མི་ཕམ་ཚངས་ཐིག
བོད་ཀྱི་བྱང་སེམས་དཔའ་རྟུལ་ཕོ་མོ་ཚོས་རང་སྲོག་མཆོད་མེར་ཕུལ་དགོས་དོན་གསལ་བཤད་ཡིད་ཚིམ་པ་ཞིག་བརྙན་འཕྲིན་དང་རླུང་འཕྲིན། ཚགས་ཤོག་སོགས་གང་སར་བྱེད་མ་ཐུབ་ན། མི་རིགས་དང་རིག་གཞུང་གཞན་པ་དག་གིས་ངོས་འཛིན་བཟང་བོ་ཞིག་བྱེད་ཤེས་ཀྱིན་མི་འདུག་པས་ཕན་མེད་གོ་ལོག་གི་ཉེན་ཁ་འདུག་པ་མ་ཟད། བོད་མི་དཀྱུས་མ་དག་གིས་ཀྱང་འདི་དག་གི་རིན་ཐང་ཆ་ཚང་ཞིག་རྟོགས་ཀྱི་མི་འདུག
གསར་འགོད་བརྒྱུད་ལམ་ཁག་ཏུ་བོད་མིའི་རང་སྲོག་མེ་མཆོད་གྱི་གནད་དོན་གླེང་བའི་གོ་སྐབས་ཡོད་མཁན་དག་མང་ཆེ་བས་འགྲེལ་བཤད་ཡིད་ཚིམ་པ་ཞིག་གནང་ཡོད་པ་མ་ཐོས། ཁོང་ཚོས་འདི་ལྟར་བརྗོད་བཞིན་འདུག བོད་མི་ཚོས་རྒྱ་ནག་གཞུང་གིས་སྲིད་ཇུས་ལ་བློ་ཁ་མ་ཁེངས་པས་ཞི་རྒོལ་བྱུང་བ་རེད་ཟེར་བ་དེ་ཁ་ལ་བྱང་འདུག དེ་ལས་ཅུང་ཟད་བཟང་བའི་ལན་འདེབས་མཁན་དག་གིས་རྒྱ་གཞུང་གིས་བོད་མི་ལ་སྡུག་སྦྱོང་དྲག་གནོན་ཆེ་དྲགས་ནས་བོད་མི་ཚོ་འུ་ཐུག་ཐབས་ཟད་ནས་རང་ཤི་བརྒྱབ་པ་རེད་ཟེར་རྒྱུ་དེ་ཡང་ཁ་ལ་བྱང་འདུག་པ་ཙམ་ལས། རྒྱལ་གཅེས་དཔའ་བོ་དཔའ་མོ་དག་གི་ཟླ་བྲལ་གྱི་མཛད་པ་ལ་འོས་ཤིང་འཚམས་པའི་འགྲེལ་བརྗོད་ཆ་ཚང་བ་ཞིག་གནང་ཐུབ་མཁན་ད་བར་ཤེས་མ་སོང་།
ད་ལྟའི་བཀའ་སྤྱི་གཉིས་ཀྱིས་སྔོན་མའི་བཀའ་ཤག་ལ་ལྟོས་ན་གདུང་སེམས་མཉམ་སྐྱེད་ཀྱི་ལས་འགུལ་སྤེལ་ཙམ་ཡོད་པ་ནི་བཟང་ཕྱོགས་སུ་ལོས་ལྟ། འོན་ཀྱང་གཞུང་དང་འབྲེལ་མ་འབྲེལ་གྱི་སྒྲིག་འཛུགས་ཀུན་གྱིས་ལས་འགུལ་གྱིས་བོད་ཀྱི་དཔའ་རྟུལ་ཕོ་མོ་ཚོའི་ཟླ་བྲལ་གྱི་མཛད་པ་དག་གི་འབུམ་ཆའི་ཆ་ཤས་ཙམ་ཡང་མཚོན་ཐུབ་མེད་པ་ནི་ངོ་ཚ་ཁ་སྐྱེངས་དགོས་པའི་གནས་ཤིག་ཏུ་ངོས་འཛིན་བྱེད་ཀྱི་ཡོད།
