དེ་རིང་ལོ་གསར་ཚེས་གཅིག་ཉིན་༸གོང་ས་མཆོག་དབུ་བཞུགས་ཐོག་བཞུགས་སྒར་མི་མང་གིས་ལོ་སར་ཉིན་གྱི་ཆོས་ཕྱོགས་བྱེད་སྒོ་ཁག་སྲུང་བརྩི་དང་། བོད་ནང་གི་བོད་མི་ཚོར་གདུང་སེམས་མཉམ་སྐྱེད་ཆེད་བོད་མི་མང་སྤྱི་འཐུས་ལྷན་ཚོགས་ཀྱི་སྣེ་འཁྲིད་པའི་ཟས་བཅད་ལས་འགུལ་ནང་མཉམ་ཞུགས་གནང་ཡོད།
དེ་རིང་ཕྱི་ཟླ་ ༢ པའི་ཚེས་ ༢༢ སྟེ། བོད་རྒྱལ་ལོ་ ༢༡༣༩ རབ་གནས་ཆུ་འབྲུག་ལོའི་ལོ་སར་ཚེ་ ༡ ཉིན་གྱི་ཞོགས་པའི་ཆུ་ཚོད་ ༧ པའི་ཐོག་༸གོང་ས་མཆོག་བཞུགས་སྒར་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་གི་ཡང་སྟེང་དུ་ཆིབས་བསྒྱུར་གྱིས། དཔལ་ལྡན་འདོད་ཁམས་དབང་ཕྱུག་མའི་ཚེས་གཏོར་རྟེན་འབུལ་དང་སྙན་ཤལ་སྒྲོན་འབུལ། རྣམ་རྒྱལ་གྲྭ་ཚང་གི་མཁན་རིན་པོ་ཆེ་མཆོག་ནས་༸གོང་ས་མཆོག་ལ་མཎྜལ་རྟེན་གསུམ་འདེགས་འབུལ་བཅས་གནང་བ་དང་། ཆུ་ཚོད་ ༨ པའི་ཐོག་༸གོང་ས་མཆོག་གཙུག་ལག་ཁང་གི་ཚོམས་ཆེན་ནང་ཆིབས་བསྒྱུར་དབུ་བཞུགས་ཐོག རྣམ་རྒྱལ་གྲྭ་ཚང་གི་དགེ་འདུན་པ་རྣམས་ནས་སྐྱབས་སེམས་དང་མཆོག་གསུམ་ཤིས་བརྗོད། བསྟན་འབར་མ། རིས་མེད་བསྟན་རྒྱས་སྨོན་ལམ་བཅས་གསུང་ཞིང་། དེའི་རྗེས་ཁྲིམས་ཞིབ་པ་ཆེ་བ་དང་བོད་མི་མང་སྤྱི་འཐུས་ཚོགས་གཙོ། བཀའ་བློན་ཁྲི་པའི་སྐུ་ཚབ་བཅས་ནས་མཎྜལ་རྟེན་གསུམ་འདེགས་འབུལ་དང་། ༸གོང་ས་མཆོག་གིས་དམངས་གཙོ་ཀ་བ་གསུམ་གྱི་མཛད་གཙོ་རྣམ་པ་དང་སྤྱི་འཐུས་རྣམ་པ། ལས་ཁུངས་ཁག་གི་དྲུང་ཆེ་དང་ཟུང་དྲུང་ཡན། རྒྱ་གར་གཞུང་གི་སྣེ་ཤན་སྐུ་ཚབ། ཚོགས་ལངས་པ་གཉིས་བཅས་ལ་མཇལ་ཁ་གནང་སྟེ། ལོ་གསར་ཉིན་གྱི་ཆོས་ཕྱོགས་ཀྱི་མཛད་སྒོ་གྲུབ་རྗེས་ཕྱིར་བཞུགས་སྒར་ཕོ་བྲང་དུ་ཞབས་སོར་བཀོད་ཡོད།
