ཁ་སང་བཞུགས་སྒར་ངྷ་སར་གཞོན་ནུའི་དབུས་རྒྱུན་ཟུར་པ་དང་ས་གནས་མང་ཚོགས་བཅས་ཀྱིས་ཉིན་གཅིག་རིང་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་ཡོད།
ད་ལོའི་བོད་ལུགས་ཀྱི་ལོ་གསར་ཚེས་གཅིག་ཉིན་ཨ་རིའི་གྲོང་ཁྱེར་ནེའུ་ཡོག་ཏུ། བོད་ཀྱི་གཞོན་ནུ་ལྷན་ཚོགས་ཀྱི་སྣེ་ཁྲིད་འོག བླ་མ་ཤིང་བཟའ་རིན་པོ་ཆེ་མཆོག་དང་། སྐུ་ཞབས་ཡེ་ཤེས་བསྟན་འཛིན་དང་རྡོ་རྗེ་རྒྱལ་པོ་བཅས་གསུམ་གྱིས། རྒྱལ་ཚོགས་ལ་དགོས་འདུན་དོན་ཚན་ལྔ་བཏོན་དེ་ཟས་བཅད་ངོ་རྒོལ་གྱི་ལས་འགུལ་ཞིག་འགྲོ་བཞིན་ཡོད་པ་ལྟར། ཁ་སང་ཟས་བཅད་ངོ་རྒོལ་གནང་སྟེ་ཉིན་ ༢༦ པ་འགྲོ་བཞིན་ཡོད་སྟབས། ཁ་སང་ཕྱི་ཚེས་ ༡༨ ཉིན་བཞུགས་སྒར་ངྷ་རམ་ས་ལའི་མེག་གྷན་རླངས་འཁོར་འབབ་ཚིགས་སུ་བོད་ཀྱི་གཞོན་ནུ་ལྷན་ཚོགས་ཀྱི་དབུས་རྒྱུན་ཟུར་པ་དང་བོད་མི་མང་སྤྱི་འཐུས། ས་གནས་མང་ཚོགས་བཅས་ཁྱོན་མི་ ༥༠ ཙམ་གྱིས། རྒྱལ་ཚོགས་ལས་ཁུངས་སྒོ་འགྲམ་དུ་ཟས་བཅད་ངོ་རྒོལ་གནང་བཞིན་པའི་བོད་མི་ཚོར་གདུང་སེམས་མཉམ་སྐྱེད་དང་རྒྱབ་སྐྱོར་མཚོན་ཆེད། ཉིན་གཅིག་རིང་ཟས་བཅད་ངོ་རྒོལ་གྱི་ལས་འགུལ་ཞིག་སྤེལ་སོང་ལ། ལས་འགུལ་མགོ་འཛུགས་མ་གནང་གོང་དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཞོན་དོན་གྲུབ་ལྷ་དར་ལགས་ཀྱིས་ལས་འགུལ་གྱི་དམིགས་ཡུལ་ངོ་སྤྲོད་དང་། ལས་འགུལ་སྐབས་དབུས་རྒྱུན་ཟུར་པ་རྒན་གྲས་ཁག་ཅིག་གིས་གཏམ་བཤད་ཀྱང་གནང་ཡོད།
གསར་འགོད་པ། དཔལ་ལྡན།
གཞུང་གིས་འདོན་པ་བསྐྱོར་ནས་དམངས་ལ་བསྒུག་ཡོད།།
གཞོན་ནུའི་ཟས་ཤིག་བཅད་ནས་རེ་བ་བྱས་ཡོད།།
བོད་ནས་རང་ལུས་བསྲེགས་ཏེ་གསོལ་བ་བཏབ་ཡོད།།
དོན་ལ་ང་ཚོ་ཡོད་པ་ཤེས་ན་ཆོག་གམ།།
བོད་ཀྱི་གཞོན་ནི་ལྷན་ཚོགས་ཀྱིས་ལས་འགུལ་འདི་འདྲ་གནང་བ་ལ་གདུང་སེམས་མཉམ་སྐྱེད་བྱས་པ་ཡིན། མ་ཟད་རྒྱབ་སྐྱོར་དང་ཡི་རང་ཡོད།