ཉེ་བའི་ལོ་འགའ་ནས་བོད་དོན་ལེགས་ཉེས་ཀྱི་ས་མཚམས་ལ་ཐག་ཇེ་ཉེ་དང་ཛ་ཇེ་དྲག་ཏུ་སོང་བ་སེམས་གྱིས་མ་བཟོད་ནས། རང་གི་དུས་ཚོད་དང་ནུས་ཤུགས་ཅི་ཡོད་བཏང་ནས་བོད་དོན་ལ་དཔྱད་བརྗོད་ཀྱི་རྩོམ་ཡིག་དང་དེབ་བྲིས་ཀྱང་ནུས་པ་མ་ཐོན་པས་ཁོ་ཆད་དེ་ཁུ་སེམ་མེར་བསྡད་ཡོད། འོན་ཀྱང་བོད་ཀྱི་དཔའ་རྟུལ་ཕོ་མོ་ཚོས་སྐུ་སྲོག་གཞན་དོན་དུ་མཆོད་པའི་དཔའ་སྙིང་དང་ཆོད་སེམས་ཀྱི་རིན་ཐང་ཆ་ཚང་ཞིག་མཚོན་ཐབས་སུ་ཐ་ན་བརྡ་འཕྲིན་ཙམ་ཡང་རྒྱལ་སྤྱིའི་བརྒྱུད་ལམ་ཁག་ ཏུ་ཐོན་མ་ཐུབ་པས་བློ་ཕམ་ཚད་ལས་འདས་པ་བྱུང་བས་འདིར་ཅུང་ཙམ་མི་བརྗོད་ཀ་མེད་ཀྱི་སྣང་བ་བྱུང་།
དང་པོ་ཆབ་སྲིད་ཀྱི་ཁ་ཕྱོགས་དགོས་པ།
གསར་འགྱུར་བརྒྱུད་ལམ་ཁག་ཏུ་བོད་ཀྱི་ཆབ་སྲིད་པ་ཚོས་བོད་མིའི་སྐྱིད་སྡུག་གླེང་སྐབས་བོད་མི་ཚོས་རྒྱ་ནག་གཞུང་གིས་སྲིད་ཇུས་ལ་བློ་ཁ་མ་ཁེངས་པ་རེད་ཟེར་གྱི་འདུག་པ་ཙམ་ནི་ཚིག་ནུས་ཆུང་དྲགས་པ་རེད་སྙམ། བོད་མི་ཚོས་རྒྱ་གཞུང་གི་སྲིད་ཇུས་ལ་བློ་ཁ་མ་ཁེངས་པ་ཙམ་གྱི་ག་ལ་ཚད། བོད་མི་རྒན་དར་གཞོན་གསུམ་གྱིས་དུས་རབས་ཕྱེད་ཀ་ལྷག་གི་རིང་དུ་རྒྱ་གཞུང་གིས་བཙན་གནོན་དང་མནར་གཅོད་ཤུགས་དྲག་ཅིང་རྒྱུན་རིང་དྲགས་པའི་སྡུག་བསྔལ་མ་བཟོད་པར་མེ་མདའ་དང་བཙོན་ཁང་ཁག་ཏུ་སྡུག་ལྕེབ་བྱེད་མཁན་ལོ་རེ་བཞིན་མང་ནས་མང་དུ་འགྲོ་ བཞིན་ཡོད་པ་རེད་ཟེར་ན་འོས་ཤིང་འཚམས་པ་མ་རེད་དམ།
རྒྱ་གཞུང་གིས་བོད་མི་ལ་སྡུག་སྦྱོང་དྲག་གནོན་ཆེ་དྲགས་ནས་བོད་མི་ཚོ་འུ་ཐུག་ཐབས་ཟད་ནས་རང་ལུས་མེ་སྲེག་བཏང་བ་རེད་ཟེར་པ་ཙམ་གྱིས་ཡང་ཆོག་གི་མི་འདུག་སྙམ། དྲང་མོར་བཤད་ན། རང་ལུས་མཆོད་མེར་ཕུལ་བ་ནི་རང་གཅེས་འཛིན་གྱིས་རང་སྡུག་མ་ཐེག་ནས་མ་རེད། བོད་མི་རིགས་གིས་སྡུག་བསྔལ་ཟློག་ཆེད་དུ་རང་སྲོག་བློས་བཏང་བ་རེད། འདི་ནི་འགྲན་ཟླ་བྲལ་བའི་ཆེས་སྙིང་སྟོབས་དང་ཆོས་དད་ཆེས་ཆེ་བ་གཉིས་ཀ་ཡིན་པས་རང་སྡུག་མ་ཐེག་ནས་མ་རེད།
