བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༥༤༨སྟེང་གི་རྩོམ་སྒྲིག་པའི་གཏམ།
དེ་རིང་ནི་ཕྱི་ལོ་ ༡༩༥༩ ལོའི་ཟླ་ ༣ ཚེས་ ༡༠ ཉིན་ལྷ་སར་བཅའ་སྡོད་དམག་དཔོན་ཐཱན་ཀོན་སན་གྱིས་བོད་མིའི་དབུ་ཁྲིད་༧གོང་ས་མཆོག་གིས་འཁོར་དང་ཞབས་འབྲང་གཅིག་ཀྱང་འཁྲིད་མི་ཆོག་པར་སྐུ་རྐྱང་ལྷ་ས་ནོར་བུའི་གླིང་ཁའི་ཉེ་འཁྲིས་སུ་ཡོད་པའི་དམག་སྒར་ནང་དམག་མིའི་ཟློས་གར་འཁྲབ་སྟོན་ཞིག་ལ་མགྲོན་འབོད་བྱས་སྐབས། བོད་མི་ཁྲི་ཕྲག་མང་པོས་ནོར་གླིང་ཕོ་བྲང་གི་མཐའ་བསྐོར་ཏེ་ཁོག་པའི་སྙིང་ལས་གཅེས་པའི་ཡིད་བཞིན་ནོར་བུ་རྒྱ་དམག་གིས་བཙན་འཁྲིད་བྱེད་པར་དོགས་ཤིང་། ལྷ་སའི་དམར་དམག་གི་དབང་བསྒྱུར་མཐར་སྐྲོད་གཏོང་འདོད་ཀྱིས་ལོ་རྒྱུས་ཀྱི་དོན་སྙིང་ལྡན་ལ་དཔའ་མཛངས་ཀྱི་རྔམ་བརྗིད་ཆེ་བའི་བོད་མིའི་སྒེར་ལངས་ཀྱི་དབུ་ཁྱུད་བྲིས་ཏེ་བགྲང་བྱ་ང་གསུམ་འཁོར་བའི་ཉིན་མོ་དེ་ཡིན། འདི་ནི་བཙན་བྱོལ་བོད་མིའི་མི་རབས་གཉིས་པའི་གསུམ་བཅུའི་དུས་དྲན་ཐེངས་དང་པོ་དེ་ཡིན་ཞེས་བརྗོད་ཀྱང་ཆོག
བོད་པ་བཙན་བྱོལ་དུ་གྱར་ཏེ་གསུམ་བཅུའི་དུས་དྲན་ཐེངས་དང་པོ་སྲུང་གཙི་གནང་སྐབས། ༧གོང་ས་མཆོག་གིས་དེ་རིང་ནི་རང་རེ་བོད་མི་མང་ནས་ལྟ་ལོག་ངན་གཡོའི་ལམ་དུ་ཞུགས་པའི་རྒྱ་དམར་གྱི་སྲིད་དབང་གདུག་རྩུབ་ཅན་ལ་ངོ་རྒོལ་དང༌། བོད་སྒེར་ལངས་རང་དབང་བསྐྱར་གསོའི་དོན་དུ་ལས་འགུལ་ཆེན་པོ་སྤེལ་ཏེ་ལོ་གཅིག་འཁོར་བའི་གཟི་བརྗིད་ཅན་གྱི་ཉིན་མོ་རྗེས་དྲན་ཞུ་འོས་པ་ཞིག་ཡིན་ལ། འཇིག་རྟེན་འདིར་ཡིག་རིགས་དང༌ལོ་རྒྱུས་མ་དར་བའི་དུས་སྐབས་ལ་སུ་ཞིག་སུའི་ཁོངས་སུ་གཏོགས་མིན་སུས་ཀྱང་བརྗོད་དཀའ་ཞིང༌། འོལ་ཚོད་དུ་བརྗོད་ཀྱང་རྩ་འཛིན་མི་འཕེར་ལ། ཡིག་རིགས་དང་ལོ་རྒྱུས་ཀྱི་སྲོལ་དར་རྗེས་ཕྱི་སྣོད་ཀྱི་བཀོད་པའི་ས་ཆུ་རི་བྲག་གངས་ཀྱི་རྭ་བ་སོགས་ཆགས་ཚུལ་དང༌། ནང་བཅུད་