ལོ་ནག་མའི་འཁྱུག་བྲིས།

རྒྱ་ནག་གིས་བོད་མིའི་ཚེ་སྲོག་འཕྲོག་ཐུབ་ཀྱང་རང་དབང་དང་སྙིང་སྟོབས་དུས་ནམ་ཡང་གཞོམ་མི་ནུས།

ལྷ་ཆབ་སྦྱིན་པ།

ང་ནམ་རྒྱུན་རང་གི་ལས་ཀར་གྱུར་བའི་ཆབ་སྲིད་བཙོན་པའི་ལོ་རྒྱུས་དང་དེ་དག་གི་གསེང་ལ་འཛུལ་ནས་བསྡད་ཡོད། ངས་བོད་མི་རིགས་ཀྱི་ཆེད་དུ་རང་གི་ཚེ་སྲོག་ཕྲ་མོ་འདི་འཁྲབ་ལྡན་དཔུང་དམག་གི་མེ་མདའི་ཁ་རུ་བརྫངས་ནས་སྐད་འབོད་དང་ངོ་རྒོལ་བྱེད་མཁན་དག་གི་སྙིང་སྟོབས་དང་མཛད་རྗེས་ཀློག་ནས་བསྡད་ཡོད།  ངས་ལོ་ངོ་གཅིག་ནས་བཅུ། བཅུ་ནས་ཉི་ཤུ། ཉི་ཤུ་ནས་སུམ་ཅུའི་བར་ཁྲི་མུན་དོང་གི་ཕུགས་ནས་བརླགས་སོང་བའི་རང་གི་རྒྱལ་ཁབ་བསྐྱར་གསོར་རྟོགས་བཟོ་བྱས་མྱོང་བའི་དཔའ་བོ་དང་དཔའ་མོའི་དཔུང་གི་བློ་སྟོབས་མཐོང་མྱོང་། དེ་བས་ཀྱང་མི་ལོ་སོ་བདུན་རིང་དགྲ་བོའི་ལྕགས་སྒྲོག་གི་འོག་ནས་འཚོ་བ་བསྐྱལ་མྱོང་བའི་བོད་མི་རིགས་ཀྱི་དཔའ་བོའི་ཁྱུ་མཆོག་སྟག་སྣ་འཇིགས་མེད་བཟང་བོ་མཆོག་གི་མི་ཚེའི་ལོ་རྒྱུས་འབྲི་རྒྱུའི་སྐལ་བཟང་ཡང་ཐོབ་པས། རང་གི་སེམས་ཀྱི་དད་པ་འདི་བོད་མི་རིགས་ཀྱི་དཔའ་བོ་དག་གི་རྗེས་སུ་མི་འགྲོ་ཐབས་མེད་བྱུང་། དེ་ལྟར་ནམ་ལང་ལང་དང་ཉི་མ་ཤར་ཤར་ལ་དགྲ་བོའི་ལྕགས་ཚན་དང་ལྕགས་མཁར་སྒོ་མེད་ཀྱི་གསེང་ལ་ཉུལ་བ་དང་། བཅད་ཁྲ་དང་གདུག་རྩུབ་ཀྱི་གསེང་ལ་ལྷུང་བའི་ངའི་སེམས་པ་དང་མིག་ཟུང་གིས། ཡང་བསྐྱར་གཅིག་བཟུང་སོང་དང་། ཡང་བསྐྱར་གཅིག་བསད་སོང་ལྟ་བུའི་ཐ་སྙད་ཁོ་ན་ལས་ཅི་ཡང་མ་མཐོང་བར་མི་ལོ་དུ་མ་འདས་པའི་ད་ལོར། སྐད་འབོད་ཀྱི་ངོ་རྒོལ་ལས་བརྒལ་ཏེ་རང་གི་ཚེ་སྲོག་སྐྱེས་སུ་འབུལ་བའི་བརྒྱུད་རིམ་ཞིག་ལ་སླེབས་པ་འདིས། སྨྲ་བསམ་བརྗོད་འདས་ཀྱི་ཚོར་བ་དྲག་པོ་ཞིག་བསླངས་ཤིང་། ཞིབ་ཏུ་བསམ་ན་སྙིང་ཆུང་ཚལ་བར་འགས་པའི་ཚད་དུ་སླེབས།