ཕྲན་འདིར་མི་རིགས་གཞན་དང་རིག་གཞུང་གཞན་པ་དག་གི་མི་རྣམས་དང་མཉམ་དུ་བསྡད་ཡོད་པའི་ཉམས་མྱོང་ལས་ཤེས་པ་ནི། གལ་ཏེ་འུ་ཐུག་ཐབས་ཟད་ཀྱིས་རང་ལུས་མེ་སྲེག་བཏང་བ་རེད་ཟེར་ན། དེ་ནི་དེང་དུས་གྲོང་ཁྱེར་གྱི་མི་དག་ལ་ཆེས་སྤྱིར་བཏང་བའི་ངན་མཚང་ཞིག་ཡིན་པས། རང་སྡུག་མ་ཐེག་ནས་རང་ཤི་བརྒྱབ་པ་ནི་ཕན་མེད་ཀྱི་ཆེས་འཕྲོ་བླག་ཆེན་པོ་ཞིག་ཏུ་ངོས་འཛིན་བྱེད་ཀྱིན་འདུག མ་ཟད་ཁོང་ཚོས་དེ་ནི་འཚེ་མེད་ཞི་བའི་ལམ་དང་འགལ་བའི་འཚེ་བའི་ངོ་བོར་ངོས་འཛིན་བྱེད་ཀྱི་འདུག མ་ཟད་བོད་མི་མང་པོ་ཞིག་གིས་ཀྱང་རང་སྲོག་རང་གཅོད་བྱས་པ་ཆོས་དང་འགལ་ཡོད་སྣང་དང་། མ་ཚད་ཁོང་ཁྲོས་དབང་གིས་ཤི་བ་ཡིན་པས་ལྟ་ཚུལ་འཛིན་མཁན་འདུག་པས་དེ་ནི་བློ་གྲོས་ཆུང་ཞིང་ཐེག་པ་ཆེ་ཆུང་གི་ཆོས་གྱི་གོ་དོན་འབྱེད་མ་ཤེས་པས་ངན་མཚང་རེད།
དེའི་ཕྱིར་ཉེ་བའི་ལོ་འགའི་རིང་གི་བོད་ཀྱི་དཔའ་བོ་དཔའ་མོ་དག་ནི་འཇིག་རྟེན་གྱི་དཔའ་བོ་ཙམ་མ་ཡིན་པར། བྱང་ཆུབ་སེམས་དཔའ་དང་སེམས་མ་རུ་གྲགས་པའི་དཔའ་བོ་དང་དཔའ་མོ་ཡིན་པར་ཤེས་ཤིང་གོ་བ་ལོན་དགོས་པ་ནི་ཆེས་གནད་འགག་རེད་ལ། དེའི་ཕྱིར་གཞན་ལ་ཡང་དེ་ལྟར་དུ་འགྲེལ་བཤད་ཡིད་ཚིམ་པ་ཞིག་རྒྱག་ཐུབ་དགོིས་པ་ནི་ཤུལ་ལུས་བོད་མི་རྩམ་ཟན་ཡོང་གྱི་ལས་འགན་དུ་མཐོང་།
གཉིས་པ་ཆོས་ཀྱི་གནད་འགག་ཤེས་ན་སྲིད་དོན་གོ་བ།