ལོ་སར་གྱི་གཞུང་འབྲེལ་མཛད་སྒོ་གྲུབ་རྗེས་བོད་མི་མང་སྤྱི་འཐུས་ལྷན་ཚོགས་ཀྱིས་གོ་སྒྲིག་འོག བོད་ནང་རང་ལུས་མེར་སྲེག་གི་ལས་འགུལ་དང་། རྒྱ་ལོའི་ལོ་གསར་སྐབས་ཞི་རྒོལ་བ་མེ་མདས་རྐྱེན་ལམ་དུ་བཏང་བ་རྣམས་ལ་གདུང་སེམས་མཉམ་སྐྱེད་ཀྱི་ཟས་བཅད་ལས་འགུལ་དབུ་འཛུགས་གནང་སོང་། ལས་འགུལ་ཐོག་དབུས་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཆེ་བ་མཆོག་དང་། བཀའ་བློན་ཁྲི་ཚབ་ནང་སྲིད་བཀའ་བློན་མཆོག བདེ་སྲུང་བཀའ་བློན་མཆོག སྤྱི་འཐུས་ཚོགས་གཙོ་གཞོན་གཉིས་གཙོས་པའི་སྤྱི་འཐུས་རྣམས། ལས་ཁུངས་ཁག་གི་དྲུང་ཆེ། གཞུང་འབྲེལ་མིན་པའི་ཚོགས་པ་ཁག་གི་ཚོགས་མི་དང་སེར་སྐྱ་མི་མང་བཅས་མཉམ་ཞུགས་པ་ཡོངས་སྐུ་བཞེངས་ཐོག་བོད་རྒྱལ་ཁབ་ཆེན་མོའི་རྒྱལ་གླུ་བླངས་བ་དང་། འདས་གྲོངས་སུ་གྱུར་བའི་རྒྱལ་གཅེས་དཔའ་བོ་དཔའ་མོ་རྣམས་ལ་ངག་བཅད་མྱ་ངན་གནང་རྗེས།
སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་བོད་ནང་གི་ཛ་དྲག་གི་གནས་སྟངས་ངོ་སྤྲོད་དང་སྤྲགས། བོད་ནང་རང་ལུས་མེར་བསྲེགས་བཏང་བ་དང་མེ་མདའ་བརྒྱབ་ཏེ་འདས་གྲོངས་སུ་གྱུར་བ་རྣམས་དང་། རང་ལུས་མེར་བསྲེགས་བཏང་རྗེས་གར་ཡོད་མི་ཤེས་པ་རྣམས་ཀྱི་ནང་མི་སྤུན་མཆེད་རྣམས་ལ། ང་ཚོ་བཙན་བྱོལ་ནང་ཡོད་པའི་བོད་མི་ཚོས་གདུང་སེམས་མཉམ་སྐྱེད་བྱེད་ཀྱི་ཡོད་ལ། ཁྱེད་རང་ཚོའི་ལས་འགུལ་འཕྲོ་བརླག་མི་འགྲོ་ཆེད་གང་ཐུབ་ཐུབ་བྱེད་ཀྱིན་ཡིན་ཞེས་དམ་བཅའ་ཡོད། ཁྱེད་རང་ཚོའི་ངོས་ནས་ཀྱང་སེམས་ཤུགས་མ་ཆག་པར་འདུག་རྒྱུ་དང་། རང་སྲོག་བློས་གཏོང་བྱས་མཁན་རྣམས་ཀྱི་ཚོར་སྣང་ག་འདྲ་ཞིག་གི་ཐོག་བློས་གཏོང་བྱས་པ་དེ་ང་ཚོས་ཚོར་ཐུབ་ཀྱི་ཡོད། ཁྱེད་རང་ཚོས་ཚིག་ཁ་ཤས་བཤད་པ་ཙམ་གྱི་ཚེ་སྲོག་ལ་ཉེན་ཁ་ཡོད་པའི་གནས་སྟངས་འོག་ལྷག་ཡོད། སྤྱིར་ལོ་གསར་བའི་ནང་དགའ་སྤྲོའི་འཚམས་འདྲི་བྱེད་དགོས་པའི་གནས་སྟངས་ཡིན་ཡང་། ༢༠༡༢ ལོར་བོད་པའི་གནད་དོན་དེ་རྒྱལ་སྤྱིའི་ཐོག་བཟང་ཕྱོགས་ཀྱི་འགྱུར་བ་ཆེན་པོ་ཞིག་འགྲོ་ཐུབ་པའི་རེ་བ་དང་སྨོན་ལམ་ཡོད་ལ། རེ་བ་དེ་འགྲུབ་པར་བོད་ཕྱི་ནང་གཉིས་ཀྱི་བོད་མི་ཚང་མས་འབད་བརྩོན་ལྷོད་མེད་གནང་དགོས་པ་རེད། “ ཅེས་བརྗོད་བྱུང་བར་མ་ཟད། རྒྱལ་སྤྱིའི་སྤྱི་ཚོགས་ལ། “ ཉེ་ལམ་རྒྱལ་སྤྱིའི་གསར་འགོད་མཐུན་ཚོགས་ཀྱིས་བོད་ནང་གི་གནས་སྟངས་ཐད་རྒྱ་ནག་གཞུང་ལ་ངོ་རྒོལ་ཡི་གེ་བཏང་ཡོད་པ་ལྟར། མ་འོངས་པར་མུ་མཐུད་འབད་བརྩོན་གནང་དགོས་པ་རེད། རྒྱལ་ཁབ་ཀྱི་དབུ་ཁྲིད་ཚོར་མཚོན་ནའང་། བོད་ནང་གི་གནས་ཚུལ་དེ་བཤད་དགོས་པ་རེད་བསམ་གྱི་འདུག ཁུ་སིམ་པོར་ག་ཚོད་བསྡད་ཀྱང་རྒྱ་གཞུང་གིས་མཐོང་ཆུང་གཏོང་གི་རེད་མ་གཏོགས། བརྩི་འཇོག་མེད་པ་གསལ་བོ་རེད། རྒྱ་ནག་གཞུང་ལ་མ་བཤད་པར་སོ་སོའི་ལུང་པ་གཅིག་པུའི་ཁེ་ཕན་སྲུང་སྐྱོབ་བྱས་བསྡད་དེ། ནུབ་ཕྱོགས་རང་དབང་ལུང་པར་ནམ་རྒྱུན་བརྩི་མཐོང་བྱེད་ཀྱིན་པའི་དམངས་གཙོའི་འགྲོ་ལུགས་དང་གཞི་རིམ་གྱི་ཐོབ་ཐང་། དྲང་བདེན། འདྲ་མཉམ། མིའི་ཆེ་མཐོང་སོགས་ཀྱི་ཐད་དཀའ་ངལ་མྱོང་བསྡད་པའི་རིགས་ལ་རོགས་པ་མ་བྱས་པ་ཡིན་ན། མིའི་ཚེ་སྲོག་ལ་རིན་ཐང་མེད་པའི་རྣམ་འགྱུར་ཤུགས་ཆེར་བསླེབས་ཡོང་གི་ཡོད་པ་རེད། དེར་བརྟེན། འཛམ་གླིང་གི་དབུ་ཁྲིད་ཚོས་བོད་པའི་དཀའ་རྙོག་དེ་དཀའ་རྙོག་ཆེན་པོ་ཞིག་དང་གནད་འགག་ཆེན་པོ་ཞིག་ཡིན་པའི་ངོས་འཛིན་ཐོག ༸གོང་ས་མཆོག་སྐུ་འཚོ་བཞུགས་ཀྱི་སྐབས་འདིར་དོ་སྣང་ཤུགས་ཆེར་གནང་དགོས། “ ཞེས་འབོད་སྐུལ་གནང་སོང་།
