དེ་རིང་ཞོགས་པའི་ཆུ་ཚོད་ ༥།༥༨ སྟེང་ཇོ་ནང་བསྟན་པའི་མངའ་བདག་ཁལ་ཁ་རྗེ་བཙུན་དམ་པ་འཇམ་དཔལ་རྣམ་གྲོལ་ཆོས་ཀྱི་རྒྱལ་མཚན་མཆོག་དགུང་གྲངས་ ༨༡ ཐོག སོག་པོའི་རྒྱལ་ས་ཨུ་ལམ་པ་ངྷིར་དུ་ཡོད་པའི་དགའ་ལྡན་དགོན་པའི་བླ་བྲང་ནས་དགོངས་པ་གཞན་དོན་དུ་གཤེགས་ཡོད་འདུག
དེ་རིང་སྔ་དྲོར་འཕགས་ཡུལ་ཇོ་ནང་འགྲོ་ཕན་ལྷན་ཚོགས་དབུས་རྒྱུན་ལས་ཁང་གིས་དམ་པ་ཁོང་དགོངས་པ་རྫོགས་པའི་གནས་ཚུལ་དང་བཅས་ལོ་རྒྱུས་མདོ་བསྡུས་བཏང་འབྱོར་བྱུང་བའི་ནང་། ཇོ་ནང་རྗེ་བཙུན་ཀུན་དགའ་གྲོལ་མཆོག་གི་སྐུ་ཕྲེང་བཅུ་གཅིག་པ་ཁལ་ཁ་རིན་པོ་ཆེ་འཇམ་དཔལ་རྣམ་གྲོལ་ཆོས་ཀྱི་རྒྱལ་མཚན་དཔལ་བཟང་པོ་མཆོག་ནི་ཕྱི་ལོ་ ༡༩༣༢ ལོར་བོད་དབུས་རྭ་ལོའི་གདུང་རྒྱུད་ཡབ་བློ་བཟང་འཇམ་དཔལ་དང་། ཡུམ་དབྱངས་ཅན་ལྷ་མོ་གཉིས་ཀྱི་སྲས་སུ་སྐུ་འཁྲུངས་ཤིང་། རྗེ་ཏཱ་ར་ནཱ་ཐ་དང་གདུང་རྒྱུད་ཡང་གཅིག་པར་སྙམ། དགའ་ལྡན་ཁྲི་ཐོག་དགུ་བཅུ་བ་དང་། གནས་ཆུང་ཆོས་རྒྱལ་ཆེན་པོ་སོགས་ཀྱིས་སྐྱེས་ཆེན་དམ་པ་ཞིག་ཡིན་པར་ལུང་བསྟན་གནང་། དགུང་གྲངས་བཞིའི་ཐོག་རྒྱལ་ཚབ་རྭ་སྒྲེང་རིན་པོ་ཆེས་ལྷ་བླའི་བཀའ་ལུང་རྩེ་མཐུན་ལྟར། ཁལ་ཁ་རྗེ་བཙུན་དམ་པ་སྐུ་ཕྲེང་བཅུ་བའི་ཡང་སྤྲུལ་དུ་ངོས་འཛིན་མཛད་དེ། འབྲས་སྤུངས་སྒོ་མང་གྲྭ་ཚང་དུ་ཆོས་ཞུགས་ཀྱིས་རྭ་སྒྲེང་རིན་པོ་ཆེ་སོགས་རྩ་བའི་ཡོངས་འཛིན་དུ་བསྟེན་ཏེ་མདོ་ཕྱོགས་ཀྱི་གཞུང་ཆེན་ཁག་ལ་སློབ་གཉེར་ཕུལ་ཕྱིན་མཛད།
དགུང་གྲངས་ ༢༡ ཐོག་རང་ཉིད་ཀྱི་གདན་ས་རྟག་བརྟན་ཆོས་སྡེར་ཞབས་སོར་འཁོད་ཅིང་། འདིའི་དུས་སུ་ཇོ་ནང་བའི་རྣལ་འབྱོར་བ་ཞིག་དང་མཉམ་དུ་ཇོ་ལུགས་དཔལ་དུས་ཀྱི་འཁོར་ལོའི་སྦྱོར་བ་ཡན་ལག་དྲུག་མི་མངོན་པའི་ཚུལ་དུ་ཉམས་བཞེས་མཛད། ཕྱིས་སུ་དུས་འགྱུར་གྱི་དབང་གིས་འཕགས་ཡུལ་དུ་ཕེབས་ཏེ་གནས་ངེས་མེད་དུ་བཞུགས། ཁྱད་པར་བླ་མ་ཀ་ལུ་རིན་པོ་ཆེའི་མདུན་ནས་ཇོ་ནང་དང་ཤངས་པའི་ཆོས་སྐོར་མཐོང་བ་དོན་བརྒྱུད་ཀྱི་ཉམས་ལེན་བདག་གིར་བཞེས། ༧གོང་ས་ཐམས་ཅད་མཁྱེན་པ་མཆོག་གིས་གཞུང་འབྲེལ་ཁྲི་སྟོན་མཛད་སྒོ་བྱེད་དགོས་ཞེས་བཀའ་བསྩལ་པ་དང་། སོག་པོའི་སྲིད་འཛིན་སོགས་ཆེས་མཐོའི་དཔོན་རིགས་ཁག་དང་སེར་སྐྱ་མི་མང་གི་རེ་འདུན་ལྟར་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཁྲི་སྟོན་གྱི་མཛད་སྒོ་རྒྱ་ཆེར་སྤེལ།
