ཅང་ཀྲོན་ཆོན། བོད་རྒྱ་སྤུན་ཟླས་ནམ་ཡང་ཁྱེད་རང་བརྗེད་མི་སྲིད།

ཆིས་ཅཱ་ཊིན།  (མེལ་བྷོན། )གྱིས་བརྩམས། ལྷ་སྡེ་གནམ་ལོ་ཡག་གིས་བསྒྱུར།

༡

ལོ་འགའི་སྔོན། དགའ་བསུ་ཆེས་ཆེར་ཐོབ་པའི་ཨོ་སི་ཁའི་རྟགས་མ་ཐོབ་པའི་གློག་བརྙན《རྐུས་ཉན་རྩོད་རྙོག》ནང་གི་མི་སྣ་གཙོ་བོ་ནི་འཇར་མན་ཤར་མའི་གསང་བའི་ལས་ཁུངས་ཀྱི་མིང་ལ་ཝའི་སི་ལའེ་ཟེར་བའི་མྱུལ་མ་ཞིག་རེད། ཁོ་བོས་ཉིན་རྒྱུན་རྒྱལ་གཅེས་འཁྲབ་གཞུང་རྩོམ་པ་པོ་ཏའེ་ལེ་མན་ལ་མྱུལ་ཞིབ་བྱེད་ཀྱིན་ཡོད། མ་བསམ་ས་ནས་མི་དྲི་མི་བྲོ་ཞིང་གདུག་རྩུབ་ཆེ་མདོག་ལྡན་པའི་ཝའི་སི་ལའེ་ཡིས་གསང་བའི་ལས་ཁུངས་ཀྱིས་ཏའེ་ལེ་མན་འཇུ་བཟུང་བྱེད་རྩིས་ཀྱི་གོ་རིམ་ཁྲོད་དུ་འཁྲབ་གཞུང་རྩོམ་པ་པོའི་མི་ཚེ་ལོ་རྒྱུས་ཀྱི་བདེན་པ་དང་ལྷད་མེད་འཚོ་བའི་རང་གཤིས་ཀྱི་འགུག་ཤུགས་ལ་བརྟེན་ནས་ལམ་ནོར་ལྡོག་ཤེས་ཀྱིས་དབང་ཆ་གཅིག་སྡུད་ལམ་ལུགས་ཀྱི་ཚེ་གཡོག་ནས་རང་ཉིད་ཀྱི་མདུན་ལམ་དོར་ནས་ལྐོག་ཏུ་རྩོམ་པ་པོ་ཁོང་མྱུར་སྐྱོབ་ལ་ཞུགས་པའི་མིང་གཞུང་མེད་པའི་དཔའ་བོ་ཞིག་ཏུ་གྱུར་ཡོད།

གློག་བརྙན་ལྟ་མཁན་ལྷན་རྒྱས་ནས་ཝའི་སི་ལའེ་ལགས་གདོན་འདྲེ་ནས་ལྷའི་ཕོ་ཉར་གྱུར་ཞིང་། དམྱལ་ཁམས་ནས་ལྷ་ཡུལ་ལ་གཤེགས་པར་ཚད་མཐོ་བའི་གདེངས་འཇོག་གནང་ཡོད། འདིའི་ཁྲོད་དུ་འཁྲབ་སྟོན་པའི་ཕུལ་བྱུང་གི་འཁྲབ་རྩལ་འདུ་མོད། དུས་ཚོད་གཉིས་ལྷག་གི་དུས་ཡུན་ཁྲོད་ལྟ་མཁན་ལྷན་རྒྱས་བཟོད་བསྲན་དཀའ་བའི་དྲག་རྩུབ་གནས་སྟངས་ཀྱི་གཏིང་རུམ་ནས་སྐད་ཅིག་ཉིད་ལ་སྤྲོ་བའི་ཀློང་དུ་དྲངས་ཤིང་། དགའ་སྐྱིད་གཉིས་འཛོམས་ཀྱི་བག་ཕེབས་པའི་དྲོད་ཁོལ་འོག་ཞུགས་ཐུབ་ཡོད། དོན་ལ་འགྲོ་བ་མིས་མཐོང་འདོད་པ་ནི་མི་གཤིས་ཀྱི་བསྐྱར་ལོག་དང་ཀུན་སྤྱོད་ལ་རྒྱལ་ཁ་ཐོབ་པའི་རྣམ་པ་ཡིན། དེ་བས། ཡུའུ་ཀོ་ལགས་ཀྱིས་གསུངས་པའི“རྩ་དོན་ཡོད་ཚད་ལས་ཀུན་སྤྱོད་རྩ་དོན་མཆོག”ཅེས་པའི་གསལ་འགྲེལ་གྱི་བདེན་དཔང་དུ་གྱུར་ཡོད།

དཔྱད་བརྗོད་ལ་ལས་གློག་བརྙན་མཇུག་བསྡུ་སྟངས་ཀྱི་གོ་སྒྲིག་ནི་རྩོམ་པ་པོའི་ཞེ་འདོད་ལྟར་ཡོང་ཡོིད་ཅིང་། ཁོང་གིས་གློག་བརྙན་འདིར“འོད་སྟོང་འབར་བའི་རྔ་མ་ཞིག་བཏགས”པར་བཤད། དབང་དྲག་ལྡན་པའི་འཇར་མན་ཤར་མའི་གསང་བའི་ལས་ཁུངས་ཀྱི་མགོ་གཙོས“རྩ་བ་ཉིད་ནས་མི་འདི་འདྲ་ཞིག་མེད”ཅེས་བཤད་འདུག  ཕྱོགས་མ་འདྲ་བའི་ལྟ་བ་འདི་དག་ལས་བསྟན་དོན། ཝའི་སི་ལའེ་དངོས་ཡོད་འཚོ་བའི་ཁྲོད་གསོན་ཐབས་མེད་པ་དེ་ཡིན་པས། ཕུགས་བསམ་དང་དངོས་ཡོད་ཀྱི་བར་ཐག་ནི་གནམ་ས་ལྟ་བུ་རེད།

སྟབས་ལེགས་ནས་འཇིག་རྟེན་འདི་གདུག་རྩུབ་ཀྱི་དབང་དུ་གྱུར་ཏེ་མི་རྣམས་གསོན་ཐབས་བྲལ་བའི་དུས་ལ་སླེབས་མེད། འཇིག་རྟེན་འདིར་སྙིང་ཉེ་བའི་ཝའི་སི་ལའེ་བྱོན་མྱོང་ཡོད། གཅིག་བྱས་ན་གྲངས་འབོར་ཉུང་ཉུང་ཞིག་ཡིན་ཤས་ཆེ། འོན་ཀྱང་། གཏན་ནས་བྱོན་མྱོང་མེད་པ་ཞིག་མིན་ལ། ཉུང་མཐར་རྒྱ་ནག་གི་གྲོང་ཁྱེར་ཁྲོན་ཆིན་དང་ང་རང་གི་འཚོ་བའི་ཁྲོད་ནས་བྱུང་མྱོང་། ཁོང་ནི་ངས་བྲིས་པའི《རང་དབང་ལྷ་མོའི་མིག་ཆུ》ཞེས་པའི་ལེའུ་ ༢༣ “ཤོག་ལྷེ་གཅིག་གིས་བཏེགས་པའི་དྲི་བ”ཞེས་པར་གླེང་བའི་མིང་མེད་པའི་མི་དེ་ཡིན་ལ། ཁོང་གིས་རང་ཉིད་ཀྱི་ཉེན་ཁར་མི་འཛེམ་པར་ང་རང་ལ་ཁོང་གི་ཨ་ཅེ་ཡི་གདོང་རིས་ངོ་མ་དེ་ཕྱི་ལ་བརྟོལ་ཡོད། ངས་ཁོང་ལ་ཉེན་རྟོག་མི་སྣས་གདུག་སྦྱོང་བཏང་མི་ཡོང་ངམ་སྙམ་ནས་ད་ལྟའི་བར་དངོས་མིང་ཤི་གསང་རོ་གསང་བྱས་ཡོད།

