མཁན་པོ་དགེ་བ་འཛིན་བཟུང་།

ཟླ་འདིའི་ཕྱི་ཚེས་ ༨ ཉིན་ཁམས་རྫ་སྟོད་རྫོང་དགེ་རྒྱལ་རྫོགས་ཆེན་དགོན་པའི་མཁན་པོ་དགེ་བ་ལགས་རྒྱ་གཞུང་གིས་འཛིན་བཟུང་བྱས་ཡོད་འདུག དེ་ནི། མཁན་པོ་དགེ་བ་ལགས་ཀྱིས་དེ་སྔ་ནས་རྫ་སྟོད་རྫོང་ཐོག་དུ་༼ རྨོངས་སེལ་འཛིན་གྲྭ༽ཞེས་པའི་བོད་ཡིག་ཆེད་སྦྱོང་འཛིན་གྲྭ་ཞིག་བཙུགས་ཡོད་པ་དང་། ཁོང་གིས་ད་བར་འཛིན་གྲྭའི་འགན་འཛིན་དང་དགེ་རྒན་གཅིག་ལྕོགས་གནང་གི་ཡོད་པ་མ་ཟད། དགུན་ཁར་རྫོང་དང་ཞང་གི་སློབ་གྲྭ་ཁག་གུང་གསེང་བཏང་བ་དང་བསྟུན་ཏེ། བོད་ཀྱི་རིག་གནས་ཆེད་སྦྱོང་འཛིན་གྲྭ་ཚོགས་ཏེ། དུས་རྒྱུན་སློབ་མ་ ༢༥༠༠ ཡས་མས་འཛོམ་བཞིན་ཡོད་འདུག

ད་ལོའི་དགུན་གནང་སྐབས་ཀྱི་ཟབ་སྦྱོང་བདེ་ཆེན་ཞིང་སྒྲུབ་དེ་ཕྱི་ཟླ་ ༢ ཚེས་ ༩ ལ་ཚོགས་གཏན་འཁེལ་ཏེ། དུས་ཚོད་ཏག་ཏག་ལ་སླེབ་སྐབས་རྫོང་སྲིད་གཞུང་ནས་ཟབ་སྦྱོང་དེ་ཚོགས་མི་ཆོག་པའི་བཀའ་རྒྱ་འབྱོར་ཡོད་འདུག དུས་དེར་རྨོངས་སེལ་འཛིན་གྲྭ་གཙོས་པས་ས་གནས་བོད་མི་ ༢༥༠༠ ལྔ་བརྒྱ་ཙམ་གྱིས་“བོད་མིར་ཆོས་དང་དང་སྨྲ་བརྗོད་རང་དབང་དགོས། ༧རྒྱལ་བ་རིན་པོ་ཆེ་བོད་ལ་མྱུར་དུ་གདན་འདྲེན་དགོས” ཞེས་ངོ་རྒོལ་སྐད་འབོད་རྒྱག་བཞིན། རྫ་ཆུའི་ཕར་འགྲམ་ནས་རྫོང་ཉེན་རྟོག་ལས་ཁུངས་སྒོ་འགྲམ་བར་དུ་གོམ་བགྲོད་གནང་ཡོད་འདུག 

ཟླ་ ༢ ཚེས་ ༡༠ ཉིན་རྨོངས་སེལ་འཛིན་གྲྭའི་འགན་འཛིན་མཁན་པོ་དགེ་བ་ལགས་དང་། དགེ་རྒན་ཁ་ཤས་རྫོང་ཉེན་རྟོག་ལས་ཁུངས་སུ་བཀག་ཉར་བྱས་ཡོད་སྟབས། ཡང་བསྐྱར་སློབ་མ་ ༨༠༠ ཙམ་ཉེན་རྟོག་ལས་ཁུངས་སུ་ཕྱིན་ཏེ་དགེ་རྒན་རྣམས་ཀློད་གྲོལ་གཏོང་དགོས་པའི་སྐད་འབོད་ཤུགས་ཆེན་བྱས་སྟབས། དགོང་མོ་དེར་ཁོང་ཅག་ཕྱིར་ཀློད་གྲོལ་ཙམ་ཐོབ་ཡོད་ཀྱང་། དུས་དེ་ནས་བཟུང་མཁན་པོ་དགེ་བ་ལགས་རྫོགས་ཆེན་དགོན་ནས་ས་གཞན་གང་དུའང་སོང་མི་ཆོག་པའི་བཀའ་རྒྱ་བཏང་ཡོད་པ་མ་ཟད། ཉིན་ལྟར་རྨོངས་སེལ་སློབ་གྲྭའི་སློབ་མ་རྣམས་དང་ས་གནས་མི་མང་ཐོག་དམ་དྲག་བྱེད་བཞིན་ཡོད་འདུག

ཉེ་ལམ་ཕྱི་ཟླ་ ༣ ཚེས་ ༨ ཉིན་གྱི་མཚན་མོར་མཁན་པོ་དགེ་བ་ལགས་གར་སོང་ཆ་མེད་དུ་གྱུར་ཡོད་སྟབས། ས་གནས་མི་མང་ཡོངས་ཀྱིས་ཁོང་རྒྱ་གཞུང་གིས་འཛིན་བཟུང་བྱས་ཟིན་པར་ངོས་འཛིན་བྱས་ཡོད་པ་མ་ཟད། སྡེ་མི་སྐོར་ཞིག་དང་མཁན་པོ་ཁོང་གི་སྲིང་མོ་རྫོང་ཉེན་རྟོག་ལས་ཁུངས་སུ་ཕྱིན་ཏེ། མཁན་པོ་ཁོང་གང་དུ་བཀག་ཉར་བྱས་ཡོད་མེད་དང་། ཁོང་ལ་ནག་ཉེས་གང་ཡང་མེད་པས་ཀློད་གྲོལ་གཏོང་དགོས་པའི་རེ་འདུན་བཏོན་ཡང་། ཉེན་རྟོག་པ་ཚོས་ཁོང་གར་ཡོད་གསལ་བཤད་བྱས་མེད་པ་དང་། དེའི་རྗེས་སུ་ཁོང་གི་སྲིང་མོ་གཅིག་པུ་ཐེངས་ཁ་ཤས་ཕྱིན་ཏེ་བརྩད་གཅོད་བྱས་ཡོད་པ་དང་། ཕྱི་ཚེས་ ༡༥ ཉིན་སླར་ཡང་ཁོ་མོ་ཉེན་རྟོག་ལས་ཁུངས་སུ་ཕྱིན་ཏེ་སྐད་ཆ་དྲིས་ཀྱང་ཡ་ལན་སྤྲད་མེད་སྟབས། མོ་རང་ཁོང་ཁྲོ་ལངས་ཏེ་སྐད་ཤུགས་ཆེན་པོ་བརྒྱབ་སྟེ་ས་རུ་འགྱེལ་ཡོད་འདུག དེ་མ་ཐག་རྫོང་ཐོག་གི་སྨན་ཁང་ཞིག་ཏུ་འཁྲིད་ཡོད་ཀྱང་མྱུར་སྐྱོབ་མ་ཐུབ་པར་སྐུ་གྲོངས་ཡོད་འདུག

ས་གནས་འབྲེལ་ཡོད་ཚོས་བརྗོད་པ་ལྟར་ན། ད་ཆར་མཁན་པོ་ཁོང་རྫ་སྟོད་རྫོང་ཉེན་རྟོག་ཁང་ན་མེད་པར། ས་གནས་གཞན་ཞིག་ཏུ་འཁྲིད་ཡོད་འདུག་ལ། ཁོང་འཛིན་བཟུང་བྱས་རྗེས་ས་གནས་དེ་གའི་གནད་ཡོད་མི་སྣ་ ༡༣ ཙམ་སྔ་རྗེས་སུ་འཛིན་བཟུང་བཀག་ཉལ་བྱས་ཡོད་འདུག དེ་དག་ནི་ཁོང་དང་ཕྱག་ལས་གནང་མཁན་བཀྲ་ཤིས་ལྷ་ཕུག་དགོན་པའི་རང་ལོ་ ༤༧ ཡིན་པ་དགེ་འདུན་པ་ཨ་བྷོ་དང་། གསེར་རྟ་བླ་རུང་དགོན་པར་སློབ་གཉེར་གནང་མྱོང་མཁན་གྲྭ་ཀརྨ་སྐྱབས། རྫ་སྟོད་རྫོང་གི་ལས་བྱེད་ཟུར་པ་རང་ལོ་ ༣༢ ཡིན་པ་ཚེ་རིང་དོན་འགྲུབ། རྨངས་སེལ་སློབ་གྲྭའི་དགེ་རྒན་ཧྲག་པ་སོགས་ཡིན་འདུག

