ཧྥ་རན་སིར་བོད་ཀྱི་རིས་མེད་སྨོན་ལམ།

སང་ཉིན་ཕྱི་ཚེས་ ༡༠ ཉིན། ཧྥ་རན་སིར་རྟེན་གཞི་བྱས་པའི་བོད་ཀྱི་བྱམས་བརྩེ་ཁང་གིས་གོ་སྒྲིག་འོག ཧྥ་རན་སིའི་རྒྱལ་ས་ཕ་རེ་སིའི་ནང་བོད་ཀྱི་རིས་མེད་སྨོན་ལམ་ཞིག་ཚོགས་གཏན་འཁེལ་ཡོད་ཅིང་། ཚོགས་མགོན་དུ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་ཆེད་དུ་རྒྱ་གར་ནས་གདན་ཞུ་གནང་ཡོད་འདུག གོ་སྐབས་དེ་དང་བསྟུན་ཏེ་ཧྥ་རན་སིའི་གྲོས་ཚོགས་གོང་མ་དང་། ས་གནས་གཞུང་འཛིན་ལས་ཁུངས་བཅས་སུ་ཟམ་གདོང་རིན་པོ་ཆེ་མཆོག་ལ་ད་ལྟའི་བོད་ནང་གི་གནས་སྟངས་ཆེད་ཛ་དྲག་འབོད་སྐུལ་གྱི་གསུང་བཤད་གོ་སྒྲིག་བྱས་ཡོད་འདུག

ཐེངས་འདིའི་སྨོན་ལམ་གོ་སྒྲིག་པ་བོད་ཀྱི་བྱམས་བརྩེ་ཁང་གི་དབུ་འཛིན་སུམ་གྱང་རིན་པོ་ཆེས་ངོ་སྤྲོད་གནང་དོན། “ རྩ་བའི་སྔོན་མ་བོད་ནང་དང་ད་ལྟ་རྒྱ་གར་ནང་ལོ་སར་སྐབས་ཆོས་བརྒྱུད་འདྲ་མིན་གྱི་སྨོན་ལམ་ཚོགས་སྲོལ་ཡོད་པ་རེད། སྨོན་ལམ་དེ་དག་གི་སྐབས་སུ་ཆོས་ཕྱོགས་ཀྱི་མཛད་རིམ་གཅིག་བུ་མ་ཡིན་པར། མི་མང་པོ་མཉམ་དུ་འཛོམས་ནས་གླུ་ལེན་གར་རྩེད་ཀྱིས་མཚོན་པའི་རིག་གཞུང་གི་ལས་རིམ་གང་མང་ཞིག་ཀྱང་སྤེལ་གྱིན་ཡོད་པ་རེད། ལོ་རྒྱུས་ཆ་ཀྱི་ནས་ཡིན་ན་རེད། ད་ལྟའི་གནས་སྟངས་ཀྱི་ཆ་ནས་ཡིན་ན་རེད། སྨོན་ལམ་ཚོགས་སྲོལ་འདིས་བོད་མི་ཚོའི་མཉམ་རུབ་མཉམ་གནས་ལ་ཧ་ལས་པའི་ཕན་ཐོགས་བྱུང་ཡོད་པ་རེད། དེ་སྒང་ལ་ད་ལྟ་ཧྥ་རན་སི་ནང་ལ་ཆ་མཚོན་ན་ལོ་རེ་བཞིན་བོད་མི་ཇེ་མང་དུ་འགྲོ་བཞིན་ཡོད་པ་རེད། ཡིན་ནའང་། བོད་པའི་མཉམ་གནས་མཉམ་རུབ་ཀྱི་ཁོར་ཡུག་དང་གོ་སྐབས་ཧ་ལས་པའི་ཉུང་ཉུང་རེད། དེར་བརྟེན། བོད་པའི་སྲོལ་རྒྱུན་རྒྱུན་འཛིན་དང་ཧྥ་རན་སིའི་བོད་མི་ཚོར་བོད་ཀྱི་ཁོར་ཡུག་ཅིག་བསྐྲུན་ཆེད་ད་ཐེངས་ཀྱི་རིས་མེད་སྨོན་ལམ་འདི་གོ་སྒྲིག་བྱས་ཡིན” ཞེས་དང་། ཁོང་གི་བརྗོད་པ་ལྟར་ན། རིས་མེད་སྨོན་ལམ་འདི་ལོ་རེ་བཞིན་ཚོགས་རྒྱུ་ཡིན་ཞིང་། སྨོན་ལམ་སྐབས་ཆོས་ཕྱོགས་ཀྱི་མཛད་རིམ་རྐྱང་བ་མ་ཡིན་པར། ཧྥ་རན་སིར་ཡོད་པའི་བོད་མི་དང་ལྷག་པར་རྒྱལ་ཁབ་འདིའི་ནང་འཚར་ལོངས་བྱུང་བཞིན་པའི་བོད་ཕྲུག་ཚོའི་ཆེད་དུ་ལས་རིམ་འདྲ་མིན་གོ་སྒྲིག་ཡོད་ནའང་། ད་ལོའི་བོད་ནང་གི་ཛ་དྲག་གི་གནས་སྟངས་ཀྱི་དབང་གིས་གླུ་ལེན་གར་རྩེད་ཀྱི་མཚོན་པའི་ལས་རིམ་ཁག་ཅིག་ཕྱིར་འཐེན་བྱས་ཡོད་འདུག་ལ། དེ་དག་གི་ཚབ་ཏུ་ཟམ་གདོང་རིན་པ་ཆེར་གྲོས་ཚོགས་དང་ས་གནས་སྲིད་གཞུང་བཅས་སུ་གསུང་བཤད་གོ་སྒྲིག་བྱས་ཡོད་འདུག

