མཚོ་སྔོན་གཅན་ཚ་ལ་མོ་བདེ་ཆེན་དགོན་དུ་གསུམ་བཅུའི་དུས་དྲན་སྲུང་གཙི་གནང་སྟེ་རྒྱ་གཞུང་ལ་ངོ་རྒོལ་སྐད་འབོད་གནང་འདུག
དེ་རིང་གནས་ཚུལ་འབྱོར་བ་ལྟར་ན། ཕྱི་ཟླ་ ༣ ཚེས་ ༨ ཉིན་ཏེ་བོད་ལུགས་ཀྱི་ཆོ་འཕྲུལ་དུས་ཆེན་ཉིན། མདོ་སྨད་གཅན་ཚ་རྫོང་ནང་ཁོག་ཞང་ལ་མོ་བདེ་ཆེན་དགོན་པའི་དགེ་འདུན་པ་ཚོས་སྨོན་ལམ་གྱི་མཆོད་གཏོར་སྟེང་མར་རྒྱན་གྱིས་བོད་ཀྱི་རྒྱལ་དར་དང་། ༧གོང་ས་མཆོག་གི་སྐུ་བརྙན་བཞེངས་ཏེ་སྨོན་ལམ་གསུངས་ཡོད་འདུག
ཕྱི་ཟླ་ ༣ ཚེས་ ༡༠ ཉིན་ལ་མོ་བདེ་ཆེན་དགོན་གྱི་དགེ་འདུན་པ་ ༧༠ ནས་ ༨༠ ཙམ་གྱིས་དགོན་པའི་ཉེ་འཁྲིས་ཀྱི་རི་སྒང་ཞིག་ཏུ་བསང་གསོལ་ཆེན་པོ་ཞིག་གནང་སྟེ། མི་ལོ་ང་གསུམ་གོང་གི་ཉིན་མོ་འདིར་བོད་མིས་རང་དབང་སྒེར་ལངས་ལ་རྒྱ་དམག་གིས་དྲག་གནོན་བྱས་པར་དྲན་གསོའི་ཆེད་ཤོག་སྦག་སྦར་སྒྲོན་ཞིང་། བྱང་ཆུབ་སེམས་མཆོག་སྐྱོར་བཞིན་རྫོང་ཐོག་ཏུ་ཁ་ཕྱོགས་ཏེ་བསྐྱོད་ཡོད་འདུག
དགེ་འདུན་པ་རྣམས་ཀྱི་སྐད་གསེང་རིམ་བཞིན་ཇེ་མཐོར་སོང་སྟེ་“བོད་ལ་རང་བཙན་དགོས། ༸རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས” སོགས་ཀྱི་སྐད་འབོད་རྒྱག་བཞིན་དགོན་པ་དང་སྤྱི་ལེ་ ༡ དང་ཕྱེད་ཙམ་གྱི་སར་ཡོད་པའི་མ་ཎི་རྡོ་ལུང་གྲོང་ཚོར་འབྱོར་སྐབས། གྲོང་སྡེའི་མི་མང་བསླེབས་ཏེ་དགེ་འདུན་པ་རྣམས་རྫོང་ཐོག་ཏུ་མི་ཕེབས་རྒྱུར་བཀག་འགོག་བྱས་ཡོད་ཅིང་། བུད་མེད་དང་བྱིས་པ་ཚོས་ངུ་འབོད་བྱེད་བཞིན་ཞུ་བ་འཐེན་ཏེ་དགེ་འདུན་པ་རྣམས་ཀྱི་མདུན་བཀག་ཡོད་འདུག
