ང་ཚོ་ཚང་མས་གཟབ་གཟབ་བྱ་རྒྱུའི་དུས་ལ་བབ་འདུག

སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པའི་ལས་ཉིན་གསུམ་པ་སྟེ། ཕྱི་ཚེས་ ༡༦ ཉིན་གྱི་སྔ་དྲོའི་ཆུ་ཚོད་ ༡༠།༣༠ སྟེང་། བཀའ་བློན་ཁྲི་པ་བློ་བཟང་སེངྒེ་མཆོག་གིས་བཀའ་ཤག་གི་གསལ་བཤད་གནང་སོང་།

སྐབས་དེར་བཀའ་ཁྲི་མཆོག་གིས་སྐབས་བཅོ་ལྔ་བའི་གྲོས་ཚོགས་ཚོགས་དུས་གསུམ་པའི་ཉིན་དང་པོར་བོད་ནང་གི་ཛ་དྲག་གི་གནས་སྟངས་ཐད་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་འཇོག་ཐུབ་པ་བྱུང་བ་དང་བགྲོ་གླེང་གི་སྐབས་སུ་སྤྱི་འཐུས་རྣམ་པས་ཆ་ཤས་བླངས་ཏེ། མ་འོངས་པའི་ལས་ཀ་བྱེད་ཕྱོགས་ལ་ཐུགས་ཕན་སོས་བའི་དགོངས་ཚུལ་གནང་བའི་ཐད་བསྔགས་བརྗོད་དང་།༸གོང་ས་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གིས་འོས་འདེམས་བྱས་པའི་མགོ་ཁྲིད་ལ་རྩིས་སྤྲོད་གནང་རྒྱུའི་ཞལ་བཞེས་གནང་སྐབས་མི་མང་ནང་སེམས་འཚབ་ཆེན་པོ་བྱུང་ཡོད་ཀྱང་། འདས་པའི་ལོ་གཅིག་རིང་བོད་ཕྱི་ནང་གཉིས་ཀྱི་བོད་མི་དང་། དམིགས་བསལ་ཁྲིམས་བཟོ་ལྷན་ཚོགས་གཙོས་པའི་ཚོགས་པ་ཁག་བཅས་ཀྱིས་འཕྱར་གྲུ་མཉམ་འདེགས་བྱས་ཏེ། ལོ་རྒྱུས་ལྡན་པའི་ཆབ་སྲིད་ཀྱི་སྐུ་དབང་རྩིས་སྤྲོད་གནང་བ་དེ་ཞི་འཇམ་གྱི་ངང་ལེགས་འགྲུབ་བྱུང་དང་འབྱུང་བཞིན་པ་དེས། རྒྱ་ནག་གཞུང་གིས་༸གོང་ས་མཆོག་གཙོས་པའི་མི་ཐོག་རྒན་པ་ཚོའི་སྐབས་སུ་བཙན་བྱོལ་སྒྲིག་འཛུགས་གནས་ཐུབ་ཀྱང་། མ་འོངས་པར་བཙན་བྱོལ་སྒྲིག་འཛུགས་ནུས་མེད་འཐོར་བཤིག་འགྲོ་བའི་རྩིས་དང་རེ་བ། འཆར་གཞི་བཏང་སྟེ་འབད་བརྩོན་ཤུགས་ཆེན་བྱེད་བཞིན་པ་དེ་འགྲུབ་ཐབས་མེད་པ་ཞིག་དང་། མི་རབས་གསར་བ་ཚོས་མུ་མཐུད་དེ་བོད་ཀྱི་རྩ་དོན་རྩོད་ཐུབ་པ་དང་། བོད་ནང་རང་དབང་བསྐྱར་གསོ་མ་བྱས་པར་སྒྲིག་འཛུགས་མུ་མཐུད་གནས་རྒྱུ་ཡིན་པའི་བརྡ་ལན་སྤྲོད་ཐུབ་ཡོད་པ་དེ། ༸གོང་ས་མཆོག་དང་བཀའ་དྲིན་ཡིན་པའི་བསྔགས་བརྗོད་གནང་སོང་།

བཀའ་ཁྲི་མཆོག་གིས་མ་འོངས་པར་བཀའ་སྤྱི་གཉིས་ཆིག་སྒྲིལ་མཉམ་རུབ་བྱ་རྒྱུ་གལ་ཆེན་ཡིན་པའི་ཐད་ནས་ཁོང་གིས།  “ ༸གོང་ས་མཆོག་གི་དགོངས་གཞི་དང་རེ་བ་གཙོ་བོ། བོད་ནང་རང་དབང་བསྐྱར་གསོ་མ་བྱས་པར་བོད་མིའི་སྒྲིག་འཛུགས་གནས་རྒྱུ་དང་བོད་མི་ཚོ་སོ་སོའི་རྐང་པའི་སྒང་ལངས་ཐུབ་རྒྱུ་དེ་ཡིན་སྟབས། ང་ཚོར་དམིགས་བསལ་གྱི་འགན་འཁྲི་ཆེན་པོ་ཞིག་ཡོད། བཀའ་ཤག་གི་ངོས་ནས་འདས་པའི་ཟླ་བ་ ༦ རིང་ཞབས་ཞུ་ཕྲན་བུ་ཞུས་ཐུབ་ཡོད་ཀྱང་། བྱས་པ་ལས་བྱ་རྒྱུ་མང་པོ་ཞིག་ལྷག་བསྡད་ཡོད་སྟབས། ལོ་བཞི་དང་ཕྱེད་ཀའི་རིང་ཁྲིམས་བཟོ་ལྷན་ཚོགས་དང་བཀའ་ཤག་སྤྱི་མོས་ཐོག་འཕྱར་གྲུ་མཉམ་འདེགས་དང་ཆིག་སྒྲིལ་བྱ་རྒྱུ་ཧ་ཅང་གལ་ཆེན་པོ་རེད། ཕྱོགས་གཅིག་ནས་ང་ཚོའི་འགན་དེ་ལས་སླ་བོ་རེད་ཅེས་བཤད་ཀྱང་མ་འགྲིག་པ་མི་འདུག ལོ་བཞི་དང་ཕྱེད་ཀ་ང་ཚོ་མཉམ་དུ་བརྒལ་རྒྱུ་ལྷག་ཡོད་པ་རེད།  ཡིན་ནའང་། ལོ་བཞི་དང་ཕྱེད་ཀ་ལས་སླ་བོ་དང་དཀའ་ལས་ཁག་པོ་ཡིན་མིན། གང་འདྲ་ཆགས་མིན་ང་ཚོའི་ལག་པར་ཡོད། ང་ཚོས་ཆིག་སྒྲིལ་དང་འཕྱར་གྲུ་མཉམ་འདེགས་ཐོག  ད་ལྟའི་བར་བསྒྲུབས་པ་ལྟར་མུ་མཐུད་ལྷག་བསམ་རྣམ་དག་གིས་བསྒྲུབ་པ་ཡིན་ན་ལས་སླ་བོ་ཆགས་ཀྱི་རེད། ནོར་འཁྲུལ་ཆུང་ཆུང་ཤོར་བར་སྤྱི་འབངས་ཀྱི་ཆེན་པོར་མཐོང་སྲིད་པ་རེད། གང་ཡིན་ཞེ་ན། ད་ལྟའི་བར་༸གོང་ས་མཆོག་གི་བཀའ་དྲིན་ལ་བརྟེན་ནས་ང་ཚོས་