སྐབས་འདིར་བདག་གིས་རང་ལོ་ཉི་ཤུ་སོན་མ་ཐག་པའི་དཔའ་བོ་བཀྲ་བྷེས་ ༢༠༠༩ ལོའི་ཟླ་ ༢ཚེས་ ༢༧ ཉིན་ཚེ་སྲོག་སྐྱེས་སུ་ཕུལ་བའི་སྙིང་སྟོབས་དང་མཐའ་མའི་དཀའ་སྡུག་ལ་ཚོད་དཔག་བྱེད་དགོས་བྱུང་ལ། དཔའ་བོ་ཁོང་གིས་རང་གི་ཚེ་སྲོག་སྐྱེས་སུ་འབུལ་བའི་དམ་བཅའ་ལམ་ལྷོང་མ་བྱུང་བར་དགྲ་བོའི་ལག་པར་ཤོར་སོང་བ་དང་། དམར་ལྷབ་ལྷུབ་འབར་བའི་མེ་ལྕེ་དེའི་སྐབས་སུ་སྡུག་བོའུ་ཞིག་གི་སྐག་སྒྲ་གཉིས་བསྟུད་མར་གྲགས་སྐད། དཔའ་བོ་ཁོང་ས་ལ་འགྱེལ་བ་དང་སྙིང་སྟོབས་ཀྱིས་འབར་བའི་མེ་ལྕེ་དེའང་གཞིལ་བར་གྱུར་འདུག རྗེས་སུ་གོ་ཐོས་ལྟར་ན། བོའུ་སྐད་དེ་གཉིས་ཀྱིས་ཁོང་གི་སྒྱིད་ངར་གཡས་གཡོན་ལ་བརྒྱབ་འདུག་པ་དང་། སྨན་ཁང་ནས་རྐང་བ་གཉིས་གཅོད་དགོས་མིན་ཞིག་ཀྱང་སྐབས་དེར་གླེང་བྱུང་། དཔའ་བོ་ཁོང་གིས་རང་ལུས་མཆོད་མེར་སྒྲོན་པ་ནས་དེ་རིང་ལ་ཐུག་གི་བར་གྱི་དཀའ་སྡུག་ལ་ཚོད་དཔག་ཅིག་བྱས་ན། དང་པོར་མེར་འཚིག་པའི་ལུས་པོ་ཆ་ཚང་སྨན་བཅོས་བྱས་པ་དང་། དེའི་ཁར་དགྲ་བོའི་མེ་མདས་རྨས་པའི་རྐང་བ་གཡས་གཡོན་གཉིས་གཤགས་བཅོས་རིམ་པ་བྱས་པའི་དཀའ་སྡུག་ལ་བསམ་ན་བཅོས་མིན་གྱི་མིག་ཆུ་མི་འཆོར་བའི་རང་དབང་ཞིག་ག་ལ་ཡོད་ཨང་། དེའི་རྗེས་སུ་སུས་ཀྱང་མཐོང་ཐོས་བྲལ་བའི་ཁྲི་མུན་དོང་ལ་གཡུག་ནས་ད་བར་ཤི་གསོན་ཆ་མི་འཚལ་བའི་གནས་ཚུལ་སོགས་ལ་བསམ་ན། རང་གི་ཚེ་སྲོག་སྐྱེས་སུ་ཕུལ་བའི་དཔའ་བོ་རིམ་པའི་ཁྲོད་ཀྱི་མ་འདས་པ་དག་ལས་ཁོང་གི་དཀའ་སྡུག་ནི་ཐོལ་བ་ཞིག་ཡིན་པ་ཚོད་དཔག་བྱེད་ཐུབ། དེའི་རྗེས་ནས་དཔའ་བོ་ཆུང་ཆུང་ཕུན་ཚོགས་ལགས་ཀྱིས་རང་གི་ཚེ་སྲོག་སྐྱེས་སུ་ཕུལ་ནས་འཛམ་གླིང་ལ་བདེན་པ་ངོམ་པའི་གནས་ཚུལ་དེ་བྱུང་ཞིང་། ཕུན་ཚོགས་ལགས་ཀྱི་ཕུང་བོ་ཞུགས་འབུལ་ཉིན་གྱི་གྲྭ་མང་དང་མི་མང་གི་སེམས་འཕྲེང་བསྒྲིགས་པའི་པར་རིས་དང་བརྙན་འཕྲིན་ཐུང་ཐུང་ཞིག་ཀྱང་མཇལ་རྒྱུ་བྱུང་།