རང་ཤི་བརྒྱབ་པར་གཅིག་མཚུངས་ཡིན་པ་ཁག་ལ་ཤི་དོན་ཆེས་མི་འདྲ་བ་ཡོད་པ་ཤེས་གལ། དེང་དུས་ཀྱི་གྲོང་ཁྱེར་གྱི་མི་མང་པོ་རང་གཅེས་འཛིན་ཁོ་ན་ལ་བློ་ཕྱོགས་པའི་དབང་གིས་རང་གི་སྡུག་བསྔལ་མ་ཐེག་པ་དང་ཐབས་ལམ་གཞན་མ་བརྙེད་པར་རང་ཤི་རྒྱག་མཁན་དང་གཅིག ཁ་ཆེའི་ཆོས་ལ་ལྟ་བ་ལོག་པ་འགའ་ཁོང་ཚོའི་རྟོགས་ཡུལ་གྱི་ཆོས་ལ་དད་གདུང་དྲག་པོས་ཁོང་ཚོས་དཀོན་མཆོག་མཉེས་ཕྱིར་གཞན་ལ་འཚེ་བའི་ཆེད་དུ་རང་སྲོག་བློས་གཏོང་བྱེད་པ། རྒྱལ་སྲས་བྱང་ཆུབ་སེམས་དཔས་གཞན་གྱི་སྡུག་བསྔལ་ཟློག་ཆེད་དང་བདེ་བ་སྒྲུབ་ཐབས་སུ་རང་སྲོག་བློས་གཏོང་བྱས་པ་དག་ནི་གནམ་ས་ལྟ་བུའི་ཁྱད་འགྱུར་དང་དུག་སྨན་ལྟ་བུའི་མཆོག་དམན་ཡོད་པ་ཤེས་གལ་ཆེ་ལ། དེ་ཚུལ་མ་ཤེས་ན་བླུན་རྨོངས་རེད།
བོད་མིའི་དཔའ་རྟུལ་རྣམས་ཀྱིས་བོད་མིའི་བདེན་དོན་རང་དབང་དང་། ནང་པ་སངས་རྒྱས་པའི་ཆོས་དང་རིག་གཞུང་གནས་ཐབས། འཛམ་གླིང་ཞི་བདེའི་རྨང་གཞི་འཚེ་མེད་ཞི་བ་སོགས་ཀྱི་ཆེད་དུ་རང་སྲོག་བློས་གཏོང་གིས་རང་ལུས་མཆོད་མེར་ཕུལ་བ་ནི་རྒྱལ་སྲས་བྱང་ཆུབ་སེམས་དཔའི་སྤྱོད་པ་ཁོ་ན་ཡིན་པར་སུ་ཞིག་བསྙོན་ཐུབ། འདི་ཤེས་ན་ཆབ་སྲིད་ཀྱི་དོན་སྙིང་ཡང་ཡོད་པ་ཤེས་གལ་ཆེ།
གསུམ་པ་འདི་ཅི་ཞིག་གི་མཚོན་རྟགས་ཡིན།
གངས་ཅན་པའི་ལ་རྒྱའི་ཟུངས་ཁྲག་ལྷོག་ལྷོག་ཏུ་རྒྱུ་བའི་རྒྱལ་གཅེས་དཔའ་བོ་དཔའ་མོ་འདི་དག་རེ་ཞིག་འཇིག་རྟེན་འདི་ནས་ཁ་གྱེས་པ་ནི་བཟོད་ཐབས་དཀའ་བའི་ན་ཟུག་ཅིག་དང་། ཐེག་པར་དཀའ་བའི་ཕངས་སེམས་ཤིག་ཡིན་པ་སྨོས་མེད་རེད། འོན་ཀྱང་རྨད་དུ་བྱུང་བའི་ཆོད་སེམས་དང་བླ་ན་མེད་པའི་བྱང་སེམས་ལ་བསམ་ན་ཧ་ལས་ཤིང་ཧོན་འཐོར་དགོས་པའི་མཛད་རྗེས་དང་མཚོན་རྟགས་གཉིས་ཀ་ཡིན་པའི་རྒྱུ་མཚན་འགའ་ཞིག་དྲངས་ན་འདི་ལྟར་རེད།