ག་རེ་གནང་ཡང་། སྐྱབས་གསོལ་ཞུ་ས་ཞིག་ཡོད་སྟབས། མི་མང་ནང་འགྲིག་འགྲོ་བསམ་པའི་ཚོད་དཔག་ཅིག་ཡོང་བསྡད་ཡོད་པ་རེད། ཆབ་སྲིད་ཀྱི་སྐུ་དབང་ཆ་ཚང་མར་གནང་བ་དང་མི་མང་གི་འོས་འདེམས་བྱས་པའི་མགོ་ཁྲིད་ཀྱི་ལག་ཏུ་ལྷུང་ཡོང་སྐབས། ཕྱག་ལས་གནང་སྟངས་ཆུང་ཆུང་ཞིག་མ་འགྲིག་པ་དེ་ཆེན་པོར་མཐོང་བའི་ཉེན་ཁ་ཡོད་པ་ཞིག་དང་། ཕྱག་ལས་གནང་བའི་སྐབས་གང་གསུང་ཡང་། སྤྱི་དམངས་ཀྱི་དོ་སྣང་ཤུགས་ཆེར་བྱེད་ཀྱིན་པ་ཚང་མས་མཁྱེན་གྱི་ཡོད་སྟབས། ང་ཚོས་བོད་ནང་རང་ལུས་མེར་བསྲེགས་བཏང་སྟེ་རེ་བ་ཆེན་པོ་རྒྱག་བཞིན་པ་དང་། བོད་ནང་གི་ཛ་དྲག་གི་གནས་སྟངས་སྐབས་ཆིག་སྒྲིལ་མཉམ་རུབ་གཙོ་བོར་འཇོག་རྒྱུ་གལ་ཆེན་པོ་རེད། ” ཅེས་གསུངས་བྱུང་།  

ཡང་བོད་ནང་རང་ལུས་མེར་བསྲེགས་ཀྱི་གནས་ཚུལ་བྱུང་བཞིན་པའི་ཐད་ལ་ཁོང་གིས། “ བོད་ནང་རང་ལུས་མེར་བསྲེགས་བཏང་བའི་ཐད་ལ། ཕྱི་ཟླ་ ༡༠ པོའི་ཚེས་ ༡༩ དང་།  ཕྱི་ཟླ་ ༡ པོའི་ཚེས་ ༤ དང་ ༥ བཅས་ཉིན་གཉིས་བཅས་ལ་གནས་མཆོག་རྡོ་རྗེ་གདན་དུ་མཆོད་འབུལ་སྨོན་ལམ་ལོ་རྒྱུས་ནང་ཆེ་ཤོས་དང་། ཕྱི་ཟླ་ ༢ པའི་ཚེས་ ༨ ཉིན་རྒྱལ་སྤྱིའི་ཁྱོན་ཡོངས་སུ་བོད་པ་དང་བོད་དོན་རྒྱབ་སྐྱོར་གནང་མཁན་ཡོངས་ལ་གང་ཐུབ་ཅི་ཐུབ་གནང་རོགས་གནོངས་ཞེས་འབོད་སྐུལ་ཞུས་པ་ལྟར། ལྷོ་ཨ་མི་རི་ཀ བྱང་ཨ་རི་དང་ཡུ་རོབ། ཨེ་ཤ་བཅས་སུ་མི་སྟོང་ཕྲག་མང་པོ་མཉམ་ཞུགས་ཀྱིས་རྒྱབ་སྐྱོར་གནང་འདུག དེས་བོད་མི་ཚོ་རྡོག་རྩ་གཅིག་སྒྲིལ་དང་སེམས་ནང་ན་ཚ་ཡོད་པ་དང་། བོད་ནང་རང་སྲོག་མེ་ལ་འབུལ་མཁན་དེ་དག་གྲངས་ཀ་ཙམ་མིན་པར་ང་ཚོ་ལྟར་མི་ཡིན་ཞིང་། ཕ་མ་སྤུན་མཆེད་ཡོད་མཁན། གདམ་ཀ་བྱུང་ན་རང་སྲོག་ཉར་འདོད་ཡོད་མཁན་ཡིན་ནའང་། རྒྱ་ནག་གཞུང་གིས་བོད་ནང་མཁྲེགས་བཟུང་གི་སྲིད་ཇུས་དེའི་འོག་གནས་ཐུབ་ཀྱི་མི་འདུག ང་ཚོར་ཡོད་པའི་རྩ་ཆེའི་སྐུ་སྲོག་ཕུལ་རྒྱུ་ཡིན་ཞེས་སྐུ་སྲོག་ཕུལ་བ་རེད།