ད་ལྟ་ལོ་ངོ་ ༣༥ འདས་སོང་། ཁོང་ཧ་ལམ་དགུང་ལོ་ ༨༠ སླེབས་གྲབས་ཡོད། ལོ་ཟླས་མི་ལ་གུ་ཡངས་གཏོང་མི་སྲིད་པས། ང་ཚོ་ཚང་མ་ལོ་ན་གཞོན་གཞོན་ཞིག་མིན་ཞིང་། དུས་ཚོད་ཀྱིས་སྒུག་ཁོམ་སྟེར་གྱི་མི་འདུག མི་འདིའི་དངོས་མིང་བོད་རྒྱའི་མི་རེ་ངོ་རེ་ཡིས་བརྗེད་མི་འོས་པ་ཞིག་ཡིན་ལ། རང་ཉིད་ཀྱིས་ཕམ་ཁ་ཁུར་ནས་བདེན་དོན་ལ་རྒྱབ་སྐྱོར་གནང་བའི་ལོ་རྒྱུས་འཛམ་གླིང་ཧྲིལ་བོར་བསྒྲགས་འོས་པ་ཞིག་ཡིན། ཚང་མས་ཁོང་ལ་ཤེས་སུ་འཇུག་འོས་པ་ནི་ཁོང་གི་ལོ་རྒྱུས་ནི་ཇི་འདྲའི་གཟི་བརྗིད་ལྡན་ཞིང་ཕལ་བ་ལས་འགོང་བ་ཞིག་རེད་ཨང་། ཡང་ཅིག་བཤད་ན། རྒྱ་ནག་ནས་བཟོས་པའི་དཔའ་བོ་ཝའི་སི་ལའེ་ཁོང་གི་སྤོབས་སྟོབས་ཀྱིས་ང་ཚོ་ཚང་མར་འབད་པ་ལྷུར་ལེན་གནང་ཕྱོགས་ཀྱི་ལམ་ཁ་ཞིག་བསྟན་ཡོད། ཁོང་གི་དངོས་མིང་ལ་ཅང་ཀྲོན་ཆོན་དུ་འབོད་ཅིང་།  ཁྲོན་ཆིན་སྤྱི་བདེ་ལས་ཁུངས་ཀྱི་གསང་འབྲེལ་བ་ཅང་ཀྲོན་མའེ་ཡི་ཕ་གཅིག་མ་གཅིག་གི་གཅུང་བོ་རེད།

༢

མདུན་གྱི་གཡོན་ནས། ཅང་ཀྲོན་ཆོན། ཅང་ཀྲོན་ཊི། རྒྱབ་ཀྱི་གཡོན་ནས། ཅང་ཞའོ་མའེ། ཅང་ཀྲོན་མའེ།

ཅང་ཀྲོན་མའེ་ལ་གཅུང་བོ་གཉིས་ཡོད་ཅིང་། ཆེ་བ་ནི་ཅང་ཀྲོན་ཊི་དང་ཆུང་བ་ནི་ཅང་ཀྲོན་ཆོན་ཡིན།

ཕྱི་ལོ་ ༡༩༧༥ ལོའི་དཔྱིད་མགོའི་ཉིན་ཞིག་ལ་ཅང་ཀྲོན་ཆོན་ལགས་ངས་ལས་ཀ་ལས་སའི་སྲང་མདོའི་བཟོ་གྲྭར་སླེབས་ནས་ང་རང་བཙལ་ཞིང་། ང་རང་གཅིག་པུར་སྐད་ཆ་བཤད་དགོས་ཟེར། ང་རང་གིས་ཐེ་ཚོམ་ཅུང་ཟོས་རྗེས་དགོངས་པ་ཞུས་ནས་ཁོང་དང་མཉམ་དུ་ཁྲོན་ཆིན་གྲོང་ཁྱེར་གྱི་བཅིངས་འགྲོལ་རྟགས་ཅན་གྱི་མཐའ་ཁོར་ཏུ་དུས་ཚོད་གསུམ་ལྷག་ལ་སྐད་ཆ་བཤད་པ་ཡིན། སྐབས་དེར་ཅང་ཀྲོན་ཆོན་གྱིས་གསུངས་ཚད་ང་རང་ལ་མཚོན་ན་སྒྲུང་གཏམ་ཞིག་དང་གློག་བརྙན་ཞིག་རེད་ལ། དངོས་ཡོད་འཚོ་བ་ལས་བརྒལ་ཞིང་། ངའི་ཤེས་ཚད་དང་བར་ཐག་ཆེས་རིང་བས། ཡིད་ཆེས་དཀའ་བ་ཞིག་རེད།

དཀྱིལ་སྙིང་ཕབ་བཤུས། སང་ཉིན། ང་རང་ཁྲོན་ཆིན་དང་ཁ་གྱེས་རྩིས་ཡིན། མདང་དགོང་ང་རང་ལ་གཉིད་ཁྱོན་ནས་ཡོང་མ་སོང་ལ། བློ་རྩེའང་ཉིས་འགལ་རེད། ཕྱོགས་གཅིག་ནི་རང་ཉིད་ཀྱི་ཨ་ཅེ་རེད་ལ། ཕ་གཅིག་མ་གཅིག་ཡིན་པའི་ཁར། ང་རང་དཀའ་ངལ་ལ་འཕྲད་དུས་རོགས་སྐྱོར་གནང་མྱོང་། ཕྱོགས་གཞན་ཞིག་ནི་རང་ཉིད་ཀྱི་གྲོགས་པོ་བཟང་བོ་རེད་ལ། ང་རང་དང་མཚུངས་པར་བཙོན་ཁང་ནས་ཕྱི་ལ་ཡོང་མཁན་ཞིག་རེད། གལ་ཏེ་ངས་མུ་མཐུད་དུ་རང་ཉིད་ཀྱི་ཨ་ཅེ་གསང་རོགས་བྱས་ནས་ལས་གནས་ངོ་མ་མ་བཤད་པ་ཡིན་ན། སྤྱི་ཚོགས་འདིའི་ནང་ཁྱོད་རང་ལ་བཤད་མཁན་གྱི་མི་གཉིས་པ་ཞིག་ཡོད་མི་སྲིད་པར་ཡིད་ཆེས་ཡོད། མི་སུ་གང་གིས་ཀྱང་ཁྱོད་རང་སྲུང་སྐྱོབ་བྱེད་སླད་ཉེན་ཁར་མཆོངས་མི་སྲིད་ལ། ཁྱོད་རང་མུ་མཐུད་ནས་མགོ་བསྐོར་འོག་ཚུད་དེ་བཙོན་ཁང་ནང་ཐེངས་གཉིས་པར་འགྲོ་རྒྱུ་ལས་ལྷག་མེད། ཅཱ་ཊིན་ལགས། ཁྱོད་རང་གི་ལང་ཚོ་ལོ་བཅུའི་བཙོན་ཁང་གི་འཚོ་བས་ཆུད་ཟོས་བཏང་ཡོད་པས། ངས་དངོས་གནས་ཁྱོད་རང་ཡང་བསྐྱར་བཙོན་ཁང་དུ་ཚུད་དུ་འཇོག་འདུན་བྱུང་མ་སོང་། དེ་བས། ངས་ཁྱོད་རང་བཙལ་རྒྱུ་ཐག་བཅད་པ་ཡིན་ལ། དོན་དངོས་ཆ་ཚང་བཤད་འདོད་པ་དེ་ཡིན།