ཀྱི་སེམས་ཅན་མི་རིགས་དང་སྐད་ཡིག་རིག་གནས། ཆས་གོས། མི་གཤིས་སོགས་སྒོ་ཀུན་ནས་གསལ་པོར་ཤན་འབྱེད་པའི་རང་རེ་བོད་རིགས་རྣམས། རང་སྲིད་རང་ཉིད་ཀྱིས་སྐྱོང་བའི་རྒྱལ་ཁབ་སྒེར་བཙན་གཙང་མ་ཞིག་ཡིན་པར་ལོ་ངོ་སྟོང་ཕྲག་གོང་གི་བཙན་པོ་རིམ་བྱུང་དང་བོད་རྗེ་རིམ་པ། རྒྱལ་དབང་སྐུ་ཕྲེང་ན་རིམ་གྱི་བར་རྒྱལ་རབས་ལོ་རྒྱུས་ནས་གསལ་པོར་རྟོགས་ཞེས་ཉིན་མོ་འདིའི་རིན་ཐང་དང་། སྐབས་དེའི་ཆབ་སྲིད་ལངས་ཕྱོགས་ཀྱི་ཟུར་ངོས་ཤིག་ནས་གླེང་ཡོད།
ཉིན་མོ་འདི་ནི་བོད་པའི་སྲིད་དོན་ལོ་རྒྱུས་ཐོག་ཏུ་ཁྲག་དམར་བཞུར་བའི་ཉི་མ་ནག་པོ་ཞིག་ཡིན་ཞིང་། བོད་ས་རྒྱ་ལག་ཏུ་ཤོར་ནས་ད་ལྟའི་བར་གྱི་ཆབ་སྲིད་འཕོ་འགྱུར་དང་། བོད་གཞིས་བྱེས་གཉིས་ཀྱི་རྩ་དོན་འཐབ་རྩོད་ཀྱི་ལེའུ་གསལ་བའི་ལོ་རྒྱུས་ཀྱི་གླེགས་བམ་ཞིག་ཀྱང་ཆགས་ཡོད། ལོ་ལྟར་དེ་རིང་གི་ཉིན་མོར་རྒྱལ་སྤྱིའི་སྲིད་དོན་ཉམས་ཞིབ་པ་དག་གིས་མིག་ཧྲིག་ཧྲིག་དང་ཨམ་ཅོག་གྲུང་གྲུང་གིས་བོད་དོན་འཐབ་རྩོད་ཀྱི་ཁ་ཕྱོགས་ལ་ལྟ་ཞིང་། བོད་གཞིས་བྱེས་ཀྱི་མི་མང་ཚོས་བློ་རྩེ་གཅིག་སྒྲིམ་ཐོག་ངྷ་རམ་ས་ལའི་བཀའ་གསུང་ལམ་སྟོན་ལ་ཉན།
ད་ལོའི་གསུམ་བཅུའི་དུས་དྲན་ནི་དེ་བས་ཀྱང་འགག་རྩ་ཞིག་ཏུ་འཁེལ་ཡོད། ༧གོང་ས་མཆོག་གིས་བོད་པའི་ཆབ་སྲིད་དང་འཛིན་སྐྱོང་གི་ཐུགས་འགན་མཚམས་འཇོག་གནང་སྟེ། ནང་པའི་དབུ་ཁྲིད་ཁེ་གཙང་ཞིག་དང་ཤཱཀྱ་དགེ་སྦྱོང་ཁེར་ཚུགས་ཤིག་གི་ངོས་ཐད་ནས་བོད་མི་བྱིངས་དང་ལྷན་དུ་མི་མང་གིས་བདམས་པའི་མགོ་ཁྲིད་དག་ལ་རྒྱང་གཟིགས་དང་། ཡང་སྒོས་སྲིད་སྐྱོང་ར་སྟག་ནས་བརྒྱུད་པའི་མཚན་གནས་རྗེས་འབྲེལ་གྱི་བཀའ་བློན་ཁྲི་པ་བློ་བཟང་སེང་གེ་མཆོག་གི་བོད་པའི་རྩ་དོན་འཐབ་རྩོད་ཀྱི་སྲིད་བྱུས་ལངས་ཕྱོགས་དང་། འདས་མ་འོངས་ད་ལྟ་གསུམ་གྱི་བློ་འདོན་འཆར་འགོད་ལ་རྒྱང་གཞལ་གནང་བའི་ཉིན་མོ་ཞིག་ཀྱང་ཆགས་ཡོད།