བོད་ནང་ཞི་བའི་ངོ་རྒོལ་དང་སྐད་འབོད། ཡིག་ཆ་ཡན་རྩིག་པའི་སྒང་སྦྱར་བའི་གོ་སྐབས་དང་རང་དབང་མེད་པ་དང་། ཞི་བའི་ཐོག་ནས་ལས་འགུལ་ནང་མཉམ་ཞུགས་བྱས་ཀྱང་། མེ་མདའ་བརྒྱབ་སྟེ་མི་སྟོང་འགྲོ་བཞིན་ཡོད་པ་རེད། ད་ལོའི་ལོ་གཅིག་པུའི་ནང་མི་ ༧ ལྷག་འདས་གྲོངས་སུ་ཕྱིན་པ་རེད། དེ་འདྲའི་རང་དབང་མེད་དུས་ཐབས་ལམ་ག་རེ་ཡོད་དམ། ཞི་བའི་ཐོག་སྐད་འབོད་དུ་འཛུལ་ཞུགས་བྱས་ཀྱང་མེ་མདའ་བརྒྱབ་སྟེ་གྲོངས་བཞིན་པ་ལས།  སོ་སོའི་གཅེས་བའི་སྲོག་མེར་བསྲེགས་བཏང་བ་ཡིན་ན་བོད་དང་བོད་མི་རིགས་ལ་ཐུགས་ཕན་གསོ་བ་ཡོང་གི་རེད་བསམ་པའི་ཐོག་ནས་བོད་མི་ཚོས་བློས་གཏོང་བྱེད་བཞིན་པ་རེད། ཁ་སང་ལས་འགུལ་སྤེལ་བར་འགྲོ་སོང་གཏོང་དགོས་པ་རེད་ཅེས་གསུངས་སོང་། བཀའ་སྤྱི་གཉིས་ལྷན་འཛོམས་ཀྱི་ཚོགས་འདུའི་སྐབས་སུ། བཀའ་ཤག་གི་ངོས་ནས་མཐུན་རྐྱེན་བསྐྲུན་ཕྱོགས་ཀྱི་ཐད་ནས་ཧིན་སྒོར་ས་ཡ་ ༡༠ གྲོས་ཚོགས་ཀྱི་ཐོག་ནས་ལས་འགུལ་ག་རེ་སྤེལ་ཡང་མཐུན་རྐྱེན་བསྐྲུན་རྒྱུ་ཡིན་ཞེས་ཞུས་ཡོད། ད་དུང་དེའི་ཐོག་དགོས་ཀྱང་བཀའ་ཤག་གི་ངོས་ནས་གང་ཐུབ་ཞུ་རྒྱུ་ཡིན། བོད་ནང་ཛ་དྲག་གི་གནས་སྟངས་ཆགས་ཡོད་པའི་སྐབས་འདིར་འགྲོ་སོང་ལ་བལྟས་ཏེ་ལས་འགུལ་སྤེལ་མ་ཐུབ་པ་ཡིན་ན། འགྲིག་གི་མི་འདུག་བསམ་གྱི་ཡོད། ” ཅེས་གསུངས་བྱུང།