ངས་ཁྱོད་རང་ལ་བཤད་འདོད་པ་ནི། ཅང་ཀྲོན་མའེ་སྟེ། ངའི་ཨ་ཅེ། ཁྱོད་ཀྱི་གྲོགས་མོ་བཟང་བོ། ཁོ་མོ་ལོ་རབས་ ༥༠ ནས་ཁྲོན་ཆིན་སྤྱི་བདེ་ལས་ཁུངས་ཀྱི་གསང་འབྲེལ་བ་བྱས་ཡོད། སྤྱི་བདེ་ལས་ཁུངས་ཀྱིས་ཅང་ཀྲོན་མའེ་དང་ཁྲོན་ཆིན་གྱི་སློབ་གྲྭ་ཆེན་མོ་བ་ཚའེ་ཏའོ་ཝེ་གཉིས་འཁྲིག་སྤྱོིད་ལ་ཞུགས་ཀྱིན་པ་དངོས་སུ་འཇུས་རྗེས། ཅང་ཀྲོན་མའེ་ཡིས་རང་མཚང་སྦས་སླད་སྤྱི་བདེ་ལས་ཁུངས་ཀྱི་གསང་འབྲེལ་བ་བྱེད་རྒྱུའི་ལམ་ཁ་གདམ་པ་རེད། ……ཅང་ཀྲོན་མའེ་ཡིས་སློབ་གྲོགས་ཝང་བུན་ཡུན་དང་དགའ་རོགས་ཀྲིན་ཁུག་གཉིས་གོ་མིན་ཏང་གི་གསང་ཉུལ་བ་ཡིན་པ་ཡར་གཏུགས་ཀྱིས་ཁྲོན་ཆིན་ཁྲའོ་ཐེན་སྒོ་ཆེན་ནས་སྲོག་ཐོག་ལ་བཏང་བ་རེད་ལ། ཁོང་གཉིས་ཤི་ཁའང་སུས་ལྐོག་བཙོང་བྱས་པ་ཤེས་མེད། …… ཅང་ཀྲོན་མའེ་ཡིས་ཧོང་ཀོང་གི་སྐྱེས་མ་ཞིག་བཙོན་ཁང་དུ་འཇུག་མྱོང་ལ། ད་དུང་བུ་མོ་སློབ་གྲྭ་ཆེན་མོ་བ་ཞིག་ཀྱང་བཙོན་ཁང་དུ་འཇུག་མྱོང་། དེ་ནི་ཁྱོད་རང་སྟེ། ཆིས་ཅཱ་ཊིན་རེད། ……

མདུན་གྱི་གཡོན་ནས། ཅང་ཞའོ་མའེ། ཅང་ཀྲོན་མའེ། ཆིས་ཅཱ་ཊིན།

རྒྱབ་ཀྱི་གཡོན་ནས། ཅང་ཀྲོན་ཆོན། ཅང་ཀྲོན་ཊི།

ཨ་ཅེ་ལགས་ཀྱིས་སྤྱི་བདེ་ལས་ཁུངས་ལ་ལས་ཀ་བྱས་པར་བྱས་རྗེས་ཆེ་བས། ཁོ་མོའི་གཅུང་བོ་གཉིས་སམ། ཀྲོན་ཊི་དང་ང་རང་གཉིས་ལ་སྤྱི་བདེ་ལས་རིགས་སུ་ལས་ཀ་གཉེར་རྒྱུའི་སྐལ་བ་བྱུང་སོང་། ཀྲོན་ཊི་ཐོག་མར་ཁྲོན་ཆིན་དང་དེ་ནས་པེ་ཅིན་རྡོ་སོལ་ལྷན་ཁང་གི་ཉེན་རྟོགས་སྡེ་ཚན་དུ་ལས་གནས་རེག ང་རང་ཁྲོན་ཆིན་ནས་ཉེན་རྟོགས་པ་དང་རྗེས་ལ་མགོ་བའི་གྲས་ཀྱི་ལས་ཀ་རེག་པ་དང་། དེའི་རྗེས་ལ་གཡག་རྔའི་སྤྱི་བདེ་ལས་ཁུངས་ཀྱི་འགོ་གཙོའི་ལས་ཚབ་པ་བྱས། ང་ཚོ་ལོ་ན་གཞོན་ཞིང་ལས་ཀར་ཧུར་ཐག་ཆེ་བས། དཔོན་གཡང་རང་འཁོར་ལྟ་བུ་རེད།

ཅང་ཀྲོན་ཆོན་ལགས་ཉེན་རྟོགས་པ་གནང་སྐབས་རྒྱལ་ནང་དུ་ལོག་པའི་རྒྱ་རིགས་སྤུན་ཟླར་བརྫུས་པ།

ཐེངས་འདིར་ང་རང་བཙོན་ཁང་ནས་ཕྱི་ལ་ཐོན་རྗེས།  ཨ་ཅེ་ལགས་ལ་ཁྲོན་ཆིན་དུ་ལྟ་རུ་ཡོང་བ་ཡིན། གཅེན་པོ་ཀྲོན་ཊི་ཡང་ཆེད་དུ་པེ་ཅིན་ནས་ལོ་ ༡༤ ངོ་མ་ཐུག་པའི་གཅུང་བོར་ལྟ་རུ་བསླེབས་སོང་། ང་རང་དང་ཀྲོན་ཊི་གཉིས་ཀྱི་བསམ་ཡིད་ལས་འདས་པ་ཞིག་ལ་སྔར་ཉེས་པ་ཕོག་མཁན་གྱི་བུ་མོ་སློབ་གྲྭ་ཆེན་མོ་བ་དེའང་འདིར་འདུག ཨ་ཅེ་ལགས་ཀྱིས་མུ་མཐུད་དུ་གསང་འབྲེལ་བའི་བྱ་བ་བསྒྲུབས་ཀྱིན་པར་མ་ཟད། དམིགས་འབེན་ཆིས་ཅཱ་ཊིན་ཁྱོད་རང་ལ་གཏད་འདུག་པས། ངེད་སྤུན་གཉིས་ཀྱིས་ཨ་ཅེ་ལགས་ལ་དེ་འདྲ་མ་གནང་རོགས་ཞེས་ཞུ་བ་བྱས་པ་ཡིན། ཡིན་ནའང་། ཨ་ཅེ་ལགས་ཀྱིས་ཁར་ཉན་མ་སོང་བའི་ཁར། ཁོ་མོས་རྒྱལ་ཁབ་ཀྱི་ཆེད་དུ་བྱས་རྗེས་བཞག་ནས་མི་དམངས་ལ་ཞབས་འདེགས་ཞུ་བའི་གཟི་བརྗིད་ལྡན་པ་བྱ་བ་གཉེར་རྒྱུ་ཡིན་ལ། “མུ་མཐུད་དུ་མིང་མེད་དཔའ་བོ་བྱེད་རྒྱུ་ཡིན་ཟེར། ”

…… 

དོན་ངོ་མར་ཕྱི་ལོ་ ༡༠༧༢ ལོའི་ཟླ་ ༩ ནི་ང་རང་བཙོན་ཁང་ནས་ཕྱི་ལ་ཐོན་པའི་ལོ་གཉིས་པ་ཡིན་ལ། ཅང་ཀྲོན་མའེ་ང་རང་གི་ཁྱིམ་ཚང་དུ་སླེབས་སོང་ལ། ངས་ཁོ་མོ་ནི་འདམ་འབག་དག་ཤུལ་དུ་ལྷག་པའི་གསེར་ལྟ་བུའི་གྲོགས་མོར་བཀུར་བཞིན་པར་མ་ཟད། གྲོགས་མོའི་མཛའ་བརྩེ་ལ་གཅེས་སྲུང་གིས་རང་ཉིད་ནི་ཅང་ཚང་གི་ནང་མི་ཞིག་ལ་ལྟ་བཞིན་ཡོད་པས། ཁོ་མོར་ཅི་ཡང་གསང་སྦས་བྱེད་ཀྱིན་མེད། དེ་ནས་བརྩིས་པའི་ལོ་གཅིག་དང་ཕྱེད་ཀའི་རྗེས་ཀྱི་དེ་རིང་། ཅང་ཀྲོན་ཆོན་ལགས་ཀྱིས་དུས་ཚོད་གསུམ་ལྷག་ལ་གསུངས་པའི་བརྩམས་སྒྲུང་ངམ། གློག་བརྙན་དེས་ང་རང་ཉེན་ཁར་ལྷུང་སྐབས་སྐྱོབ་པ་རེད་ལ། སྲོག་སྐྱོབ་ཀྱི་བཀའ་དྲིན་ཡང་འདུས་ཡོད།

