ལེགས་བྱང་སྤེལ་རེས་ཀྱིས་འཛམ་གླིང་ལ་ཞབས་འདེཊ་ཞུ་དགོས།

དེ་རིང་སྔ་དྲོ་ས་རཱ་མཐོ་སློབ་ནང་། དྷ་ས་རིག་སློབ་དང་ཨེ་མོ་རི་མཐོ་སློབ་དབར་ཤེས་ཡོན་འབྲེལ་བ་བྱུང་ནས་ལོ་ངོ་ ༡༢ འཁོར་བའི་དུས་དྲན་མཛད་སྒོ་ཞིག་ཚོགས་ཏེ། མ་འོངས་པར་ཤར་ནུབ་རིག་གནས་ཀྱི་ལེགས་བྱང་སྤེལ་རེས་ཀྱིས་འཛམ་གླིང་ལ་ཞབས་འདེགས་ཞུ་ཐབས་སྐོར་གྱི་གཏམ་བཤད་གནང་སོང་།

དེ་རིང་སྔ་དྲོའི་ཆུ་ཚོད་ ༩།༣༠ སྟེང་། ས་རཱ་བོད་ཀྱི་མཐོ་རིམ་རིག་གནས་སློབ་གཉེར་ཁང་གི་ཚོགས་ཁང་དུ། དྷ་ས་རིགས་སློབ་དང་ཨེ་མོ་རི་མཐོ་སློབ་དབར་ཤེས་ཡོན་གྱི་འབྲེལ་བ་བྱུང་ནས་ལོ་ངོ་ ༡༢ འཁོར་བའི་དུས་དྲན་མཛད་སྒོ་ཞིག་ཚོགས་སོང་། མཛད་སྒོའི་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་ཨེ་མོ་རི་མཐོ་སློབ་ཀྱི་དབུ་འཛིན་ཇེམ་སི་ཝ་ནིར་(James Wagner)ལགས་རྣམ་གཉིས་གཙོས། བཙན་བྱོལ་བོད་མིའི་གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག་གི་གནད་ཡོད་མི་སྣ། ཨེ་མོ་རི་མཐོ་སློབ་ཀྱི་འབྲེལ་ཡོད་དགེ་སློབ་ཉི་ཤུ་ལྷག་དང་།  ས་རཱ་མཐོ་སློབ་ཀྱི་དགེ་སློབ་ལས་བྱེད་བཅས་སེར་སྐྱ་ ༤༠༠ ལྷག་མཉམ་ཞུགས་གནང་འདུག 

མཛད་སྒོའི་ཐོག་མར་སྐུ་མགྲོན་གཙོ་བོ་རྣམ་གཉིས་ཀྱིས་སྣང་གསལ་མར་མེ་ཞལ་འབྱེད་དང་། མཚན་ཉིད་གྲྭ་ཚང་གི་དགེ་འདུན་པ་རྣམས་ཀྱིས་རྟེན་འབྲེལ་ཆེད་སྐྱབས་འགྲོའི་ཁྲུས་གསོལ་དང་སྨོན་ལམ་གསུངས་རྗེས། རིགས་སློབ་དབུ་འཛིན་དགེ་བཤེས་སྐལ་བཟང་དགྲ་འདུལ་ལགས་ཀྱིས་ཨེ་མོ་རི་མཐོ་སློབ་འགན་འཛིན་གཙོས་མཛད་སྒོར་ཕེབས་མཁན་ཡོངས་ལ་འཚམས་འདྲི་དང་སྦྲགས། ས་རཱ་མཐོ་སློབ་དང་ཨེ་མོ་རི་མཐོ་སློབ་བར་གྱི་རིག་གནས་བརྗེ་ལེན་གྱི་ལས་འཆར་འདི་བརྒྱུད་དེ། ཨེ་མོ་རི་མཐོ་སློབ་ཀྱི་སློབ་མ་ཚོར་བོད་ཀྱི་རིག་གནས་ལ་ཞིབ་འཇུག་དང་། བོད་ཀྱི་སྐད་ཡིག་སློབ་སྦྱོང་གི་མཐུན་རྐྱེན་སྐྲུན་བཞིན་པ་ལྟར། ཨེ་མོ་རི་མཐོ་སློབ་ངོས་ནས་ཀྱང་ལས་འཆར་འདི་བོད་ཀྱི་རིག་གནས་སློབ་སྦྱོང་གི་གོ་སྐབས་ཤིག་ཏུ་ངོས་འཛིན་བྱེད་ཀྱི་ཡོད་པ་དང་། ༢༠༠༧ ལོར་༸གོང་ས་མཆོག་དང་ཨེ་མོ་རིའི་མཐོ་སློབ་མགོ་འཁྲིད་རྣམ་པར་མཇལ་འཕྲད་གནང་པ་ནས་བཟུང་། ལས་འཆར་འདི་སྔར་ལས་གྲ་ཇེ་རྒྱས་སུ་སོང་སྟེ་བོད་ཀྱི་སྲོལ་རྒྱུན་རིག་གནས་དང་ནུབ་ཕྱོགས་དེང་རབས་ཚན་རིགས་བར་ཉམས་མྱོང་བརྗེ་ལེན་གྱི་སྐལ་བཟང་བྱུང་ཡོད་ཚུལ་བརྗོད་བྱུང་།  