ཚང་མས་མཐོང་གསལ་གྱི་ཞུགས་འབུལ་བརྙན་འཕྲིན་ཐུང་ཐུང་དེའི་ནང་ནས་དཔའ་བོ་ཁོང་གི་ཡབ་ཡུམ་གཉིས་ཀྱི་བརྙན་རིས་ཀྱང་འཁྱུག་ཙམ་མཐོང་ཐུབ་ལ། སྐབས་དེའི་ཡབ་ཡུམ་གཉིས་ལ་མཚོན་ན། བུ་ཆུང་སྟག་ཕྲུག་འདྲ་ཞིག་ལག་ནས་ཤོར་ན་དེ་ལས་སྡུག་བསྔལ་བའི་ཡུལ་ཞིག་གང་ན་ཡོད་ཀྱང་། སྲུང་མདུད་སྔོ་དམར་རེ་གོན་པའི་ཡབ་ཡུམ་གཉིས་ཀྱིས་ཕྱག་ཟུང་ཐལ་མོར་སྦྱར་ནས་གསོལ་འདེབས་བྱེད་ཀྱིན་པ་ལས། ཕམ་སེམས་ཀྱི་མིག་ཆུ་འབྱིན་གྱིན་མི་འདུག དེའི་རྗེས་ནས་ཁོང་གི་ཕ་རྒན་གྱིས་“ ངས་རང་གི་བུ་ལ་ཡིད་ཆེས་བྱས་པའི་ཚད་ཐིག་ལས་བརྒལ་སོང་། བོད་མི་ས་ཡ་དྲུག་གི་ཆེད་དུ་འདི་ལྟར་འདས་སོང་བར་ང་ཕངས་ཀྱི་མེད” ཅེས་གསུངས་འདུག་པ་ཐོས་ན། ཡིད་འགུལ་མི་ཐེབས་པའི་སྐྱེ་བོ་སུ་ཞིག་ཡོད། དངོས་གནས་བོད་མི་རིགས་ཀྱི་དཔའ་བོ་ཁོང་ལ་ཕ་མ་ཡང་དེ་འདྲ་ཞིག་ལོས་ཡོད་བསམ་པ་བྱུང་། དེ་བས་ཀྱང་ཡིད་སྐྱོ་དགོས་པ་ཞིག་ལ་དཔའ་བོ་ཕུན་ཚོགས་ལགས་ཀྱི་སྤུན་ཆུང་བ་ཡིན་པའི་དཔའ་བོ་ཆུང་ཆུང་བློ་བཟང་སྐལ་བཟང་ལགས་ཀྱིས་ཚེ་སྲོག་སྐྱེས་སུ་ཕུལ་བ་ལམ་ལྷོང་མ་བྱུང་བར་དགྲ་ལག་ཏུ་ཤོར་ནས་ཅི་ཆ་མ་འཚལ་བའི་གནས་ཚུལ་བྱུང་བ་དང་། ཡང་རྗེས་སུ་ཕུན་ཚོགས་ལགས་ཀྱི་གཅེན་པོ་ཡང་དགྲ་བོས་བཙན་ཁྲིད་ཀྱིས་ལོ་ངོ་གསུམ་གྱི་ཁྲིམས་ཐག་བཅད་ཁྲ་བཏང་བ་སོགས་ཀྱིས། ཤུལ་དུ་ལུས་པའི་ཕ་མ་གཉིས་ཀྱི་སྡུག་བསྔལ་དེ་ཅི་འདྲ་ཡིན་མིན་བརྗོད་ག་ལ་དགོས། དེ་ནས་རིམ་པས་རང་གི་ཚེ་སྲོག་སྐྱེས་སུ་འབུལ་མཁན་གྱི་དཔའ་བོ་དཔའ་མོ་མང་བོ་བྱུང་བའི་ཁྲོད་ཀྱི་ཁམས་རྟའུའི་ཨ་ནེ་དཔལ་ལྡན་ཆོས་འཚོའི་དམར་ལྷབ་ལྷུབ་ཀྱི་བརྙན་འཕྲིན་ཐུང་ཐུང་ཞིག་མཇལ་བྱུང་། མེ་ལྕེ་དགུང་ལ་མཆེད་ཀྱང་ད་དུང་གོམ་པ་རེ་རེ་བཞིན་མདུན་དུ་སྤོས་ནས་ཡོང་བཞིན་པའི་དཔའ་མོ་ཁོང་གི་སྙིང་སྟོབས་དེས། ང་རེ་ཞིག་ཧད་དུ་བཅུག་སོང་། ད་དུང་མི་མང་གིས་༸གོང་ས་མཆོག་ལ་གསོལ་འདེབས་དང་བུད་མེད་ཅིག་གིས་ཁ་བཏགས་འཐེན་བཞིན་པའི་བརྙན་འཕྲིན་ཐུང་ངུ་དེར་མཇལ་ན་མིག་ཆུས་བྲང་གཞུང་མི་བརླན་མཁན་སུ་ཡོད་དམ། དེའི་རྗེས་ནས་མགོ་ལོག་གི་སྤྲུལ་སྐུ་བསོད་བྷོའི་འཚིག་ཟིན་པའི་སྐུ་ཕུང་དང་དཔའ་བོའི་རང་མདངས་གསལ་བའི་ཞལ་ཆེམས་སྒྲ་ཐག་ཉན་དུ་ཡོད་པ་སོགས་ཀྱིས་ཉི་མ་རེ་རེ་བཞིན་བཙན་བྱོལ་གྱི་གསར་འགྱུར་བརྒྱུད་ལམ་ཁེབས་ནས་ཡོང་གི་ཡོད་པའི་སྐབས་འདིར་གྲངས་ཀ་རྩི་ཚོད་མེད་པར་གྱུར་ཡོད། ད་དུང་མུ་མཐུད་ནས་འབར་ངེས་པར་བསམ་ན་ཤ་གསེང་ནས་འདར་འོང་བ་ཞིག་མ་རེད་དམ།

ལྷག་དོན་དུ་འདས་པའི་བདུན་ཕྲག་གཅིག་གཉིས་ཤིག་གི་ནང་དུ་རང་ལུས་མཆོད་མེར་ཕུལ་བ་དང་། དམར་གསོད་བཏང་བའི་གྲངས་འབོར་དེ་ལྟོས་ལྟོས་རིག་རིག་ལ་འཕར་སོང་བ་འདིས། ང་ཚོས་བྱང་ཆུབ་སེམས་མཆོག་བཏོན་ནས་བྱང་ཆུབ་ཀྱི་སེམས་རྒྱུད་ལ་སྐྱེས་མེད་པ་དག་སྐྱེས་པར་འགྱུར་བ་དང་སྐྱེས་པ་རྣམས་གོང་དུ་འཕེལ་བའི་ཁ་གཡང་ཙམ་བསྒྲགས་ནས། དགྲ་བོར་ཞེ་སྡང་མི་སྐྱེས་པའི་རྣམ་པ་བསྟན་བསྡད་ན། དངོས་ཡོད་གནས་ཚུལ་དང་དུས་ནམ་ཡང་མཐུན་གྱི་མེད་པའི་ཚོར་བ་ཞིག་བྱུང་། བྱང་ཆུབ་ཀྱི་སེམས་སྐྱེས་ཡོད་པའི་སྐྱེས་བུ་ཞིག་ཡིན་ཚེ་ལོས་ཆོག་མོད། ང་ཚོའི་མི་སེར་ཆ་ཚང་བྱང་ཆུབ་སེམས་དཔའ་འཁྲབ་བསྡད་ན་མི་རིགས་དང་རྒྱལ་ཁབ་སུ་ཞིག་གིས་བསྐྱབ་ནུས་སམ་སྙམ་པའི་ཚོར་བ་ང་གཅིག་བུ་མ་ཡིན་པའི་གང་ཟག་ཐ་མལ་བ་ཚང་མར་སྐྱེས་ཡོད།

