བསྟན་འཛིན་ཟླ་བ།
དེ་རིང་ནི་བོད་ཆུ་འབྲུག་གི་གནམ་ལོ་གསར་བ་རེད་ལ། གནམ་ལོ་གསར་བ་ཚེས་དུས་ནམ་རྒྱུན་མི་རྣམས་ཀྱིས་ནང་མི་ལྷན་འཛོམས་བྱེད་ཅིང་། ཟས་དང་གོས་གསར་གྱོན་པ་མ་ཟད། གླུ་དང་གར་ལ་རོལ་ནས་སྤྲོ་སྐྱིད་ཀྱི་དགོད་སྒྲ་ལྷང་ལྷང་བྱེད་པ་ཞིག་ཡིན་པས། རང་ཉིད་ལ་མཚོན་ནའང་བཙན་བྱོལ་གྱི་གནས་བབ་ཅི་འདྲ་ཞིག་སྐྱོ་ཡང་སྐོམ་ཆུ་མངར་མོ་སྐོར་ཞིག་དང་། ཀ་ར་སིལ་ཏོག་འགའ་ཞིག་གིས་གནམ་ལོ་གསར་བ་རྟགས་དང་རྟེན་འབྲེལ་གྱིས་བསུས་ནས་དགའ་སྐྱིད་ཀྱི་རྣམ་པ་བཏོད་མྱོང་། ཡིན་ནའང་དེ་རིང་ནི་གཞན་ཞིག་སྟེ། དཔའ་བོ་མང་བོ་ཞིག་གིས་མེ་རྒོལ་བྱས་སོང་ལ། སྤུན་ཟླ་མི་ཉུང་བ་ཞིག་དམར་གསོད་བཏང་སོང་། དེ་བས་ཕྱིའི་སྤྲོ་སྐྱིད་ཀྱི་རྣམ་པ་ཕར་ཟད། ནང་གི་རྟགས་དང་རྟེན་འབྲེལ་བསྒྲིག་རྒྱུ་ཡང་མཚམས་འཇོག་བྱས་ཏེ་སྡུག་འདུག་ནག་ཙར་ཙར་འདིས་ཆུ་འབྲུག་ལོ་སར་བསུས་ཡོད་ལ། ཆུ་འབྲུག་ལོ་སར་འདི་མྱ་ངན་གྱིས་མྱོང་གི་ཡོད།
བོད་ལྗོངས་ཆོལ་ཁ་གསུམ་དུ་གྲགས་པའི་གངས་ཅན་པའི་གནམ་ས་གཉིས་ཀ་དྲག་པོའི་དམག་མཚོན་གྱིས་མནན་ཅིང་། རྒྱལ་ཁབ་དང་ཚོགས་སྡེ་རུ་གྲགས་པ་ཐམས་ཅད་བསླུ་བ་རྒྱུ་ཡིས་བཏུལ་ཏེ་རང་དབང་དང་བདེན་པའི་འབོད་སྒྲ་ཆེས་ཉམ་ཆུང་བའི་མི་ནག་གི་ལོ་ཟླ་འདི་དག་གི་ནང་ཐུ་བྷོད་བཙན་པོའི་སྙིང་སྟོབས་གསེར་ཡིག་གིས་འབྲི་མཁན་གྱི་བཙན་པོའི་བུ་རྒྱུད་འདི་ཚོར། དལ་བརྒྱད་འབྱོར་བཅུ་ཚང་བའི་མི་ལུས་རིན་པོ་ཆེ་མེ་ལ་བསྲེགས་ནས་རྒྱ་ནག་གཞུང་གི་དྲང་བདེན་མིན་པའི་སྲིད་ཇུས་ལ་ངོ་རྒོལ་གནང་མཁན་གྱི་བོད་པ་མེ་རྒོལ་བ་འདི་ཚོར། དྲང་བ་དང་བདེན་པའི་དོན་དུ་ཐ་ན་གཅེས་པའི་ཚེ་སྲོག་གིས་ཀྱང་རྒོལ་ཐུབ་ཅིང་། གནས་བབ་ཅི་འདྲ་ཞིག་གི་འོག་ཡིན་རུང་གཞན་ལ་མགོ་མི་བསྒུར་བའི་ཐུ་བྷོད་བཙན