ཉིན་གསུམ་རིང་གི་སྨོན་ལམ་མཛད་རིམ་ལྟར་ན། སང་ཉིན་ཕྱི་ཚེས་ ༡༠ ཉིན་གྱི་སྔ་དྲོའི་ཆུ་ཚོད་ ༩ ཐོག་བཀའ་བློན་ཁྲི་ཟུར་ཟམ་གདོང་རིམ་པོ་ཆེ་དབུ་བཞུགས་ཀྱིས་རྒྱལ་ས་ཕ་རེ་སིའི་ཚོགས་ཁང་(L’ESPACE ST MARTIN)ནང་དབུ་འཛུགས་བྱ་རྒྱུ་ཡིན་ཞིང་།  ཉིན་རྒྱབ་ཆུ་ཚོད་ ༣ པའི་ཐོག་ཚོགས་ཞུགས་པ་ཚང་མ་བོད་རིགས་ཚོགས་པའི་གོ་སྒྲིག་བྱས་པའི་གསུམ་བཅུ་དུས་དྲན་སྟེང་མཉམ་ཞུགས་བྱ་རྒྱུ་ཡིན་འདུག ཕྱི་ཚེས་ ༡༡ ཉིན་གང་བོར་ས་གནས་(BREUILPONT)སུ་རྟེན་གཞི་བྱས་པའི་ད་ཚང་གླིང་དུ་ཟམ་གདོང་རིན་པོ་ཆེས་དགེ་བཤེས་གླིང་རུ་ཚང་བའི་༼ བློ་སྦྱོང་ཚིག་བརྒྱད་མའི་༽བཀའ་ཆོས་གནང་རྒྱུ་ཡིན་འདུག ཕྱི་ཚེས་༩ སྟེ། དེ་རིང་ཕྱི་དྲོ་ཆུ་ཚོད་ ༧ ཐོག ཟམ་གདོང་རིན་པོ་ཆེས་ཕ་རེ་སིའི་རྫོང་གྲོང་ ༡༡ པའི་རྫོང་དཔོན་སྐུ་ཞབས་(PATRICK BLOCHE) དང་མཇལ་འཕྲད་དང་། རྫོང་ལས་ཁུངས་ཀྱི་ཚོམས་ཆེན་ནང་བོད་དོན་རྒྱབ་སྐྱོར་ཚོགས་པ་ཁག་ལ་ད་ལྟའི་བོད་ནང་གི་ཛ་དྲག་གནས་སྟངས་ཐད་འབོད་སྐུལ་གསལ་བསྒྲགས་ཀྱི་གསུང་བཤད་གནང་རྒྱུ་ཡིན་འདུག་ལ། ཕྱི་ཚེས་ ༡༣ ཉིན་གྱི་ཕྱི་དྲོ་ཆུ་ཚོད་༦ སྟེང་ཧྥ་རན་སིའི་གྲོས་ཚོགས་གོང་མའི་ནང་དེ་མཚུངས་ཀྱི་གསུང་བཤད་གནང་རྒྱུ་ཡིན་འདུག ཐེངས་འདིའི་སྨོན་ལམ་དང་གཏམ་བཤད་ལས་རིམ་ཚང་མའི་ནང་ཨ་རིའི་གོ་ལིམ་པི་ཡ་གཙུག་ལག་སློབ་གཉེར་ཁང་གི་ནང་དོན་རིག་པའི་འགན་འཛིན་སྐུ་ཞབས་(ROBERT THURMAN)དང་། ཧྥ་རན་སིའི་ཞི་བདེ་དང་འཛམ་གླིང་སྤྱིའི་འགན་ཁུར་ཚོགས་པའི་མགྲིན་ཚབ་པ་ལྕམ་(SOFIA STRIL-REVER) གཉིས་མཉམ་ཞུགས་གནང་གི་ཡོད་འདུག

