སྨན་པའི་ལས་ཀ་ནི་ཆོས་ཉམས་ལེན་རེད།

ཧི་མ་ཅལ་མངའ་སྡེ་གསོ་རིག་སློབ་གླིང་གི་གོ་སྒྲིག་འོག རྒྱ་གར་རྒྱལ་ཡོངས་སྤྱི་ཚོཊ་ནད་གཞི་སྔོན་འགོག་དང་འཕྲོད་བསྟེན་སྨན་པའི་ལོ་འཁོར་ཚོཊ་ཆེན་ཐེངས་ ༣༩ པ་དེ། དེ་རིང་ཕྱི་ཚེས་ ༢༨ ཉིན་གྱི་སྔ་དྲོའི་ཆུ་ཚོད་ ༩།༣༠ སྟེང་ཀང་རཱ་རྫོང་ཉེ་འདབས་ཀྱི་ཊེན་ཊཱ་ (TANDA) སྨན་ཁང་གི་ཚོཊ་ཁང་དུ་ཚོགས་ཡོད་ཅིང་། ཐེངས་འདིའི་ཚོགས་ཆེན་སྟེང་༸གོང་ས་མཆོག་གཙོས་པའི་རྒྱ་གར་དབུས་གཞུང་གི་འཛིན་སྐྱོང་གྲོང་ཁྱེར་གསུམ་དང་། མངའ་སྡེ་ཁག་ ༢༤ ཙམ་ནས་ཕེབས་པའི་སྨན་པ་དང་། སྨན་པའི་སྐུ་ཚབ་བཅས་ཁྱོན་མི་ ༩༠༠ ལྷག་འདུ་འཛོམས་བྱུང་ཡོད།

མཛད་སྒོའི་ཐོག་མར་མཐོ་སློབ་དེའི་སློབ་སྤྱི་ལགས་ཀྱིས་ཚོགས་ཆེན་གྱི་དམིགས་ཡུལ་དང་འཆར་གཞི་སྐོར་ངོ་སྤྲོད་གནང་རྗེས། ༸གོང་ས་མཆོག་གིས་ཚོགས་ཞུགས་པ་ཚོར་བཀའ་སློབ་བསྩལ་ཡོད།  ༸གོང་ས་མཆོག་གིས་གསུངས་དོན། “ ངོས་རང་ཚོགས་འདུ་གལ་ཆེན་འདིའི་སྟེང་ཡོང་ཐུབ་པར་ཧ་ཅང་དགའ་པོ་བྱུང་། ངོས་རང་ངྷ་སར་བསྡད་དེ་ལོ་ ༥༢ ལྷག་ཕྱིན་པ་རེད། འདས་པའི་ལོ་ངོ་འདི་དག་རིང་ས་ཆ་འདིར་ཧ་ལས་པའི་ཡར་རྒྱས་ཕྱིན་ཡོད། ངོས་རང་ཐོག་མར་ངྷ་སར་འབྱོར་སྐབས་ས་འདིར་ཚོང་ཁང་གཉིས་ལས་མི་འདུག ད་ཆར་ཚོང་ཁང་དང་མགྲོན་ཁང་སོགས་ཧ་ཅང་མང་པོ་མཐོང་རྒྱུ་ཡོད། སྨན་ཁང་ནི་ཧ་ཅང་གལ་ཆེན་གྱི་གྲས་ཡིན་ལ། མི་ཚང་མས་རང་ཉིད་ཀྱི་འཕྲོད་བསྟེན་ཐོག་སེམས་ཁུར་ཆེན་པོ་བྱེད་ཀྱི་ཡོད། ཁྱེད་ཚོ་སྨན་པར་ཆ་བཞག་ན་འཕྲོད་བསྟེན་ཐོག་དོ་སྣང་མང་ཙམ་གནང་དགོས་པ་རེད། ཁྱེད་ཚོའི་ལས་ཀ་འདི་གལ་ཆེན་པོ་ཆགས་ཡོད་པའི་ཆ་ནས། སྨན་པ་ཚོས་ཕྱག་ལས་གནང་སྐབས་སེམས་བཟང་པོ་དང་འགན་འཁུར་གྱི་ཚོར་བ་ཡོད་པ་ཞིག་གནང་ན། ཁྱེད་རྣམ་པའི་ལས་ཀ་དེ་ཆོས་ཕྱོགས་ཀྱི་ཉམས་ལེན་ཡག་ཤོས་དེ་ཆགས་ཡོད། ང་རང་ལ་མཚོན་ནའང་། སྨན་ཁང་དུ་སྨན་བཅོས་བྱེད་སྐབས་སྨན་པ་ཚོའི་གདོང་ལ་འཛུམ་མདངས་ཡོད་པ་དང་། སེམས་ཁུར་དང་ཤ་ཚའི་རྣམ་འགྱུར་ཡོད་ན་རང་བཞིན་གྱིས་སེམས་ལ་དགའ་ཚོར་ཡོང་གི་འདུག་ ” ཅེས་གསུངས་ཡོད།

རྒྱ་གར་རྒྱལ་ཡོངས་སྤྱི་ཚོགས་ནད་གཞི་སྔོན་འགོག་དང་འཕྲོད་བསྟེན་སྨན་པའི་ལོ་འཁོར་ལྷན་ཚོགས་དེ་དུས་ཡུན་ཉིན་གསུམ་རིང་འཚོགས་རྒྱུ་ཡིན་འདུག