༣ 

པར་དང་པོ། ཅང་ཀྲོན་ཊིན་སྤྱི་བདེ་ལས་ཁུངས་ཀྱི་མགོ་གཙོའི་ལས་ཚབ་མ་གནང་བའི་ཡར་སྔོན་དང་། པར་གཉིས་པ། བཙོན་ཁང་ནས་ལོ་ ༡༤  སྡུག་སྦྱོང་མྱོང་མཐར་ཕྱི་ལ་ཐོན་པའི་ཅང་ཀྲོན་ཆོན།

ཅང་ཀྲོན་ཆོན་ལགས་ཕྱི་ལོ་ ༡༩༥༨ ལོར་བོད་ལྗོངས་སུ་མངགས་ནས་དྲག་འདུལ་ལ་ཞུགས་ཡོད་ཅིང་། སྐབས་དེར་ཁོང་དགུང་ལོ་ ༢༣ རེད། ཁོང་གིས་ངོ་ལོག་ཇག་པའི་མགོ་བ་གཉིས་ལྐོག་གློད་བྱས་ཡོད་པར་མ་ཟད།  ས་གནས་སུ་ངལ་རྩོལ་སློབ་གསོ་གཏོང་བཞིན་པའི་རུ་ཁག་གཅིག་རང་ཡུལ་ལ་མངགས་པས། ཁོང་ལ་གསར་བརྗེ་ངོ་ལོག་པའི་ཉེས་མིང་འོག་ལོ་ ༡༥ ཁྲིམས་ཆད་ཕོག་ཅིང་། ལོ་གཅིག་སྔ་སྣུར་གྱིས་ལོ་ ༡༤ རིང་བཙོན་ལ་ཚུད་རྗེས་ཕྱི་ལ་ཐོན་པ་རེད། གསར་བརྗེ་ངོ་ལོག་པའི་ཉེས་པས་ཅང་ཀྲོན་ཆོན་ལགས་ཀྱི་གཡག་རྔའི་སྤྱི་བདེ་ལས་ཁུངས་ཀྱི་འགན་འཛིན་ལས་ཚབ་ཀྱི་མདུན་ལམ་བརླག་ཡོད་པའི་ཁར། དམར་ཤོག་ཚོགས་མི་ཡིན་པའི་ལྕམ་མོས་ཀྱང་སྦྲུམ་མའི་ལུས་པོ་ཁུར་བཞིན་ཁོང་བསྐྱུར་ནས་དམར་ཤོག་ཚོགས་པའི་རྗེས་སུ་འབྲངས་འདུག ཅང་ཀྲོན་ཆོན་གྱིས་རྒྱལ་ཁབ་ཀྱི་གསང་བ་མང་བོ་ཤེས་ཡོད་པས། ཁོང་དང་ཀྲིག་ཨིན་ལེ་ཡི་གལ་གནད་ཆེ་བའི་དྲུང་ཆེ་སོགས་རྒྱ་ནག་དམར་ཤོག་གཞུང་གི་མཐོ་རིམ་དཔོན་རིགས་ཁག་མཉམ་དུ་བཙོན་ཁང་གཅིག་ལ་བཅུག་ཡོད་པས། ཧུའུ་ཧྥུན་ནམ་ཀྲང་ཀོང་ཉིན་འཇུག་སའི་བཙོན་ཁང་དང་ཐག་རིང་བོ་མི་འདུག

ཅང་ཀྲོན་ཆོན་གྱི་ས་བདག་གི་ཞྭ་མོ་གཡོགས་པའི་ཨ་མ་ལགས་ཀྱིས་བུ་མ་མཐོང་བར་ཚེ་ལས་འདས་འདུག་ལ། ཁོང་གི་ལྕམ་མོ་ཟུར་བས་བཙས་པའི་བུ་ཆུང་ཡང་ལོ་གསུམ་མ་ལོན་པར་གྲོངས་འདུག་པས། ཕ་བུ་མཇལ་བའི་གོ་སྐབས་ནམ་ཡང་ལྷག་ཡོད་པ་མ་རེད། དེ་བས། ཅང་ཀྲོན་ཆོན་ལགས་ཁྱིམ་མེད་བདག་མེད་དུ་གྱུར་བས། ཐེངས་འདིར་བཙོན་ཁང་ནས་གློད་རྗེས། ཁྲོན་ཆིན་ལ་ཡོང་ནས་ཨ་ཅེ་ལགས་ལ་སྐྱབས་བཅོལ་གྱི་བསམ་འདུན་བཅིངས་ཡོད་པ་རེད།

མ་བསམ་ས་ནས་ཅང་ཀྲོན་མའེ་ཡིས་ཁྱིམ་ཐོར་ཁ་གཡར་ནས་གདོན་འདྲེ་ཡིས་འཚེ་བ་ཐེབས་པའི་མིའང་གདོན་འདྲེ་དང་མཉམ་རུབ་བྱེད་དགོས་པར་གནོན་ཤུགས་སྤྲད་ནས་མོ་དང་མཚུངས་པར་ཅང་ཀྲོན་ཆོན་ཡང་ཁྲོན་ཆིན་སྤྱི་བདེ་ལས་ཁུངས་ཀྱི་གསང་འབྲེལ་བ་བྱེད་དུ་འཇོག་བསམ་འདུག་ལ། ཅང་ཀྲོན་མའེ་ཡི་བསམ་པར་ཅང་ཀྲོན་ཆོན་ནི་སྤྱི་བདེ་བྱ་བར་ཉམས་མྱོང་ཡོད་པའི་ཁར། སྤྱང་གྲུང་ལྡན་མཁན་ཞིག་ཀྱང་ཡིན་པ་དང་བཙོན་ལ་བསྡད་པ་གང་ཐད་ནས་ཉེས་ཅན་པས་ཡིད་ཆེས་བྱེད་སླ་ལ། ཉམས་མྱོང་ཡང་ཕུན་སུམ་ཚོགས་པ་ཡོད། དེ་ལྟར་དཔལ་འབྱོར་གྱི་ཐད་ནས་རང་མགོ་ཐོན་པ་དང་ཁོ་མོའི་ཁུར་བོར་མི་འགྱུར་བ་དང་ཆབ་སྲིད་ཀྱི་ཐད་ནས་རང་ཉིད་དང་བུ་མོར་བཀྲ་མི་ཤིས་པ་འབྱུང་མི་སྲིད་པས། རྡོ་བ་གཅིག་གིས་བྱ་ཕོ་གཉིས་གསོད་པའི་དཔེ་རུ་འགྱུར་འདུག་ལ། དེ་འདྲའི་དོན་དག་མི་བསྒྲུབ་ཅི་ཞིག་སྒྲུབ་ལྟ་བུར་སྣང་ཡོད་འདུག