རང་བཞིན་གྱི་སོ་སོའི་སྐྱེས་བུ་ཞིག་གིས་རང་དོན་ཡིད་བྱེད་མ་འདྲེས་པར་གཞན་དོན་དུ་རྒྱུ་ནོར་ཅུང་ཟད་རེ་གཏོང་དཀའ་བ་དང་། བདེན་གཏམ་གྱི་ཚིག་ངན་ཅུང་ཙམ་ཡང་མི་བཟོད་ལ། རང་ལུས་ལ་ཚེར་མ་ཆུང་ངུ་རེས་བཙུགས་པའི་ཚོར་བ་མི་བཟོད་ན། གང་ཞིག་གིས་རང་གི་ཚེ་སྲོག་ཡོངས་རྫོགས་གཞན་དོན་དུ་གཏོང་ཐུབ་པ་ནི་བྱང་ཆུབ་ཀྱི་སེམས་རྣལ་མ་རྒྱུད་ལ་ཡོད་པའི་མཚོན་དཔེ་རྨ་མེད་པ་རེད་ལ། ཡང་ན་ཆོས་ཀྱི་གནས་ལུགས་བདག་མེད་རྟོགས་པའི་ཤེས་རབ་རྒྱུད་ལ་ཡོད་པའི་མཚོན་རྟགས་ཁོ་ན་ལས་གཞན་ཅི་ཡང་མིན་པ་ལ་ཐེ་ཚོམ་ཙམ་ཡང་བྱེད་མི་རིགས་པའི་གནས་རེད།
འདི་ལ་བསམ་བློ་རྣལ་མ་བཏང་ན། བླ་ན་མེད་པའི་མཛད་པ་འདི་དག་གིས་ནི་ང་ཚོ་གངས་ཅན་པ་དག་དང་ནང་པ་སངས་རྒྱས་པ་དག་དགའ་བ་ཚད་མེད་ཀྱང་སྐྱེ་དགོས་པའི་གནས་ཞིག་ཀྱང་རེད། ཕྲན་ནི་ཧ་ལས་ཞིང་ཧང་སངས་ཡོད། རྒྱུ་མཚན་ནི། ད་ལྟ་སྙིགས་མ་ལྔ་བདོ་པའི་དུས་དང་བྱང་སེམས་དང་འཕགས་པའི་གང་ཟག་ནི་ལོ་རྒྱུས་ཀྱི་ཡུལ་ཙམ་ལས་དངོས་མཐོང་གི་ཆོས་སུ་མེད་ཚོད་བྱེད་མོད། རྒྱལ་གཅེས་དཔའ་བོ་འདི་དག་གིས་རང་སྲོག་སེམས་ཅན་གྱི་བདེ་སྐྱིད་ཀྱི་ཆེད་དུ་གཏོང་བ་ནི་ད་དུང་འཇིག་རྟེན་འདི་ན་བྱང་སེམས་འཕགས་པ་དངོས་མཐོང་དུ་ཡོད་པའི་མཚོན་རྟགས་རྣལ་མ་རེད་མོད། དེ་ནི་རྒྱལ་བའི་བསྟན་པ་རྣམ་དག་ད་དུང་གང་ཟག་མང་པོའི་ཐུགས་རྒྱུད་ན་ཡོད་པའི་མཚོན་རྟགས་འཁྲུལ་མེད་ཀྱང་མ་རེད་དམ། ད་དུང་རྒྱལ་བསྟན་མྱུར་དུ་ནུབ་རན་ལ་སླེབས་མེད་པའི་རྟགས་ཀྱང་རེད།
