ཧྥ་རན་སིར་གསུམ་དུས་སྲུང་གཙི།༼པར༽

ཁ་སང་ཕྱི་ཚེས་ ༡༠ ཉིན་འཛམ་གླིང་གང་སར་ཡོད་པའི་བོད་མི་ཚོས་གསུམ་བཅུ་དུས་དྲན་ཐེངས་ལྔ་གསུམ་པ་དེ་སྲུང་གཙི་བྱས་ཡོད་པ་ལྟར། ཧྥ་རན་སིར་གནས་སྡོད་བོད་མི་དང་བོད་དོན་རྒྱབ་སྐྱོར་བ། གཞུང་དང་གཞུང་འབྲེལ་མིན་པའི་བོད་དོན་རྒྱབ་སྐྱོར་ཚོགས་པ་བཅས་མཉམ་རུབ་ཐོག་ཐེངས་འདིའི་དུས་དྲན་སྲུང་གཙི་བྱས་ཡོད།

དེ་ཡང་ཁ་སང་སྔ་དྲོ་ཆུ་ཚོད་ ༩ ཐོག་རྒྱལ་ས་ཕ་རི་སིར་བོད་ཀྱི་བྱམས་བརྩེ་ཁང་གིས་གོ་སྒྲིག་འོག་བཀའ་བློན་ཁྲི་ཟུར་ཟམ་གདོང་རིན་པོ་ཆེ་དབུ་བཞུགས་ཐོག་བོད་ཀྱི་རིས་མེད་སྨོན་ལམ་ཚོགས་ཡོད་པ་དང་། དེ་དང་དུས་མཉམ་ཕ་རེ་སིའི་རྫོང་གྲོང་གཉིས་པ་དང་བཅུ་གཅིག་པ་གཉིས་ཀྱིས་སྲིད་གཞུང་སྒོ་ཆེན་སྟེང་བོད་ཀྱི་རྒྱལ་དར་བསྒྲེངས་འཛུགས་བྱས་ཡོད། ཉིན་གུང་ཆུ་ཚོད་ ༡༢ ཐོག་ཧྥ་རན་སིའི་ས་གནས་ཁག་ ༢༣ གྱི་བོད་དོན་རྒྱབ་སྐྱོར་ཚོགས་པ་ཁག་གིས་ཚོགས་འདུ་ཞིག་བསྐངས་ཏེ། ལོ་འདིའི་ནང་བོད་དོན་འཐབ་རྩོད་ཀྱི་ལས་འགུལ་གང་སྤེལ་ཐད་གྲོས་བསྡུར་དང་། ཚོགས་པ་ཁག་མཉམ་རུབ་ཐོག་ཧྥ་རན་སི་གཞུང་དང་གྲོས་ཚོགས་གོང་འོག སྲིད་དོན་ཚོགས་པ་ཚང་མར་བོད་ནང་གི་ཛ་དྲག་གནས་སྟངས་ལ་དོ་ཁུར་དགོས་པའི་འབོད་སྐུལ་ཞུ་ཡིག་ཅིག་ཕུལ་ཡོད་འདུག

ཉིན་རྒྱབ་ཆུ་ཚོད་ ༣ ཐོག་ཧྥ་རན་སིའི་བོད་རིགས་ཚོགས་པའི་གོ་སྒྲིག་འོག་ཕ་རི་སིའི་རང་དབང་ཐང་ཆེན་དུ་དུས་དྲན་སྲུང་གཙིའི་མཛད་སྒོ་དངོས་གཞི་ཚུགས་ཤིང་། དངོས་གཞི་མཛད་སྒོ་ཐོག་ཕ་རི་སིའི་དབུས་བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་དྲུང་ཆེ་ཚེ་རིང་དོན་གྲུབ་དང་། ཕ་རི་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ (JENA FRANCOIS HUMBERT) རྫོང་གྲོང་ ༡༡ སྤྱི་ཁྱབ་དང་གྲོས་ཚོགས་འཐུས་མི་སྐུ་ཞབས(PARICK BLOCHE)ཕ་རི་སི་ས་གནས་འཐུས་མི་ཟུར་པ་ཞིག་བཅས་ཆེད་ཕེབས་ཀྱིས་བཀའ་ཤག་གི་གསུང་འཕྲིན་སྒྲོག་སྦྱོང་དང་གཏམ་བཤད་གནང་ཡོད། དུས་དྲན་ཐོག་མཉམ་ཞུགས་གནང་མཁན་དང་བོད་མི་ཚོས་རང་དབང་ཐང་ཆེན་ནས་མགོ་འཛུགས་ཀྱི་རྒྱ་ནག་གཞུང་ཚབ་ཁང་བར་ངོ་རྒོལ་སྐད་འབོད་ཀྱི་གོམ་བགྲོད་བྱས་ཡོད་ལ། ལམ་བར་དང་རྒྱ་ནག་གཞུང་ཚབ་མདུན་དུ་བོད་རང་དབང་སློབ་ཕྲུག་ཚོགས་པས་བོད་ནང་བཙོན་འཇུག་མནར་གཅོད་སྐོར་ལ་གཏམ་བརྗོད་ཟློས་གར་འཁྲབ་སྟོན་བྱས་ཡོད།

