ཤར་ཕྱོགས་ཁུག་རྟ།
༧ གོང་ས་མཆོག་དང་བཙན་བྱོལ་བོད་གཞུང་གིས་ས་དང་གནམ་ལས་ངོ་མི་ཤེས་པའི་རྒྱ་གར་ འཕགས་པའི་ཡུལ་ནས་དུས་རབས་ཕྱེད་ཀའི་རིང་ངལ་བ་བརྒྱ་ཕྲག་ཁྱད་བསད་ཀྱིས་བོད་མི་ རིགས་ཀྱི་རང་དབང་འཐབ་རྩོད་དང་བོད་ཀྱི་མགྲིན་ཚབ་གནང་སྟེ། ༢༠༠༨ ལོར་བོད་མིའི་མངོན་འདོད་གང་ཡིན་རྒྱ་ནག་གཞུང་གིས་མགོ་ཁྲིད་རྣམས་ཀྱི་མདུན་དུ་ བསྟར་ཡོད།
ཡིན་ནའང་། རྒྱ་ནག་གཞུང་གིས་དེ་ནི་ཕྱེད་རང་བཙན་དང་རྣམ་པ་འགྱུར་བའི་རང་བཙན། ༧གོང་ས་མཆོག་དང་བཙན་བྱོལ་བོད་གཞུང་གིས་བཏོན་པ་དེ་བོད་ནང་གི་བོད་མིའི་མངོན་འདོད་མིན། ཁོང་རྣམས་བདེ་སྐྱིད་ལྡན་པའི་ངང་འཚོ་བ་སྐྱེལ་བཞིན་ཡོད་ཅེས་རྒྱལ་སྤྱི་དང་བཙན་བྱོལ་བོད་གཞུང་ལ་ཧམ་འགྲེལ་རྒྱག་གི་ཡོད། ཐ་ན་༧གོང་ས་མཆོག་དང་བཙན་བྱོལ་བོད་གཞུང་ལ་དེ་འདྲའི་བསམ་ཚུལ་འདོན་རྒྱུའི་ཐོབ་ཐབ་ཀྱང་མེད་པ་དང་། བོད་ནང་གི་བོད་མི་ཚོས་དེ་འདྲ་ཞིག་རྩ་བ་ནས་འདོད་ཀྱི་མེད་ཅེས་བསྐྱར་བཤད་ཡང་བཤད་ཁྲི་ཕྲག་མང་པོ་བརྩེགས་ཀྱིན་པ་རེད།
ཡིན་ ནའང་། རྒྱ་ནག་གཞུང་གིས་༧གོང་ས་མཆོག་དང་བཙན་བྱོལ་བོད་གཞུང་གི་གང་གནང་བཞིན་པ་དག་ བོད་ནང་གི་བོད་མི་ཚོར་ཤེས་རྟོགས་འབྱུང་བའི་ལམ་ཁ་བསྟེན་གྱི་ཡོད་པ་རེད་དམ་ ཟེར་ན། དེ་ནི་ཐབས་ཟད་འུ་ཐུག་གིས་བཀབ་ཀྱང་ཤོར་ན་མ་གཏོགས་གནས་ཚུལ་ཁྱོན་ནས་ཤེས་རྟོག་ བྱེད་དུ་འཇུག་གི་མེད་པ་དེ་རེད། མི་ལོ ༥༣ རིང་བོད་ནང་༧གོང་ས་མཆོག་དང་བཙན་བྱོལ་བོད་གཞུང་གིས་ག་རེ་གནང་མིན་དེ་སྐད་ཆ་ ཤབ་ཤུབ་ཙམ་དང་། མགོ་ཚང་ན་མཇུག་མེད་ན། མཇུག་ཡོད་ན་བར་མེད་པ་རྐྱང་རྐྱང་གིས་བསྐྱལ་ཡོད་པ་ནི་ཧ་ཅང་གསལ་བོ་རེད།