ཨེ་མོ་རི་མཐོ་སློབ་ཀྱི་མཁས་དབང་བྷོ་བྷེ་ཕོལ་(Dr.Bobby Paul)ལགས་ཀྱིས་ཤར་ནུབ་རིག་གནས་མཉམ་འབྲེལ་ཐོག་འཛམ་གླིང་ལ་ཞབས་འདེགས་སྒྲུབ་དགོས་པའི་སྐོར་བརྗོད་དོན། “༧གོང་ས་མཆོག་གི་དབུ་ཁྲིད་འོག་ཡོད་པའི་སློབ་གླིང་འདིའི་ལས་གཞིའི་ཆ་ཤས་ཤིག་ཏུ་གྱུར་པར་དགའ་སྤོབས་ཡོད་ལ། ཨེ་མོ་རི་མཐོ་སློབ་ཀྱིས་བོད་ཀྱི་རིག་གཞུང་སྲུང་སྐྱོབ་ཐད་ཆོད་སེམས་བརྟན་པོ་བཟུང་ཡོད། དེའི་རྒྱུ་མཚན་ནི། གཅིག་ནས་རྒྱ་གར་ནང་སྐྱབས་བཅོལ་དུ་སླེབས་པའི་བོད་རིགས་ཚོའི་ཉིན་རེའི་འཚོ་བ་དང་། མི་ཚེ་སྐྱེལ་སྟངས་ནི་བོད་ཀྱི་རིག་གཞུང་དང་ཐད་ཀར་འབྲེལ་བསྡད་ཡོད་ལ།  གཉིས་ནས། བོད་མི་ཚོ་ནི་འདས་པའི་ལོ་ངོ་མང་པོའི་རིང་ནས་དར་ཡོང་པའི་རིག་གནས་དཔལ་ཡོན་ལ་བདག་པོ་རྒྱག་མཁན་ཞིག་ཡིན་པ་དང་། ལྷག་པར་དུ་བོད་ཀྱི་རིག་གཞུང་སྤྱི་དང་བོད་རྒྱུད་ནང་བསྟན་ཆོས་ལུགས་ནི་བོད་ཙམ་མ་ཡིན་པར། དེང་སྐབས་འཛམ་གླིང་ཁྱོན་ཡོངས་ཀྱི་སྤྱི་ནོར་ཞིག་ཆགས་ཡོད་སྟབས། ནུབ་ཕྱོགས་སུ་དར་པའི་ཚན་རིག་ནི་ནུབ་ཕྱོགས་པ་གཅིག་པུར་དབང་པ་ཞིག་དང་། ཤར་ཕྱོགས་པའི་རིག་གཞུང་དང་བོད་རྒྱུད་ནང་བསྟན་ཆོས་ལུགས་ནི་བོད་གཅིག་པུར་འགན་འཁྲི་ཡོད་པ་ཞིག་མ་ཡིན་པར། འགྲོ་བ་མིའི་རིགས་ཀྱི་ད་ལྟ་དང་མ་འོངས་པའི་ཆེད་དུ་མཉམ་འབྲེལ་གྱི་ཐོག་ནས་ཕན་ཚུན་ལྟ་གྲུབ་བརྗེ་ལེན་དང་། ལེགས་བྱང་སྤེལ་རེས་བྱས་ཏེ་འཛམ་གླིང་ལ་ཞབས་འདེགས་ཞུ་ཐུབ་པ་ཞིག་བྱ་དགོས།” ཞེས་བརྗོད་དེ།  འདས་པའི་ལོ་བརྒྱ་ཕྲག་མང་པོའི་རིང་ཆོས་ལུགས་དང་ཚན་རིག་གི་ལྟ་གྲུབ་འགལ་ཟླར་ལྷག་ཡོད་ཀྱང་། ད་ཆར་ཕྱོགས་ཡོངས་ནས་ཕན་ཚུན་ལ་རྒྱུས་ལོན་དང་སློབ་སྦྱོང་བྱེད་མགོ་ཚུགས་ཡོད་པ་མ་ཟད།  བཙན་བྱོན་བོད་མིའི་སྤྱི་ཚོགས་ནང་བོད་རང་གི་སྲོལ་རྒྱུན་རིག་གནས་ཡོད་པའི་སྟེང་ལ། དེང་རབས་ནུབ་ཕྱོགས་པའི་ལམ་སྲོལ་ཡང་ཕྱོགས་ཡོངས་ནས་དར་བཞིན་པ་དང་། སཱ་ར་མཐོ་སློབ་དང་ཨ་རིའི་ཨེ་མོ་རི་མཐོ་སློབ་བར་གྱི་རིག་གཞུང་བརྗེ་ལེན་གྱི་ལས་གཞི་འདིའི་དམིགས་ཡུལ་ཡང་། ད་ལྟ་དང་མ་འོངས་པའི་དུས་སྐབས་ནང་ཕྱོགས་གཉིས་ཀྱི་སློབ་ཕྲུག་ཚོས་ཕན་ཚུན་གྱི་རིག་གཞུང་དང་སྲོལ་རྒྱུན་ལ་སློབ་སྦྱོང་བྱས་ཏེ། ལྟ་གྲུབ་གཉིས་ཀྱི་བར་དགེ་སྤེལ་ཉེས་འགོག་གི་ལམ་ནས།  འཛམ་གླིང་སྤྱི་དང་འགྲོ་བ་མིའི་སྤྱི་ཚོགས་ལ་དགོས་ཕན་ལྡན་པའི་ལམ་ཕྱོགས་གསར་པ་ཞིག་ལེགས་འགྲུབ་བྱ་དགོས་རྒྱུ་དེ་ཡིན་པར་བརྗོད་སོང་།