་པོའི་སྙིང་སྟོབས་དང་། ལ་ཕན་མ་ཐོགས་ཀྱང་གནོད་མི་སྐྱེལ་བའི་སྙིང་རྗེ་རྩ་བ་ཅན་གྱི་བསྟན་པའི་ཞག་རྩིས་བརླན་ཏེ་སྡུག་དང་གདུང་བ་ཐམས་ཅད་རང་སྟེང་དུ་ལེན་པའི་བློས་བཏོང་བ་འདི་ཚོར། འཛམ་གླིང་གི་འཚེ་མེད་ཞི་བའི་ལས་འགུལ་སྤྱི་དང་། བྱེ་བྲག་བོད་གངས་ཅན་པའི་མི་ལོ་ལྔ་བཅུ་ལྷག་རིང་གི་རང་དབང་བསྐྱར་གསོའི་ལས་འགུལ་ཁྲོད་ཀྱི་ཚད་མཐོ་ཤོས་དང་ནུས་པ་ཆེ་ཤོས་གནང་མཁན་གྱི་གདོང་མཆོང་བ་འདི་ཚོར། རང་དབང་དང་འདྲ་མཉམ། འགྲོ་བ་མིའི་ཐོབ་ཐང་སོགས་བོད་མི་སྤྱི་ལ་མཁོ་ཡང་། རྒྱ་གུང་ཁྲན་གྱི་སྐྱོབ་གསོ་དང་བྱ་དགའ། འཛུགས་སྐྲུན་སོགས་ལ་ཞེ་རྩ་བཅོལ་ནས་སྐྱིད་ཉལ་རྒྱག་ཆོག་ཀྱང་། དད་དམ་བརྟན་པོ་དང་རེ་བ་གསོན་པོའི་ཁ་ཆེམས་འཇོག་མཁན་གྱི་བོད་པ་ཆོས་དད་པ་འདི་ཚོར། རྒྱ་གུང་ཁྲན་གྱི་གཞུང་གི་གཡོ་སྒྱུ་དང་། དེའི་རྗེས་འབྲང་གི་མཁས་པའི་མགོ་སྐོར། དེས་སྟངས་འཛིན་འོག་གི་གསར་ལམ་གྱི་རྫུན་ཚིག་སོགས་སླུ་བྱེད་དང་འཁྲུལ་བྱེད་ཀྱི་ཐབས་བཀོད་བརྒྱ་ཕྲག་མང་བོའི་སྣེ་ནས་རིན་ཆེན་མི་ལུས་ལ་རྣམ་དཔྱོད་དང་ཤེས་རབ་ཀྱི་མེ་ལྕེ་སྦར་མཁན་འདི་ཚོར། སེམས་བསམ་པའི་གཏིང་ནས་དང་། ཤ་རུས་པའི་གསེང་ནས་མྱ་ངན་དང་གུས་འདུད་ཞུ་རྒྱུ་ཡིན་ལ། བོད་ཆུ་འབྲུག་གནམ་ལོ་གསར་བ་འདི། འདི་ལྟར་གདུང་བའི་ངག་དང་སྐྱོ་བའི་སེམས་ཀྱིས་སྲུང་བརྩི་ཞུ་རྒྱུ་ཡིན།
ལོ་སར་མ་བཏང་ན་རིག་གཞུང་ཉམས་འགྲོ་བར་བཤད་མཁན་ཚོ་དང་། ལོ་སར་སྐབས་སྲིད་ཕྱོགས་ཀྱི་ལོ་སར་བྱེད་སྒོ་མི་སྤེལ་རྒྱུ་དང་། ཆོས་ཕྱོགས་ཀྱི་བྱེད་སྒོ་ཁག་སྤེལ་དགོས་པར་བཀའ་མོལ་གནང་མཁན་གྱི་ཁ་སྤུ་དང་འགྲམ་སྤུ་འདྲེས་པའི་སྐད་ཆ་འདི་ཚོ། ད་བར་རང་རེའི་བོད་པ་ཚང་གིས་ཆོས་དང་སྲིད་གཉིས་བསྲེས་བསྲེས་པའི་གོམས་གཤིས་ཤིག་ཡིན་པ་འདྲ། ད་