ཡབ་ཆེན་ལ་གསོལ་བ་ཕུར་ཚུགས་སུ་འདེབས་པ།

ནམ་མཁའ་ན་སྤྲིན་པ་མེད་པའི་ཉི་མ་ཞིག་སྟེ། ༡༩༨༧ ལོའི་ཟླ་དགུ་པའི་ནང་ལྷ་སར་ངོ་རྒོལ་བྱུང་བ་རེད། རྒྱ་དམག་སེ་ར་དང་འབྲས་སྤུངས། དགའ་ལྡན་དགོན་པ་བཅས་ལ་རྒྱུགས་ནས་དགེ་འདུན་པ་འཛིན་བཟུང་བྱས་པ་རེད། དེ་ནི་ལོ་ ༢༠ གོང་གི་གནས་ཚུལ་ཞིག་རེད། འོན་ཀྱང་པེ་ཅིན་ན་སྐབས་ཐོག་དེ་ལ་དགེ་འདུན་པ་དེ་ཚོའི་གྲོགས་པོ་ཞིག་ཡོད་པ་རེད། གྲོགས་པོ་དེ་ནི་པཎ་ཆེན་རིན་པོ་ཆེ་རེད། པཎ་ཆེན་རིན་པོ་ཆེས་བཀའ་སློབ་གནང་བ་ལ་བརྟེན་ནས་དགེ་འདུན་པ་རྣམས་གློད་གྲོལ་བཏང་བ་རེད། དེ་ལྟར་བོད་ལ་དཀའ་རྙོག་བྱུང་སྐབས་པཎ་ཆེན་རིན་པོ་ཆེ་ནི་བོད་ཀྱི་ཁྱིམ་ཚང་གི་བདེ་སྡུག་ཞུ་སའི་ཡབ་ཆེན་ཞིག་ཏུ་གྱུར་པ་རེད།

ཁ་སང་བོད་ཀྱི་ན་གཞོན་ཞིག་ལ་གླེང་མོལ་བྱས་པ་ཡིན། གླེང་མོལ་དེ་ནི་སྐར་མ་ཁ་ཤས་རིང་གི་གླེང་མོལ་ཞིག་ཡིན། གླེང་མོལ་བྱེད་སྐབས་ཚིག་ཆེན་པོ་གཉིས་གློ་བུར་དུ་ཐོན་པ་དེས་ང་སྐབས་གཅིག་གི་རིང་སྙིང་རྩ་འགག་པ་ལྟ་བུའི་མི་ཞིག་ཏུ་བསྒྱུར། སྐད་ཆ་དང་པོ་ནི་ཁོས་ད་ལྟ་གཞུང་གི་ཕོགས་ལེན་གྱི་ཡོད་མོད་ཧ་ལམ་ཕོགས་དེ་ཡང་གཡུགས་ཆོག་ཆོག་ཏུ་བསྡད་འདུག་པ་དེ་ཡིན། སྐད་ཆ་གཉིས་པ་ནི་ཁོང་གིས་བོད་མི་ཚོ་ལ་མཐུན་སྒྲིལ་ཡོད་ན་བོད་དོན་ནི་ཟླ་བ་ཁ་ཤས་ཀྱི་རིང་ལ་ཐག་གཅོད་ཐུབ་པའི་གནད་དོན་ཞིག་ཏུ་མཐོང་གི་ཡོད་ཟེར།

ད་ལྟའི་རང་སྲོག་བློས་གཏོང་གི་ལས་འགུལ་འདི་འདྲ་ནི་ད་སྔ་བོད་ཀྱི་ལོ་རྒྱུས་ཐོག་བྱུང་མྱོང་མེད་པ་རེད། དེར་བརྟེན། ལོ་རྒྱུས་ཀྱི་ཐོག་ནས་འདི་ལ་ཚོད་དཔག་བྱེད་ཐུབ་པ་ཞིག་མི་འདུག་ལ། ལས་འགུལ་འདིས་ང་ཚོ་ཁ་ཕྱོགས་གང་དུ་འཁྲིད་རྒྱུ་ཡིན་མིན་ལའང་ཚོད་དཔག་བྱེད་ཐུབ་པ་མི་འདུག ཤེས་རྟོགས་བྱུང་བ་ལྟར་ན། ཨ་མདོ་རྔ་བ་མི་མང་གིས་གལ་སྲིད་སྐྱབས་མགོན་ཀིརྟི་རིན་པོ་ཆེས་ལས་འགུལ་མཚམས་འཇོག་བྱ་དགོས་གསུངས་ནའང་མཚམས་འཇོག་མི་བྱེད་ཅེས་ཐག་ཆོད་པའི་རྣམ་འགྱུར་སྟོན་གི་འདུག་ཟེར།