དེ་རྗེས། ཨེ་མོ་རི་མཐོ་སློབ་ཀྱི་དབུ་འཛིན་ཇེམ་སི་ཝ་ནིར་ལགས་གཏམ་བཤད་གནང་དོན།  “ཨེ་མོ་རེ་དང་བོད་ཀྱི་ཤེས་ཡོན་སྡེ་ཚན་ཁག་བར་རིག་གཞུང་བརྗེ་ལེན་གྱི་བརྒྱུད་རིམ་ནང་། ༧གོང་ས་མཆོག་གི་ལམ་སྟོན་འོག་འདས་པའི་དུས་ཡུན་ནང་ཨེ་མོ་རི་སློབ་གླིང་གི་སློབ་ཕྲུག་ཚོར་བོད་ཀྱི་རིག་གཞུང་སློབ་གཉེར་ཐད། ས་རཱ་མཐོ་སློབ་དང་བོད་གཞུང་དཔེ་མཛོད་ཁང་། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་སོགས་ཀྱིས་རོགས་ཕན་ཆེན་པོ་བྱུང་ཡོད།  ཨེ་མོ་རི་མཐོ་སློབ་ཀྱིས་འགྲོ་བ་མིའི་རིགས་ཀྱི་འཇིག་རྟེན་ལ་ཁ་ཕྱོགས་ཏེ།  སློབ་སྦྱོང་ལ་ལམ་སྟོན་དང་མཐུན་རྐྱེན་སྦྱོར་གྱི་ཡོད་པའི་ཁུལ་རེད། འོན་ཀྱང་། བོད་ཀྱི་སྤྱི་ཚོགས་དང་ཨེ་མོ་རི་མཐོ་སློབ་བར་རིག་གཞུང་བརྗེ་ལེན་གྱི་ལས་གཞི་མགོ་ཚུགས་པ་ནས་བཟུང་།  ང་ཚོར་ངེས་ཤེས་དང་དྲན་སྐུལ་གསལ་བོ་ཞིག་ཐེབས་སུ་བཅུག་སོང་། དེ་ནི་ཨེ་མོ་རེ་མཐོ་སློབ་ནང་ཚན་རིག་དང་ཁྲིམས་ལུགས། སྨན་གྱི་སློབ་སྦྱོང་། སྤྱི་ཚོགས་རིགས་གནས། ས་ཁམས་སོགས་རིག་ཚན་འདྲ་མིན་ཐོག་གནས་རིམ་ཅི་འདྲ་ཞིག་ཐོན་པ་ཡིན་ནའང་འདྲ།  གཞི་རྩའི་དམིགས་ཡུལ་ནི་ང་ཚོས་མིའི་རིགས་ཀྱི་འཇིག་རྟེན་ལ་ཕན་འབྲས་འཐོན་པའི་ཁ་ཕྱོགས་ཤིག་ཟིན་ཐུབ་ཡོད་མེད་དེ་རེད། མིའི་རིགས་ཀྱི་འཇིག་རྟེན་ལ་ཕན་རླབས་བསྐྲུན་རྒྱུ་དེ་ནི་ཚན་རིགས་སོགས་ལག་རྩལ་དང་ཤེས་བྱ་ཙམ་ཁོ་ནས་བསྒྲུབ་ཐུབ་ཀྱི་མེད་པར།  གཙོ་བོ་བྱམས་སྙིང་རྗེ་དང་བརྩེ་བ་སོགས་མིའི་སེམས་རྒྱུད་ལ་རག་ལས་ཡོད་སྟབས། མིའི་རིགས་ཀྱི་སེམས་རྒྱུད་དམ་སེམས་ཀྱི་ཚན་རིག་སྟེ་བོད་རྒྱུད་ནང་བསྟན་ཆོས་ལུགས་དང་།  བོད་ཀྱི་རིག་གཞུང་འདིས་ང་ཚོ་ལ་དོན་དངོས་ཐོག་མིའི་རིགས་ཀྱི་འཇིག་རྟེན་ལ་ཁ་ཕྱོགས་རྒྱུར་དྲན་སྐུལ་དང་ངེས་ཤེས་ཟབ་མོ་ཞིག་སྤྲད་ཡོད།” ཅེས་བརྗོད་སོང་། 