ད་ ལྟ་༧གོང་ས་མཆོག་བོད་དུ་གདན་འདྲེན་ཞུ་ཆེད་དང་༧གོང་ས་མཆོག་གི་དགོངས་གཞིར་གསན་ བསམ་ཐུབ་ཆེད་རང་ལུས་ཀྱང་མེ་ལ་གཞོམ་བསྲེགས་རིམ་བསྟུད་དུ་བྱེད་པ་འདིས། གལ་སྲིད་བོད་ནང་གི་བོད་མི་དེ་ཚོས་རྒྱ་ནག་གཞུང་གིས་”༧གོང་ས་མཆོག་གིས་བོད་ ཀྱི་མགྲིན་ཚབ་ཐུབ་ཀྱི་མ་རེད་”ཅེས་བཤད་པ་རྣམས་གསན་རྟོགས་བྱུང་བ་ཡིན་ན། “༧གོང་ས་མཆོག་དང་བོད་གཞུང་གིས་བཏོན་པའི་བོད་མིའི་མངོན་འདོད་དེ་བོད་ནང་གི་ བོད་མི་ཚོའི་འདོད་མོས་དང་རྒྱབ་འགལ་ཡིན་”ཞེས་པ་ཤེས་རྟོགས་བྱུང་བ་ཡིན་ན། ད་གཟོད་གནས་ཚུལ་ཅི་ཞིག་འབྱུང་གི་རེད་དམ། འདི་རྒྱ་ནག་གཞུང་དང་བཙན་བྱོལ་བོད་གཞུང་གཉིས་ཀའི་དྲི་བ་ཞིག་རེད།
གལ་སྲིད་༧གོང་ས་མཆོག་དང་བཙན་བྱོལ་བོད་གཞུང་གིས་རྩོད་བཞིན་པའི་བོད་མིའི་མངོན་འདོད་དེ་བོད་ནང་ནས་ཡོངས་སུ་གསན་པ་ཡིན་ན། ཤེས་རྟོགས་བྱུང་བ་ཡིན་ན། ད་གཟོད་བོད་ནང་གི་བོད་མི་ཚོས་ག་རེ་བྱེད་ཀྱི་རེད་དམ། ངས་ལྟོས་ན་སྐབས་དེར་ཁོང་ཚོས་རང་བསྲེགས་བྱེད་རྒྱུ་མ་རེད། འོ་ན་ག་རེ་བྱེད་རྒྱུ་རེད་དམ། ༧གོང་ས་མཆོག་དང་བཙན་བྱོལ་གཞུང་གི་རྩོད་བཞིན་པའི་དམིགས་ཡུལ་དེར་རྒྱབ་སྐྱོར་གནང་གི་རེད། རྒྱབ་སྐྱོར་ཅི་ལྟར་བྱེད་ཀྱི་རེད་དམ་ཞེ་ན། ཁོང་ཚོས་རྒྱ་ནག་གི་རྩ་ཁྲིམས་དང་བཅའ་ཁྲིམས་གཉིས་ཀ་ཁ་བཏོན་བཞིན་འདོན་རྒྱུ་རེད། དར་ཆ་བཞིན་འཕྱར་ཏེ་མཛུབ་མོ་གེར་བཞིན་ནང་དོན་ལ་རྩོད་པ་རྒྱ་མཚོའི་རླབས་དང་། མེ་ལྕེ་ལྷབ་ལྷབ་དུ་གཡོ་བ་བཞིན་རྒྱག་རྒྱུ་རེད།
རྩོད་ པ་རྒྱབ་ནས་ག་རེ་འབྱུང་གི་རེད། རྩོད་པ་མཐར་ཕྱིན་པ་རྒྱབ་ནས་ད་གཟོད་ཁོང་ཚོས་རྒྱ་ནག་གི་རྩ་ཁྲིམས་དང་བཅའ་ ཁྲིམས་སོགས་གང་དུ་འཇོག་དགོས་མིན་གསལ་བོ་བཟོ་ཡི་རེད། ང་ཚོས་ཚོད་དཔག་མིན་པར་བཤད་ཆོག་པ་ཞིག་ནི། དངོས་གནས་དེ་འདྲའི་རྩོད་པ་རྒྱབ་པ་ཡིན་ན། འཛམ་གླིང་སྤྱི་དང་མཉམ་འབྲེལ་རྒྱལ་ཚོགས། བོད་ལ་ཤ་ཚ་ཆེ་བའི་རྒྱལ་ཁབ་ཁག་གིས་ད་གཟོད་བོད་དོན་ལ་རྒྱབ་སྐྱོར་བྱེད་རྒྱུ་ཧ་ ཅང་སྟབས་བདེ་ཆགས་ཀྱི་རེད་ལ། ཉིན་མོ་དེ་ནས་ཐད་ཀར་བོད་ནང་གི་བོད་མི་ཚོའི་མངོན་འདོད་རྒྱུ་མཚན་དུ་དྲངས་ནས་ རྒྱ་ནག་ལ་ཁ་རྡུང་གཏོང་གི་རེད་ལ། ༧གོང་ས་མཆོག་དང་བཙན་བྱོལ་བོད་གཞུང་གི་ལངས་ཕྱོགས་ལ་རྒྱལ་སྤྱིའི་སྒང་དེ་བས་ ཀྱང་ཆུ་ལ་ཆུ་བཞག་པ་ལྟ་བུའི་ངེས་ཤེས་ཀྱང་ཐོན་ཡོང་གི་རེད།
སྐབས་དེར་རྒྱ་ནག་གིས་ག་རེ་ཟེར་གྱི་རེད། རྒྱལ་སྤྱིའི་ཁྱོན་ལ་ད་དུང་བོད་ནང་གི་བོད་མི་ཚོའི་འདོད་པ་དེ་མིན། ཁོང་ཚོ་དེ་འདྲའི་འདོད་མོས་ཁྱོན་ནས་མེད། ལྷ་ཡུལ་ལ་སྙེགས་པ་ལྟ་བུའི་བདེ་སྐྱིད་ལྡན་པའི་འཚོ་བ་རོལ་གྱིན་ཡོད་ཅེས་བཤད་ཀི་རེད་དམ། རྩ་བ་ནས་བཤད་ཐུབ་ཀི་མ་རེད། བཤད་ནའང་དེ་ལ་གཞི་འཛིན་ས། དོགས་པ་ཟ་སའི་ཆུ་ཐིག་ཙམ་ཡང་ཡོད་པ་རེད་དམ། གཏན་ནས་ཡོད་པ་མ་རེད།
དེ་ བས་བོད་ནང་ནས་༧གོང་ས་མཆོག་གདན་འདྲེན་ཞུ་ཆེད། ༧གོང་ས་མཆོག་བོད་དུ་ཕེབས་སའི་ལམ་ཁ་གཙང་མ་བཟོ་དགོས་ཀྱི་འདུག དེའང་རྒྱ་ནག་གི་རྩ་ཁྲིམས་དང་བཅའ་ཁྲིམས་ཀྱི་འབྲུ་དོན་དོན་དངོས་ལག་བསྟར་བྱེད་ ཀྱི་ཡིན་མིན་ཐད་ནས་གཙང་མ་བཟོ་དགོས་པ་རེད། དེ་ནས་གཙང་མ་ཆགས་སོང་ན། ད་གཟོད་༧གོང་ས་མཆོག་གི་སྐུ་ཚབ་ཀྱིས་བོད་རིགས་ཡོངས་ཀྱི་མངོན་འདོད་ངོ་མ་རྒྱ་ ནག་གཞུང་ལ་སྤྲད་པ་དེ་མངོན་འགྱུར་ཡོང་གི་རེད། དེ་མངོན་འགྱུར་ལག་བསྟར་ཐུབ་པ་བྱུང་བ་ཡིན་ན། སྐབས་དེར་༧སྤྱན་རས་གཟིགས་དབང་༧བསྟན་འཛིན་རྒྱ་མཚོ་གངས་ཅན་ལྗོངས་སུ་གདན་ འདྲེན་ཞུ་ཐུབ་སོང་བ་རེད།