ད་ལས་འགུལ་འདིའི་བློས་གཏོང་གི་ཚད་དེ་ནི་འགྲོ་བ་མི་ཞིག་གི་བློ་ཡུལ་ལ་ཤོང་པ་ཞིག་མ་རེད། ཨ་མ་དང་ཨ་ཕ་དག་གིས་སྙིང་ནས་བརྩེ་བའི་བྱིས་པ་རྣམས་དྭ་ཕྲུག་ཏུ་བཞག་ནས་ལས་འགུལ་ནང་ཞུགས་ཡོང་དུས། དེའི་ཆོད་སེམས་ཀྱི་ཚད་མཐོང་ཡོང་གི་འདུག རྒྱ་ལ་གཤིབས་ནས་ལས་ཀ་བྱེད་མཁན་གྱི་བོད་རིགས་ཚོ་ལ་མཚོན་ན། རྒྱ་ལ་གཤིབས་ནས་མི་ཚེ་བསྐྱལ་འདོད་མེད་པ་དང་། རྒྱ་ལ་གཤིབས་ནས་མི་ཚེ་བསྐྱལ་ན་བོད་མི་རིགས་འདི་གསོན་མི་ཐུབ་པའི་གནས་སྟངས་དེ་ལ་ངེས་ཤེས་བརྟན་པོ་ཞིག་རྙེད་འདུག

ད་ངས་ལོ་ཤས་གོང་གི་གནས་ཚུལ་ཞིག་ལ་དྲན་གསོ་གཏོང་། གནས་ཚུལ་དེ་ནི་བོད་མིའི་བསམ་བློའམ་འཇིག་རྟེན་ལྟ་ཚུལ་ཞིག་རེད་མ་གཏོགས། ཚན་རིག་གི་ཐོག་ནས་ཚད་གྲུབ་ཏུ་འཇོག་པ་ཞིག་མ་རེད། གནས་ཚུལ་འདི་མ་ཞུས་གོང་ལ་ངས་བཤད་ན་འདོད་པ་ནི། ༧གོང་ས་མཆོག་གི་སྐོར་ཡིན། ༧གོང་ས་མཆོག་གིས་བོད་གཞུང་གི་སྲིད་དབང་རྩིས་སྤྲོད་ཀྱིས་བགྲེས་ཡོལ་གནང་བ་དེ་ལ་བསམ་ཚུལ་འདྲ་མི་འདྲ་བྱུང་ཡོད། བསམ་ཚུལ་དེ་དག་གི་ཁྲོད་ཀྱི་གཅིག་ནི། ༧རྒྱལ་བ་རིན་པོ་ཆེ་ཞུ་བ་འདི་ནི་བོད་ཀྱི་བསྟན་སྲིད་གཉིས་ཀྱི་མངའ་བདག་རེད་ལ། དེ་ཡང་དགའ་ལྡན་ཕོ་བྲང་གི་ལོ་ཡུན་དེ་ཚོ་དང་། སྐུ་ཕྲེང་བཅུ་བཞིའི་རིང་གི་དངོས་ཡོད་གནས་ཚུལ་ཞིག་རེད། དེར་བརྟེན། ༧རྒྱལ་བ་རིན་པོ་ཆེ་ནི་བོད་མི་རིགས་ཀྱི་མགོན་སྐྱབས་ཡིན་པ་འདི་ལ་དགོངས་པ་ཞུ་རྒྱུ་ཞིག་དང་དགོངས་པ་ཞུ་ས་ཞིག་ཡོད་མ་རེད་ཟེར་བ་དེ་རེད།