བོད་རྒྱ་ཞི་མོལ་གྱི་ཐད་ནས་ཁོང་གིས། “ བོད་རྒྱ་ཞི་མོལ་གྱི་ཐོག་ནས་བོད་རྒྱའི་དཀའ་རྙོག་སེལ་ཐབས་ཀྱི་གཉིས་སྨན་དབུ་མའི་ལམ་གྱི་སྲིད་བྱུས་དེ་གྲོས་ཚོགས་ཀྱིས་གཏན་འབེབས་དང་༸གོང་ས་མཆོག་གི་དགོངས་གཞི་རེད། ང་རང་འོས་བསྡུ་ལངས་པའི་སྐབས་སུ་དབུ་མའི་ལམ་གཞིར་བཞག་པའི་ཐོག་ལངས་པ་ཡིན་པ་ཚང་མས་མཁྱེན་གྱི་ཡོད་པ་རེད། དམིགས་བསལ་སྐུ་ཚབ་རྣམ་པ་ ༢༠༡༠ ནས་ད་ལྟའི་བར་དུ་རྒྱ་ནག་ནང་ཕེབས་མ་ཐུབ་པ་དང་། ཁོ་རང་ཚོས་རྗེས་འབྲེལ་བྱེད་མ་ཐུབ་པའི་གནས་སྟངས་ཆགས་ཡོད། ད་ལྟའི་བར་དུ་བོད་རྒྱ་ཞི་མོལ་གྱི་གོམ་པ་མདུན་དུ་སྤོ་མ་ཐུབ་པའི་རྒྱུ་མཚན་ང་ཚོའི་ངོས་ནས་མ་བྱས་པ་མིན་པར། རྐྱེན་གཙོ་བོ་རྒྱ་ནག་གཞུང་རང་དུ་ལྷག་བསྡད་ཡོད། ཁོ་རང་ཚོའི་ག་དུས་སྒོ་ཕྱེ་ཡང་། ང་རང་ཚོ་གྲ་སྒྲིག་ཡིན” ཞེས་གསུངས་བྱུང་།  

མཇུག་ཏུ་བཀའ་ཁྲི་མཆོག་གིས། “ ནམ་རྒྱུན་༸གོང་ས་མཆོག་གི་བཀའ་སློབ་དང་བོད་གཞིས་བྱེས་གཉིས་ཀྱི་རེ་འདོད་གཙོ་བོ་ཆིག་སྒྲིལ་དང་འཕྱར་གྲུ་མཉམ་འདེགས་བྱ་རྒྱུ་ལས། ཆོལ་ཁ་དང་ཆོད་བརྒྱུད་ཀྱི་དབྱེ་བ་བཀར་རྒྱུ་མི་འདུག་ཅེས་པ་དེ་ཡིན་སྟབས། ང་ཚོའི་ངོས་ནས་ཀྱང་༸གོང་ས་མཆོག་གི་རེ་བ་ལྟར་ལོ་ ༡ ནང་ལྷིང་འཇགས་སྒོས་ཆབ་སྲིད་ཀྱི་གནས་སྟངས་བརྟན་དུ་འགྲོ་བཞིན་ཡོད་པ་དང་། བཀའ་ཤག་གི་ངོས་ནས་ཀྱང་ཕྲན་བུ་འབད་བརྩོན་བྱས་ཏེ་ཟླ་བ་ ༦ ནང་རེ་རེ་བཞིན་བསྒྲུབ་དེ་བརྟན་དུ་གཏོང་གི་ཡོད། ང་ཚོ་ཚང་མས་ལས་འགན་གཙོ་བོ་རྡོག་རྩ་ཆིག་སྒྲིལ་བྱ་རྒྱུ་དེ་རེད། རྒྱ་ནག་གི་མཁྲེགས་འཛིན་སྲིད་ཇུས་ལ་ཡིད་ཆེས་བྱེད་མཁན་ཚོས་ང་ཚོའི་སྒྲིག་འཛུགས་མེད་ན་བསམ་པའི་རེ་བ་བྱེད་ཀྱིན་པར་མ་ཟད།  