གཟའ་ཕུར་བུའི་ཉིན་ནས་འཚོགས་བཞིན་པའི་ཡུ་རོབ་མཐུན་ཚོགས་ཀྱི་སྔོན་རྩིས་ཚོགས་ཆེན་ལ། ཡུ་རོབ་རྒྱལ་ཁབ་ཁག་གང་སར་མི་མང་སྟོང་ཕྲག་མང་པོ་གྲོང་ཁྱེར་ཁག་ཏུ་འདུ་འཛོམས་ཐོག་ངོ་རྒོལ་སྐད་འབོད་བྱེད་བཞིན་ཡོད་འདུག
དེ་རིང་ནས་ཉིན་༢རིང་བྷེལ་ཇལ་གྱི་རྒྱལ་སར་ཡོད་པའི་ཡུ་རོབ་མཐུན་ཚོགས་ཀྱི་སྤྱི་ཁྱབ་ལས་ཁང་དུ་ཡུ་རོབ་མཐུན་ཚོགས་ཀྱི་ལོ་འཁོར་སྔོན་རྩིས་ཚོགས་ཆེན་འཚོགས་བཞིན་ཡོད་པ་དང་། ཚོགས་ཆེན་སྐབས་གཙོ་བོ་ཡུ་རོབ་གླིང་གི་དཔལ་འབྱོར་ཉམས་རྒུད་ཀྱི་གནས་བབ་སླར་གསོ་ཡོང་ཐབས་སུ། ཡུ་རོབ་རྒྱལ་ཁབ་སོ་སོའི་སྤྱི་ཚོགས་ཞབས་ཞུ་དང་མང་ཚོགས་བདེ་དོན་ལས་གཞིའི་ཐད་ཀྱི་མ་དངུལ་ཉུང་དུ་བཏང་སྟེ། ཕྱོགས་ཡོངས་ནས་ཆ་སྙོམས་ངང་དཔལ་འབྱོར་གནས་བབ་མཐོར་འདེགས་བྱ་རྒྱུར་གྲོས་འཆར་བཏོན་པར་མང་ཚོགས་ཀྱིས་ངོ་རྒོལ་བྱེད་ཀྱི་ཡོད་འདུགཁ་སང་སི་པན་གྱི་སློབ་ཆུང་སློབ་མ་དང་མཐོ་སློབ་སློབ་ཕྲུག་སྟོང་ཕྲག་མང་པོ་འཛིན་གྲྭར་མ་སོང་པར་གྲོང་ཁྱེར་སོ་སོའི་ཁྲོམ་གཞུང་དུ་ཐོན་ཏེ། ཡུ་རོབ་མཐུན་ཚོགས་ཀྱི་གྲོས་འཆར་འོག་ཤེས་ཡོན་མཐུན་འགྱུར་མ་དངུལ་ཉུང་དུ་གཏོང་རྒྱུའི་ལས་འཆར་ལ་ངོ་རྒོལ་བྱས་ཡོད་པ་མ་ཟད། གྲོང་ཁྱེར་འགའ་རེའི་ནང་ངོ་རྒོལ་བ་དང་ཉེན་རྟོག་དམག་མིའི་བར་འཁྲུག་འཛིང་ཤོར་བའི་གནས་ཚུལ་ཡང་བྱུང་ཡོད་འདུག དེ་བཞིན་ཧྥ་རན་སི་དང་། བྷེལ་ཇམ། བྷི་རེ་སི། པུར་ཇོ་གྷལ་སོགས་ཡུ་རོབ་གླིང་གང་སར་སློབ་ཕྲུག་དང་། མི་མང་དཀྱུས་མ། ལས་བྱེད་སོགས་ཀྱིས་ཡུ་རོབ་མཐུན་ཚོགས་ཀྱི་གྲོས་འཆར་ཁྲོད་ཀྱི་སྤྱི་ཚོགས་ཞབས་ཞུ་དང་མི་མང་བདེ་དོན་ཐད་ཀྱི་མ་དངུལ་ཉུང་དུ་བཏང་སྟེ། སྤྱི་ཡོངས་ཀྱི་དཔལ་འབྱོར་གནས་བབ་མཐོར་འདེགས་ཡོང་ཐབས་ཞེས་པའི་སྲིད་ཇུས་འོག ཤེས་ཡོན་དང་མི་མང་བདེ་དོན་ལས་གཞི་ཁག་བཅས་ཀྱི་མཐུན་འགྱུར་མ་དངུལ་ཇེ་ཉུང་གཏོང་བ། ལས་བྱེད་ཀྱི་གླ་ཕོགས་ཉུང་དུ་གཏོང་བ་སོགས་ཀྱི་ཐད་ངོ་རྒོལ་བྱེད་ཀྱི་ཡོད་འདུག
ཡུ་རོབ་མཐུན་ཚོགས་ཀྱིས་ ༢༠༡༢ ནས་ ༢༠༡༣ ལ་ཚོད་བགམ་སྔོན་རྩིས་བྱས་པ་ལྟར་ན། ཡུ་རོབ་གླིང་སྤྱི་ཡོངས་ཀྱི་དཔལ་འབྱོར་འཕེལ་ཚད་བརྒྱ་ཆ་ ༠་༦ ལས་བརྒལ་ཐུབ་ཀྱི་མེད་པ་དང་། ལས་མེད་ཀྱི་བརྒྱ་ཆ་ ༡༠ ཟིན་རྒྱུ་ཡིན་འདུག
མི་མང་མེད་ན་རྒྱལ་ཁབ་མེད།།
མི་མང་མེད་ན་ཡོང་སྒོ་མེད།།
མི་མང་མེད་ན་འཕེལ་རྒྱས་མེད།།
མང་གཙོ་ཁྲིམས་གཙོ་ཞི་བདེ་གཙོ།།