ཆབ་སྲིད་ཀྱི་ཐད་ནས་བསམ་ན་ཡང་། འདིས་ནི་གངས་ཅན་ཙམ་མ་ཡིན་པར་འཛམ་གླིང་ལ་རྨད་དུ་བྱུང་བའི་ལོ་རྒྱུས་བྲིས་པ་རེད། འདི་ནི་ད་སྔོན་འཛམ་གླིང་དུ་ཆེར་བྱུང་མྱོང་མེད་པའི་ལོ་རྒྱས་གསར་པའི་ལེའུ་རེད། འདིས་གངས་ཅན་པའི་རྒན་དར་གཞོན་གསུམ་གྱི་སྙིང་ནང་དུ་འགྱུར་བ་མེད་པའི་ཆིག་སྒྲིལ་དང་ལ་རྒྱའི་བག་ཆགས་སྲ་ཞིང་འཐས་པ་ཞིག་བཞག་པ་རེད། ཆོས་པ་ཞིག་ཡིན་ན་ཆོས་ཀྱི་ཉམས་ལེན་ལ་དཔེ་མཚོན་བཞག་པ་རེད། རྒྱ་གཞུང་གི་མཁྲེགས་འཛིན་གྱི་ལངས་ཕྱོགས་ལ་འདྲི་ཚིག་ལན་མེད་པ་ཞིག་བྲིས་པ་རེད་ལ། སྐྱག་རྫུན་གྱི་མཚང་ལུད་ཁུང་ནས་བརྡོལ་བ་རེད་ལ། སྲིད་དོན་པ་ཞིག་ཡིན་ན་འདི་ཆབ་སྲིད་ཀྱི་གལ་འགངས་བླ་ན་མེད་པ་རུ་འབྲེལ་ཐུབ་པ་སྨོས་མེད་རེད།
བཞི་བ་བློ་ཕམ་དགོས་པའི་དོན་ཅི་ཡོད།
རིན་ཐང་བྲལ་བའི་རང་ལུས་མེ་སྲེག་གཏོང་མཁན་ཡོད་ཀྱང་དེ་ལ་གཏོང་ལུགས་གཏོང་སྟངས་དག་ལ་སློབ་སྟོན་གནང་མཁན་མེད་དང་གཅིག འགྲན་ཟླ་བྲལ་བའི་རང་ལུས་མེ་མཆོད་སོགས་གློག་བརྙན་ལེན་པ་སོགས་ཀྱི་གྲ་སྒྲིག་བྱེད་མཁན་གྱིས་མ་འདང་བ་དང་གཉིས། གཞིས་སྡོད་བོད་མིས་བླ་ན་མེད་པའི་མཛད་རྗེས་ལ་བྱེས་སྡོད་གཞུང་དམངས་ཀྱི་སྒྲིག་འཛུགས་དག་གིས་རྒྱབ་སྐྱོར་ཙམ་ཡོད་ཀྱང་། དཀའ་སྤྱད་ཧུར་བརྩོན་དང་རྣམ་དཔྱོད་དང་བློ་རིག་གི་རྩལ་དང་ནུས་པས་དཔའ་བོ་དཔའ་མོ་ཚོའི་ཡོན་ཏན་གྱི་ཆ་ཤས་ཙམ་ལ་འགྲན་ཐུབ་པའི་ལས་འགུལ་གྱིས་མ་འདང་བ་དང་གསུམ་རེད།
འདི་དག་གི་ལེ་ལན་སུ་ལ་བབས་ཡོད་ཟེར་ན། འདི་དག་ནི་བོད་གཞུང་འབྲེལ་ལས་བྱེད་པ་དག་གཙོ་བོར་བྱས་པའི་ཆབ་སྲིད་ཀྱི་གར་སྟེགས་སྟེང་ན་འཚོ་བ་རོལ་མཁན་ཀུན་གྱི་གཙོས་ས་གནས་སོ་སོའི་འབྲེལ་ཡོད་བྱེས་སྡོད་པ་དག་གི་འཐུས་ཤོར་ཚབས་ཆེན་ཞིག་རེད། མ་འོངས་པར་གཞིས་ལུས་བོད་མི་སུ་ཞིག་གིས་བླ་ན་མེད་པའི་ལས་འགུལ་ཅི་ཞིག་སྤེལ་ཡང་། དེ་ཉིད་དངོས་བྱུང་གནས་ཚུལ་བརྙན་ལེན་མཁན་མེད་ཐབས་མེད་པ་དང་། དེ་ཉིད་གྲ་སྒྲིག་ཚགས་ཚུད་དགོས་