མེད་པར་བཟོ་བའི་འབད་བརྩོན་བྱེད་ཀྱི་ཡོད་པ་རེད། ངས་རྒྱལ་སྤྱིའི་ཚགས་པར་ཁག་ལ་བསམ་ཚུལ་བརྗེ་རེས་བྱེད་སྐབས་ཁོང་ཚོས། བོད་དོན་ཁྱབ་བསྒྲགས་བྱེད་བཞིན་པའི་ཐད་དགག་པ་རྒྱག་མཁན་དང་སྐྱོན་འཛུགས་བྱེད་མཁན། མཆན་རྒྱག་མང་པོ་ཞིག་བསླེབས་ཡོང་གི་འདུག བསླེབས་སྟངས་ལ་བལྟས་པ་ཡིན་ན། དེ་རྒྱ་མི་རེ་གཉིས་ཤིག་གིས་རང་དབང་ཐོག་བསམ་ཚུལ་སྤེལ་བ་ཞིག་མིན་པར། རྒྱ་ནག་གིས་ཆེད་མངགས་འགྲོ་སོང་བཏང་སྟེ་འབད་བརྩོན་བྱས་པ་ཞིག་རེད། ཅེས་བཤད་ཡོང་གི་འདུག་ལ། བཀུར་འོས་སྤྱི་འཐུས་ཁག་ཅིག་གིས་སེམས་འཚབ་ཆེན་པོས་ང་ཚོ་བོད་པའི་དྲ་རྒྱ་ཁ་ཤས་ཀྱི་ནང་དུ་འང་མཆན་འདྲ་མིན་སྣ་ཚོགས་ཡོང་གི་འདུག་ཅེས་གསུངས་བྱུང་། དེ་དག་ཀྱང་མིང་མེད་ཡིན་སྟབས། དངོས་ནས་བྱོས་ཟེར་མཁན་ཞིག་དང་བྱེད་དགོས་ཟེར་མཁན་བཅས་མཐུན་རྐྱེན་བསྐྲུན་མཁན་ཞིག་ཡོད་པ་གསལ་བོ་རེད། ང་ཚོ་ཚང་མས་གཟབ་གཟབ་བྱེད་དགོས་པའི་དུས་ལ་བབ་འདུག བོད་རང་སྐྱོང་ལྗོངས་ཀྱི་དམར་བོའི་སྲིད་གཞུང་བཙུགས་པའི་ལོ་འཁོར་དུས་ཆེན་ཞིག་གི་ཐོག་མི་ ༡༣ གྱིས་བོད་མིའི་ཚབ་ཡིན་མདོག་བྱས་ཏེ་ཕྱིན་པ་དང་བཙན་བྱོལ་ནང་དོལ་རྒྱལ་བེད་སྤྱོད་བཏང་སྟེ་དཀྲོགས་གཏམ་བྱེད་པའི་འབད་བརྩོན་བྱེད་ཀྱིན་པ་གསལ་བོ་ཡིན་སྟབས། ཆོལ་ཁ་དང་ཆོས་ལུགས། ཆོས་རྒྱུད་ཁ་ལ་འཁྱེར་ཏེ་ང་ཚོའི་སྤྱི་ཚོགས་ནང་དཀྲོགས་གཏམ་ཡོང་གི་ཡོད་པ་རེད། ཁ་སང་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་འཇོག་སྐབས། སྤྱི་འཐུས་ ༢༦ གིས་ཚོར་བ་ཤུགས་ཆེན་པོས་ད་ལྟའི་ཆབ་སྲིད་ཀྱི་གནས་སྟངས་འདིའི་སྐབས་ཆིག་སྒྲིལ་གལ་ཧ་ཅང་གལ་ཆེན་ཡིན་པ་གསུངས་བྱུང་བར་སྙིང་ཐག་པ་ནས་དགའ་བསུ་དང་རྒྱབ་སྐྱོར་ཡོད་ལ། ཁས་ལེན་ཡང་ཞུ་བཞིན་ཡོད།” ཅེས་གསུངས་བྱུང་།    

གསར་འགོད་པ། དོན་གོ