གཞུང་གི་ལས་བྱེད་ཚོས་མི་མང་ལ་མཐོང་སྤྲོད་རོགས།

ཉེ་ལམ་ངྷ་སར་གནས་སྡོད་ཆོས་འཕེལ་ཚེ་དབང་ལགས་དང་། ངྷ་ས་ས་གནས་མགོ་འཛིན་བསོད་ནམས་རྡོ་རྗེ་ལགས་གཉིས་བར་རྙོག་གླེང་ཞིག་བྱུང་ཡོད་པ་དེ་ཕྱི་ཚེས་ ༤ ཉིན་ངྷ་ས་ས་གནས་འཐུས་ཚོགས་དང་། རང་བདེན་ཚོགས་ཆུང་གཉིས་ཀྱིས་ཐག་གཅོད་གནང་བ་ལྟར་ཕྱོགས་གཉིས་ཀྱིས་དང་ལེན་གནང་ཡོད་འདུག

ཟླ་འདིའི་ཕྱི་ཚེས་ ༢  ཉིན་གྱི་སྔ་དྲོར་ངྷ་སར་གནས་སྡོད་བོད་མི་ཆོས་འཕེལ་ཚེ་དབང་ལགས་མི་གཞན་ཞིག་གི་འཛིན་བྱང་(Ration card )ཞེས་པར་རྒྱབ་གཉེར་ལེན་ཆེད། ངྷ་ས་བདེ་དོན་ལས་ཁུངས་སུ་བཅར་ཏེ་ལས་བྱེད་ཡེ་ཤེས་ལགས་སུ། བདེ་དོན་ལས་ཁུངས་ཀྱིས་ཟླ་ ༢ ལྷག་རིང་མི་མང་ལ་མཚན་རྟགས་རྒྱབ་གཉེར་མ་སྤྲད་སྟབས། གལ་སྲིད། མུ་མཐུད་རྒྱབ་གཉེར་མ་སྤྲད་པ་ཡིན་ན་བཀའ་ཤག་ལ་སྙན་གསེང་ཞུ་རྒྱུ་ཡིན་ཞེས་བཤད་སྐབས། ས་གནས་མགོ་འཛིན་བསོད་ནམས་རྡོ་རྗེ་ལགས་དེར་ཕེབས་ཏེ། ལས་དོན་དེར་ཁྱོད་རང་ལ་ཇུས་གཏོགས་མེད། ཁྱོད་རང་ལས་ཁུངས་ནས་ཕྱིར་ཐོན་ཞེས་ལབ་སྐབས། ཆོས་འཕེལ་ཚེ་དབང་ལགས་ཁོང་ཁྲོ་ལངས་ཏེ་ས་གནས་མགོ་འཛིན་གྱི་གདོང་ལ་ཁུ་ཚུར་གཉིས་གཞུས་ཡོད་འདུག གནས་ཚུལ་དེ་བསོད་ནམས་རྡོ་རྗེ་ལགས་ཀྱིས་བདེ་སྲུང་ཡན་ལག་དང་། ངྷ་ས་ཕར་ངོས་ཧྤོར་སི་གྷན་ཇིའི་རྒྱ་གར་སྐོར་སྲུང་ལས་ཁུངས་བཅས་ལ་ཁྲིམས་གཏུག་བྱས་ཡོད་པ་དང་། ཆོས་འཕེལ་ཚེ་དབང་ལགས་ཀྱིས་ཀྱང་ཁྲིམས་གཏུག་བྱ་འཆར་ཡོད་སྐབས། ངྷ་ས་ས་གནས་འཐུས་ཚོགས་དང་རང་བདེན་ཚོགས་ཆུང་གཉིས་ཀྱིས་བར་འདུམ་གནང་ཡོད་འདུག