ཕྱི་དྲོའི་ཆུ་ཚོད་ ༢ པ་ཡོལ་ཙམ་ལ་གར་ཡོང་མི་ཤེས་པའི་དམག་མིའི་རླངས་འཁོར་ ༥ ཙམ་དགོན་གཤམ་གྱི་གཞུང་ལམ་དུ་འབྱོར་ཡོད་ཅིང་། དེའི་རྗེས་ཁ་པར་གྱི་བརྒྱུད་ལམ་བཀག་འདུག་སྟབས། གནས་ཚུལ་ཅི་བྱུང་དང་གྲྭ་མང་འཛིན་བཟུང་བྱས་ཡོད་མེད་སོགས་ཀྱི་གནས་ཚུལ་ཤེས་རྟོགས་མ་ཐུབ།
གནས་ཚུལ་ནང་མུ་མཐུད་དུ་བཀོད་དོན། “ ཕྱི་ཟླ་ ༢ པའི་ཕྱི་ཚེས་ ༨ ཉིན་བཀའ་སྤྱི་གཉིས་ཀྱི་གོ་སྒྲིག་འོག་འཛམ་གླིང་ཁྱོན་ཡོངས་ཀྱི་བོད་མི་ཚོས་བོད་ནང་གི་ཛ་དྲག་གནས་སྟངས་ཐད། ཉིན་བརྒྱ་དུས་གཅིག་ཏུ་གདུང་སེམས་མཉམ་སྐྱེད་ཀྱི་ལས་འགུལ་སྤེལ་སྐབས། གཅན་ཚ་རྫོང་གི་རྨ་མགུར་རྣམ་རྒྱལ་གླིང་དགོན་པའི་དགེ་འདུན་པ་དང་ཉེ་འཁོར་གྱི་མང་ཚོགས་དགོན་པར་འཛོམས་ཏེ་སྨོན་ལམ་གསུངས་ཡོད” ཅེས་དང་།
“ སྤྱིར་ན་རྒྱ་ནག་ཁོངས་ཀྱི་སློབ་གྲྭ་ཁག་གི་དགུན་ཁའི་གུང་གསེང་ཕྱི་ཟླ་ ༣ ཚེས་ ༡ ནས་རྫོགས་ཡོད་ཀྱང་། རྫོང་འདིའི་འོག་ཏུ་ད་ལོ་དགུན་གནང་གི་དུས་ཡུན་ཉིན་ ༡༥ འཕར་འགྱངས་བྱས་ཏེ། དགེ་རྒན་དང་ལས་བྱེད་རྣམས་ས་གནས་ཆ་བགོས་ཀྱིས་བརྟན་ལྷིང་སྲུང་སྐྱོབ་ཀྱི་ལས་དོན་ལ་མཉམ་ཞུགས་བྱེད་དགོས་པའི་བཙན་བཀའ་བཏང་འདུག
ཕྱི་ཚེས་ ༨ ཉིན་གྱི་ཆོ་འཕྲུལ་སྨོན་ལམ་སྟེང་རྒྱན་མར་གྱིས་བཞེངས་པའི་༧གོང་ས་མཆོག་དང་བོད་ཀྱི་རྒྱལ་དར།
ཕྱི་ཟླ་ ༣ ཚེས་ ༡༠ ཉིན་དགེ་འདུན་པ་ ༧༠ ནས་ ༨༠ ཙམ་གྱིས་དགོན་པའི་འཁྲིས་ཀྱི་རི་སྒང་ཞིག་ཏུ་བསང་གསོལ་བཏང་སྟེ་གསུམ་དུས་སྲུང་གཙི།
དགེ་འདུན་པ་རྣམས་ཀྱིས་རྒྱ་གཞུང་ལ་ངོ་རྒོད་སྐད་འབོད་གནང་བཞིན་རྫོང་གི་ཕྱོགས་སུ་སྐྱོད་བཞིན་པ།
དགེ་འདུན་པ་རྣམས་ཀྱིས་སྐད་འབོད་གནང་བཞིན་མ་ཎི་རྡོ་ལུང་གྲོང་ཚོར་འབྱོར་བ།
མ་ཎི་རྡོ་ལུང་གྲོང་ཚོའི་མི་མང་ཚོས་ངུ་འབོད་བྱེད་བཞིན་དགེ་འདུན་པ་རྣམས་ཀྱི་མདུན་འགོག་བཞིན་པ།