ཕྱི་ལོ་ ༡༩༩༧ ལོར་༧གོང་ས་སྐྱབས་མགོན་རྒྱལ་བའི་དབང་པོ་མཆོག་གིས་དཔལ་རྒྱལ་བ་ཇོ་ནང་བའི་བསྟན་པའི་བདག་པོར་མངའ་གསོལ་མཛད་ཏེ་གཞུང་འབྲེལ་མཛད་སྒོ་བསྡུས། དེ་དང་ཆབས་ཅིག་ལོ་དེར་ ༸གོང་ས་མཆོག་གིས་དཔལ་ཇོ་ནང་བའི་ངེས་དོན་གྱི་བསྟན་པ་སླར་གསོའི་ཆེད་སིམ་ལ་སངས་རྒྱས་ཆོས་གླིང་ཇོ་ནང་མ་དགོན་རྟག་བརྟན་ཕུན་ཚོགས་ཆོས་གླིང་ཞེས་པར་མཚན་གསོལ་ཏེ། དགོན་གནས་རྟེན་དང་བརྟེན་པ་བཅས་གནང་། བྱེས་འབྱོར་ཇོ་ནང་བའི་དགེ་འདུན་པ་ ༤༠ ལྷག་སྒྲིག་ཁུངས་སུ་ཞུགས་ཡོད། དེ་ནས་སོག་ཡུལ་དུ་ཕེབས་ཏེ་གསེར་ཁྲིར་མངའ་གསོལ་མཛད་དེ་མཛད་འཕྲིན་རྒྱ་ཆེར་བསྐྱངས། ཕྱི་ལོ་ ༢༠༠༢ ལོར་༧གོང་ས་མཆོག་ཇོ་ནང་མ་དགོན་དུ་གདན་འདྲེན་ཞུས་ཏེ་ངེས་དོན་གྱི་ཆོས་འཁོར་རྒྱ་ཆེར་བསྐོར། ཕྱི་ལོ་ ༢༠༠༨ ཟླ་ ༤ ཚེས་ ༡༡ ཉིན་ཇོ་ནང་མ་དགོན་དུ་རྟག་བརྟན་བླ་བྲང་ལེགས་འགྲུབ་གྱི་མཛད་སྒོར་ཆིབས་བསྒྱུར་བསྐྱངས། ༧གོང་ས་མཆོག་གི་བཀའ་དགོངས་ལྟར་ཕྱི་ལོ་ ༢༠༡༡ ལོར་སོག་པོར་ཕེབས། སོག་པོའི་གཞུང་ངོིས་ནས་སོག་རྒྱལ་ཁབ་ཀྱི་ཆོས་ཀྱི་དབུ་འཛིན་དུ་མངའ་གསོལ་མཛད་པ་བཞིན་བདག་གིར་བཞེས་ཏེ་བསྟན་འགྲོའི་དོན་རྒྱ་ཆེར་སྤེལ། ཕྱི་ལོ་ ༢༠༡༢ ཟླ་ ༣ ཚེས་ ༡ ཉིན་གྱི་ཞོགས་པ་རྒྱ་གར་དུས་ཚོད་ ༥:༥༨ སྟེང་དགོངས་པ་གཞན་དོན་དུ་གཤེགས་པའོ།། ཞེས་བཀོད་འདུག
ཇོ་ནང་ཆོས་འབྱུང་ཟླ་སྒྲོན་ལས།
རྒྱལ་བའི་ལུང་བསྟན་ཇོ་ནང་ཀུན་མཁྱེན་དོལ་པོ་རྗེ་༡། །
ཆོས་གྲགས་༢བློ་དཔལ་༣ས་བཟང་༤མ་ཎི༥ཞིང་སྟོན༥དང་། །
ཐང་ཆེན་༧སྨན་ཆུ་༨རིན་ཚུལ་༩གྷ་རུང་༡༠ཕུན་ཚོགས་དཔལ་༡༡། །
ཐང་ཆུང་༡༢ཕྱོགས་རྒྱལ་༡༣ཉ་དབོན༡༤མཚན་མིན་༡༥བཅོ་ལྔ་འོ། །
ཞེས་གསུངས་པ་ལྟར་ཇོ་ནང་པའི་བསྟན་པ་རྟག་ཏུ་རྒྱས་འགྱུར་ཅིག །
ཇོ་ནང་པ་ལ་མྱ་ངན་གུས་འདུད་དང་བཅས། ཡང་སྤྲུལ་ཉི་མ་གཞོན་ནུ་མྱུར་དུ་བྱོན་པས་སྨོན་འདུན་གྲངས་མེད་དང་བཅས་་་་རེ་སྒུག་གི་མིག་འབྲས་ཁྱེད་ལ་བལྟས་ནས་ཡོད།