ཆབ་སྲིད་དང་དཔལ་འབྱོར་གཉིས་ཐད་ཀྱི་བཟང་རྐྱེན་ནི་ཅང་ཀྲོན་མའེ་ཡི་འདས་པའི་བྱུང་བའང་ཡིན་པས། མ་འོངས་པར་གསང་འབྲེལ་བྱེད་པའི་སྙིང་སྟོབས་ནི་དངུལ་དངོས་ཀྱི་གཞི་རྟེན་ཡང་རེད། ཁོ་མོར་ངལ་སྣང་རྩ་བ་ནས་འབྱུང་གི་མེད་པའི་ཁར། མི་གཞན་ཡང་རང་ཉིད་དང་མཚུངས་པར་བསམ་འདུག

སུ་ཞིག་གིས་བཤད་ཐུབ་བམ། འཇིག་རྟེན་འདིར་དངུལ་དངོས་ཀྱི་རྗེས་སུ་མི་འབྲངས་པར་བདེན་དོན་གཙིགས་སུ་བཀུར་མཁན་གྱི་མིའང་ཡོད་པར་མ་ཟད། མི་དེ་ནི་གཞན་མ་ཡིན་པར་ཁོ་མོའི་མདུན་དུ་ཡོིད་པའི་རང་ཉིད་ཀྱི་གཅུང་བོ་ཅང་ཀྲོན་ཆོན་རེད། ཅང་ཀྲོན་མའེ་ཡིས་གཅུང་བོ་ཁྲིད་ནས་ཁྲོན་ཆིན་སྤྱི་བདེ་ལས་ཁུངས་ཀྱི་མགོ་བའི་རྩར་བཅར་ཞིང་། བསམ་པའི་ནང་དུ་དོན་ཆེན་གྱི་ཕྱེད་ཀ་འགྲུབ་ཤག་གི་ཚོད་རྩིས་བརྒྱབ་འདུག

ཉིན་དེར་ཅང་ཀྲོན་ཆོན་གྱིས་འདས་པའི་དུས་སུ་ཨ་མས་བཟོས་པའི་ལྭ་བ་དེ་གྱོན་ཞིང་། རང་ཉིད་ལ་གསལ་འདེབས་ཀྱིས་ཅིས་ཀྱང་ཨ་མ་བརྗེད་མི་རུང་། དེ་མཚུངས་སུ་སྐར་བརྒྱད་ཅན་གྱི་ཐ་མག་སྒམ་གང་ཨམ་ཕྲག་ནང་བཅུག་ནས་སྤྱི་བདེ་ལས་ཁུངས་ཀྱི་རྒྱས་སྤྲོས་ཆེ་བའི་ཐ་མག་སོགས་ལ་མི་རེག་པའི་དམ་བཅའ་ཡིད་ལ་བཅངས་ཡོད་པས། ཨ་ཅེ་དང་སྤྱི་བདེ་མགོ་བས་འཇམ་དྲག་མཉམ་སྤྱོད་ཀྱི་མདུན་ནས་བླུན་ཉམས་དང་འོན་པའི་བཟོ་ལྟ་བཏོད་ནས་སྤྱི་ཚོགས་ལ་ཁ་གྱེས་ནས་ཡུན་རིང་འགོར་ཡོད་པས། ཇི་ལྟར་བཤད་ཀྱང་ལས་ཀ་དེ་ལས་པའི་ནུས་པ་མེད་ཚུལ་ལབ་སྟེ་དང་ལེན་བྱས་མི་འདུག

དེའི་རྗེས་ནས་ཅང་ཀྲོན་ཆོན་གྱིས་ང་རང་ལ་བཤད་དོན། ཕྱི་ལོ་ ༡༩༥༧ ལོའི་ཡར་སྔོན་ཁོ་རང་གིས་རྒྱ་ནག་དམར་ཤོག་ཚོགས་པར་བརྩི་བཀུར་ཐ་གཅིག་ཏུ་བྱེད་ཀྱིན་པའི་ཁར། གུང་ཁྲན་རིང་ལུགས་ཀྱི་ལས་དོན་ཐད་ལུས་སྲོག་ལོངས་སྤྱོད་འབུལ་ཐུབ་ཀྱི་ཡོད། ཡིན་ནའང་། ༥༧ ལོའི་རྗེས་ནས་རང་ཉིད་མགོ་བསྐོར་འོག་ཚུད་ཟིན་པ་ངོས་ཟིན་སོང་། ཁོས་མུ་མཐུད་དུ་བཤད་དོན། དེ་རིང་གི་ཅང་ཀྲོན་ཆོན་ནི་མི་གཞན་ཞིག་སྟེ། དམར་ཤོག་ཚོགས་པར་ལས་ཀ་རྐང་གཅིག་ལས་མི་སྲིད། འདི་ནི་ཅང་ཀྲོན་ཆོན་བོད་བདེ་འཇགས་གཏོང་དུ་མངགས་ཀྱང“ངོ་ལོག་པ”གློད་ཅིང་ངལ་རྩོལ་བཅོས་བསྒྱུར་རུ་ཁག་གཏོར་དོན་ལ་ཐུག་ཡོད་པ་རེད།  ཡང་ཅིག་བཤད་ན། རང་ཉིད་ཀྱི་ཨ་ཅེ་ཡིན་ཡང་ཁྱིམ་ཐོར་ཁ་གཡར་ནས་བསླུ་བསམ་འཁོར་ཡང་བསྒུལ་ཐུབ་མེད་དོན་ལའང་ཐུག་ཡོད་པ་རེད།

སྤྱི་བདེ་ལས་ཁུངས་ནས་ཕྱིར་ནང་ལ་ལོག་རྗེས། ཨ་ཅེ་དང་གཅུང་བོའི་འགལ་བ་ཛ་དྲག་གི་ཕྱོགས་སུ་འཕེལ་མགོ་བརྩམས་འདུག ཅང་ཀྲོན་ཆོན་ལགས་ཀྱིས་ཅང་ཀྲོན་མའེ་ལ་བརྗེད་མི་རུང་བ་ནི་ཨ་མ་ལགས་ས་བདག་གི་གྲལ་དུ་བཅད་ཅིང་། བཅིངས་འགྲོལ་བྱས་མ་ཐག་ནས་ཞིང་བ་ཚོར་འཐབ་རྩོད་བྱེད་དུ་བཅུག་ནས་སྡོད་བཟོད་མེད་པར་བོད་ནང་དུ་སྦས་སྐུང་བྱེད་དགོས་ཐུག་པ་དང་། དེའི་རྗེས་ཀྱི་རིག་གསར་སྐབས་སུ་ཡིག་ཆེན་ཉལ་ཁྲི་དང་འབྲས་སྒམ་སོགས་ཀྱི་སྟེང་དུ་སྦྱར་ནས་ལོ་ན་བདུན་ཅུ་སོན་པའི་ལོ་ལོན་ཞིག་གཞི་རིམ་དུ་བསྐྱལ་ནས་ཤི་ལམ་ལ་བཅུག་ཡོད་པ་རེད། ཁྱོད་རང་གི་བུ་མོའི་ཨ་ཕ་ལགས་ཀྱང་ཤིན་ཅང་ལ་རྒྱང་འཕུད་བཏང་ནས་ངལ་རྩོལ་བཅོས་བསྒྱུར་བྱེད་ཀྱིན་པ་དང་། ཁྱོད་ཀྱི་གཅུང་བོར་གསར་བརྗེ་ངོ་ལོག་པའི་ཉེས་པ་བཅད་ནས་ལོ་ ༡༤ ཁྲིམས་ལ་སྦྱར་བས་ཁྱིམ་གཞི་སྟོང་ཟིན་པས། ཁྱོད་རང་ནི་གསར་བརྗེ་ངོ་ལོག་པའི་ནང་མི་ཡིན་བཞིན་དུ་གདུག་རྩུབ་དཔུང་ཁག་ལ་རོགས་འདེགས་བྱེད་མི་འོས་པ་ཞིག་རེད། ད་དུང་ཅང་ཀྲོན་ཆོན་གྱིས་ཨ་ཅེ་ནི་བླ་རུལ་བ་རེད་ཅེས་སྡིགས་དམོད་ཀྱང་བྱས་ཤིང་། ཀའོ་ཨེར་ཅི་ཡི་བརྩམས་ཆོས《བླ་རུལ་བ》ཞེས་པ་མདུན་ཅོག་སྟེང་དུ་བཤམས་པར་མ་ཟད། ཁྱོད་རང་གིས་མི་རྩིས་སྤྲོད་ཀྱི་ཟ་མ་ཟ་བཞིན་པས། ཆིས་ཅཱ་ཊིན་ལྟ་བུའི་སློབ་མ་ཞིག་ཀྱང་སྤྱི་བདེ་རྩིས་སྤྲོད་བྱས་ཡོད་ལ། མི་གཤིས་ཟེར་བ་ཞིག་ཁྱོན་ནས་མི་འདུག