བོད་རིགས་མི་དམངས་ཀྱི་ལག་རྩལ་དང་སྒྱུ་རྩལ་ཐོག་ནས་༸ གོང་ས་མཆོག་དང་། བོད་ཀྱི་རྒྱལ་དར། ཆོས་ཀྱི་འཁོར་ལོ། པད་དཀར་གྱི་གདན་སོགས་མཆོད་གཤམས་བྱས་ཏེ་སུམ་ཅུའི་དུས་དྲན་སྲུང་བརྩི་གནང་ཐུབ་པར་བསྔགས་བརྗོད་གྲངས་མེད་ཡོད།
གང་དུ་དྲག་གོན་ཡོད་ན། དེ་རུ་ངོ་རྒོལ་ཡོད། ཅེས་པའི་མའོ་ཡིས་བཀའ་སློབ་དེ་རྒྱུན་འཁྱོངས་བྱེད་ཐུབ་པ་དགོས།
དེ་ནི་གུང་ཁྲན་ཏང་གིས་ང་ཚོར་བཞག་པའི་བསླབ་བྱ་ཡག་ཤོས་ཤིག་རེད།
འདི་དངོས་་མ་ཡིན་པས་སྙིང་ཐེག་པ་ནས་ཐུགས་རྗེ་ཆེ་ཞུ། རང་དོན་རང་གི་བསྒྲུབ་ཟེར་བའི་དཔེར་ལྟར་རེད། བོད་དོན་བོད་ཀྱི་རྩོད། དོན་དངོས་ཕྱི་ལ་བསྒྲགས་བྱེད། ཁྲབ་སྟོན་མིན་པའི་བོད་ནང་གི་ལས་འགུལ་འདི་ལྟ་བུ་དགོས། བོད་པ་ཚོ་ལྷག་དོན་ཕྱི་སྡོད་བོད་པ་ཚོ་ལོངས་ཤོག་ཡར་ལ་ལོངས་ཤོག་རང་གི་ཆེད་དུ་ལོངས་ཤོག་དོན་དངོས་ལ་ཞུགས་ནས་ལོངས་ཤོག
མདོ་སྨད་གཅན་ཚའི་བདེ་ཆེན་དགོན་གྱི་གྲྭ་མང་གིས་གོང་ས་མཆོག་དང་བོད་ཀྱི་རྒྱལ་དར་གཉིས་སྒྲིག་གཤོམ་གནང་ནས་གསུམ་བཅུའི་དུས་དྲན་སྲུང་བརྩི་དང་རྒྱ་ནག་གཞུང་ལ་ངོ་རྒོལ་སྐད་འབོད་མཛད་པ་ལ་བསྔག་བརྗོད་དང་རྗེས་སུ་ཡི་རང་ཡོད།
འཇིག་རྟེན་འདིར་དངོས་གནས་རང་དབང་དང་། འདྲ་མཉམ། བདེ་སྐྱིད་སོགས་མེད་དུས་འཚོ་བ་ལ་སྙིང་བོ་མེད་པ་རེད།
༸གོང་མ་མཆོག་དང་བོད་ཀྱི་རྒྱལ་དར་མར་རྒྱན་དུ་བཟོས་འདུག་པ་འདི་ནི་དངོས་གནས་སྒྱུ་རྩལ་གྱི་ཁྱད་ཆོས་ལྡན་པ་ཞིག་རེད།གཞིས་ལུས་མི་མང་ཚོར་དངོས་གནས་དཔའ་པོའི་སྙིང་སྟོབས་མ་ཟད།འཇིག་རུང་བའི་རྒྱ་དམར་པོའི་མནར་གཅོད་འོག་ཏུའང་གསར་གཏོད་དང་རིག་གནས་སྲུང་སྐྱོབ་ཀྱི་ནུས་པས་ཁེངས་ཡོད་པ་ཞིག་རེད།
