༸གོང་ས་མཆོག་གི་སྐུ་པར་དང་མེར་བསྲེགས་གནས་ཚུལ་བརྒྱུད་གཏོང་བྱས་པའི་ཉེས་འཛུགས་འོག ཆབ་མདོ་གོང་ཇོ་རྫོང་ཟོང་ཆུ་གྲོང་ཚོའི་བོད་མི་ ༣༠ ཡས་མས་ཤིག་འཛིན་བཟུང་བྱས་འདུག
ཟླ་འདིའི་ཕྱི་ཚེས་ ༣ ཉིན་རྒྱ་ནག་གཞུང་གིས་ཆབ་མདོ་ས་ཁུལ་གོང་ཇོ་རྫོང་ཟོང་ཆུ་གྲོང་ཚོའི་བོད་མི་ཚོས་ཁ་པར་བརྒྱུད་༸གོང་ས་མཆོག་གི་སྐུ་པར་དང་བཀའ་སློབ། བོད་ནང་རང་ལུས་མེར་བསྲེགས་གཏོང་མཁན་ཚོའི་སྐུ་པར་དང་། ཁོང་ཚོས་རང་ལུས་མེར་བསྲེགས་གཏོང་དགོས་པའི་རྒྱུ་རྐྱེན་སོགས་བརྡ་འཕྲིན་གྱི་ལམ་ནས་ཕན་ཚུན་ལ་མཁོ་གཏོང་བྱས་ཡོད་པའི་ཉེས་འཛུགས་འོག རང་ལོ་ ༤༨ ཡས་མས་ཡིན་པའི་ངག་དབང་འཇིགས་མེད་དང་། ཐུབ་བསྟན་བཟང་པོ་སོགས་བོད་མི་ ༣༠ ཡས་མས་ཤིག་འཛིན་བཟུང་བཀག་ཉར་བྱས་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཐུབ་བསྟན་བཟང་པོ་དང་བོད་མི་ཁག་ཅིག་ལ་ཉིན་ ༡ དང་ ༢ ལྷག་གི་རིང་འདྲི་བརྩད་བཀག་ཉར་བྱས་རྗེས་ཀློད་གྲོལ་བཏང་ཡོད་ཀྱང་། ངག་དབང་འཇིགས་མེད་གཙོས་པའི་བོད་མི་ཁག་ཅིག་ད་ལྟའི་ཆར་ཡང་གོང་ཇོ་རྫོང་གི་བཙོན་ཁང་ཞིག་ཏུ་བཀག་ཉར་བྱས་ཡོད་འདུག་ལ། གཞན་ཁག་ཅིག་གི་མིང་སོགས་ཤེས་རྟོགས་བྱུང་མི་འདུག
ཉེ་ལམ་ངག་དབང་བཟང་པོའི་ནང་མིས་ཁོང་ལ་ཟ་མ་བསྐྱལ་སྐབས། ཉེན་རྟོག་པས་ཐུག་འཕྲད་བྱེད་བཅུག་མེད་པར་མ་ཟད། གོང་ཇོ་རྫོང་དང་གྲོང་ཚོའི་ཉེ་ཁུལ་ཡོངས་སུ་དམག་མི་འགྲེམས་འཇོག་གིས་དམ་དྲག་ཤུགས་ཆེན་བྱེད་བཞིན་ཡོད་འདུག