པ་གལ་ཆེ་ཤོས་དང་། མི་ཚོགས་ཆེས་མང་ས་ཁག་ཅིག་ནས་ལས་འགུལ་སྤེལ་དགོས་པ། བོད་མི་སྡེབས་ལངས་དགོས་པའི་སློབ་སྟོན་ལ་སོགས་ཀྱི་ལམ་སྟོན་ཚགས་ཚུད་གནང་ཐུབ་པའི་ལས་འགན་ནི་བོད་གཞུང་འབྲེལ་ལས་བྱེད་པ་དག་གཙོ་བོར་བྱས་པའི་ཆབ་སྲིད་གར་སྟེགས་སུ་འཚོ་མཁན་ཀུན་དང་། ས་གནས་སོ་སོའི་འབྲེལ་ཡོད་བྱེས་སྡོད་བོད་མི་རེ་རེའི་ཕྲག་སྟེང་དུ་བབས་པའི་ལས་འགན་ཡིན་པ་ཡིད་འཇགས་འཚལ།
ལྔ་བ་རང་ལུས་མེད་སྲེག་གཏོང་རིགས་དང་མི་རིགས།
རང་ལུས་མེར་བསྲེགས་ཀྱིས་ནུས་པ་མི་ཐོན་སྟབས་མ་གནང་ན་བཟང་རབས་དང་། མང་པོ་ཞིག་གིས་རྒྱལ་གཅེས་དཔའ་བོ་དག་གཅིག་རྗེས་གཉིས་མཐུད་དུ་ཤི་ན་ཤུལ་དུ་བོད་མི་ངན་སྙིགས་དག་ལས་ལྷག་གི་མ་རེད་ཟེར་བ་སོགས་ནི། བློ་གྲོས་གཏིང་མི་ཟབ་ཅིང་མིག་རྒྱང་ཐུང་དྲགས་པའི་སྐད་ཆ་རེད། རྒྱུ་མཚན་མང་ཡང་འགའ་ཞིག་གླེང་ན། རྒྱལ་གཅེས་དཔའ་བོ་དཔའ་མོ་རེ་རེའི་བླ་ན་མེད་པའི་མཛད་རྗེས་རེ་རེ་བཞག་དུས། གངས་ཅན་པ་ཆེས་མང་པོའི་སྙིང་ནང་དུ་གཏིང་ཟབ་པའི་རྒྱལ་གཅེས་པའི་བག་ཆགས་ཆེས་སྲ་བརྟན་རེ་འཇོག་གིན་ཡོད་པ་སྨོས་ཅི་དགོས། དེ་འདྲའི་བག་ཆགས་ཟབ་མོ་དག་ནམ་ཞིག་ན་མི་སྨིན་པར་འདུག་ས་མེད་པ་ནི་སྔོན་ལས་ལྡོག་མེད་ཀྱི་འབྲས་བུ་དག་དང་གཅིག་མཚུངས་རེད། འདིས་ནི་གངས་ཅན་པའི་མི་རབས་གསར་པའི་སྙིང་ཁམས་ལ་ཁྱད་པར་ཆེས་ཆེན་པོ་ཞིག་བཟོས་དང་བཟོ་བཞིན་ཡོད། དེའི་ཕྱིར་གངས་ཅན་པའི་དཔའ་སྙིང་དང་བྱང་སེམས་ནི་བོད་མི་བརྒྱ་སྟོང་ཁ་ཤས་འདས་གྲོངས་སུ་སུ་སོང་བས་རྫོགས་འགྲོ་བ་ཞིག་གཏན་ནས་མིན་པར་དེ་བས་མང་དུ་འཕེལ་རྒྱུ་གདོན་མི་ཟ།
