དེ་རིང་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བཀའ་བློན་ཁྲི་པ་མཆོག་གིས་མདོ་སྨད་རྩོམ་སྒྲིག་ཚོགས་ཆུང་གིས་རྩོམ་སྒྲིག་གིས་བོད་མིའི་རང་དབང་འཐབ་རྩོད་ཆེད་རང་ལུས་མེར་བསྲེགས་ཀྱི་གནས་ཚུལ་བཀོད་པའི་དཔེ་དེབ་༼ལྕགས་ཡོས་བཙན་རྒོལ་མེ་ལྕེ། ༽ཞེས་དབུ་འབྱེད་གནང་སོང་།
དེ་རིང་ཞོགས་པའི་ཆུ་ཚོད་ ༡༠ སྟེང་གངས་སྐྱིད་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་ཕྱི་ལོ་ ༢༠༡༡ ཟླ་ ༣ ཚེས་ ༡༦ ལྕགས་ཡོས་ཞི་རྒོལ་ཆེན་མོ་བྱུང་སྟེ་ལོ་གཅིག་འཁོར་བའི་དུས་དྲན་ཉིན་མོ་དང་བསྟུན་ཏེ། མདོ་སྨད་བཙན་རྒོལ་བདེན་རྒྱབ་མནའ་འབྲེལ་རྩོམ་སྒྲིག་ཚོགས་ཆུང་གིས་རྩོམ་སྒྲིག་བྱས་པའི་དཔེ་དེབ་ ༼ལྕགས་ཡོས་བཙན་རྒོལ་མེ་ལྕེ ༽ཞེས་པ་དབུ་འབྱེད་མཛད་སྒོ་ཚོགས་སོང་། མཛད་སྒོའི་སྒུ་མགྲོན་གཙོ་བོར་དབུས་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་བློ་བཟང་སེང་གེ་མཆོག་དང་། དམིགས་བསལ་སྐུ་མགྲོན་དུ་བཀའ་ཟུར་ཨ་ལགས་འཇིགས་མེད་རིན་པོ་ཆེ་མཆོག་བཅས་དང་། གཞན། སྤྱི་འཐུས་ཁག་ཅིག་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ། རྒྱ་གར་དང་བོད་པའི་གསར་འགོད་པ་བཅས་ཕེབས་འདུག
མཛད་སྒོ་དབུ་འཛུགས་སྐབས་རྩོམ་སྒྲིག་ཚོགས་ཆུང་གི་ཚོགས་མི་མདོ་སྨད་སྤྱི་འཐུས་སྨན་པ་མཁྱེན་རབ་ལགས་ཀྱིས་དཔེ་དེབ་དེ་ངོ་སྤྲོད་གནང་བ་ལྟར་ན། ༼ལྕགས་ཡོས་བཙན་རྒོལ་མེ་ལྕེ ༽ཞེས་པའི་དཔེ་དེབ་ནང་། ཕྱི་ལོ་ ༡༩༩༨ ཟླ་ ༤ ཚེས་ ༢༧ ཉིན་རྒྱལ་གཅེས་དཔའ་བོ་ཐུབ་བསྟན་དངོས་གྲུབ་མཆོག་གིས་བོད་བསྟན་སྲིད་མི་རིགས་ཆེད་རྒྱ་གར་རྒྱལ་ས་ལྡི་ལིར་རང་ལུས་མེར་བསྲེགས་བཏང་བ་ནས། ཁ་སང་ཕྱི་ཚེས་ ༡༤ ཉིན་རེབ་གོང་རོང་བོ་དགོན་པའི་གྲྭ་འཇམ་དབྱངས་དཔལ་ལྡན་ལགས་ཀྱིས་རང་ལུས་མེར་བསྲེགས་བཏང་བའི་བར་གྱི་བོད་ཕྱི་ནང་གི་རང་ལུས་མེར་བསྲེགས་བཏང་པའི་གནས་ཚུལ་ཆ་ཚང་བཀོད་ཡོད་ཀྱང་། དེབ་ཀྱི་ཁ་བྱང་ནང་༼ལྕགས་ཡོས༽ཞེས་བསླེབ་དགོས་དོན་ལས་འགུལ་རླབས་ཆེན་ཞིག་བྱུང་པ་དེ་དུས་ཚོད་ཀྱི་ཐོག་ནས་ངོས་འཛིན་གསལ་བོ་བཟོས་ན། མ་འོངས་ལོ་རྒྱུས་ནང་དྲན་གསོ་ཐེབས་བདེ་བ་དང་སེམས་ལ་འཇགས་བདེ་བའི་དབང་གིས་བཀོད་པ་ཞིག་དང་། དེ་ནི་ ༢༠༡༡ ཟླ་ ༣ ཚེས་ ༡༦ ཉིན་རྒྱལ་གཅེས་དཔལ་བོ་གྲྭ་ཕུན་ཚོགས་ལགས་ཀྱིས་རང་ལུས་མེར་བསྲེགས་བཏང་པ་ནས་མེ་བསྲེགས་ཞི་རྒོལ་ལས་འགུལ་ཤུགས་ཆེན་པོ་བྱུང་པའི་ལོ་དེ་ལྕགས་ཡོས་ལོར་འཁེལ་ཡོད་པས་མིང་དེ་ལྟར་བཏགས་ཚུལ་བརྗོད་སོང་།
ཁོང་གིས་མུ་མཐུད་ངོ་སྤྲོད་གནང་བར་དེབ་དེར་སྡེ་ཚན་ཆེན་བ་ ༣ དང་ཤོག་ངོས་ ༤༥༠ ཙམ་གྱིས་གྲུབ་ཡོད་འདུག་ལ། སྡེ་ཚན་དང་པོའི་ནང་། བོད་མིའི་རང་ལུས་མེར་བསྲེགས་གཏོང་དགོས་པའི་རྒྱུ་རྐྱེན་རྒྱ་གཞུང་གིས་ད་ལྟའི་བར་བོད་ཐོག་བཟུང་བའི་སྲིད་ཇུས་དེ་ཆགས་ཡོད་པ་དག་རིམ་པ་བཞིན་རེ་རེ་བྱས་ཏེ་བཀོད་ཡོད་འདུག གཉིས་པ། བོད་ནང་གི་རང་ལུས་མེར་བསྲེགས་ཞི་རྒོལ་ལ་བརྟེན་ནས་རྒྱལ་སྤྱིའི་ནང་གནས་ཚུལ་ག་རེ་བྱུང་ཡོད་པ། རྒྱལ་ཚོགས་དང་རྒྱལ་སྤྱིའི་སྤྱི་ཚོགས་ངོས་ནས་ཞི་རྒོལ་དེའི་ཐད་ཆ་ཤས་ག་རེ་བླངས་ཡོད་པ་དང་རྒྱབ་སྐྱོར་གྱི་རྣམ་པ་ཅི་འདྲ་ཡིན་པ། རྒྱལ་སྤྱིའི་སྲིད་གཞུང་ཁག་གིས་ཆ་ཤས་ག་རེ་བླངས་ཡོད་པ། རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཅི་འདྲ་ཐོན་ཡོད་པ་བཅས་དང་། གསུམ་པ། བཙན་བྱོལ་ནང་བཀའ་སྤྱི་གཉིས་ཀྱིས་དབུ་ཁྲིད་དེ་བོད་ནང་གི་རང་ལུས་མེར་བསྲེགས་ཐད་ལས་འགུལ་དང་ཛ་དྲག་གསར་འགོད་གསལ་བསྒྲགས་ག་རེ་སྤེལ་ཡོད་པ། འཛམ་གླིང་རྒྱལ་ཁབ་གང་སར་ཡོད་པའི་བོད་མི་ཚོས་ལས་འགུལ་ག་རེ་སྤེལ་བ། རྒྱ་གར་ནང་༧གོང་ས་མཆོག་གཙོས་པའི་བླ་ཆེན་ཁག་དང་བཙན་བྱོལ་སེར་སྐྱ་མི་མང་གིས་གདུང་སེམས་མཉམ་སྐྱེད་ག་རེ་གནང་ཡོད་པ། དེ་དག་གི་གནས་སྟངས་གང་འདྲ་ཆགས་ཡོད་པ་བཅས་བཀོད་ཡོད་འདུག ཁོང་གིས་ “དཔེ་དེབ་ནང་ཁ་སང་བར་གྱི་གནས་ཚུལ་རྣམས་ཚུད་ཡོད་ཀྱང་། ཇི་སྲིད་རྒྱ་གཞུང་གིས་བོད་ཐོག་འཛིན་པའི་སྲིད་ཇུས་ལ་བཟང་ཕྱོགས་ནས་འགྱུར་པ་མ་བཏང་པར་དུ་རང་ལུས་མེར་བསྲེགས་སོགས་བོད་མིའི་ཞི་རྒོལ་མུ་མཐུད་འབྱུང་ངེས་ཡིན་སྟབས། ང་ཚོས་ཀྱང་གནས་སྟངས་འདྲ་མིན་ཐོག་ནས་བདག་པོ་རྒྱག་དགོས་པ་རེད ”ཅེས་བརྗོད་བྱུང་།
དེའི་རྗེས་བཀའ་ཁྲི་མཆོག་གིས་དཔེ་དེབ་དབུ་འབྱེད་དང་འབྲེལ། མདོ་སྨད་བཙན་རྒོལ་བདེན་རྒྱབ་རྩོམ་སྒྲིག་ཚོགས་ཆུང་གིས་འདས་པའི་ལོ་ ༡༠ ཙམ་རིང་དུས་ཚོད་ཟུར་འདོན་ཐོག་དཀའ་ལས་བརྒྱབ་སྟེ་ཐོག་མར་པཎ་ཆེན་རིན་པོ་ཆེའི་རྣམ་ཐར་ནས། ཉེ་ཆར་ཝ་ཤིན་ཊོན་དུ་༧གོང་ས་མཆོག་གི་དུས་འཁོར་དབང་ཆེན་སྐབས་༧གོང་ས་མཆོག་གི་སྐུ་པར་བརྙན་དེབ་ཤོག་ངོས་ ༡༥༠༠ ཅན་ཞིག་དཔར་འགྲེམས་གནང་པ། དེ་བཞིན་དོལ་རྒྱལ་དང་འབྲེལ་བའི་དེབ་ཅིག་དཔར་བསྐྲུན་དང་། ད་ཆར་རྒྱ་ཡིག་དང་དབྱིན་ཡིག་ཐོག་སྒྱུར་མུས་ཡིན་པ། དེ་རིང་གྲྭ་ཕུན་ཚོགས་ལགས་སྐུ་ལུས་མེར་བསྲེགས་བཏང་ནས་ལོ་གཅིག་འཁོར་པའི་དུས་དྲན་ཉིན་མོ་དང་བསྟུན། ད་ལྟའི་བར་རང་ལུས་མེར་བསྲེགས་བཏང་པའི་སྤྱི་ཡོངས་ཀྱི་ཡིག་ཆ་ཚང་མ་ཕྱོགས་བསྡོམས་བྱས་ཐུབ་པ་དེར་བསྔགས་བརྗོད་དང་། སོ་སོའི་ལས་ཞོར་དང་གུང་སེང་བེད་སྤྱད་དེ་འབད་བརྩོན་ཆེན་པོས་དཔེ་དེབ་རྩོམ་སྒྲིག་གི་ལས་ཀ་བྱས་ཡོད། དེབ་འདིའི་ནང་དོན་ཐད་ནས་ད་ལྟ་རང་རག་པ་ཞིག་ཡིན་སྟབས་ཞིབ་ཕྲ་ཤེས་རྟོགས་ཐུབ་མེད་ནའང་། རྩོམ་སྒྲིག་པ་རྣམ་པས་ད་སྔ་བཏོན་པའི་དེབ་རྣམས་བོད་པའི་རྩ་དོན་ལ་ཕན་པ། ༧གོང་ས་མཆོག་གི་བཀའ་དགོངས་བཞིན་གནང་པ་རྐྱང་ཆགས་ཡོད་པ་ལྟར། དེབ་འདི་ཡང་དེ་བཞིན་ཡོད་ཤག་གི་ཡིད་ཆེས་བྱེད་ཀྱི་ཡོད་པར་གསུངས་སོང་།
མདོ་སྨད་བཙན་རྒོལ་བདེན་རྒྱབ་མནའ་འབྲེལ་རྩོམ་སྒྲིག་ཚོགས་ཆུང་ཞེས་པ་འདི་ནི། སྒྲིག་འཛུགས་རང་བཞིན་གྱི་ཚོགས་པ་དེ་འདྲ་མིན་པར་གཞུང་དང་ཚོགས་པ་སྒྲིག་འཛུགས་སོགས་སུ་ལས་ཁུར་ཡོད་པའི་མདོ་སྨད་ཕྱོགས་ཀྱི་ཤེས་ཡོན་པ་ཁག་ཅིག་ལས་གྲུབ་པ་ཞིག་དང་། ཁོང་ཚོས་དང་བླང་ཐོག་འདས་པའི་ལོ་ ༡༠ རིང་བོད་ཀྱི་རྩ་དོན་དང་༧རྒྱལ་བ་པཎ་ཆེན་གྱི་མཛད་རྣམ། བོད་ནང་གི་ཛ་དྲག་གནས་ཚུལ་བཅས་ཀྱི་ཐོག་ཡིག་ཆ་དང་རྩོམ་ཡིག གནས་ཚུལ་རིགས་ལ་ཞིབ་འཇུག་དང་ཕྱོགས་སྒྲིག་གིས་ད་སྔ་བོད་རྒྱ་དབྱིན་གསུམ་ནང་དཔེ་དེབ་ ༨ ཙམ་དཔར་སྐྲུན་བྱས་ཡོད་འདུག ཐེངས་འདིའི་རྩོམ་སྒྲིག་ལས་ཁུར་ཁྲོད་ཁྱོན་མི་ ༡༧ ཡོད་འདུག
གསར་འགོད་པ། བནྡེ་སྐྱབས།
འདི་ལྟར་ལོ་རྒྱུས་ལ་མཉམ་ཞིབ་ཀྱི་ཐོག་ནས་རྒྱ་ནག་དམར་གཞུང་ལ་ལན་འདེབས་ཀྱི་ཚུལ་དུ་སྤེལ་བ་འདྲ་བོ་ཞིག་རེད། དམར་གཞུང་གིས་དུས་རྟག་ཏུ་སྐྱག་རྫུན་བཤད་པ་དང་འཁྱོག་བཤད་བྱེད་ཀྱི་ཡོད་པ་རྣམས་རེ་རེ་བཞིན་གསལ་འདོན་གནང་ཐུབ་ན་དེ་བས་དགེ་མཚན་ཆེ་བར་མཐོང་། གང་ལྟར་སྨྱུག་འཛིན་པ་རྣམས་དང་ཀྱི་སྨྱུག་ཁ་བོད་མི་ནང་ཁུལ་དུ་མི་གཏོད་པར་དམར་གཞུང་ལ་ལན་འདེབས་གནང་པ་ཡི་རང་དང་རྒྱབ་སྐྱོར་ཡོད་ཐུགས་རྗེ་ཆེ་ཞུ།
བསྔགས་བརྗོད་གྲངས་མེད་དང་རྗེས་སུ་ཡི་རང་ཡོད། སྨན་པ་མཁྱེན་རབ་ནི་རྩོམ་སྒྲིག་ཚོགས་མི་ཙམ་མིན་པར་ཚོགས་ཆུང་གི་ཚོགས་གཙོ་ཡིན་ཚུལ་གོ་སོང་བས། གསར་འགོད་པས་གཟིགས་ཞིབ་གནང་གལ་མཐོང་།
ང་ཚོས་ནམ་ཡང་ལོ་རྒྱུས་རྗེད་མི་ཉན་པས་འདི་དག་ནི་མ་འོངས་པའི་ལོ་རྒྱུས་ཆེན་མོ་ཞིག་གི་ཁུངས་སུ་ཡང་འཇོག་ཆོག
འདི་དག་གི་ཕྱོགས་ལ་གང་འཚམ་འགྲིགས་པ་ཞིག་རེད། འོན་ཀྱང་ངས་བལྟས་ན་ད་དུང་ཆད་པ་གཅིག་ནི་བཙན་བྱོལ་ནང་གི་རྩོམ་པ་པོ་ཚོ་ཁ་འཐོར་དང་། འབྲེལ་མེད་ལྟ་བུར་ཡོད་པས་འདི་དག་མ་འོངས་པར་མཉམ་འཛོམས་ཐོག་རྩོམ་རིག་གི་ཁ་ཕྱོགས་དང་། ཞན་ཆ་སོགས་ལ་བགྲོ་གླེང་དང་། ཆབ་སྲིད་དང་སྤྱི་སྐད་རྩོམ་ཡིག་འབྲི་སྟངས་སོགས་ལ་འབད་ཐུབ་ན་བསམ།
ཐུགས་རྗེ་ཆེ། ཧ་ཅང་དགའ་བོ་བྱུང་།
ངོ་མ་ཡག་པོ་འདུག ཁོང་རྣམས་ལ་སྙིང་ཐག་པ་ནས་ཐུགས་རྗེ་ཆེ་ཞུ་བ་ཡིན། དེ་མ་གཏོགས་བོད་ལ་བྱུས་ཉེས་རེ་རེ་བྱུང་དུས་མགོ་བདེ་ཁ་ཅིག་གིས་གོ་སྐབས་བཟུང་ནས་ཞལ་འདེབས་བསྡུ་བྱད་བྱེད་ཀྱི་འདུག་ན་དངོས་གནས་བློ་ཕམ་པའི་ལས་ཀ་རེད། ད་ཡིན་ན་ཡག་པོ་བྱུང་།