ཕྱི་ཚེས་ ༣ ཉིན་ས་གནས་འཐུས་ཚོགས་དང་རང་བདེན་ཚོགས་ཆུང་ཐུན་མོང་གིས་གོང་གསལ་རྩོད་ཉོག་དེར་བར་འདུམ་ཆོད་ཡིག་ཅིག་བཞག་ཡོད་པའི་ནང་། ཆོས་འཕེལ་ཚེ་དབང་ལགས་ཀྱིས་ངྷ་ས་ས་གནས་མགོ་འཛིན་བསོད་ནམས་རྡོ་རྗེ་ལགས་སུ་ལག་པ་བརྐྱངས་རྗེས། བསོད་ནམས་རྡོ་རྗེ་ཡིས་རྒྱ་གར་སྐོར་སྲུང་ལས་ཁུངས་ལ་ཞུ་གཏུག་བྱས་ཟིན་ཡང་། ངྷ་ས་ས་གནས་འཐུས་ཚོགས་དང་རང་བདེན་ཚོགས་ཆུང་ཐུན་མོང་གིས་གནས་ཚུལ་དེར་འགན་ལེན་གནང་སྟེ། ཆོས་འཕེལ་ཚེ་དབང་ལགས་ཀྱིས་རང་སྐྱོན་ངོས་ལེན་གནང་དགོས་པ་དང་། ས་མགོ་བསོད་ནམས་རྡོ་རྗེ་ལགས་ཀྱིས་ཀྱང་ཞུ་གཏུག་ཡིག་ཆ་(FIR)དེ་རྒྱ་གར་སྐོར་སྲུང་ལས་ཁུངས་ནས་ཕྱིར་འཐེན་བྱ་དགོས་པའི་འབོད་སྐུལ་ཞུས་པར། ཕྱོགས་གཉིས་ཀས་མོས་མཐུན་གནང་ཡོད་པ་མ་ཟད། གོང་གསལ་ཚོགས་པ་གཉིས་ཀྱི་ཐག་གཅོད་གང་གནང་ལ་དང་ལེན་ཞུ་རྒྱུའི་ཁས་ལེན་ཞུས་ཡོད་སྐོར་བཀོད་འདུག

རྙོག་དྲ་དེའི་ཐད་ས་གནས་འཐུས་ཚོགས་དང་རང་བདེན་ཚོགས་ཆུང་གཉིས་ཀྱིས་ཕྱོགས་ངོས་ནས་འགན་ལེན་ཁག་འཁུར་ཞུ་དགོས་པའི་དོན་ཚན་ ༥ བཀོད་ཡོད་པ་དག་ནི། དང་པོ། དོ་བདག་ཆོས་འཕེལ་ཚེ་དབང་ནས་ས་གནས་འཐུས་ཚོགས་དང་རང་བདེན་ཚོགས་ཆུང་ས་གནས་མགོ་འཛིན་ལས་བྱེད་བརྒྱ་དཔོན་རྣམ་པ་བཅས་ཚང་འཛོམས་ཐོག ༧གོང་ས་མཆོག་གི་སྐུ་དཔར་མཐོང་གྲོལ་རིན་པོ་ཆེར་སྔོན་ཆད་རྒྱབ་བསྐྱུར་དང་། ཕྱིན་ཆད་དེ་རིགས་མི་ཡོང་བའི་ཁས་ལེན་གྱི་ཕྱག་གསུམ་དང་མཇལ་དར་འབུལ་རྒྱུ། གཉིས་པ། ས་གནས་མགོ་འཛིན་ལ་ལག་པ་བརྐྱངས་པར་དགོངས་སེལ་ཆེད་མཇལ་དར་འབུལ་རྒྱུ། གསུམ་པ། ས་གནས་མགོ་འཛིན་ལས་ཁུངས་དང་ལས་བྱེད་རྣམས་ཀྱི་ཆེ་མཐོང་ཆེད་ཉེས་ཆད་ལ་ཧིན་སྒོར་ ༥༠༠༠ འབུལ་རྒྱུ། བཞི་བ། ཕྱི་ལོ་ ༢༠༡༢ ཕྱི་ཟླ་ ༣ པའི་ཚེས་ ༤ ཉིན་ནས་ལོ་གསུམ་རིང་དོ་བདག་སྒེར་གྱི་ལས་དོན་ཐོག་ས་གནས་མགོ་འཛིན་ལས་ཁུངས་ཀྱིས་མཐུན་སྦྱོར་རྒྱབ་གཉེར་རིགས་འགོག་རྒྱུ་མ་ཟད་དོ་བདག་རང་ཡིག་ཚང་དུ་ངོ་བཅར་མི་ཆོག ཡིན་ན་ཡང་དོ་བདག་གི་བཟའ་ཟླ་བུ་ཕྲུག་རྣམས་ཀྱི་ཆེད་ས་གནས་མགོ་འཛིན་གྱིས་རྒྱབ་གཉེར་དང་། གནད་དོན་གང་གི་ཐོག་ནང་མི་ངོ་བཅར་ཞུས་རིགས་ལ་རོགས་རམ་གནང་རྒྱུ་ལས་བཀག་འགོག་བྱ་མི་ཆོག་པ།  ལྔ་པ། མ་འོངས་པར་གནད་དོན་དེའི་རིགས་མི་འབྱུང་ཆེད་ཆོས་འཕེལ་ཚེ་དབང་གིས་ཁས་ལེན་མཚན་རྟགས་འགོད་རྒྱུ་དང་། གལ་ཏེ་གན་རྒྱའི་ཡི་གེར་བརྩི་བཀུར་མ་ཞུས་ཚེ་སྒྲིག་གསལ་ལྟར། ས་གནས་སྐོར་སྲུང་བར་རྩིས་སྤྲོད་ཞུ་རྒྱུ་ལས་ཚོགས་པ་གཉིས་ནས་ཐེ་གཏོགས་ཞུ་རྒྱུ་མིན། ཞེས་བཀོད་འདུག་ལ། ཕྱི་ཚེས་ ༤ ཉིན་དོ་བདག་ཕྱོགས་གཉིས་ཀྱིས་ཐོག་གཅོད་དེ་ལ་མོས་མཐུན་གནང་སྟེ་རྩོད་ཉོག་འགྲིག་འཇགས་བྱུང་ཡོད་པ་རེད།