བོད་མི་མང་སྤྱི་འཐུས་ལྷན་ཚོགས་ཀྱིས་བོད་ནང་ཛ་དྲག་གི་གནས་སྟངས་རིམ་པ་བྱུང་བའི་ཐད་རྒྱ་ནག་གཞུང་དང་རྒྱལ་སྤྱིའི་སྤྱི་ཚོགས་བཅས་ལ་འབོད་སྐུལ་དང་གསལ་བསྒྲགས། ཉེ་ཆར་ལྡི་ལིར་ཡོད་པའི་རྒྱལ་ཁབ་ཁག་གི་གཞུང་ཚབ་མི་སྣར་ཐུག་འཕྲད་ཀྱིས་སྙ་ཞུ་དང་། རྒྱ་ནག་གི་སྲིད་འཛིན་ཧུའུ་ལ་ཡོངས་བསྒྲགས་སྙན་ཞུ་རིམ་པར་ཕུལ་ཡོད་པ་མ་ཟད། དེ་རིང་དོན་ཚན་ ༧ ཅན་གྱི་དགོས་འདུན་ཞིག་བཏོན་ཡོད་ལ། དེའི་ནང་། ༡༽ དམག་དཔུང་ཕོན་ཆེ་བསྐྱར་སྣོན་བྱས་པ་རྣམས་འཕྲལ་དུ་ཕྱིར་འཐེན་གྱིས་ཛ་དྲག་གནས་སྟངས་འགྲིག་འཇགས་དང་བོད་མིའི་མངོན་འདོད་ལ་བསམ་གཞིགས་ཀྱི་བྱེད་ཐབས་ལག་བསྟར་ བྱེད་དགོས། ༢༽ དངོས་ཡོད་གནས་ཚུལ་རྟོག་ཞིབ་ཆེད་ཕྱོགས་ལྷུང་མེད་པའི་རང་དབང་ཅན་གྱི་སྐུ་ཚབ་ བོད་ནང་གཏོང་དགོས་པ་དང། གལ་ཏེ་དེ་ལྟར་བྱ་རྒྱུར་དཀའ་ངལ་འཕྲད་ཚེ་དངོས་ཡོད་གནས་ཚུལ་འཚོལ་ཞིབ་ཆེད་བོད་ མིའི་སྐུ་ཚབ་གཏོང་དགོས། ༣༽ བོད་མི་རིགས་ཀྱི་ངོ་བོ་རྩ་མེད་འགྲོ་རྒྱུའི་སྲིད་བྱུས་དང་བྱེད་ཐབས་མཚམས་ འཇོག་བྱས་ཏེ་བོད་མིར་ཆོས་དད་རང་དབང་སྤྲོད་རྒྱུ་དང་ཞི་འགྲིག་གི་ཐབས་ལམ་ བསྟེན་དགོས་པ་དང། བོད་མིའི་སེམས་ཚོར་ལ་དོ་ཕོག་གཏོང་བའི་བྱ་སྤྱོད་འགོག་ཐབས་བྱེད་དགོས། ༤༽ བོད་མི་འབྲོག་པ་རྣམས་ས་གནས་གཅིག་ཏུ་བཙན་སྡོད་བྱེད་དུ་འཇུག་པ་དེ་དག་མཚམས་ འཇོག་གིས་འབྲོག་པ་ཚོའི་ཕ་མེས་ནས་བརྒྱུད་པའི་ཁོར་ཡུག་གི་གོ་རྟོགས་དེ་བཞིན་ བོད་ཀྱི་ཁོར་ཡུག་སྲུང་སྐྱོབ་ཀྱི་ལས་གཞི་ལག་བསྟར་བྱ་རྒྱུའི་ཆ་ཤས་སུ་ངེས་པར་ དུ་མཉམ་ཞུགས་བྱེད་དུ་འཇུག་དགོས། ༥༽ བོད་ནང་འཛུགས་སྐྲུན་གྱི་ལས་གཞི་ཅི་འདྲ་ཞིག་ལག་བསྟར་བྱེད་སྐབས་མཐོ་སྒང་བོད་ ཀྱི་ཁོར་ཡུག་འཇིག་ཉེན་ཆེ་བ་དེར་ངེས་པར་དུ་བསམ་གཞིགས་ཐོག་ས་གནས་བོད་རིགས་ ཚོར་ཁེ་ཕན་ཡོད་པ་བྱེད་དགོས། ༦༽ པཎ་ཆེན་ཆུང་སྲིད་རིན་པོ་ཆེ་མཆོག་གིས་གཙོས་ཆབ་སྲིད་བཙོན་པ་རྣམས་འཕྲལ་མར་ གློད་བཀྲོལ་བཏང་སྟེ་འབར་མའི་སྲིད་གཞུང་ལྟར་གཞུང་དང་མང་ཚོགས་དབར་ཡིད་ཆེས་ཆེ་ རུ་གཏོང་དགོས། ༧༽ བོད་མི་ཚོ་དང་གྲོས་མོལ་བསྐྱར་གསོ་བྱས་ཏེ་ཆོད་སེམས་བརྟན་པོས་བོད་ཀྱི་དཀའ་ངལ་སེལ་ཆེད་ཕུགས་རྒྱང་རིང་པོས་ཐབས་ལམ་ཐོག་ནས་བོད་དང་ཉེ་འབྲེལ་ས་ཁྱོན་ཁག་ཏུ་བརྟན་ལྷིང་གི་ཁོར་ཡུག་བཟང་པོ་ཞིག་བསྐྲུན་ཐབས་བྱེད་དགོས། ཞེས་བཀོད་འདུག
གསལ་བསྒྲགས་དེའི་ནང་། རང་དབང་མང་གཙོའི་སྲིད་གཞུང་དང་གྲོས་ཚོགས་ཁག་གིས། འགྲོ་བ་མིའི་ཐོབ་ཐང་དང་ཡོངས་ཁྱབ་རིན་ཐང་ལ་རྩིས་མེད་རྡོག་རོལ་གཏོང་བའི་རྒྱ་གཞུང་གི་བྱ་སྤྱོད་རྒྱ་ཡན་དུ་མི་འགྲོ་བའི་གནོན་ཤུགས་སྤྲོད་ཐབས་ཀྱི་འགན་འཁུར་མང་ཙམ་ལེན་རྒྱུ་དང་། དམངས་གཙོའི་རྒྱལ་ཁབ་ཁག་གི་དབུ་ཁྲིད་རྣམ་པས་དོན་ཕན་ལྡན་པའི་ནུས་ཤུགས་འདོན་རྒྱུ། རྒྱལ་སྤྱིའི་གཞུང་འབྲེལ་མིན་པའི་ཚོགས་སྡེ་དང་བོད་དོན་རྒྱབ་སྐྱོར་ཚོགས་པ། མི་སྒེར་བཅས་ནས་བོད་ནང་གི་གནས་སྟངས་འབྲེལ་ཡོད་ལ་ངོ་སྤྲོད་གསལ་བཤད་དང་བདེན་པའི་རྒྱབ་ལངས་བྱ་རྒྱུའི་འབོད་སྐུལ་གནང་འདུག
