ཡུལ་ཤུལ་ཁྲི་འདུ་རྫོང་ཟིལ་དཀར་དགོན་པའི་གྲྭ་བསོད་ནམས་དགེ་བ་དང་བློ་བཟང་བསམ་གཏན། བློ་བཟང་ཉི་མ་གསུམ་ལ་ཁྲིམས་ཐག་བཅད་འདུག
ལྷོ་ཕྱོགས་སེ་ར་དགོན་པའི་དགེ་འདུན་པ་ཞིག་གིས་གནས་ཚུལ་བཏང་འབྱོར་བྱུང་བ་ལྟར་ན། ཉེ་ལམ་རྒྱ་གཞུང་གིས་འཛིན་བཟུང་བྱས་པའི་ཡུལ་ཤུལ་སྐྱེ་དགུ་མདོ་ཁྲི་འདུ་རྫོང་སྒ་སྟོད་གྲོང་རྡལ་ཉ་མཚོ་ཟིལ་དཀར་དགོན་པའི་གྲྭ་བསོད་ནམས་དགེ་བ་དང་བློ་བཟང་བསམ་གཏན། བློ་བཟང་ཉི་མ་གསུམ་ལ་རེས་གཟའ་ཕུར་བུ་སྟེ་ཚེས་ ༡༥ ཉིན་ནང་མི་གཉེན་འབྲེལ་སོགས་ལ་བརྡ་ལན་གང་ཡང་མེད་པར། ཟི་ལིང་གི་ཁྲིམས་ཁང་ཞིག་ནས་གསང་སྟབས་ཀྱིས་བསོད་ནམས་དགེ་བ་ལགས་སུ་ལོ་ ༢ དང་། བློ་བཟང་བསམ་གཏན་དང་བློ་བཟང་ཉི་མ་གཉིས་ལ་ལོ་ ༡ དང་ཟླ་དགུ་རེའི་བཅས་ཀྱི་ཁྲིམས་ཐག་བཅད་ཡོད་འདུག
ཁོང་ཅག་ལ་ཁྲིམས་ཐག་བཅད་ཡོད་པའི་གནས་ཚུལ་དེ་ཐོས་འཕྲལ་ས་གནས་མི་མང་ཁོང་ཁྲོ་ཟོས་ཏེ་ངོ་རྒོལ་རྒྱག་རྩིས་བྱས་སྐབས། དགོན་པའི་ཁྲི་བ་དང༌མཁན་པོ་སོགས་ཀྱིས་ཡང་བསྐྱར་ངོ་རྒོལ་བྱས་ཚེ་རྒྱ་དམག་གིས་མེ་མདའ་བརྒྱབ་སྟེ་དྲག་གནོན་བྱ་རྒྱུ་ཉག་ཅིག་ཡིན་སྟབས། ང་ཚོར་གྱོང་གུད་ཚབས་ཆེན་ཐེབས་ཉེན་ཡོད་པས་ཚང་མས་ཐུགས་བསམ་བཞེས་རོགས་ཞེས་འབོད་སྐུལ་ཞུས་ཏེ་བཀག་འགོག་བྱས་ཡོད་འདུག
ཁོང་རྣམས་ཕྱི་ཟླ་ ༢ ཚེས་ ༡༥ ཉིན་འཛིན་བཟུང་བྱས་རྗེས་ད་བར་གར་ཡོད་ཅི་ཆགས་ཀྱི་གནས་ཚུལ་གཅིག་ཀྱང་ཤེས་རྟོགས་ཐུབ་མེད་ལ། རྒྱ་མིའི་ཉེན་རྟོག་པས་ཁྲི་འདུ་རྫོང་ཐོག་ཏུ་བཀག་ཡོད་ཚུལ་བརྗོད་ཡོད་ཀྱང་། ནང་མི་སུ་གང་ཡང་ཐུག་འཕྲད་དང་མཐོང་ཐོས་བྱུང་མེད། ཕྱི་ཟླ་ ༢ ཚེས་ ༨ ཉིན་ངོ་རྒོལ་སྐད་འབོད་བྱུང་བ་ནས་ད་ལྟའི་བར་ཟིལ་དཀར་དགོན་པའི་གྲྭ་བ་ཚང་མ་དགོན་པའི་ཕྱི་རོལ་ཏུ་གཏན་ནས་འགྲོ་སྐྱོད་མི་ཆོག་པ་བཟང་བཙོད་ལྟ་བུར་བཀག་ཉར་བྱས་ཡོད་པ་དང་། རྒྱལ་གཅེས་ཆོས་གཅེས་ཟེར་བའི་བྱ་འགུལ་ཞིག་མུ་མཐུད་སྤེལ་བཞིན་ཡོད་འདུག
འབྲེལ་ཡོད་དང་གསར་འགོད་པ་རྣམ་པའི་འདི་ཕྱོགས་ལ་ཞིབ་འཇུག་མང་ཙམ་གནང་རོགས། གང་ལགས་ཞུས་ན་དུས་ཡུན་ཟླ་ངོ་གཅིག་གི་ནང་དུ་འདི་ལྟར་ཟི་ལིང་གི་ཁྲིམས་ཁང་ཞིག་ནས་ལོ་ཚད་བཟོས་བ་ཟེར་བ་དེ་དག་དག་ཡོད་ན།
མདུན་ཕྱོགས་ནི་ཧ་ཅང་རིང་ཡང་ཁྱེད་ཚོས་འདི་ལྟར་ཐུང་ཐུང་བཟོས་ཡོད། འོན་ཀྱང་ཁྱེད་ཅག་གི་ཕུག་འདུན་དང་ཆོད་སེམས་ལ་ངས་ནམ་ཡང་ཚོད་དཔག་བྱེད་མི་ཐུབ།