དེ་ལྟར་ཅང་ཀྲོན་མའེ་རླུང་དྲག་ཏུ་ལངས་ནས་གཅུང་བོར་ཁྱིམ་ཐོ་ལེན་རོགས་བྱས་ཡོད་པ་མ་རེད། སྐབས་དེར་ཁྱིམ་ཐོ་མེད་ན་གྲོང་ཁྱེར་ནང་དུ་འཚོ་བ་རོལ་ཐབས་མེད་པས། ཅང་ཀྲོན་ཆོན་གྱིས་ལས་ཀ་ལས་ཆོག་གི་མེད་ལ། ལས་ཀ་ལས་མ་ཆོག་ན་འཚོ་རྟེན་ཡོང་ཁུངས་ཆད་པ་རེད། ཡིན་ནའང་། ཨ་ཅེ་དང་ཁྱི་སྤྱང་མཉམ་འབྲེལ་བྱེད་འདུན་རྩ་བ་ནས་མེད་པས། ཁྲོན་ཆིན་དང་ཁ་གྱེས་དགོས་ཐུག་པ་རེད། ཁ་གྱེས་ཁར། ཅང་ཀྲོན་ཆོན་ལ་ངའི་གཅུང་བོས་སྐུད་ལྭ་ཞིག་སྤྲད་པ་དང་། ཅང་གིས་ད་དུང་རྩིས་འདང་ཤིན་ཏུ་ཆེ་བའི་པར་ཆས་ཀྱང་རིན་གོང་ཕྱེད་བཅག་གིས་རྒྱ་སྒོར་ ༡༠༠ བརྗེ་ཡོད་འདུག སྐབས་དེར་ཅང་ཀྲོན་ཆོན་སྤྲང་བོ་རང་དུ་གྱུར་ཡོད་པ་རེད།

རྩོམ་པ་པོ་ཡའོ་ཀོས་གསུངས་དོན། འཇིག་རྟེན་འདིར་མི་ཁག་ཅིག་མུན་ནག་གི་མདུན་དུ་ཕྱི་བསྣུར་བྱེད་ཀྱིན་ཡོད། འདི་ནི་ཅང་ཀྲོན་མའེ་ལྟ་བུར་དམིགས་ཡོད་པ་ཞིག་རེད། ཅང་ཀྲོན་ཆོན་གྱིས་ང་རང་ལ་བཤད་རྒྱུར། ཡུན་ནན་གྱི་ཚ་བའི་ལུང་བར་བྱ་རིགས་ཤིག་ཡོད་ཅིང་། ནམ་རྒྱུན་མོ་ཊའི་མདུན་ངོས་ཀྱི་ཤེལ་སྒོར་བརྡབས་ནས་འཆི་བཞིན་ཡོད་ལ། བྱ་རིགས་དེས་དེ་ནི་ཉི་མར་འཁྲུལ་བས་རེད། དེ་བས། བྱ་རིགས་དེར་ཉི་མའི་བྱ་ཞེས་འབོད། ཅང་ཀྲོན་ཆོན་གྱིས་མཐུད་ནས་གསུངས་དོན། “བྱ་རིགས་ཀྱིས་ཀྱང་འོད་སྣང་སླད་དུ་རང་སྲོག་དོར་ཐུབ་ན། མི་ནི་བཤད་མ་དགོས་པ་ཞིག་རེད། ”ཅང་ཀྲོན་ཆོན་ནི་དངོས་གནས་ཉི་མའི་བྱ་ཞིག་རེད།

༤

ཅང་ཀྲོན་ཆོན་ལགས་ཁྲོན་ཆིན་དང་ཁ་གྱེས་རྗེས། ཕྱིར་ཐེངས་གཅིག་ཡོང་མྱོང་ལ། སྐབས་དེར་ངའི་གྲོགས་པོ་ཞིག་གི་ནང་དུ་སྡོད་དུ་བཅུག་པ་ཡིན། གྲོགས་པོ་དེས་བཤད་ན། མཚན་མོར་དེར་ཅང་ཀྲོན་ཆོན་ལ་གཉིད་ཁྱོན་ནས་ཡོང་མ་སོང་། ཞེད་སྣང་གི་ཀློང་དུ་ཚུད་འདུག གྲགས་འགུལ་ཅུང་ཙམ་ཡོད་ན་ལམ་སང་གཡས་ལྟ་གཡོན་ལྟ་བྱེད་ཀྱིན་འདུག

ཐེངས་དེར་ཁ་གྱེས་སྐབས། ཅང་ཀྲོན་ཆོན་གྱིས་ང་རང་ལ་ཁ་བྱང་ཞིག་སྤྲད་འདུག་ལ། སེམས་ལ་བཟུང་རྗེས་མེད་པ་བཟོ་རོགས་ཞེས་བསྐུལ་འདུག དེར་མཚུངས་སུ་ཁྱོད་ཀྱིས་དེང་ཕྱིན་མི་འདི་བརྒྱུད་ནས་ངའི་གནས་ཚུལ་ཤེས་ཐུབ་ཟེར། མི་དེ་ནི་ཁྲོམ་འདུས(རྒྱས་ཁྲིན་ཏུ་འབོད)གྲོང་མཐའ་ན་ཡོད་པའི་ཞིང་བ་ཞིག་རེད།

ལོ་གསུམ་གྱི་རྗེས་ནས་ངས་ཅང་ཀྲོན་ཆོན་ལགས་བརྩད་གཅོད་སླད། ཁྲོམ་འདུས་ལ་སོང་ནས་མི་དེ་བཙལ་བ་ཡིན། ཁོ་བོས་བཤད་ན་ཅང་ཀྲོན་ཆོན་ཡང་བསྐྱར་བཙོན་ལ་ཚུད་ནས་ལོ་ ༥ ཁྲིམས་ཐག་བཅད་འདུག ཞིབ་ཆ་མ་ངེས་ཀྱང་སྐབས་དེར་ཁོང་གིས་སྤྱི་བདེ་ཡི་བྱེད་ཐབས་སྤྱད་ནས་དངུལ་བཙལ་བར་བརྟེན་ནས་ཉེས་དོན་ཁྲིམས་ཆད་ཕོག་པ་ཞིག་རེད། ལོ་ ༥ འདི་ཅང་ཀྲོན་མའེ་ལ་མཚོན་ན་ལག་སྐྱེས་བཟང་བོ་ཞིག་ཅིས་མ་ཡིན། 