དེ་རིང་གི་ཟས་བཅད་ལས་འགུལ་ཐོག་བོད་མི་མང་སྤྱི་འཐུས་ལྷན་ཚོགས་ཀྱིས། སྨོན་ལམ་གསུང་འདོན་དང་བོད་ནང་ཛ་དྲག་གི་གནས་སྟངས་སྐོར་གྱི་གློག་བརྙན་གཟིགས་འབུལ་བཅས་གནང་བ་མ་ཟད། ཕྱི་དྲོའི་ཆུ་ཚོད་ ༥ བའི་ཐོག་ཐེག་ཆེན་ཆོས་གླིང་གཙུག་ལག་ཁང་ནས་མེག་གྷན་ཁྲོམ་ལམ་དུ་མར་མེ་ཁྲོམ་སྐོར་གནང་རྗེས། བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས། འདས་པའི་མི་ལོ་ ༥༠ ལྷག་གི་རིང་རྒྱ་ནག་གཞུང་བོད་མི་ས་ཡ་གཅིག་ལྷག་དམར་གསོད་བཏང་བ་སོགས་བོད་མིའི་ཆོས་དང་རིག་གཞུང་རྩ་གཏོོར་གྱི་སྲིད་ཇུས་རིམ་པ་ལག་བསྟར་བྱས་པའི་དབང་གིས། ད་ལྟའི་ཆར་མི་རབས་གསར་བ་ཚོས་བོད་ཀྱི་རྩ་དོན་འཐབ་རྩོད་ཆེད་རང་སྲོག་བློས་གཏོང་གི་ལས་འགུལ་རིམ་པ་སྤེལ་གྱི་ཡོད་ལ། ཛ་དྲག་གི་གནས་སྟངས་དེའི་ནག་ཉེས་མཐའ་དག་རྒྱ་ནག་གཞུང་གིས་འགན་འཁུར་དགོས་ཞེས་གསུངས་བྱུང་བ་མ་ཟད། ད་ལྟའི་བོད་ནང་གི་ཛ་དྲག་གི་གནས་སྟངས་ལ་གཞིགས་ཏེ་བཙན་བྱོོལ་བོད་མིའི་སྒྲིག་འཛུགས་དང་། གཞུང་འབྲེལ་མིན་པའི་ཚོགས་པ་ཁག་གིས་གདུང་སེམས་མཉམ་སྐྱེད་ཀྱི་ལས་འགུལ་རིམ་པ་སྤེལ་དགོས་པའི་འབོད་སྐུལ་དང་། བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་བོད་ནང་གི་གནས་སྟངས་ལ་གཞིགས་ཏེ་ཛ་དྲག་གི་འགུལ་སྤེལ་རིམ་པ་སྤེལ་རྒྱུ་ཡིན་པའི་སྐོར་སོགས་གསུངས་ཡོད།
དྲྭ་གྲོགས་ཡོངས་ལ་དྲི་བ་ཆུང་ཆུང་ཞིག་འདུག་པའི་ལན་གང་མགྱོགས་གནང་རོགས་གནང་། དྲི་བ་དེ་ནི་ ང་ཚོ་ཚང་མ་ལ་མཁོ་བའི་དྲི་བ་ཡིན་། དེ་ནི་བོད་རྒྱལ་ལོ་དེ་ག་དུས་ནས་འགོ་འཚུགས་ཡོད་དམ། སུ་ཡིས་དུས་སུ་འགོ་ཚུགས་པ་ཡིན་ནམ་། ད་ལྟ་བར་དུ་འཕོ་འགྱུར་ཡག་ཤོས་བྱུང་བ་ལྔ་དང་སྡུག་ཤོས་བྱུང་བ་ལྔ་ཞིག་བྲིས་རོགས་གནང་།
