ད་
གནས་ཚུལ་དེའི་ཐད་བོད་མི་མང་སྤྱི་འཐུས་ལྷན་ཚོགས་ཀྱིས་གསར་འགོད་བསྒྲགས་གཏམ་ཞིག་སྤེལ་ཡོད་པའི་ནང་། “ཕྱི་ལོ་ ༢༠༡༡ ཟླ་ ༣ ཚེས་ ༡༦ ནས་ལོ་འདིའི་ཟླ་ ༣ ཚེས་ ༡༤ བར། བོད་ནང་རང་ལུས་མེར་སྲེག་གཏོང་མཁན་ ༢༨ བྱུང་ཡོད་པ་དང་དེའི་ནང་ནས་མི་གྲངས་ ༢༡ སྐུ་སྲོག་ཤོར་ཡོད། དེ་མིན་མང་ཆེ་བ་ད་ལྟའི་སྐབས་བཙོན་འཇུག་དང་བཀག་ཉར་ཁང་གང་ཞིག་ཏུ་ཡོད་མེད་ཤེས་རྟོགས་ཐུབ་མེད་ལ། ཁོང་རྣམས་ཀྱི་སྐུ་ལུས་མེར་བསྲེགས་ཐེབས་ཡོད་པའི་ཐོག རྒྱ་གཞུང་གིས་འདྲི་བརྩད་དང་མནར་གཅོད་བཏང་ནས་དམྱལ་བ་ས་སྟེང་དུ་འཕོས་པ་ལྟ་བུའི་དཀའ་སྡུག་གི་འོག་ནས་རིམ་གྱིས་སྐུ་སྲོག་ཤོར་བཞིན་ཡོད” ཅེས་དང་།
“བོད་ནང་རང་ལུས་མེར་བསྲེགས་གིས་མཚོན་ས་གནས་གང་སར་སྦྱར་ཡིག་འགྲེམས་སྤེལ་དང་ཞི་རྒོལ་སོགས་མང་པོ་བྱུང་དང་འབྱུང་བཞིན་ཡོད་རུང་། རྒྱ་གཞུང་གིས་བོད་མི་ཚོའི་དགོས་འདུན་ལ་བསམ་གཞིག་བྱེད་རྒྱུ་ལས་ལྡོག་སྟེ། བོད་ཀྱི་དགོན་སྡེ་ཁག་ཏུ་ལས་དོན་རུ་ཁག་མང་དུ་བཙུགས་ནས་རྒྱལ་གཅེས་ཆོས་གཅེས་ཟེར་བའི་ལས་འགུལ་རྒྱ་སྐྱེད་བྱས་པ་དང་། རྒྱ་ནག་གི་དཔོན་རིགས་རིམ་པའི་འདྲ་པར་བཙན་གྱིས་དགོན་པ་དང་གྲྭ་ཤག ཁྱིམ་ཚང་ཁག་ཏུ་འགྲེམས་འཇོག་བྱས་བཅུག་པ་སོགས་འཁྱོག་བཤད་ཀྱི་དྲིལ་བསྒྲགས་སྣ་ཚོགས་བྱེད་ཀྱི་ཡོད” ཅེས་སོགས་བཀོད་འདུག
བསྒྲགས་གཏམ་ནང་མི་མཐུད་དུ་བསྟན་དོན “བོད་མི་མང་སྤྱི་འཐུས་ལྷན་ཚོགས་ཀྱི་ངོས་ནས་ཡང་ནས་ཡང་དུ། རྒྱ་ནག་གཞུང་གིས་བོད་ཐོག་འཛིན་པའི་མཁྲེགས་འཛིན་དང་ཕྱོགས་སུ་ལྷུང་བའི་སྲིད་བྱུས་དེ་ལ་བསྒྱུར་བཅོས་མ་བཏང་ན། བོད་ནང་རང་ལུས་མེར་བསྲེགས་སོགས་ཀྱི་ལས་འགུལ་སྣ་ཚོགས་ཡོང་སྲིད་པས། དེ་དག་ཡོངས་རྫོགས་རྒྱ་ནག་གཞུང་རང་ཉིད་ཀྱིས་འགན་འཁྱེར་དགོས་ཞེས་ནན་བརྗོད་བྱས་ཡོད་ལ་ད་དུང་ཡང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༣ པ་འདིའི་ཐོག་ནས་དེ་བཞིན་ནན་བརྗོད་བྱེད་རྒྱུ་ཡིན” ཅེས་བཀོད་འདུག
མཇུག་ཏུ་འཛམ་གླིང་མཉམ་འབྲེལ་རྒྱལ་ཚོགས་དང་། མང་གཙོ་དང་འགྲོ་བ་མིའི་ཐོབ་ཐང་ལ་གཙིགས་ཆེར་འཛིན་མཁན་གྱི་རྒྱལ་ཁབ་དང་ཚོགས་སྡེ་ཁག་གིས། བོད་ནང་གི་བོད་མི་དེ་དག་གི་རང་ལུས་མེར་བསྲེགས་བཏང་བའི་རྩ་ཆེན་གྱི་ལས་འགུལ་དེ་དག་གོ་མེད་ཚོར་མེད་ངང་མི་འཇོག་པར། རྒྱ་ནག་གཞུང་ལ་བདེན་པའི་གནས་ལུགས་ར་སྤྲོད་བྱེད་རོགས་ཞེས་རྒྱལ་གཅེས་དཔའ་བོ་དཔའ་མོ་དེ་དག་གི་དགོས་འདུན་མ་འགྲུབ་བར་ང་ཚོས་རེ་སྐུལ་ཞུ་རྒྱུ་ཡིན།” ཞེས་སོགས་བཀོད་འདུག