ཅང་ཀྲོན་ཆོན་ལགས་ནི་སྤྱང་གྲུང་ཅན་ཞིག་ཡིན་པར་མ་ཟད། དགའ་ཕྱོགས་རྒྱ་ཆེ་ཞིང་། རྩོམ་རིག་ལ་དད་འདུན་ཡོད་མཁན་ཞིག་ཡིན་པས། གང་ཞིག་ནས་རེག་པ་སུས་ཤེས། 《ཐང་རྒྱལ་རབས་ཀྱི་སྙན་ཚིག་སུམ་བརྒྱ་མ》བློ་ལ་བཤར་ཐུབ་ཀྱི་འདུག་ལ། ཁོ་རང་ཁྲོན་ཆིན་དུ་ཡོད་སྐབས། དེའི་ཁྲོད་ཀྱི་སྙན་རྩོམ་ཁག་ཅིག་ཕབ་བཤུས་ཀྱིས་ང་རང་ལ་སྤྲད་མྱོང་། ཡིག་གཟུགས་ཡག་ཅིང་། ད་དུང་ང་རང་ལ་འབོལ་རྩོམ་ཁ་ཤས་ཀྱང་བྲིས་མྱོང་། ཡིད་སྐྱོ་བ་ཞིག་ལ་ང་རང་དེའི་ཐད་ནས་བླུན་པོ་བླུན་ནག་ཅིག་ཡིན་པས། ཁོ་རང་དང་མཉམ་རོལ་བྱེད་ཐབས་མི་འདུག དེའི་མ་ཚད་ཅང་ཀྲོན་ཆོན་འགྱིག་རྩེ་བར་ཤིན་ཏུ་དགའ་ཞིང་། གཉིད་ཁོངས་ནས་ཀྱང་འགྱིག་རྩེ་ནས་རྒྱལ་ཁ་ལེན་ཐུབ་མཁན་ཞིག་ཡིན། ཡིད་ཕམ་པ་ཞིག་ལ་ལོ་ན་ ༢༣ ནས་ཁོང་གི་རང་དབང་ཤོར་ཡོད་པས། མི་ཚེ་ཡི་མདུན་ལྗོངས་རྒྱ་བསྐྱེད་ཐུབ་མེད་ལ། ལྷན་སྐྱེས་ཀྱི་ཤེས་རབ་ཀྱང་ཆུད་ཟོས་སུ་ལྷག་སོང་།

༡༩༨༤ ལོར་ཅང་ཀྲོན་ཆོན་བཙོན་ཁང་ནས་ཐེངས་གཉིས་པ་ཕྱི་ལ་གློད་འདུག སྤྱི་བདེ་ལས་བྱེད་ཡིན་པའི་གྲོགས་པོ་རྙིང་བ་ཞིག་གིས་རོགས་བསྐྱོར་འོག་ཅང་ཀྲོན་ཆོན་གྱིས་རྫས་འགྱུར་རིག་པ་དང་ཆང་བསྙལ་རིག་པར་རང་སྦྱོང་བྱས་པས། མ་འགྱངས་པར་ཅང་ཀྲོན་ཆོན་ལ་སྐད་གྲགས་ཆགས་ཡོད་པར་མ་ཟད། ལག་རྩལ་ལ་རྒྱལ་ཁབ་རིམ་པའི་གསེར་གྱི་རྟགས་མའང་ཐོབ་པས། ཝོའུ་ཧན་གྲོང་ཁྱེར་གྱི་ཆང་གི་བཟོ་གྲྭ་ཞིག་ཏུ་སྤྱི་ཁྱབ་ལག་རྩལ་པ་གནང་འདུག

གསེར་ས་འོག་ཏུ་ཡོད་ཀྱང་འོད་ནམ་མཁར་རྒྱག་ཐུབ།

༡༩༨༥ལོའི་དབྱར་གནང་སྐབས། ངས་བུ་མོ་ཁྲིད་ནས་ཀོང་ཀྲིག་ཏུ་ཡོད་པའི་ཕ་རྒན་གྱི་གྲོགས་པོ་རྙིང་བ་ཞིག་ལ་ལྟ་རུ་ཕྱིན་པ་ཡིན། ཕྱིར་ལོག་སྐབས། ཝོའུ་ཧན་ནས་ཅང་ཀྲོན་ཆོན་ལ་ལྟ་རུ་སོང་བ་ཡིན། ཅང་ཀྲོན་ཆོན་ལགས་ལ་བཙོན་ཁང་གི་འཚོ་བས་ལོ་ ༢༠ ལྷག་ལ་མནར་གཅོད་བཏང་ཡོད་པའི་ཁར། ཨ་ཅེ་ལགས་ཀྱིས་རྒྱང་འཕུད་བཏང་བ་དང་འཁྱམ་ཉུལ་གྱི་འཚོ་བར་ཞུགས་ཡོད། མ་གཞི་ལོ་ན་ ༢༣ སྐབས་བཙོན་ལ་ཚུད་པའི་ལང་ཚོའི་གཟི་དཔལ་འབར་བའི་ཕོ་རྒོད་འདི་རྒྱ་ནག་དང་རཱ་ཤི་ཡས་མཉམ་རུབ་ཀྱིས་བཟོས་པའི་གློག་བརྙན《རླུང་ཤར་ཕྱོགས་ནས་གཡུགས་བྱུང》ཟེར་བའི་ནང་གི་མདོ་འཛིན་པ་ཀྲང་ཧའེ་དང་འདྲ་བོ་ཡོད།  ཡིན་ནའང་། སྐབས་དེར་ལོ་ན་ ༥༠ བརྒལ་མ་ཐག་ཡིན་མོད་རྒས་ཉམས་ཤར་འདུག་ཅིང་། ཚོར་བས་ཟིན་མི་ཐུབ་པའི་མགོ་འདར་བྱུང་འདུག

ང་རང་གློག་བརྙན་སློབ་ཆེན་ནས་སློབ་མཐར་ཕྱིན་རྗེས། རང་ཁྱིམ་དུ་རྒྱ་ཡིག་དང་དབྱིན་ཡིག་ལ་རང་སྦྱོང་བྱེད་འདུན་ཡོད་ནའང་། འཚོ་བས་དབང་གིས་གོ་སྐབས་དེ་འཛིན་ཐུབ་ཀྱི་མི་འདུག ཅང་ཀྲོན་ཆོན་ལགས་ཀྱིས་འཕྲིན་ཡིག་བཏང་ནས“ཁྱོད་རང་ལ་ཕུགས་བསམ་དེ་ཡོད་ན། ངས་རོགས་སྐྱོར་གནང་ཆོག ”དེ་ནི་བསྐྱིན་པ་མི་དགོས་པའི་རོགས་བསྐྱོར་ཡིན་པས། ངས་མི་ཚེ་འདིར་ཅང་ཀྲོན་ཆོན་གྱི་བཀའ་དྲིན་གཞལ་ཐུབ་མེད་པས། ངོས་ལེན་བྱེད་མ་ཕོད།

༥

༡༩༨༧ ལོར་ང་རང་ཕྱི་རྒྱལ་ལ་མ་སླེབས་གོང་། གོ་ཐོས་སུ་ཅང་ཀྲོན་ཆོན་དང་དཀར་མཛེས་ནས་ལས་འཁྱུར་ངལ་གསོ་བྱས་པའི་བུད་མེད་ཅིག་གཉེན་སྒྲིག་བྱས་འདུག  ང་རང་ཨོ་སི་ཁྲི་ལི་ཡར་སླེབས་རྗེས། ཅང་ཀྲོན་ཆོན་ལ་འབྲེལ་བ་རྦད་དེ་ཆད་སོང་། ལོ་འདི་དག་རིང་། ངས་ཕྱིར་རྒྱ་ནག་ལ་བསྐྱོད་ཀྱིན་པའི་གྲོགས་པོ་གཉིས་ལ་རེ་བཅོལ་གྱིས་བརྩད་གཅོད་བྱེད་དུ་བཅུག་པ་དང་། ཐོག་མར་ཅང་ཀྲོན་ཊི་བརྙེད་པ་ཡིན་ན། གཅུང་བོ་བརྙེད་བདེ་ཆགས་ཡོད་སྙམ། འོན་ཀྱང་། པེ་ཅིན་རྡོ་སོལ་ལྷན་ཁང་གི་ལས་འཁྱུར་ངལ་གསོ་བའི་མིང་ཐོའི་ཁྲོད་དུ་ཅང་ཀྲོན་ཊི་ཞེས་པའི་མིང་དེ་མི་འདུག གཅིག་བྱས་ན་ཁོ་བོ་གྲོངས་ཟིན་པ་འདྲ། 