ད་ལོ་ལོ་གསར་ཚེས་གཅིག་ནས་བོད་མི་ཡུལ་གྱར་བ་ཡོངས་ཀྱི་བོད་ནང་གི་རྫ་དྲགས་གནས་ཚུལ་ལ་གདུང་སེམས་མཉམ་བསྐྱེད་ཀྱི་ཡུལ་གྲུ་གང་སར་ལོ་གསར་ཚེས་གཅིག་ལ་ཟས་བཅད་ངོ་བརྒོལ་དང་ལུང་ཆུང་བྷན་དྷ་རཱ་ལ་ཡང་ལོ་གསར་ཚེས་པ་གཅིག་ཞོགས་པ་ཟས་བཅད་ངོ་བརྒོལ་དང་འདས་པོ་དཔའོ་རྣམས་ལ་སྨོན་ལམ་ཕྱི་དྲོ་ཆུ་ཚོད་ལྔ་པ་ནས་བདུན་པ་བར་མར་མེ་ཁྲོམ་བསྐོར་མི་དམངས་ཀྱིས་ལས་འགུལ་སྤེལ་་་་་་་་་་་་་་ད་ལོ་གསར་བསྐོད་པ་ཚོས་གནས་ཚུལ་གང་ས་ནས་ཕྱོགས་བསྒྲིགས་བྱས་ནས་བོད་ནང་བོད་མི་ཚོས་མཁྱེན་ཐུབ་པ་ངེས་པར་གནང་དགོས་དེའི་ལས་འགན་ཁྱེད་རང་ཚོར་ཡོད་་་་བོད་རྒྱལ་ལོ་་་་་་༸གོང་ས་མཆོག་སྐུ་ཚེ་བརྟན་པའི་སྨོན་ལམ་ཞུ་་་་
ངས་གངས་ལྗོངས་ནང་ཞུགས་པའི་བོད་མི་སྤུན་ཟླ་ཡོངས་ལ་ཡུལ་གྱར་བོད་མི་ཡོངས་ཀྱི་ཚབས་ཞུས་ནས་ཆུ་འབྲུག་ལོའི་གནམ་ལོ་གསར་ཚེས་ལ་འཚམས་འདྲི་དང་ཁྱེད་རྣམ་པའི་དཔའ་ངར་དང་མཛད་རྗེས་ལ་བསྔགས་བརྗོད་ཞུ་བཞིན་ཡོད་་་་་་་་་་་་་ང་ཚོས་ཁྱེད་རྣམ་པའི་མཛད་རྗེས་དེར་དཔུང་པ་མཉམ་རུབ་ཀྱི་ཕྱི་རྒྱལ་ཡུལ་གྲུ་གང་སར་ནུས་པ་ལྡན་པའི་ལས་འགུལ་སྤེལ་མུས་ཡིན་པས་་་་་ང་ཚོ་བོད་མི་ཚང་མ་མྱུར་དུ་མཇལ་བའི་སྨོན་འདུན་ཞུ་་་་་་་བོད་རྒྱལ་ལོ་
གང་དུ་ཡང་མི་རྐྱང་མགོ་རིལ་ཚོ་སྔོན་དུ་ཕྱིན་ནས་དཀའ་ལས་རྒྱག་པ་ལ་བལྟས་ན་སྙིང་རྗེ་ཞིང་དམངས་ལའང་ཚོར་བ་ཞིག་ངེས་པར་སླེབས་དགོས་པ་མཐོང་།
ཟས་བཅད་ངོ་རྒོལ་འདིར་སྤྱི་འཐུས་དང་གྲྭ་བ་ཨ་ནེ་ལས་རྡ་སའི་མི་དམངས་མཐོང་རྒྱུ་ཉུང་ཙམ་ལས་མེད་པ་ཅི་ཞིག་ཡིན་ནམ། ཁ་ཕོ་ཆེ་བ་རྣམས་དངོས་སུ་ཐོན་དགོས་པ་ལས་གྲིབ་ཙམ་ཡང་མཐོང་རྒྱུ་མེད་པ་ཡིད་སྐྱོ།
ཡིག་ནོར་མང་བོ་འདུག ཡིག་ནོར་མང་བོ་འདུག ཡིག་ནོར་མང་བོ་འདུག ཡིག་ནོར་མང་བོ་འདུག ཡིག་ནོར་མང་བོ་འདུག