ཙན་དན་དགོན་པར་རང་བཙན་སྦྱར་ཡིག

ཟླ་འདིའི་ཚེས་ ༤ ཉིན་སོག་ཙན་དན་དགོན་པའི་ཉེ་འདབས་ལ་བོད་རང་བཙན་ཡིན། རྒྱལ་བ་རིན་པོ་ཆེ་བོད་ལ་ཕེབས་འཇུག་དགོས་སོགས་ཀྱི་ཡི་གེ་མང་པོ་གཏོར་ཡོད་པ་དང་། རྒྱ་ནག་གཞུང་གིས་དམ་དྲག་སྔར་ལས་ཆེ་བ་བྱེད་ཀྱི་ཡོད་འདུག སོག་རྫོང་ཙན་དན་དགོན་པའི་གྲྭ་སྐལ་བཟང་ཚུལ་ཁྲིམས་ལགས་ཕྱི་ཟླ་ ༡ ཚེས་ ༡༥ ཡས་མས་ནས་གར་སོང་ཆ་མེད་དུ་གྱུར་ཡོད་པ་དང་། ས་གནས་མི་མང་གིས་ཁོང་རྒྱ་གཞུང་གིས་འཛིན་བཟུང་བྱས་པར་དོགས་པ་བྱེད་ཀྱི་ཡོད་འདུག

༢༠༡༡ ལོའི་ཕྱི་ཟླ་ ༡༢ ཚེས་ ༡༦ སོག་ཙན་དན་དགོན་པར་བོད་རང་བཙན་གྱི་སྦྱར་ཡིག་འགྲེམས་སྤེལ་བྱས་ཡོད་པ་དང་། གྲྭ་མང་རྣམས་འཁོར་ཞག་ལ་མ་སོང་གོང་དེར་རྫོང་སྤྱི་བདེ་མི་སྣ་རྣམས་ཀྱིས་གྲྭ་པ་ལོ་ཆུང་བ་རྣམས་ཀྱི་ལག་པ་པར་བརྒྱབ་སྟེ། ཡིག་ཆ་འགྲེམས་སྤེལ་བྱེད་མཁན་རྩད་གཅོད་བྱས་སྐབས། གྲྭ་སྐལ་བཟང་ཚུལ་ཁྲིམས་ཡིན་པར་དོགས་པ་བྱས་ཡོད་འདུག གྲྭ་སྐལ་བཟང་ཚུལ་ཁྲིམས་ནི་སོག་རོང་སྨད་ཚ་ཧྲོག་ཤང་ནས་ཡིན་པ་དང་། ཕ་མིང་ལ་ཨ་འཇིག་ཟེར་གྱི་ཡོད་པ་དང་། རང་ལོ་ ༡༩ ཙམ་ཡིན་འདུག སྐབས་དེར་ཙན་དན་དགོན་པའི་གྲྭ་ཆོས་དབྱིངས་བྱམས་པ་དང་གྲྭ་ཆོས་དབྱིངས་བློ་དགའ་གཉིས་ལ་ཉིན་ ༡༠ རིང་རྒྱ་ནག་གཞུང་གིས་འདྲི་རྩད་བཀག་ཉར་བྱས་ཡོད་པ་དང་། སོག་རྫོང་ཁོངས་ཀྱི་དགོན་པ་ཆེ་བ་རྣམས་སུ་གཞུང་གི་ལས་བྱེད་མི་སྣ་ ༣ ནས་ ༥ བར་དང་། གྲོང་ཚོའི་ལྷ་ཁང་རེ་ལ་ལས་བྱེད་མི་སྣ་རེ་རེ་གཏན་སྡོད་བྱེད་བཞིན་ཡོད་འདུག

ཕྱི་ཟླ་ ༡ ཚེས་ ༡༥ ཉིན་རྒྱ་ནག་ཉེན་རྟོག་པས་འཛིན་བཟུང་བྱས་པའི་སོག་རྫོང་ཙན་དན་དགོན་པའི་གྲྭ་ཆོས་དབྱིངས་བློ་རྒྱལ་དང་། ཆོས་དཔལ་ཟླ་བ་གཉིས་ལ་ཕྱི་ཟླ་ ༢ ཚེས་ཤར་ཙམ་ལ་གསང་སྟབས་ཀྱིས་ཁྲིམས་ཐག་བཅད་ཡོད་འདུག ད་ལྟ་ནགས་ཆུ་ཁུལ་ཐོག་ཏུ་ཁོང་གཉིས་བཙོན་འཇུག་བྱས་ཡོད་པ་དང་། ཆོས་དབྱིངས་བློ་རྒྱལ་གྱིས་“ང་ལོ་གཉིས་རིང་ནང་ལ་ལོག་ཐུབ་ས་མ་རེད། ཁྱེད་རང་ཚོ་ངའི་ཆེད་སེམས་ཕྲལ་མ་བྱེད། ངས་རྐུ་བྱས་པ་དང་རྫུན་བཤད་ནས་བཙོན་དུ་ཚུད་པ་མ་རེད། པར་ཁ་ཤས་ལ་བལྟས་པའི་རྐྱེན་རེད། ད་ལོ་ང་དབྱར་གནས་ཀྱི་སྦྱིན་བདག་ཡིན་པས་ཁྱེད་ཚོས་དབྱར་གནས་དེ་ང་ཡོད་པ་ནང་བཞིན་གཏོང་འཇོག་རོགས་གྱིས་”ཞེས་སྐད་བཞག་ཡོད་འདུག

ཆོས་དབྱིངས་བློ་རྒྱལ་རང་ལོ་ ༣༡ སོག་རོང་སྨད་བསོད་སྟོབས་ལགས་ཀྱི་བུ་ཡིན་པ་དང་། ཆོས་དཔལ་ཟླ་བ་རང་ལོ་ ༢༡ གཡག་ལ་ཤང་གྲོང་ཚོ་གཉིས་པའི་སྒོ་པེ་རང་གྲོལ་གྱི་བུ་ཡིན་འདུག ཁོང་གཉིས་ཟླ་ ༡ ཚེས་ ༡༥ ཉིན་གྲྭ་མང་རྣམས་འཁོར་ཞག་ལ་འགྲོ་བའི་དུས་ཚོད་དང་བསྟུན་ནས་སོག་རྫོང་སྤྱི་བདེ་ལས་ཁུངས་སུ་ཤོག་ལབ་ནས་འཛིན་བཟུང་བྱས་ཡོད་པ་རེད། ཁོང་གཉིས་འཛིན་བཟུང་བྱེད་དགོས་དོན་རྔ་པ་ཀིརྟི་དགོན་པའི་གྲྭ་པ་མེར་བསྲེགས་གཏོང་བའི་པར་རིས་མང་པོ་གློག་ཀླད་དུ་ལྟས་པར་བསྙད་ནས་འཇུ་བཟུང་བྱས་བ་ཞིག་ཡིན་འདུག་ཅེས་འབྲེལ་བརྗོད་གནང་སོང་།།