སྐབས་འདིར་སླེབས་སྐབས། ཤོག་བྱའི་སྐུད་ཐག་ཆད་སོང་། ཅང་ཀྲོན་ཆོན་ཡ། ཁྱེད་རང་གང་དུ་ཡོད་དམ། ངས་ཚང་མར་རེ་བསྐུལ་ཞུ་ཡག་ནི་ཐབས་བརྒྱ་ཇུས་སྟོང་གིས་ང་ཚོ་ཐུན་མོང་གི་གྲོགས་པོ་ཅང་ཀྲོན་ཆོན་ལགས་བརྙེད་ཐབས་གནང་རོགས། 

མི་ཞིག་གི་མི་གཤིས་ཁྲོད་དུ་ཆེས་རླབས་ཆེ་བ་ནི་ཅི་ཞིག་ཡིན་ནམ། 

རང་ཉིད་ཀྱི་ཁེ་དབང་དོར་ནས་གཞན་སྐྱོབ་རྒྱུ་དེ་རེད་ལ། དེ་ལ་གཞན་ལས་རང་ལ་ཁེ་ཕན་སྤུ་ཉག་ཙམ་ཡང་མེད་མོད། དེ་ལྟར་རྒྱུན་སྐྱོང་གིས་མིང་གྲགས་སོགས་སྐྱག་ལུད་བཞིན་དོར་ཐུབ་མཁན་ཞིག་སྟེ། དཀའ་ངལ་ཁྲི་ཕྲག་ལ་མགོ་བོ་མི་བསྒུར་ཞིང་བློ་འགྱོད་མི་བྱེད་ལ། ལྷག་བསམ་དང་དྲང་བདེན་གྱི་བསམ་བློར་འགྱུར་བ་མེད། དེ་ནི་ཅང་ཀྲོན་ཆོན་ལགས་ཡིན།

འཇིག་རྟེན་འདིར་མི་འདི་འདྲ་ཞིག་གིས་ལས་ཀ་འདི་འདྲ་ཞིག་ལས་ཡོད་པས། ང་ཚོ་འཚོ་སྡོད་བྱེད་ཀྱིན་པར་དོན་སྙིང་བསྐྲུན་ཐུབ་ཡོད། དུས་རབས་ཕྱེད་ཀ་ཞིག་འདས་ཟིན་པས། ལོ་ཟླ་བཞུད་སོང་། དུས་ཚོད་འགྱངས་སོང་། ང་ཚོའི་དྲན་ཤེས་མག་མོག་ཏུ་གཏོང་སྲིད་ལ། ང་ཚོའི་སེམས་ཚོར་ལ་གྲང་ཤ་བསྒོ་སྲིད། ང་ཚོས་མི་ལ་ལ་ཞིག་དང་དོན་དག་ཁ་ཤས་ཤིག་བརྗེད་ཆོག ཡིན་ནའང་། ཅང་ཀྲོན་ཆོན་ལགས་རྩ་བ་ཉིད་ནས་བརྗེད་མི་ཆོག རྒྱུ་མཚན་ནི་མི་འདིས་བོད་ལ་ལྷག་བསམ་ཕུལ་ཡོད་ལ། རྒྱ་ནག་ལ་མིག་དཔེ་བསྐྲུན་ཡོད།

དུས་རབས་ཕྱེད་ཀའི་ཡར་སྔོན། ཅང་ཀྲོན་ཆོན་ལགས་ཀྱིས་ལྐོག་གློད་གནང་བའི་ཇག་པའི་མགོ་གཙོ་ཟེར་བ་དང་། ངལ་རྩོལ་བཅོས་བསྒྱུར་ར་བ་ནས་ཁྱིམ་ལ་ལོག་པའམ། ཕྱི་ལ་བྲོས་པའི་བོད་མི་དང་རྒྱ་མི། ཡང་ན། རྒྱ་མི་དང་བོད་མི། ཕོའམ་མོ། ལོ་ན་རྒས་ཟིན་པའམ། གྲོངས་ཟིན་པ། སུ་ཞིག་ཡིན་ནའང་བུ་རབས་ཚ་བརྒྱུད་ཡོད་ངེས་པས། དེ་རིང་ངྷ་རམ་སཱ་ལ་ན་ཡོད་པའམ། ཡང་ན་བོད་ནང་ངམ་ཕྱི་རྒྱལ་གང་དུ་ཡོད་ནའང་། གཞན་གྱི་རང་དབང་སླད་དུ་རང་ཉིད་ཀྱི་རང་དབང་གཏོང་ཕོད་ཅིང་། གཞན་འོད་སྣང་གི་འོག་ཏུ་འཚོ་སླད་རང་ཉིད་ཀྱི་མི་ཚེ་གཅིག་མུན་ནག་ལ་བསྟིམས་ཕོད་པའི་ཅང་ཀྲོན་ཆོན་ལགས་ག་དུས་ཀྱང་མ་བརྗེད་རོགས།

ང་ཚོས་ཅང་ཀྲོན་ཆོན་ལགས་ཀྱི་མིང་བྱང་བོད་རྒྱའི་ལོ་རྒྱུས་ཀྱི་རྡོ་རིང་ངོས་སུ་བརྐོ་འོས་ལ། དྲང་བདེན་གྱི་དཔལ་འབར་རྡོ་རིང་མདུན་དུ་བསྒྲོན་འོས། ང་ཚོས་ཅང་ཀྲོན་ཆོན་ལགས་ཀྱི་བོད་རྒྱ་འདྲ་མཉམ་གྱི་བསམ་བློ་དང་ཐུན་མོང་གིས་སྡུག་བསྔལ་གྱི་འབྱུང་ཁུངས་སམ། གཅིག་སྡུད་ལམ་ལུགས་ལ་ངོ་རྒོལ་བྱེད་པའི་སྙིང་སྟོབས་ལ་སློབ་སྦྱོང་བྱེད་འོས་ཤིང་།  ཁྲིམས་བཟོའི་དམངས་གཙོ་མངོན་འགྱུར་ཡོང་བར་ཧུར་ཐག་བྱེད་འོས།

བསྒྱུར་མཆན།

༡ རྩོམ་ཡིག་འདི་ནི་ཨོ་སི་ཁྲི་ལི་ཡ་དང་ཤར་ཨེ་ཤི་ཡའི་དོན་གཅོད་ལས་ཁུངས་ཀྱིས་གྲོང་ཁྱེར་མེལ་བྷོན་དུ་བསྡུ་བསྐོང་གནང་བའི་བོད་རྒྱའི་རིག་གཞུང་བརྗེས་རེས་ཚོགས་འདུའི་སྐབས་ཀྱི་སྐུ་མགྲོན་གཙོ་བོའི་གཏམ་བཤད་རེད་ལ། ད་ལྟ་རྩོམ་ཡིག་འདི་ཧོང་ཀོང་གི་རྒྱ་ཡིག་དུས་དེབ《སྒོ་དབྱེ》སྟེང་བཏོན་ཡོད་པ་རེད།

༢ ཆིས་ཅཱ་ཊིན།  ཨོ་སི་ཁྲི་ལི་ཡར་བཞུགས་པའི་གྲགས་ཆེན་རྒྱ་རིགས་སྐྱེས་མ་རྩོམ་པ་པོ་ཞིག་དང་། སྲིད་དོན་བཙོན་མ་ཟུར་བ་ཞིག་ཡིན།