ཕྱི་ཚེས་ ༦ ཉིན་གསར་འགོད་པས་ས་གནས་མགོ་འཛིན་བསོད་ནམས་རྡོ་རྗེ་ལགས་སུ། རྩོད་ཉོག་དེའི་འབྱུང་རྐྱེན་ས་གནས་མི་མང་གི་འཛིན་བྱང་ཟླ་གཉིས་ཙམ་ལ་རྒྱབ་གཉེར་སྤྲད་མེད་པ་བདེན་པ་ཡིན་མིན་དྲིས་པར་ཁོང་གིས། “ བདེ་དོན་ལས་ཁུངས་ཀྱི་ངོས་ནས་འདི་ལོའི་ཕྱི་ཟླ་ ༢ པའི་བར་དུ་མི་མང་ལ་རྒྱབ་གཉེར་སྤྲད་ཡོད་ཀྱང་། བསླེབ་ལ་ཉེ་བའི་ས་གནས་འཐུས་ཚོགས་ཐོག་ལས་ཁུངས་ཀྱིས་ཟླ་ ༦ གི་ལས་དོན་དང་རྩིས་ཁྲ་འབུལ་དགོས་སྟབས། ཟླ་འདིའི་ཚེས་ ༡ ནས་ ༡༠ བར་མི་མང་ལ་རྒྱབ་གཉེར་སྤྲོད་རྒྱུ་མིན་པའི་གསལ་བཤད་བྱེད་ཀྱི་ཡོད། ཕྱི་ཚེས་ ༢ ཉིན་ཆོས་འཕེལ་ཚེ་དབང་མི་གཞན་ཞིག་གི་འཛིན་བྱང་ལ་རྒྱབ་གཉེར་ལེན་དུ་ཡོང་སྐབས་འགྲེལ་བཤད་བརྒྱབ་མིན་ལ་མ་ལྟོས་པར་རྙོག་དྲ་དེ་བྱུང་བ་རེད” ཅེས་བརྗོད་བྱུང་།

