ཕྱི་རྒྱལ་གསར་འགོད་པར་རུབ་རྡུང་།

གཟའ་ལྷག་པའི་ཉིན་རྒྱ་ནག་ཀྲིག་ཅང་ཕན་ཧི་སྡེ་བའི་ནང་། རྒྱ་ཉེན་རྟོག་པས་ཕྱི་རྒྱལ་གསར་འགོད་པ་ཞིག་ལ་རུབ་རྡུང་བྱས་ཏེ།  པར་ཆས་ཀྱི་བྱང་བུ་དང་ཟིན་བྲིས་སོགས་བཙན་འཕྲོག་བྱས་འདུག

ཟླ་འདིའི་ཕྱི་ཚེས་ ༡༥ ཉིན་ནའེ་དྷིར་ལན་ཌིའི་(Netherlands)གསར་འགོད་པ་ཋེ་ནེ་སི་(Remko Tanis)ལགས་རྒྱ་ནག་ཀྲིག་ཅང་ཝུན་ཀྲིག་གྲོང་ཁྱེར་ཙཱང་ནན་རྫོང་པན་ཧི་སྡེ་བའི་ནང་བསྐྱོད་དེ། རྒྱ་གཞུང་གིས་ས་ཁུལ་དེའི་ནང་མི་མང་གི་ས་ཞིང་བཙན་འཕྲོག་བྱས་པའི་རྐྱེན་གྱིས། ཉེ་ཆར་མང་ཚོགས་འདུ་འཛོམས་གྱི་ངོ་རྒོལ་ལས་འགུལ་བྱུང་པའི་གནས་ཚུལ་རྒྱུས་ལོན་ཆེད་ས་གནས་མང་ཚོགས་ལ་བཅར་འདྲི་བྱེད་སྐབས། དམག་ལྭ་གྱོན་མེད་པའི་རྒྱ་གཞུང་ཉེན་རྟོག་དམག་མི་མང་པོ་སླེབས་ཏེ། ས་གནས་མང་ཚོགས་དང་གསར་འགོད་པའི་མཐའ་སྐོར་ཏེ་རུབ་རྡུང་བྱས་ཡོད་པར་མ་ཟད། གསར་འགོད་པའི་པར་ཆས་ཀྱི་བྱང་བུ་དང་ཟིན་བྲིས་དེབ་སོགས་ཅ་དངོས་རྣམས་བཙན་འཕྲོག་བྱས་ཡོད་འདུག

གསར་འགོད་པ་ཋེ་ནེ་སི་ལགས་གསར་ལམ་ཁག་ཏུ་དེའི་སྐོར་གྱི་གནས་ཚུལ་བརྗོད་སྐབས། “ས་གནས་མང་ཚོགས་ལ་བཅར་འདྲི་བྱེད་སྐབས། དམག་ལྭ་གྱོན་མེད་པའི་ཉེན་རྟོག་དམག་མི་ ༡༠༠ ལྷག་སླེབས་ཏེ་མཐའ་སྐོར་རྗེས། གསལ་བཤད་གང་ཡང་མེད་པར་ཐད་ཀར་མང་ཚོགས་ལ་གཅར་རྡུང་སྐོར་གསུམ་བྱས་བྱུང་། ང་ལའང་མི་བཅུ་གྲངས་ཤིག་གིས་གཅར་རྡུང་བྱས་པ་མ་ཟད། པར་ཆས་ཀྱི་བྱང་བུ་དང་ཟིན་བྲིས་དེབ་སོགས་ཅ་རྣམས་བཙན་འཕྲོག་བྱས་སོང་། སྐབས་དེར་ང་ལ་རྨས་སྐྱོན་ཚབ་ཆེན་བཟོས་མ་བྱུང་ཡང་། ས་གནས་མང་ཚོགས་ལ་གཅར་རྡུང་དྲག་པོ་བྱས་ཏེ་རྨས་སྐྱོན་ཚབ་ཆེན་བཟོས་འདུག” ཅེས་བརྗོད་འདུག

ཨ་རིའི་ཉིག་ཡོག་ཏུ་རྟེན་གཞི་བྱས་པའི་གསར་འགོད་པ་སྲུང་སྐྱོབ་མཐུན་ཚོགས་ཀྱིས་ཀྱང་། རྒྱ་ནག་གཞུང་གིས་ཕྱི་རྒྱལ་གྱི་གསར་འགོད་པ་རྣམས་རྒྱ་ནག་ནང་ལོག་ཏུ་བསྐྱོད་ཆོག་པའི་མིང་ཙམ་གྱི་རང་དབང་སྤྲད་ཡོད་ཀྱང་། ས་གནས་ས་ཐོག་ལ་སླེབས་རྗེས་གསར་འགོད་པར་འཇིགས་སྐུལ་དྲག་རྡུང་བྱེད་ཀྱིད་ཡོད་ལ། ལྷག་པར་དུ་གནས་ཚུལ་མཁོ་སྤྲོད་གནང་མཁན་ས་གནས་མང་ཚོགས་དང་རྒྱ་རིགས་གསར་འགོད་པ་ཚོར་སྲོག་ཉེན་གྱི་འཇིགས་པ་འཕྲད་བཞིན་སྟབས།   ཁོ་ཚོའི་ངོས་ནས་རྒྱ་ནག་ནང་ཕྱི་རྒྱལ་གསར་འགོད་པར་ཉེས་རྡུང་གཏོང་བཞིན་པ་དེར་བློ་འཚབ་ཡོད་པ་དང་། དེ་ནི་གསར་འགོད་པའི་གནས་ཚུལ་མཁོ་སྒྲུབ་ཀྱི་ལས་དོན་ལ་ཆེད་དམིགས་བཀག་འགོག་བཟོས་པ་ཞིག་ཡིན་སྐོར་བརྗོད་འདུག  

ཟླ་འདིའི་ཕྱི་ཚེས་ ༡༦ ཉིན་རྒྱ་ནག་ནང་ཡང་བསྐྱར་ཧྤ་རན་སིའི་གསར་འགོད་པ་ཞིག་དང་ཁོང་གི་ལག་རོགས་གཉིས་ལ་རྒྱ་ནག་ཉེན་རྟོག་པས་གཅར་རྡུང་བྱས་པའི་གནས་ཚུལ་བྱུང་ཡོད་འདུག