གཞན་ཡང་གཞན་དོན་དུ་རང་སྲོག་མེ་ལ་མཆོད་པ་ནི་རྒྱལ་སྲས་བྱང་ཆུབ་སེམས་དཔའི་མཛད་པ་འཁྲུལ་མེད་ཡིན་པས། འདི་ལ་དེ་འདྲ་མ་གནང་རོགས་ཞེས་སུ་ཡིས་བཤད་ན་དེ་ནི་ཆེས་ཉེས་པ་ཆེ་ཤོས་དང་ཆེས་ལས་ངན་ཚབས་ཆེན་ཞིག་ཡིན་པ་གཏན་ཚིགས་ཀྱིས་གྲུབ་ལ། རང་ཉིད་གཞན་དོན་དུ་རང་སྲོག་གཏོང་ནུས་མཁན་ཞིག་མ་ཡིན་ཕྱིན་གཞན་དོན་དུ་རང་སྲོག་གཏོང་རོགས་ཞེས་དེ་བས་ཀྱང་སྨྲ་ག་ལ་འོས། འདི་ནི་ཆེས་ཁྱད་དུ་འཕགས་ཤིང་འགྲན་ཟླ་བྲལ་པའི་མཛད་སྤྱོད་ཅིག་ཡིན་པས། སོ་སོའི་སྐྱེས་བུ་རང་འགའ་བ་ཞིག་གིས་འདི་དག་གི་རིན་ཐང་དཔྱོད་མི་ནུས་ལ། ལེགས་ཉེས་ཀྱི་ཁ་ཚོན་གཅོད་པའི་ཐོབ་ཐང་མེད་ལ། འོས་བབས་ནི་དེ་བས་ཀྱང་ག་ལ་ཡོད་དོ།། །།
གྲོགས་པོ་ཁྱེད་ཀྱིས་གསུངས་པ་བདེན་པ་རེད།དེང་སང་གཞུང་འཛིན་མི་སྣ་གཙོ་བྱེད་པའི་རླུང་འཕྲིན་ཁག་ནང་འབྲེལ་བཤད་ཡང་དག་ཅིག་མེད་པ་དང་མི་སེར་ནང་དུའང་འདྲ་མི་འདྲ་འབྲེལ་མཁན་འདུག།བྱས་ཙང་ཨེ་ཤེ་ཡ་རང་དབང་རླུང་འཕྲིན་ཁང་དང་ནོར་ཝེ་རླུང་འཕྲིན་ཁང་།གཞུང་འཛིན་མི་སྣ།གཞུང་སྒེར་གྱི་དྲ་རྒྱ་སོགས་སུ་ཁ་གཅིག་གྲགས་ཐོག་འབྲེལ་བཤད་ཡག་པོ་ཞིག་རྒྱག་དགོས་པ་དེ་ནི་ཧ་ཅང་གི་གལ་ཆེན་དུ་རང་གི་ཡང་མཐོང་གི་ཡོད།
ཁྱེད་ཁོ་ན་སྐུ་སྲོག་གཏོང་མཁན་ཚོའི་རིན་ཐང་ཤེས་མཁན་ཡིན་ཟེར་ནི་ཡིན་ས་རེད། འགྲིག་གི འགྲིག་གི བདེན་པ་ཞིག་གསུང་འདུག
མི་ཕམ་ཚངས་ཐིག་གིས་རང་སྲོག་བཏང་རིགས་མི་རིགས་དང་ན་སུས་ཀྱང་དཔག་མི་འོས་ཟེར་བ་བོན་རྒྱས་ད་དུང་གོ་མི་འདུག་ཡ།
རེད། བོད་ནང་གི་མེ་ལྕེ་དེ་རྣམ་གྲངས་མང་བ་དང་ངར་ཤུགས་ལྡན་པའི་སྒོ་ནས་འབར་དགོས་པ་རེད། རྒྱལ་སྲས་བྱང་ཆུབ་སེམས་དཔའི་སྤྱོད་པ་ཡིན་ན་འགོག་ག་ལ་རུང་སྟེ་སོ་སོ་སྐྱེ་བོའི་རྒྱལ་ཁབ་སླར་གསོའི་ཐབས་ལམ་ཡིན་ནའང་། འགོག་རུང་བ་ཞིག་མ་ཡིན་ནོ། །