ནི་ཐམས་ཅད་མཁྱེན་པས་ཆོས་དང་སྲིད་གཉིས་སོ་སོར་ཕྱེ་གནང་མཛད་ཡོད། ང་ཚོས་དེ་ལག་ལེན་ལ་བསྟར་ཏེ་དེང་རབས་དམངས་གཙོའི་འགྲོ་སྟངས་ཤིག་ཨེ་ཆགས་བལྟ་དགོས་པ་ལས། གོག་མ་ལངས་དང་། གཉིད་མ་སད་ལྟ་བུའི་བཏང་སྙོམས་ཀྱི་ཚོར་བ་དེ་ཚོ་བསྟེན་པའི་དུས་ཚོད་ཅིག་གཏན་ནས་མ་ཡིན་སྙམ།
ཞིབ་ཏུ་བསམ་ན་མི་ལོ་ལྔ་བཅུའི་རིང་བཀག་འགོག་བྱས་བསྡད་པའི་བོད་པའི་རིག་གཞུང་དེ་ཚོ་ཉམས་ཀྱི་མེད་ན། ལོ་རེ་གཉིས་ཀྱི་ལོ་སར་མ་བཏང་བས་ལོ་སར་གྱི་རིག་གཞུང་ཉམས་འགྲོ་བའི་ཐུགས་ཁྲལ་དེ་ཙམ་གནང་མི་དགོས་པར་འདོད་ལ། སྟོན་པ་ཤཱཀྱ་ཐུབ་པས་ཆོས་ཕྱོགས་ཀྱི་ལོ་སར་གཏོང་དགོས་པའི་བཀའ་བསྩལ་དེ་འདྲ་མཐོང་རྒྱུ་མི་འདུག་ཅིང་། རྗེ་ཙོང་ཁ་བ་ཞུ་བ་དེས་ལོ་སར་ཏག་ཏག་བཏང་བས་མཁས་རྟགས་བཞག་པའང་ཡིན་རྒྱུ་མ་རེད་འདོད། དེ་བས་འགྲེལ་བཤད་དང་ཞིབ་ཆ་ཅི་ཡང་མི་དགོས་པར་ལོ་སར་མི་གཏོང་རྒྱུ་འདི་ག་རང་ཡིན་པར་སྙམ།
ད་བར་སྤུན་ཟླ་མེ་རྒོལ་བ་ཉི་ཤུ་རྩ་གྲངས་ཤིག་གིས་སྐུ་ལུས་མཆོད་མེ་རུ་ཕུལ་སོང་ལ། ཉེས་མེད་འགའ་ཞིག་དམར་གསོད་བཏང་སོང་། དེ་བཞིན་དུ་དེ་ལས་མང་བ་ཞིག་ལ་མནར་གཅོད་བྱས་སོང་། རྒྱུ་མཚན་འདི་དག་ལ་བསམ་ནས་ལོ་སར་མི་གཏོང་རྒྱུ་འདི་མྱ་ངན་ཞིག་དང་རྗེས་དྲན་ཞིག་ཡིན་ལ། མྱ་ངན་དང་རྗེས་དྲན་འདི་ལས་འགུལ་ཞིག་ཆགས་ཡོད། དེར་བརྟེན་ལས་འགུལ་འདི་ཚོའི་ཆ་ཤས་རེ་ལེན་ཐུབ་ན་ང་ལྟ་བུས་ལས་འགུལ་ཆེན་པོ་མི་འཇོན་མཁན་ཚོས་ཀྱང་བོད་མིའི་རང་དབང་འཐབ་རྩོད་ཀྱི་གོ་རིམ་ཧྲིལ་བོའི་ནང་ཞལ་འདེབས་ཤིག་ཚོད་ཙམ་འབུལ་རྒྱུ་བྱུང་བ་ཡིན་པས་རང་ཉིད་བོད་མི་ཞིག་ཏུ་སྐྱེས་པའི་དོན་གོ་ཅུང་ཟད་རེ་ཆོད་པ་འདྲ།