གཟུ་གནས་ལགས། སྐྱོན་བརྗོད་མ་བྱས་གོང་ལ་ཡར་བལྟ་མར་བལྟ་བྱོས་དང། སྐྱོན་བརྗོད་དགོས་ས་མི་དགོས་ས་ཧ་གོ་ནི་རེད།
ལ་མོ་བདེ་ཆེན་དགོན་པའི་དགེ་འདུན་ཚོའི་རྒྱལ་གཅེས་ཀྱི་སྙིང་སྟོབས་ལ་གུས་འདུད་ཞུ།
གཟུ་གནས་བློ་ལྡན་ལགས་ཀྱིས་བོད་ནང་གི་རྒྱ་གཅེས་པ་ཚོའི་བདེ་འཇག་ལ་བསམ་བློ་བཏང་ནས་དུས་བབ་ཀྱི་རྩོམ་སྒྲིག་པར་བསམ་ཚུལ་བཏོན་པར་ཁག་མི་འདུག འོན་ཀྱང་རྒྱ་ཡི་རྒྱུགས་ཁྱི་ཡིན་འདོགས་བརྗོད་པ་ནི་དོན་ལ་གནས་བའི་གཏམ་ཞིག་ཏུ་མ་མཐོང་།
དེ་ལ་དུས་བབ་རྩོམ་སྒྲིག་པས་གསལ་བཤད་ཡག་ཐག་ཆོད་གནང་འདུག་པ་དེའི་རྒྱུད་རིམ་ནས་བལྟས་ན་གསར་འགྱུར་རག་ཚད་འགོད་རྐྱང་བྱེད་ཀྱིན་མེད་པར་དབྱེ་ཞིབ་ནན་ཏན་གནང་གི་ཡོད་པ་ཤེས་རྟོགས་བྱུང་བས་དགའ་གུས་ཡི་རང་ཞུ་འདོད་བྱུང་།
ད་ངོ་མ་ངར་གི་ཡ། བོད་ཕྱི་ནང་གི་དཔའ་རྒོད་ཚོ་མཐོང་ཡོང་དུས་ང་ཚོ་བོད་མིའིི་སྒེར་ངོས་རེ་རེས་ནས་ལས་འགུལ་ཆེ་ཆུང་ལ་མ་ལྟོས་པར་མཐའ་ན་ལས་འགུལ་སྣ་རེ་སྤེལ་དགོས་ཀྱི་འདུག གཞུང་དང་ཚོགས་བདེ་ཁག་གཅིག་པུར་རེ་དགུག་བྱེད་ན་འགྲིག་གི་མི་འདུག ལ་མོ་བདེ་ཆེན་དགོན་གྱི་དགེ་འདུན་པ་རྣམས་རྒྱལ་གྱུར་ཅིག། ཁྱེད་རྣམས་ཀྱིས་ཐུགས་ཀྱི་བཞེད་དོན་མཐའ་དག་མྱུར་དུ་འགྲུབ་པའི་སྨོན་འདུན་ཡང་ཡང་ཞུའོ།།
གཟུ་གནས་བློ་ལྡན་ལགས། གང་འདོད་དུ་ཚིག་སྡུག་ཅག་བེད་སྤྱོད་གཏོང་རྒྱུ་མ་སྔ། ང་ཚོས་ཀྱང་སེམས་འཚབ་དེའི་འོག་ནས་གསར་འགྱུར་མཁོ་སྤྲོད་པར་བཀའ་འདྲི་ཞུས་ཡིན། སྙིང་སྟོབས་དང་ཆོད་སེམས་རི་ལྟར་བརྟན་པའི་དགེ་འདུན་པ་དེ་དག་དང་ལས་འགུལ་ནང་མཉམ་ཞུགས་གནང་མཁན་ཚོས་ཕྱི་ལོགས་སུ་ཁྱབ་བསྒྱུར་ཡོང་བའི་འབོད་སྐུལ་ཞུས་འདུག་པ་མ་ཟད། པར་དེ་དག་རྒྱ་ནག་གི་བརྒྱུད་ལམ་(51)ཟེར་བའི་ནང་སྔ་མོན་ནས་འགྲེམས་སྤེལ་བྱས་འདུག་པ་ཞིག་རེད།