ཁོང་གིས་མུ་མཐུད་དུ་བརྗོད་རྒྱུར། “ས་གནས་མགོ་འཛིན་ལ་ལག་པ་བརྐྱངས་པ་ད་རེབ་གཅིག་པུ་མ་རེད། སྔོན་མ་འདིའི་རིགས་མང་པོ་བྱུང་འདུག ང་རང་ལ་མཚོན་ན་ཐེངས་གཉིས་པ་ཡིན། གནས་ཚུལ་འདིའི་འབྱུང་རྐྱེན་མཚམས་རེར་ང་ཚོའི་ལས་ཀར་ཡིད་མ་ཚིམ་པ་དང་། སོ་སོའི་ལས་ཀ་མ་འགྲུབ་པ་ལས་འབྱུང་བཞིན་ཡོད་པ་རེད་ལ། མཚམས་རེར་འོས་བསྡུའི་སྐབས་རྒྱབ་སྐྱོར་ཡོད་མེད་ཀྱི་ཐོག་ནས་ཡོང་གི་མེད་འགྲོ་སྙམ་པའི་དོགས་པ་འདུག འོན་ཀྱང་འདིའི་རིགས་ལ་བརྟེན་ནས་སེམས་ཤུགས་ཆག་གི་མེད། མི་མང་གི་ངོས་ནས་ང་ཚོའི་ལས་ཀར་བསམ་འཆར་ཡོད་ན། ས་གནས་འཐུས་ཚོགས་དང་བརྒྱ་དཔོན་སོགས་བརྒྱུད་དེ་ཞུ་དགོས་པ་རེད” ཅེས་བརྗོད་བྱུང་།

ཕྱི་ཚེས་ ༧ ཉིན་གསར་འགོད་པས་ཆོས་འཕེལ་ཚེ་དབང་ལགས་སུ་བཅར་འདྲི་ཞུས་པར་ཁོང་གིས། “ ཉིན་དེར་ང་རང་ཁོང་ཁྲོའི་ཐོག་ནས་ཟུང་དྲུང་གི་གནས་རིམ་ཡོད་པའི་གཞུང་གི་ལས་བྱེད་ཅིག་ལ་ལག་པ་བརྐྱངས་པ་དེ་ངའི་ནོར་འཁྲུལ་རེད། ཡིན་ནའང་རྗེས་སུ་ཁོ་རང་གིས་ཀྱང་ང་ཚོ་བོད་མིར་སྐྱིད་སྡུག་ཞུ་ས་ཞིག་ཡོད་བཞིན་དུ་རྒྱ་གར་ཉེན་རྟོག་པར་ཞུ་གཏུག་སྙན་ཞུ་ཕུལ་འདུག་པ་དེའང་ཏག་ཏག་ཅིག་བསྡད་ཡོད་པ་མ་རེད། གཞུང་གི་ལས་བྱེད་ཅིག་ལ་མཚོན་ན། མི་མང་ལ་མཐོང་སྤྲོད་རྒྱུ་དེ་གལ་ཆེན་པོ་རེད། རང་ཉིད་ལས་བྱེད་ཡིན་ཞེས་མི་མང་གི་འགན་མ་འཁུར་བ་ཡིན་ན། གནས་ཚུལ་འདིའི་རིགས་ད་དུང་འབྱུང་མི་སྲིད་པ་མ་རེད་དྲན་ཡོད” ཅེས་བརྗོད་བྱུང་།

ཆོས་འཕེལ་ཚེ་དབང་ལགས་ཀྱིས་མུ་མཐུད་དུ་བརྗོད་པ་ལྟར་ན། ཁོ་རང་གིས་འདས་པའི་ལོ་ ༨ ལྷག་གི་རིང་བཞུགས་སྒར་ཉེ་ཁུལ་གྱི་མི་མང་ལ་ལག་འཁྱེར་གྱི་ཐད་ནས་རོགས་རམ་བྱས་པ་དང་། ད་དུང་མུ་མཐུད་དུ་གང་ཐུབ་ཅི་ཐུབ་གནང་འདོད་ཡོད་སྐོར་བརྗོད་བྱུང་།  

གསར་འགོད་པ། དོན་གོ