མཇུག་མཐར། སྤྱི་འཐུས་ཚོགས་གཙོ་མཆོག་གིས་ད་ལྟའི་ཆར་བོད་ཀྱི་རིག་གནས་དེ་གཞན་དབང་འོག་ཉམ་ཉེས་འགྲོ་བཞིན་པའི་ཛ་དྲག་གནས་སྟངས་སྐོར་གསུངས་དོན། “ང་རང་རྒྱ་གར་དུ་སྐྱེས་པའི་བོད་པ་ཞིག་ཡིན་ལ། མཚམས་རེར་ངས་སོ་སོའི་ཕྱི་ལོགས་བོད་པ་དང་བསམ་བློ་རྒྱ་གར་བ་ཡིན་ཟེར་གྱིན་ཡོད། རྒྱ་གར་གྱི་རིག་གནས་དཔལ་ཡོན་དུས་རབས་ ༧ ནང་བོད་དུ་དར་བ་ནས།  ཕྱོགས་ཡོངས་ནས་བོད་མིའི་འཚོ་བ་སྐྱེལ་སྟངས་ལ་འགྱུར་བ་ཐེབས་པ་རེད། འབྱུང་ཁུངས་རྒྱ་གར་ཡིན་པའི་རིག་གནས་དཔལ་ཡོན་དེར་བོད་མིས་སྲུང་སྐྱོབ་དང་བདག་པོ་ཡག་པོ་བརྒྱབ་ཡོད། ཡིན་ནའང་། ད་ལྟའི་ཆར་བོད་ནང་དུ་བོད་པའི་སྐད་ཡིག་རིག་གཞུང་དང་། ནང་ཆོས་ཉམས་ལེན་སོགས་ཀྱི་ཐད་གཞན་དབང་འོག་ཉམས་ཉེས་ཆེན་པོ་འགྲོ་བཞིན་ཡོད།” བརྗོད་དེ། རྒྱ་ནག་གཞུང་གིས་བོད་ནང་དུ་ཡང་ཞིང་འབྲོག་ས་ཁུལ་གྲོང་ཁྱེར་དུ་སྒྱུར་ཐབས་ཀྱི་འཛུགས་སྐྲུན་སྣ་ཚོགས་བྱས་ཏེ། རྒྱ་རིགས་མང་པོ་བོད་ནང་གནས་སྤོར་གྱིས་ད་ལྟ་བོད་ནང་དུ་བོད་མི་གྲངས་ཉུང་ཅན་དུ་གྱུར་ཡོད་ལ། ལོ་ངོ་མང་པོའི་ལོ་རྒྱུས་རིག་གནས་ཡོད་པའི་དགོན་སྡེ་ཁག་གཏོར་བཤིག་གཏོང་བཞིན་ཡོད། ཡིན་ནའང་། བོད་མིའི་རིག་གཞུང་ལས་བསྐྱེད་པའི་བསམ་བློའི་ཚེ་སྲོག་ལ་དབང་སྒྱུར་དང་གཏོར་བརླག་གཏོང་མི་ཐུབ་པའི་སྐོར་སོགས་གསུངས་སོང་།

གསར་འགོད་པ། ཚེ་རིང་རྒྱལ།