གཟུ་གནས་བློ་ལྡན་གྱིས་བཤད་པ་ངོ་མ་ཡིན་པས་གསར་འགོད་པས་ངོ་རྒོད་བྱེད་མཁན་གྱི་ཡུལ་མའི་ངོ་གདོང་མི་གསལ་བར་གཏོང་རོགས་ཞུ།
དུས་བབ་ཤོག་ཚགས་ཁང་གིས་ཅི་བྱེད་ཀྱིན་ཡོད། ཁྱེད་ཚོས་བོད་ཀྱི་ཤི་རོགས་བྱེད་ན་བསམ་གྱིན་ཨེ་འདུག ངོ་རྒོལ་གནང་མཁན་གྱི་ངོ་གདོང་ཆེས་གསལ་སྐུ་པར་དྲ་རྒྱར་བཀོད་དོན་གང་ཡིན། ཤོད་ཅིག ་དངོས་གནས་རྒྱ་ཡི་རྒྱུག་ཁྱི་ཞིག་མིན་འགྲོ།
ཡུལ་འདིའི་དུས་དྲན་སྲུང་བརྩི་མཁན་དང་གསར་འགོད་པ་བཅས་ལ་སྙིང་ཐེག་པ་ནས་བཀའ་དྲིན་ཆེ་ཞུ། ཆོལ་གསུམ་ཆ་མཐུན་མཉམ་བསྐྱོད་ཀྱི་ལས་འགུལ་ལོ་རེར་ཆེ་རུ་ཕྱིན་བཞིན་འདུག
ཅི་འདྲའི་དགའ་བ་ལ། འདི་ནས་གསལ་བཤད་བྱེད་རྒྱུ་ཞིག་ལ་ཁ་ཉིན་ངས་དུས་བབ་དྲ་བར་ཨ་མདོ་རེབ་གོང་བདེ་ཆེན་དགོན་པས་སུམ་བཅུ་དུས་དྲན་སྲུང་བརྩི་བྱས་པའི་གནས་ཚུལ་བཀོད་ཡོད། དེའི་ཞབས་འཆན་དུ་མདའ་དཔོན་ཟེར་བ་ཞིག་གིས་དེ་ནི་ལོ་བདེ་ཆེན་དགོན་པ་རེད་ཁྱེད་རང་ནོར་འདུག་ཟེར་ནས་དགག་པ་རྒྱག་གིན་འདུག ད་ལོར་རྨ་ལྷོ་ཁུལ་ནས་རེབ་གོང་བདེ་ཆེན་དགོན་པ་དང་ལ་མོ་བདེ་ཆེན་དགོན་པ་གཉིས་ནས་སུམ་བཅུ་དུས་དྲན་སྲུང་བརྩི་བྱས་འདུག་པས་གོང་གི་དགག་པ་རྒྱག་མཁན་དེ་དང་དེ་ལྟ་བུས་དགོན་པ་དེ་གཉིས་སོ་སོར་ཤེས་དགོས། རེབ་གོང་བདེ་ཆེན་དགོན་པ་ནི་རེབ་གོང་རྫོང་གི་མངའ་ཁོངས་དང་ལ་མོ་བདེ་ཆེན་དགོན་པ་ནི་གཅན་ཚ་རྫོང་གི་མངའ་ཁོངས་རེད།
བདེན་པ་ཉིད་རྒྱལ་གྱུར་ཅིག
མར་རྒྱན་གྱི་༸རྒྱལ་བའི་སྐུ་བརྙན་འདི་ངོ་མ་མཚར་ལ་ཨང་། སྒྱུ་རྩལ་གསོན་པོ་ཞིག་འགུལ་ཞིང་མཇལ་བཞིན་འདུག་པས་ཡིད་སྤྲོ་བཞིན་ཐུགས་རྗེ་ཆེ་ལགས།