་སྦྱིན་བདག་གཙོ་བོའང་གཞིས་བྱེས་འབའ་ཐང་བརྟན་བཞུགས་གོ་སྒྲིག་ཚོགས་ཆུང་ནས་གནང་འཐུས་ཆོག་པའི་བཀའ་འཁྲོལ་སྨིན་སྩོལ་བྱུང་ཡོད་ན། ཚང་མས་རྣམ་དཀར་དགེ་ཚོགས་ཀྱི་བྱ་བ་འདི་ཉིད་གལ་ཆེ་དོན་ཆེར་བརྩིས་ཏེ་བརྟན་བཞུགས་དང་འབྲེལ་བའི་བྱེད་སྒོ་ཁག་ལ་ཕྱར་གྲུ་མཉམ་འདེགས་གནང་བའི་རེ་བ་དང།

༧༽       ལོ་སར་ཚེས་ ༡༦ ཉིན་བོད་ཀྱི་ཟློས་གར་ཐང་ཆེན་དུ་རྒྱལ་སྤྱིའི་འབའ་པ་ལྷན་འཛོམ་ཐེངས་དང་པོ་གོ་སྒྲིག་ཞུས་ཏེ། སྤྱི་ཡོངས་གནས་སྟངས་སྐོར་གོ་བསྡུར་དང། རང་ཁོངས་བླ་ཆེན་མི་ཆེན་ཁག་ཅིག་ནས་ཆོས་སྲིད་གཉིས་ཐད་བཀའ་སློབ་གསུང་བཤད་གོ་སྒྲིག་ཞུ་རྒྱུ་ཡིན་པས་ཚང་མས་དེ་དོན་དགོངས་མངའ་ཡོང་བ་མཁྱེན་མཁྱེན་མཁྱེན། ཞེས་གུས་འདུད་དང་བཅས། གཞིས་བྱེས་འབའ་ཐང་བརྟན་བཞུགས་གོ་སྒྲིག་ཚོགས་ཆུང་ནས་ཕྱི་ལོ་ ༢༠༡༢ ཟླ་ ༢ ཚེས་ ༡༥ ལ།།