དུས་འདི་དང་བསྟུན་ནས་ང་ཚོས་ངེས་པར་དུ་དྲན་འོས་པ་ཞིག་ནི། ལོ་རབས་བརྒྱད་ཅུ་བའི་ནང་ལྷ་སའི་ངོ་རྒོལ་ཁྲོད་འདས་སོང་བའི་དཔའ་བོ་དཔའ་མོ་དག་དང་། དེ་ཡི་ཉེར་ལེན་ལ་བརྟེན་ནས་ཁྲི་མུན་དོང་ལ་ལྷུང་བའི་ཆབ་སྲིད་བཙོན་པ་དག་ཡིན་ལ། དེ་ཡི་རྗེས་ནས་དུས་ཚོད་ངེས་མེད་དུ་བར་སྐོར་གླིང་ནས་སྐད་འབོད་ངོ་རྒོལ་གྱིས་ཁྲིམས་ལ་ཚུད་ཡོད་པའི་བཙོན་པ་དང་བཙོན་ཟུར། ལྷག་པར་དུ་ཉིས་སྟོང་བརྒྱད་ལོར་བོད་ཁྱོན་ཡོངས་ནས་བཞུད་སོང་བའི་དཔའ་བོ་དཔའ་མོ་བརྒྱ་ཕྲག་དུ་མ་དང་ཁྲིམས་དུ་ཚུད་པ་སྟོང་ཕྲག་དུ་མ་དེ་དག་ཡིན། དེ་དག་རེ་རེའི་རྗེས་ཀྱི་ཉམ་ང་བའི་ནང་མི་སྤུན་མཆེད་ཀྱི་སྡུག་བསྔལ་དང་དཀའ་སྡུག་ལ་ང་ཚོས་ངེས་པར་དུ་གདུང་སེམས་མཉམ་སྐྱེད་ཡོད་པའི་སྒོ་ནས་གུས་འདུད་བླ་མེད་ཞུ་དགོས། ང་ཚོར་རིན་ཐང་བྲལ་བའི་ནོར་བུ་ཞིག་ཡོད་པའང་མི་རིགས་དང་རྒྱལ་ཁབ་ཀྱི་ཆེད་དུ་རང་ལུས་སྐྱེས་སུ་ཕུལ་བའི་དཔའ་རྒོད་འདི་དག་ཡིན་འོས་པའི་རིན་ཐང་འཇོག་དགོས། སྐབས་འདིར་བདག་གིས་བརྗོད་འདོད་པ་ནི། གཞིས་ལུས་སྤུན་ཟླ་རྣམས་ཀྱིས་འདི་ལྟར་རང་གི་ཚེ་སྲོག་སྐྱེས་སུ་ཕུལ་བའི་སྐབས་འདིར། རང་རེའི་སྤྱི་ཚོགས་ཁྲོད་རང་གི་ཚེ་སྲོག་རྩེད་སྤྱད་བྱས་པ་རེད་ཟེར་བ་དང་།  ད་དུང་འདི་ནི་འཚེ་བ་རེད་ཟེར་བ། འདི་ལྟར་ཤི་ན་ཕན་མི་ཐོག་པར་འདོད་པ་སོགས་མང་བོ་ཞིག་ཡོང་གི་འདུག་ཀྱང་། འདི་ལས་ལྷག་པའི་གཟི་བརྗིད་ལྡན་པ་ཞིག་གང་ན་ཡོད། འདི་འདྲའི་དཔའ་བོས་འདི་འདྲའི་ལས་འགུལ་སྤེལ་བའི་གཟི་བརྗིད་ནི་དུས་དང་རྣམ་པ་ཀུན་ཏུ་ཉམས་པ་ག་ལ་ཡོད།

༢༠༡༢ ༢ ༡༩ ལ་བྲིས།