རྒྱ་གུང་ཁྲན་གྱིས་མེ་རྒོལ་ལས་འགུལ་འདི་དྲག་སྤྱོད་རེད་ཟེར་ནས་གནོན་ཐབས་བྱེད་ཀྱི་ཡོད་ལ། རྒྱའི་མཁས་པ་འགའ་རེས་ལས་འགུལ་འདི་ལ་གྲུབ་འབྲས་མེད་ཟེར་ནས་འགོག་ཐབས་བྱེད་ཀྱི་ཡོད། ཡིན་རྒྱུ་ཡིན་ནི་གཡོ་སྒྱུ་ཆེ་བའི་རྒྱ་གཞུང་འདི་ཅི་བྱ་གཏོལ་མེད་ལ་གཏད་ཀྱི་ཡོད་པས། རྒྱལ་སྤྱིའི་སྤྱི་ཚོགས་རྨོངས་སུ་འཇུག་གི་ཡོད་ལ། བོད་མི་རིགས་ལ་མགོ་སྐོར་གཏོང་གི་ཡོད། རང་རེ་བཙན་བྱོལ་ནང་དུའང་མི་རེ་གཉིས་ཀྱིས་ལས་འགུལ་འདི་ལ་ཕན་ཐོགས་ཆུང་ཚུལ་དང་། ཐབས་ལམ་གཞན་འཚོལ་དགོས་ཚུལ་སོགས་ཀྱི་བཀའ་མོལ་གནང་མཁན་ཡོད་མོད། མ་གཞི་ནས་ལས་འགུལ་འདི་བཙན་བྱོལ་བས་ཕར་སྐུལ་སློང་བྱས་པ་ཞིག་མིན་པར་གཞིས་བཞུགས་དཔའ་བོ་དཔའ་མོ་ཚོ་རང་གིས་བདམས་པ་ཞིག་ཡིན་པས་ང་ཚོས་འདི་བྱོས་དེ་བྱོས་ཟེར་རྒྱུའི་ཐོབ་ཐང་གཏན་ནས་མེད་སྙམ། དེར་མ་ཟད་བརྩེ་བ་དང་དུང་ཞེན་གྱི་ཐོག་ནས་བལྟས་ན་རང་ལུས་མེ་བསྲེགས་བཏང་ན་དགེ་མཚན་ཡོད་པའི་བསམ་འཆར་ཙམ་ཡང་ཞུ་ཐུབ་མཁན་གྱི་སྙིང་ཁམས་ལྕགས་ལས་གྲུབ་པ་ཞིག་ཀྱང་ཕལ་ཆེར་ཡོད་རྒྱུ་མ་རེད་བསམ།
ཉེ་ཆར་གསར་ལམ་ཁག་ཏུ་ཐོན་གསལ་ལ་ཕྱི་རྒྱལ་གསར་འགོད་པ་ཞིག་གིས་བོད་ནང་གི་གྲྭ་བ་ཞིག་ལ་རང་ལུས་མེ་སྲེག་གི་ལས་འགུལ་འདི་ཏཱ་ལའི་བླ་མས་སྐུལ་སློང་བྱས་པ་ཞིག་ཡིན་མིན་དྲིས་ཚེ་གྲྭ་བ་དེས།”ལས་འགུལ་འདི་ཏཱ་ལའི་བླ་མས་སྐུལ་སློང་བྱས་པ་ཞིག་མ་རེད། གལ་སྲིད་ཏཱ་མའི་བླ་མས་སྐུལ་སློང་བྱས་པ་ཞིག་ཡིན་ན་བོད་མི་རེ་གཉིས་ཙམ་མ་ཡིན་པར་ང་ཚོ་ཚང་མས་རང་ལུས་མེ་བསྲེགས་གཏོང་གི་རེད་”ཟེར།འདིས་ཅི་ཞིག་མཚོན་གྱི་ཡོད་དམ། གང་ལྟར་ཁོང་ཚོས་རང་ལུས་མེར་བསྲེགས་ཀྱི་ལས་འགུལ་སྤེལ་ཟིན་པ་ཞིག་ལ་གཞི་ནས་དེ་འགྲིག་གི་ཡོད་མེད་ཀྱི་གླེང་སློང་གནང་མཁན་ཚོ་ནི་དངོས་གནས་རུས་པའི་ནང་ན་རྐང་ཡོད་མེད་ཐེ་ཚོམ་གྱི་གཞིར་གྱུར་ཡོད། དེ་བས་རང་ཉིད་ཐུ་བྷོད་ཀྱི་རིགས་རྒྱུད་འདི་ལ་གཏོགས་ཕྱིར་རླབས་ཆེ་བའི་དཔའ་བོ་འདི་ཚོས་ང་ཚོའི་མཐོང་ལམ་ཡངས་པོར་འབྱེད་ཀྱི་ཡོད་པ་དང་། ང་ཚོའི་མདུན་ལམ་རྒྱ་ཆེ་རུ་གཏོང་གི་ཡོད་པ་འདི་ཤེས་གལ་ཆེ་བར་སྙམ།
རྒྱའི་གནའ་བོའི་གློག་བརྙན་དག་ན་མེ་རྒོལ་རུ་ཁག་དང་འཇབ་རྒོལ་རུ་ཁག་ཟེར་བ་ལྟ་བུའི་ཐ་སྙད་འདུག
ཆུ་ངོགས་གཏམ་རྒྱུད་དུའང་མཚན་མོ་འཇབ་རྒོལ་སྐབས་སུ་དམག་སྒར་དང་མཁར་རྫོང་ཡོད་ཚད་མེ་རུ་ལ་མེ་ཞགས་བརྒྱབས་ཏེ་མེར་བསྲེགས་བྱས་པ་ལྟ་བུ་ལ་མེ་རྒོལ་རུ་ཁག་ཅེ་ན་འགྲིག་གི་སྙམ།
བསྟན་འཛིན་ཟླ་བ་ལགས་ཀྱི་རྩོམ་ཡིག་འདི་ལ་མཆན་བུ་འདེབས་མཁན་གཅིག་ཀྱང་བྱུང་མ་སོང་ང་། སྤྱིར་ཁྱོད་ཀྱི་བསམ་ཚུལ་ལ་ཞུ་རྒྱུ་ཅང་མེད། འོན་ཀྱང་ཐ་སྙད་ཅིག་གི་བེད་སྤྱོད་དང་དོན་སྟོན་སྟངས་ལ་བསམ་ཚུལ་ཞིག་ཞུ་འདོད། དེ་ནི་༼མེ་རྒོལ་༽ཞེས་པ་འདི་རེད། འདི་ལ་༼རང་ལུས་མེར་སྲེག་༽གམ་༼རང་ལུས་མེར་སྲེག་གི་ངོ་རྒོལ༽་འདྲ་ཞིག་ཅིས་ཀྱང་ཟེར་དགོས་སྙམ། དེ་མིན་༼མེ་རྒོལ་༽ཞེས་ན་ཚིག་འདིའི་བསྟན་དོན་གཞན་དུ་གོ་སླ་བར་འགྱུར། དཔེར་ན། ལག་ཏུ་མེ་ཞགས་བཟུང་ནས་ངོ་རྒོལ་བྱས་པ་ལྟ་བུ། དེང་སང་ཤེལ་དམ་ནང་དུ་སྣུམ་དང་རས་སྦྱར་ཏེ་མེ་བསྒྲོན་ནས་གང་སར་གཡུག་སྟེ་མེ་འབར་དུ་འཇུག་པ་ལྟ་བུ་ཡང་མེ་རྒོལ་རེད་མོད། ང་ཚོའི་བོད་མི་ཚོས་ངོ་རྒོལ་བྱེད་སྟངས་དེ་དེ་ཙམ་མིན་པར་རང་གི་གཅེས་པའི་ལུས་དང་སྲོག་ཀྱང་ཕངས་མེད་དུ་བཏང་སྟེ་རང་ལུས་མེ་རུ་བསྒྲོན་ནས་ཞི་བའི་ངོ་རྒོལ་གྱི་རྣམ་པ་བསྟན་པས་ན། འདི་ན་༼མེ་རྒོལ་༽ཞེས་པའི་ཐ་སྙད་སྦྱར་ན་འགྲིག་གི་མི་འདུག་སྙམ་པ་བསམ་ཚུལ་ཡིན། གཞན་དུ་ན་༼མེ་རྒོལ་༽ཞེས་པའི་ཐ་སྙད་འདི་སྐད་རིགས་དང་ཡིག་རིགས་གཞན་ནས་བོད་བསྒྱུར་བྱས་པའང་ཡིན་སྲིད་མོད། གང་ལྟར་ཐ་སྙད་འདི་བོད་ཡིག་ནང་དུ་བྲིས་ན་ཡག་པོ་རང་མཐོང་མ་སོང་ལགས།