ང་ཚོའི་སྐུ་ཚབ་བོད་ནང་ཡོང་འཇུག་རོཊ།

རེས་གཟའ་ལྷག་པའི་ཉིན་ཧྲིལ་བོར་སྤྱི་འཐུས་གྲོས་ཚོགས་ནང་བོད་ནང་གི་ཛ་དྲག་གནས་སྟངས་ཐོག་བགྲོ་གླེང་གནང་མཐར། གྲོས་ཆོད་དོན་ཚན་ ༨ ལ་སྤྱི་མོས་བྱུང་ཡོད་པའི་ནང་། ཕྱི་ལོ་ ༢༠༠༩ ནས་བཟུང་བོད་རྔ་པ་དང་། རྟའུ། དཀར་མཛེས། ཆབ་མདོ།  ཁྲི་འདུ། ཐེམ་ཆེན། དར་ལག  རྨ་ཆུ། རེབ་སྐོང་བཅས་སུ་རང་རིགས་སེར་སྐྱ་ཕོ་མོ་ ༢༨ ཀྱིས་རང་ལུས་ཞུགས་འབུལ་གནང་སྟེ།  སེར་སྐྱ་ ༢༠ སྐུ་སྲོག་ཤོར་ཡོད་པ་དང་།  གཞན་རྣམས་ཀྱི་གནས་སྟངས་ཇི་ཆགས་ཤེས་རྟོགས་ཐུབ་མེད།

ཉེ་ཆར་རྒྱ་ནག་གི་དཔྱིད་གསར་དུས་ཆེན་སྐབས།  རྒྱ་གཞུང་སྤྱི་བདེ་ལས་བྱེད་དང་དྲག་ཆས་ཉེན་རྟོག་མི་སྣས་ཞི་རྒོལ་མང་ཚོགས་ཁྲོད་མདེལ་ཆར་ཕབས་ཏེ།  བྲག་མགོ་རྫོང་དུ་མི་ ༤ དང་། གསེར་རྟ་རྫོང་དུ་མི་ ༢   ཛམ་ཐང་རྫོང་དུ་མི་ ༡ མགོ་ལོག་པདྨ་རྫོང་དུ་མི་ ༡ བཅས་དམར་གསོད་བཏང་ཡོད།  འདི་ལོ་ཕྱི་ཟླ་ ༢ ཚེས་ ༨ ཉིན་གོང་གསལ་རྫོང་ཁག་དང་།  རྫ་སྟོད།  ནང་ཆེན། ཁྲི་འདུ།  འབར་ཁམས། པད་མ། ཆབ་ཆ། འབྲི་རུ་སོགས་སུ་མང་ཚོགས་ཀྱིས་རྣམ་པ་ཅི་རིགས་ཀྱི་སྒོ་ནས་ལྷག་དཀར་སྲུང་བརྩི་དང་འབྲེལ་བའི་བོད་མིའི་རང་དབང་རྩོད་ལེན་གྱི་ལས་འགུལ་གཞི་རྒྱ་ཆེན་པོ་སྤེལ་ ཡོད་ཅེས་བཀོད་འདུག

གྲོས་ཆོད་དོན་ཚན་དང་པོའི་ནང་དུ་བོད་མིའི་རང་དབང་དང་ཐོབ་ཐང་ཆེད་རང་ལུས་མེར་བསྲེགས་ཀྱིས་ཚེ་སྲོག་ལེགས་སྐྱེས་སུ་ཕུལ་བ་གཟི་བརྗིད་དང་། བློས་གཏོང་ཆེན་པོའི་དཔའ་མཛངས་ཀྱི་སྙིང་སྟོབས་ལ་བསྔགས་བརྗོད་དང་འབྲེལ་སྐུ་སྲོག་ཤོར་བ་རྣམས་དང་། འཛིན་བཟུང་དོ་དམ་འོག་མནར་གཅོད་མྱོང་བཞིན་པ་བཅས་ལ་སྙིང་དབུས་ནས་གུས་འདུད་ཞུ། ༢ རྒྱ་དམར་གཞུང་གིས་བོད་མིའི་ཐོག་བཙན་གནོན་གྱི་སྲིད་བྱུས་ཐབས་སྡུག་འདི་རིགས་འཕྲལ་མྱུར་མཚམས་འཇོག་གིས་བོད་མིར་རྒྱ་ནག་མི་དམངས་སྤྱི་མཐུན་རྒྱལ་ཁབ་མི་རིགས་ས་ཁོངས་རང་སྐྱོང་བཅའ་ཁྲིམས་ཀྱི་ཐོབ་ཐང་ཁག་ལག་བསྟར་འགན་ལེན་བྱ་དགོས། ༣ བོད་རིགས་ཡོངས་ལ་མི་རིགས་ས་གནས་རང་སྐྱོང་གི་སྲིད་བྱུས་དེ་དག་ལག་བསྟར་ཡོང་ཆེད་བོད་རྒྱ་གཉིས་བར་ཞི་མོལ་གྱི་ལས་དོན་འཕྲལ་དུ་མགོ་འཛུགས་དགོས།

༤ རྒྱལ་སྤྱིའི་ཕྱོགས་ལྷུང་མེད་པའི་སྐུ་ཚབ་ཚོགས་པ་བོད་ནང་འཕྲལ་གཏོང་དང་། བོད་མིའི་སྒྲིག་འཛུགས་ཀྱི་སྐུ་ཚབ་ཚོགས་པ་བོད་ནང་འཕྲལ་མར་ཡོང་འཇུག་དགོས། ༥ རྒྱ་གཞུང་གིས་བོད་ནང་འཛུགས་སྐྲུན་དང་འབྲོག་པ་གནས་སྤོ། རྒྱ་མི་བོད་དུ་གནས་སྤོར་འཕྲལ་དུ་མཚམས་འཇོག་དགོས། ༦ པཎ་ཆེན་ཆུང་སྲིད་མཆོག་གིས་གཙོས་ཆབ་སྲིད་བཙོན་པ་རྣམས་འཕྲལ་དུ་ཀློད་དགོས། ༧ འཛམ་གླིང་གི་དབུ་ཁྲིད་རྣམ་པས་བོད་མིའི་དགོས་འདུན་ཁག་འགྲུབ་ཐབས་དང་ཚེ་སྲོག་སྐྱོབ་ཐུབ་ཀྱི་འགན་འཁུར་འཕྲལ་མར་ལེན་དགོས། ༨ རྒྱལ་སྤྱིའི་གཞུང་སྒེར་ཚོགས་སྡེ་ཁག་གིས་བོད་དོན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་བ་དང་། བོད་ནང་མཉམ་འབྲེལ་རྒྱལ་ཚོགས་ཀྱི་རྟོག་ཞིབ་སྐུ་ཚབ་བསྐོ་གཏོང་ཡོང་དགོས་ཞེས་བཀོད་འདུག