ཧྥ་རན་སིའི་བོད་ཀྱི་བྱམས་བརྩེ་ཁང་ནི་ཕྱི་ལོ་ ༢༠༠༦ ལོར་སུམ་གྱང་སྤྲུལ་སྐུས་ཐེག་ཆེན་ནང་བའི་རིག་གཞུང་གཅེས་སྐྱོང་ལྷན་ཁང་ཞེས་པའི་མིང་ཐོག་ནས་རྒྱ་གར་རྡོ་རྗེ་གླིང་དུ་གསར་འཛུགས་གནང་བ་ཞིག་ཡིན་ཞིང་། ཕྱི་ལོ་ ༢༠༡༠ ལོར་ཁོང་ཧྥ་རན་སིར་གནས་སྤོ་གནང་རྗེས་བོད་ཀྱི་བྱམས་བརྩེ་ཁང་ལ་མིང་བསྒྱུར་བྱས་ཡོད་འདུག བོད་ཀྱི་བྱམས་བརྩེ་ཁང་འདིས་རྒྱ་གར་ནང་ཡོད་པའི་བོད་མི་ཉམས་ཐག་ཁག་ལ་འཚོ་གནས་དང་ཤེས་ཡོན་སློབ་གསོའི་རོགས་སྐྱོར་དང་། ཧྥ་རན་སིའི་ནང་ཡོད་པའི་བོད་མི་ཚོར་བོད་པའི་ཆོས་རིག་མི་ཉམས་བརྒྱུད་ཐད་གོ་སྒྲིག་རོགས་རམ། མ་ལེ་ཤི་ཡ་དང་སུད་སི། སུ་པན་བཅས་ནང་ཡན་ལག་ཆོས་ཚོགས་གསར་འཛུགས་ཀྱིས་དོ་དམ་འཛིན་སྐྱོང་བྱེད་ཀྱི་ཡོད་འདུག

ས་གནས་གསར་འགོད་པ། ཟླ་བ་ཚེ་རིང་།