ད་མུ་མཐུད་ནས་གནས་ཚུལ་འདི་ལ་སྣོན་པ་བརྒྱབ་པ་ཡིན་ན། ༧རྒྱལ་བ་སྐུ་ཕྲེང་བཅུ་བཞི་པ་མཆོག་ནི། མཁས་བཙུན་བཟང་གསུམ་གྱི་མཛད་པ་གང་ཅིའི་ཐད་ནས་འཕགས་པ་སྤྱན་རས་གཟིགས་སྐུ་གསོན་པོ་ཞིག་ཡིན་པ་རེད། སྐུ་གསོན་པོ་འདི་ལའང་དགོངས་པ་ཞུ་ས་ཞིག་མེད་པ་རེད། དེར་བརྟེན་༧སྐྱབས་མགོན་ཐམས་ཅད་མཁྱེན་པ་ནི་དུས་ནམ་ཡིན་ཡང་བོད་མི་རིགས་ཀྱི་མགོན་པོ་དང་སྐྱབས། ཡབ། ཡབ་ཆེན་བཅས་ཡིན་པ་རེད་ལ། ཡབ་ཆེན་ཁོང་བོད་ལ་ཕེབས་རྒྱུ་ནི། ད་ལྟའི་ལས་འགུལ་ནང་གི་འབོད་སྒྲ་གསལ་ཤོས་ཤིག་རེད།

ད་ང་ཚོའི་ཡབ་ཆེན་༧སྐྱབས་མགོན་ཆེན་པོས་བོད་མི་ཚོ་ལ་བཀའ་སློབ་གནང་རན་འདུག ༧སྐྱབས་མགོན་ཆེན་པོ་ཉག་གཅིག་གིས་གསུངས་ན་བོད་མི་ཚོས་མཉན་གྱི་རེད། ད་བར་དུ་༧སྐྱབས་མགོན་ཆེན་པོས་བཀའ་སློབ་གནང་མ་སོང་བ་གང་ཡིན་ནམ། དྲི་བ་འདི་དག་ནི་ཁ་སང་དེ་རིང་གི་དྲི་བ་ཆེ་ཤོས་དེ་རེད། ད་ལོ་ཤས་གོང་གི་གནས་ཚུལ་དེ་དྲན་གསོ་གཏོང་། ༧སྐྱབས་མགོན་ཆེན་པོས་ཆབ་སྲིད་ཀྱི་ལས་ཀ་ནས་བགྲེས་ཡོལ་ལ་ཕེབས་ཀྱི་གསུངས་པའི་སྐབས་ཐོག་དེ་ལ། ད་ལྟ་བོད་མི་ཚོ་ལ་བློ་ཕམ་ཞིག་ཡོང་གི་རེད། འོན་ཀྱང་ལོ་ཁ་ཤས་ཀྱི་རྗེས་ལ་བོད་མི་ཚོས་ངའི་ཐག་གཅོད་ནོར་མེད་པ་དེ་ཤེས་ཡོང་གི་རེད་ཅེས་གསུངས་སོང་། ད་དེ་དུས་ཀྱི་བཀའ་སློབ་དེ་དག་ཁ་སང་དེ་རིང་གི་གནས་ཚུལ་འདི་དག་ལ་དགོངས་པ་ཞིག་ཡིན་ནམ། ད་དུང་འདི་ལྟར་ཉི་མ་གཅིག་གམ་ཟླ་བ་གཅིག ཡང་ལོ་གཅིག་གམ་ལོ་བཅུ་བསྡད་པ་ཡིན་ན། བོད་མི་རིགས་ལ་བློ་འགྱོད་མི་ཡོང་བའི་དོན་དེ་འགྲུབ་རྒྱུ་ཡིན་ནམ།

ཡིན་ན་ཡང་། ད་བཟོད་ཐུབ་པ་མི་འདུག་ཡབ་ཆེན་ལགས། མེར་སྲེག་གི་ལས་འགུལ་འདི་བཟོད་ཐུབ་པ་མི་འདུག འདི་ལྟར་བོད་མི་རེ་རེའི་སྐུ་ཤ་གསོན་པོ་དེ་སྙིང་རྗེ་བྲལ་བའི་མེ་ཡིས་འཚིག་ན་བཟོད་ཐུབ་པ་མི་འདུག ཡབ་ཆེན་ལགས། འདི་མཚམས་འཇོག་ཡོང་བའི་བཀའ་སློབ་ཅིག་གནང་རོགས། མེས་འཚིག་དང་འཚིག་བཞིན་པའི་སྤུན་ཟླ་ཕོ་མོ་ཙམ་ཞིག་མ་རེད། དེ་དག་གི་ཕ་མ་སྤུན་མཆེད། དེ་དག་གི་མིང་སྲིང་བུ་ཕྲུག དེ་དག་གི་གྲོགས་པོ་གྲོགས་མོ། དེ་དག་གི་ཡུལ་སྡེ་ལུང་སྡེ། ད་ངོ་རྒོལ་དང་དམག་འཁྲུག་གི་བར་སྟོང་དེ་ཇེ་ཆུང་ལ་འགྲོ་བཞིན་འདུག འཛམ་གླིང་ན་བོད་ལ་སྙིང་རྗེ་ངོ་མ་བྱེད་མཁན་གྱི་རྒྱལ་ཁབ་གང་ཡང་མི་འདུག ཚང་མ་རང་དོན་ལ་འཐམས་ནས་བསྡད་ཡོད། ཡབ་ཆེན་ལགས། ད་གནས་སྐབས་རིང་ལས་འགུལ་འདི་དག་མཚམས་འཇོག་ཡོང་བའི་བཀའ་སློབ་གཅིག་གསུངས་རོགས། ཁྱེད་མིན་པའི་གཞན་སུ་ཞིག་ལའང་ལས་འགུལ་འདི་འགོག་པའི་ནུས་པ་མི་འདུག

བོད་དོན་འཐབ་རྩོད་ཀྱི་ལས་འགུལ་འདི་ནི་འཕྲལ་ཕུགས་གཉིས་ཀྱི་འཆར་གཞི་ཞིག་རེད། ང་ཚོའི་འཕྲལ་གྱི་རྒྱལ་ཁ་དེ་ད་ཆ་ཐོབ་ཚར་སོང་། པེ་ཅིན་གྱི་མིག་ལ་བོད་ཀྱི་གནད་དོན་དེ་གསལ་པོར་ངོ་སྤྲོད་བྱས་ཡོད། ཁྱེད་བཙན་བྱོལ་ལ་ཞབས་རྗེས་བཀོད་པའི་ཉི་མ་དེ་ནས་བཟུང་སྟེ། དུས་དེ་རིང་གི་བར་དུ་གཞིས་ལུས་བོད་མིས་པེ་ཅིན་ལ་གོ་བརྡ་གསལ་པོར་སྤྲད་ཡོད། ད་ཕུགས་ཀྱི་འཆར་གཞི་དེ་ལ་གོམ་པ་གང་ཕྱིར་སྣུར་བྱེད་དགོས་ཀྱང་བྱེད་རྒྱུ་རང་རེད། གནས་སྐབས་རིང་གོམ་པ་གང་ཕྱིར་སྣུར་བྱེད་དགོས་ཀྱང་བྱེད་རྒྱུ་རེད། རྒྱུ་མཚན་དེས་ན། ཡབ་ཆེན་ལགས། ཞལ་གསོན་པོས་བོད་མི་རིགས་ལ་བཀའ་སློབ་ཅིག་གནང་རོགས། ཞལ་གསོན་པོས་བོད་མི་རིགས་ལ་ལས་འགུལ་འདི་མཚམས་འཇོག་ཡོང་བའི་བཀའ་སློབ་ཅིག་གནང་རོགས། ཞེས་པུས་མོའི་སླ་ང་ས་ལ་བཙུགས་ཤིང་ལག་གཉིས་ཐལ་མོ་སྦྱར་ཏེ་གསོལ་བ་ཕུར་ཚུགས་སུ་འདེབས་པ་པོ་བདག་ནི་ཕ་ཡུལ་གངས་ཅན་ནས་བར་ཐག་ཤིན་ཏུ་རིང་བའི་ཡུལ་ཞིག་ན་གནས་བཅས་པའི་རྒད་པོ་ཀུན་དགའ་ཚེ་རིང་ལགས་སོ།།