ཚངས་དབྱངས་རྒྱ་མཚོ་ལགས་ཀྱིས་གནས་ཚུལ་བཏང་འབྱོར་ལ། ཟླ་འདིའི་ཕྱི་ཚེས་ ༦ ཉིན་རྒྱ་གཞུང་གི་ཉེན་རྟོག་པས་མགོ་ལོག་པདྨ་མ་རྫོང་གྱི་མཁར་ཡུལ་ཚོའི་སྟོབས་དབང་འཛིན་རྩིས་བྱས་པར་མཐའ་འཁོར་གྱི་བོད་མི་ཚོས་བཀག་འགོག་བྱས་སྐབས། རྒྱ་དམག་གིས་གང་བྱུང་མེ་མདའ་བརྒྱབ་སྟེ་རང་ལོ་ ༢༨ ཡས་མས་ཡིན་པའི་ཆོས་རིས་དམར་གསོད་བཏང་ཡོད་འདུག་ལ། བོད་མི་གཞན་གཉིས་ལ་རྨས་སྐྱོན་ཚབས་ཆེན་ཕོག་ཡོད་འདུག
གནས་ཚུལ་ནང་བཀོད་དོན། ཕྱི་ཟླ་ ༡ ཚེས་ ༢༥ ཉིན་མགོ་ལོག་པདྨ་རྫོང་སྟག་མཁར་ཡུལ་ཚོའི་མཁར་ནང་ཚོ་བ་དང་། རྟོག་རྟོག་ཚོ་བ། གྱི་མཁར་ཡུལ་ཚོའི་གྱི་ལུང་ཚོ་བ་བཅས་ཀྱིས་སྟར་མཁར་ཡུལ་ཚོའི་སྟེང་དུ་རྒྱ་གཞུང་ལ་ཞི་རྒོལ་བྱས་ཏེ་རྒྱ་གཞུང་གི་རྒྱལ་དར་མར་ཕབ་པ་སོགས་བྱས་པར་རྟེན་མི་མང་པོ་ཞིག་ཉིན་དེ་ནས་བཟུང་རིའི་སྒང་ལ་བྲོས་བྱོལ་བྱེད་དགོས་ཁེལ་ཡོད་པ་དང་། ཉིན་དེ་ནས་བཟུང་ས་གནས་ཡོངས་ལ་དམག་མི་ཕོན་ཆེན་འགྲེམ་འཇོག་བྱས་ཡོད་འདུག
ཕྱི་ཟླ་ ༣ ཚེས་ ༦ ཉིན་གྱི་མཁར་ཡུལ་ཚོའི་ཐོག་ཏུ་གོང་ཚེས་ཉིན་ཞི་རྒོལ་ནང་མཉམ་ཞུགས་བྱེད་མཁན་གྱི་མཁར་ཡུལ་ཚོའི་ཕ་སྟོབས་རྒྱས་དང་། མ་སྦེ་ལོ་གཉིས་ཀྱི་བུ་སྟོབས་དབང་འཛིན་བཟུང་བྱེད་སྐབས། ཆོས་རིས་དང་འཇམ་དཔལ་བློ་གྲོས། དཀར་ཁོ་སོགས་ཀྱིས་བར་འདུམ་བྱས་པར་ཉེན་རྟོག་པ་དང་དམག་མིས་གང་བྱུང་མེ་མདའ་བརྒྱབ་སྟེ། ཆོས་རིས་ཀྱི་གདོང་པར་མེ་མདའ་ཕོག་སྟེ་ས་གནས་དེ་གར་སྐུ་གྲོངས་ཡོད་འདུག
གཞན་ཕ་ལུག་རེས་དང་། མ་སྦོ་རྡེས་གཉིས་ཀྱི་བུ་སྐར་ཁོ་དང་། འཇམ་དཔལ་བློ་གྲོས་གཉིས་ལ་རྨས་སྐྱོན་ཚབས་ཆེན་ཕོག་སྟེ། ད་སྐབས་མགོ་ལོག་ཁུལ་ཐོག་ཏུ་སྨན་བཅོས་བྱེད་བཞིན་ཡོད་པ་དང་། ད་སྐབས་མགོ་ལོག་པདྨ་རྫོང་ནས་དམག་མི་ཕོན་ཆེན་ས་གནས་དེར་སྐྱོད་བཞིན་ཡོད་འདུག
འདས་པོ་ཆོས་རིས་ལགས་ནི་དར་རྒྱས་དང་པིར་རྡོག་གཉིས་ཀྱི་བུ་ཡིན་ཞིང་། ད་སྐབས་ཁོང་རང་ལོ་ ༢༨ ཡས་མས་ཡིན་འདུག་ལ། ཁོང་གི་ཆུང་མའི་མིང་པུག་མོ་ཟེར་ཞིང་། ཁོང་གཉིས་ལ་ཕྲུ་གུ་གཅིག་ཀྱང་ཡོད་འདུག་ཅེས་སོགས་བཀོད་འདུག
སྐྱོ་བ་ལའང་།
ད་མཆན་ཞིག་བཏབས་ནས་ཀྱང་ཡོང་རྒྱུ་མི་འདུག་མོད། རང་ཉིད་ཀྱི་ན་ཚ་ངེས་ཟིན་ཆེད་དང་། ཉིན་རེའི་དྲན་གསོའི་ཚུལ་དུ་མཆན་རེ་འབྲི་དགོས། རྒྱ་ནག་གིས་ང་ཚོ་ངེས་པར་མི་ཞིག་ཡིན་པ་ཧ་གོ་དགོས་ལ། ད་དུང་རང་དབང་དང་། དྲང་བདེན་གྱི་ཆེད་དུ་འཆི་བ་ལ་མི་སྐྲག་པའང་ངེས་པར་དུ་ཤེས་ན་བཟང་།
འཇིག་རྟེན་འདིར་ཤེས་ཡོན་གྱི་མ་འདང་བ་མ་རེད་ལགས། བྱམས་བརྩེའི་མ་འདང་བ་རེད་ཅེས་ད་ནངས་༸གོང་ས་མཆོག་གིས་གསུངས་བ་འདི་ཅི་འདྲའི་བདེན་པ་རེད་ཨང༌། ཁྲག་རྒྱུན་གཅིག་པའི་བོད་ནང་གི་བོད་མི་ཚོ་ལ་སེམས་གྱི་ཞི་བདེ་ཡོང་བའི་སྨོན་འདུན་དུ།
རྒྱ་དམར་གུང་ཁྲན་ཏང་འདིས་བོད་མི་རིགས་དེ་བཞིན་སྲོག་ལྡན་གྱི་གང་ཟག་ཞིག་ཡིན་པར་ནམ་ཡང་ཚོར་གྱི་མེད་པ་འདྲ། སྙིགས་དུས་འདིར་རྫུན་མས་དྲང་བདེན་གྱི་བླ་སྲོག་འབུར་འཇོམས་འདི་ལྟར་གནང་བར་ངོ་མ་བློ་ཕམ་དགོས་པའི་ཞིག་ལོས་ཡིན།
ཅི་འདྲའི་ཡ་ང་བ་རེད། ཨོཾ་མ་ཎི་པདྨེ་ཧུཾཿ ཨོཾ་མ་ཎི་པདྨེ་ཧུཾཿ ཨོཾ་མ་ཎི་པདྨེ་ཧུཾཿ ཨོཾ་མ་ཎི་པདྨེ་ཧུཾཿ