དེ་ ལ་བཙན་བྱོལ་བོད་གཞུང་བཀའ་སྤྱི་གཉིས་ཀྱིས་དབུ་ཁྲིད་དེ་གཞིས་ལུས་བོད་མི་ཚོར་ བོད་རིགས་ཡོངས་ལ་མིང་དོན་མཚུངས་བའི་རང་སྐྱོང་ཡོང་ཐབས་ཀྱི་འཐབ་རྩོད་གནང་ སྟངས། རྒྱ་ནག་གི་རྩ་ཁྲིམས་དང་བཅའ་ཁྲིམས་ནག་འདེད་བྱ་རྒྱུ་དེ་ཡིན། དེ་ལྟར་གནང་རོགས་ཞེས་སྐད་གསེང་མཐོན་པོས་འབོད་སྐུལ་གནང་དགོས་ཀྱི་རེད། དེ་བཞིན་རྒྱལ་སྤྱིའི་སྒང་དུའང་དེ་དོན་བཞིན་རྒྱབ་སྐྱོར་འཚོལ་བ། ཕྱི་བཞུགས་རྒྱ་རིགས་གྲོགས་པོ་ཚོ་སྐོང་འགུག་གནང་བའམ། རེ་རེའི་སར་བཅར་ནས་རྒྱ་ནག་མི་མང་ལ་གནས་ཚུལ་དེ་བཞིན་བརྡ་ལན་གསལ་བོ་ཞིག་ སྤྲོད་དགོས་པར་འབད་འབུངས་མཐའ་གཅིག་ཏུ་གནང་སྟེ་ཆིག་སྒྲིལ་བླ་ན་མེད་པ་ཞིག་ གནང་དགོས་ཀྱི་རེད།
ཉི་ མ་དེ་བར། བོད་ནང་གི་འཐབ་རྩོད་དེ་རང་བསྲེགས་བྱེད་པའི་ཚད་དུ་ཁྱོན་ནས་སླེབས་ཡོད་པ་མ་ རེད། གལ་སྲིད་༼ བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་༽དེ་ལྟར་ཁྲིམས་མཐུན་ངང་འཐབ་ རྩོད་བྱས་ཀྱང་། རྒྱ་ནག་གཞུང་གིས་དམིགས་གཞི་ངོ་མ་བོད་མི་རྩ་སྟོང་འགྲོ་རྒྱུའི་སྲིད་བྱུས་ལས་ ཅུང་ཙམ་མ་བརྒལ་བ་ཡིན་ན། ཉིན་མོ་དེ་ནས་བོད་མི་ཚོས་སྲིད་དབང་སྒེར་སྤྱོད་པ་དང་། འཇིགས་སྐུལ་དྲག་སྤྱོད་པའི་གཞུང་ལ་རང་ལུས་གཞོམ་བསྲེགས་ཀྱིས་བདེན་པ་རྩོད་ དགོས་ཀྱང་རྩོད་པའི་དུས་ཚོད་ཤར་བ་ལྟ་བུ་ཞིག་རེད། དེས་ན་སྙིང་ནས་བརྩེ་བའི་བོད་ནང་གི་སྤུན་ཟླ་ཕོ་མོ་ཚོས་རྒྱ་ནག་གཞུང་གི་ཁ་དོག་ ངོ་མ་དེ་དམར་དམར་རྗེན་རྗེན་བཟོ་རོགས།
༢༠༡༢ ། ༣ ཚེས་ ༡༤ ཉིན་ལ།
དངོས་གནས་བསམ་འཚུལ་ཡག་པོ་འདུག ད་ལྟའི་བོད་ནང་གི་གནས་སྟངས་དེ་ནི་དངོས་གནས་ཛ་དྲག་ཞིག་རེད། འུ་ཐུག་རེ་བ་ཟད་ནས་རང་ཤི་རྒྱག་གི་ཡོད་པ་དེར་ད་དུང་རང་ལུས་མེ་མཆོད་ཕུལ་བ་སོགས་མིང་སྙན་པོ་འདྲ་བཏགས་ནས་བསྡོད་པའི་དུས་ཞིག་ཁྱོན་ནས་མ་རེད། གནས་སྟངས་འདི་ལྟ་བུ་ལ་བསམས་གཞིགས་ནན་པོ་ཞིག་བྱས་པ་ཡིན་ན་ད་གཟོད་བཙན་བྱོལ་བོད་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་དང་། གང་ལྟར་རྩམ་ཟན་པ་ཞིག་ཡིན་ཕྱིན་ཆད། དགུང་མོ་ཉལ་བའི་གཉིད་མི་ཁུག་པ་ཞིག་དང་ཉིན་མོ་ཟ་བའི་ཟལ་ལ་བྲོ་བ་མེད་པ་ཞིག་ཡོད་དགོས་ཚོད་རེད། ཚང་མས་མཐུན་སྒྲིལ་རྡོག་རྩ་གཅིག་སྒྲིལ་གྱིས་གཞིས་ལུས་བོད་མི་རྣམས་དེ་ལྟ་བུའི་ཡ་ང་བའི་གནས་སྟངས་ལས་གང་དྲག་ཅི་དྲག་གི་མྱུར་སྐྱོབ་བྱ་དགོས་རྒྱུར་རང་རེའི་གཞུང་གི་དབུ་འཁྲིད་རྣམས་པ་དང་ཤེས་ཡོན་ཅན། ཚོགས་པ་ཁག་རྣམས་པས་ཉིན་ཚན་ལྟོས་མེད་ཤུགས་སྐྱོན་རོགས་ཞེས་ལག་ཐལ་མོ་སྦྱར་ནས་ཞུ་ཀྱིན་ཡོད། བཀའ་དྲིན་ཆེ།།
བོད་ནང་གི་བོད་མི་ཚོས་༧གོང་ས་མཆོག་དང་བོད་གཞུང་གིས་རྒྱ་ནག་ལ་གནང་བའི་གནད་དོན་དེ་རིགས་མི་ཉུང་བ་ཞིག་ཤེས་རྟོགས་ཐུབ་ཀྱི་ཡོད་པ་གསལ་པོ་རེད། རྒྱ་གཞུང་གིས་གུ་ཡང་གི་མངོན་འདོད་ལྟ་བུར་མིང་སྣ་ཚོགས་བཏགས་ནས་ཁས་ལེན་མ་བྱས་པར་བརྟེན་བོད་མི་ཚོས་མེ་སྲེགས་ཀྱི་ལམ་བུ་དེ་འདེམས་དགོས་བྱུང་བ་རེད།
དོན་དང་ལྡན་པ་ཞིག་བྲིས་འདུག འདི་ལས་ལམ་ཁ་མེད་པ་དེ་གསལ་བོ་རེད།
འདི་ནི་གོ་རྒྱུ་ཆེན་ཆོ་ཞིག་གང་ཡང་མི་འདུག་ དུས་རབས་ཆད་ཙམ་རིང་ཙན་བྱོལ་ནང་ལས་ཀ་གང་དང་གང་བྱས་པ་རེད་དམ། དོན་དངོས་ཐོག་བཙན་བྱོལ་ནང་གིས་དམིག་ཡུལ་དང་བོད་དོན་ལས་འགུལ་ངོ་མ་ག་རེ་བྱེད་ཀྱི་ཡོད་མེད་གཞིས་ལུས་རྣམས་ཀྱི་ཟུར་ཙམ་ཡང་མི་ཤེས་ལ་ བོད་ནང་གི་གནས་སྟང་ངོ་མ་དེའང་བཙན་བྱོལ་ནང་ནས་ཤེས་ཀྱི་མེད་གཅིག་གི་གཅིག་ལ་རེ་བ་ཆེན་པོ་རེ་བྱས་ནས་སྡད་པ་དེ་བོད་རེ་བས་ཕུང་ཞེས་པ་དེ་རང་ལས་མ་འདས།།
རྩོམ་འདྲ་བོ་མི་འདུག མི་ཞིག་ངུ་ཞོར་དུ་རང་གི་སྡུག་གཏམ་བཤད་གིན་ཡོད་པ་འདྲ་བོ་ཞིག་འདུག