འཕགས་ཡུལ་གྲུབ་དབང་གངས་ཅན་དཔལ་དུ་སྤྲུལ། །ངེས་དོན་བསྟན་པའི་ཟླ་བ་སྒྲོལ་བའི་མགོན། །ཧོར་ཡུལ་ཆོས་ཀྱི་ཉི་མ་རྗེ་བཙུན་པ། །རྫོགས་ལྡན་བསྟན་པའི་གསོས་སུ་ཞབས་བརྟན་ཤོག
ཞེས་པའི་ཚིགས་བཅད་འདི་ཁོང་གི་སྐུ་དཔར་ཆེན་པོའི་འོག་ཏུ་བཀོད་དེ་གཞིས་བཞུགས་བོད་ཀྱི་ཇོ་ནང་བའི་མི་མང་སྟོང་ཕྲག་ཡན་ལ་དད་རྟེན་དུ་༢༠༠༦ ལོར་ཕུལ་བ་ཡིན།
དེ་རིང་ངས་འདིར་སླར་ཡང་།
འཕགས་ཡུལ་གྲུབ་དབང་གངས་ཅན་དཔལ་དུ་སྤྲུལ། །ངེས་དོན་བསྟན་པའི་ཟླ་བ་སྒྲོལ་བའི་མགོན། །ཧོར་ཡུལ་ཆོས་ཀྱི་ཉི་མ་རྗེ་བཙུན་པ། །རེ་ཞིག་ནུབ་རིར་ཡིབས་པས་གདུང་བ་ལྕི། །
སྐལ་དམན་གདུལ་བྱའི་བསོད་ནམས་རྫོགས་ན་ཡང། །འགྱུར་མེད་སེམས་དཔའི་དམ་བཅའ་མ་འདོར་ཀྱེ། །རྫོགས་ལྡན་བསྟན་པ་རྒྱས་ལ་རང་ཅག་བརྩོན། །ཡང་སྤྲུལ་གཞོན་ནུའི་སྒྱུ་འཕྲུལ་མྱུར་དུ་ཕེབས། །
སྙིགས་འགྲོའི་རྒུད་པ་ད་དུང་སེལ་མེད་ཅིང་། །ཁྱད་པར་གངས་ལྗོངས་འགྲོ་བའི་སྡུག་བསྔལ་དཔུང་། །ཆུ་འཛིན་ནག་པོའི་ཕུང་བོ་ཆེས་འཐུག་པས། །ཡང་སྤྲུལ་དྲི་གཞོན་རླུང་གི་དཔུང་ཆེན་ཕེབས། །
ཁལ་ཁ་རྗེ་བཙུན་དམ་པ་ནི་ཇོ་ནང་བ་ལས་ཀྱང་དགེ་ལུགས་པར་འབྲེལ་ཆེ་བ་ཞིག་རེད། སོགས་རྒྱལ་ཁབ་ཆེན་པོ་དང་དེ་ལས་འབྲེལ་ཆེ་བ་ཤེས་སླ།
གང་ལྟར་རྗེ་བཙུན་ཏྰ་ར་ནྰ་ཐའི་སྐུ་འཕྲེང་ཡིན་པར་ཡིད་ཆེས་དང་དད་འདུན་ཡོད་མཁན་ཞིག་ཡིན་ཕྱིན་བོད་བརྒྱུད་ནང་བསྟན་ལ་མརྫད་རྗས་བཞག་པར་གདེང་འཇོག་དང་མཐོང་ཆེན་མི་བྱེད་མཁན་ཞིག་ག་ལ་ཡོད། དེ་ཕྱིར་གདོང་མཆོད་སྨོན་ལམ་ཟབ་རྒྱས་སུས་ཀྱང་ལོས་གནང་། གཞུང་འབྲེལ་གྱིས་ཡང་གནང་རིགས། ད་ལྟའི་དཀའ་སྤྱི་གཉིས་ལ་ཆད་སྲིད་ཀྱི་བློ་གྲོས་ཡོད་ན་གཞུང་འབྲེལ་གདོང་མཆོད་མཛད་སྒོ་རྒྱ་ཆེར་གནང་རིགས།
ཡང་སྲིད་ཉི་གཞོན་མྱུར་བྱོན་ཤོག །
འོག་བཅོས་་་་་་་་་ཉིན་གྱི་ཉི་མ་མཚན་གྱི་དུས་སུ་ཡིབས།།
གཞན་སྟོང་མངའ་བདག་བསྟན་པའི་སྲོག་གི་ཀྭ།།
རྟག་བརྟན་ཐེར་ཟུག་ངོ་བོར་མི་འགྲུབ་གཤིས།།
རང་དབང་སྤྲུལ་བའི་སྣང་བ་ནུབ་པ་ཙམ།།
ཉིན་གྱི་ཉི་མ་མཚན་དུས་སུ་ཡིབས།།