ད་ལོའི་ངོ་རྒོལ་སྐད་འབོད་སྟེང་ཧྥ་རན་སའི་ས་གནས་ཁག་ ༢༣ གྱི་བོད་དོན་རྒྱབ་སྐྱོར་ཚོགས་པ་ཙམ་མ་ཟད། རྒྱལ་ས་ཕ་རི་སིར་ཡོད་པའི་བོད་མི་ ༦༠༠ ལྷག་དང་། བོད་རང་དབང་སློབ་ཕྲུག་ཚོགས་པ། བོད་རྒྱ་མཐུན་ཚོགས། ཝེ་ཐི་ནམ་བོད་དོན་རྒྱབ་སྐྱོར་ཚོགས་པ། རྒྱ་ནག་དམངས་གཙོ་ཚོགས་པ། ཐེ་ཝན་རང་བཙན་ཚོགས་པ། ཡུ་གུར་མནའ་མཐུན་ཚོགས་པ་སོགས་མཉམ་ཞུགས་བྱས་ཡོད་འདུག་ལ། ད་ལོ་ཧྥ་རན་སི་གཞུང་གིས་རྒྱ་ནག་དོན་གཅོད་ཁང་ལ་སྲུང་སྐྱོབ་ནན་མོ་བྱས་ཡོད་འདུག

རིས་མེད་སྨོན་ལམ་བོད་རིག་པ་སྐུ་ཞབས་ལགས་ཀྱི་བོད་མིའི་རང་སྲེག་འཚེ་མེད་ཞི་བའི་འཐབ་རྩོད་པའི་གསུང་བཤད་གནང་བཞིན་པ།

ཧྥ་རན་སིའི་ས་གནས་ཁག་ ༢༣ གྱི་བོད་དོན་རྒྱབ་སྐྱོབ་ཚོགས་པའི་འཐུས་མིའི་ཚོགས་འདུ།

བོད་གཞུང་སྐུ་ཚབ་དོན་གཅོད། གྲོས་ཚོགས་འཐུས་མི། རྫོང་དཔོན། ས་གནས་འཐུས་མི་བཅས།

གོམ་བགྲོད་སྐབས་བོད་རང་དབང་སློབ་ཕྲུག་ཚོགས་པས་སྐད་འབོད་ལ་སྣེ་ཁྲིད་བཞིན་པ།

གོམ་བགྲོད་སྐབས་བོད་རང་དབང་སློབ་ཕྲུག་ཚོགས་པས་སྐད་འབོད་ལ་སྣེ་ཁྲིད་བཞིན།

བོད་ནང་གི་བཙོན་འཇུག་མནར་གཅོད་ཀྱི་གཏམ་བརྗོད་འཁྲབ་སྟོན་བྱེད་བཞིན་པ།

རྒྱ་ནག་གཞུང་ཚབ་ཁང་གི་མདུན་དུ།

ཧྥ་རན་སིས་རྒྱ་ནག་གཞུང་ཚབ་ཁང་ལ་སྲུང་སྐྱོབ་ནན་མོ་བྱེད་སྟངས།

ས་གནས་གསར་འགོད་པ། ཟླ་བ་ཚེ་རིང་།