མཁན་པོ་དགེ་བ་ལགས་ནི་ ༡༩༧༠ ལོར་མདོ་ཁམས་རྫ་སྟོད་གྲོང་སྡེ་རུ་ཕ་མཁོར་རྩའི་མཁས་རྒྱམ་དང་མ་པད་དཀར་གཉིས་ཀྱི་སྲས་སུ་འཁྲུངས་ཤིང་། ད་ལྟ་དགུང་གྲངས་ ༤༤ ཡིན་འདུག ཁོང་ལ་ནང་མི་གཞན་ག་ཚོད་ཡོད་གསལ་ཁ་མ་བྱུང་ཡང་། ཁོང་ནི་ཆུང་དུས་ནས་རྫ་སྟོད་དགེ་རྒྱལ་རྫོགས་ཆེན་དགོན་པར་རབ་ཏུ་བྱུང་ཞིང་། ཕྱིས་སུ་རྫོགས་ཆེན་ཤྲི་སེང་ཧའི་བཤད་གྲྭ་དང་། གསེར་རྟ་བླ་རུང་སྒར་སོགས་ཀྱི་ཆོས་གྲྭ་ཁག་ཏུ་ལོ་མང་རིང་བོད་ཀྱི་བཅུ་ཕྲག་རིག་གནས་སྤྱི་དང་། བྱེ་བྲག་ནང་དོན་རིག་པ་ལ་ཐོས་བསམ་སློབ་གཉེར་འཐིལ་ཕྱིན་གནང་ཡོད་པ་མ་ཟད། ༢༠༠༡ ལོར་རྒྱ་གར་ནང་ཕེབས་ཏེ་༧གོང་ས་མཆོག་གཙོས་པའི་བོད་པའི་བླ་ཆེན་རྣམ་པར་མཇལ་ཁ་ཞུས་ཡོད། དེའི་རྗེས་ཕྱིར་བོད་དུ་ལོག་སྟེ་རང་དགོན་དགེ་རྒྱལ་རྫོགས་ཆེན་དགོན་གྱི་བཤད་གྲྭའི་མཁན་པོའི་ཕྱག་ལས་གནང་ཡོད་པ་དང་། ཟུར་དུ་རྫ་སྟོད་རྫོང་ཐོག་ལ་༼ རྨོངས་སེལ་འཛིན་གྲྭ ༽ཞེས་པ་ཞིག་བཙུགས་ཏེ། བོད་ཀྱི་བརྡ་སྤྲོད་སུམ་རྟགས་དག་གསུམ་དང་ནང་ཆོས་ངོ་སྤྲོད། སྤྱི་ཚོགས་སློབ་གསོ། ཡ་རབས་སྤྱོད་བཟང་སོགས་ཀྱི་ཐད་སློབ་སྦྱོང་སྤྲོད་ཀྱི་ཡོད།

ཁོང་གིས་ཆེད་སྦྱོང་འཛིན་གྲྭ་དེ་བཙུགས་པའི་དམིགས་ཡུལ་གཙོ་བོ། ས་ཁུལ་དེའི་ཞིང་འབྲོག་མང་ཚོགས་ཕལ་ཆེ་བ་ཡིག་རྨོངས་ཡིན་པ་དང་། ལྷག་དོན་དུ་རྫ་སྟོད་རྫོང་ཐོག་ཏུ་ཕྱོགས་མཐའ་ཁག་ནས་སྤོས་པའི་བོད་རིགས་མང་པོ་ཞིག་ལས་མེད་དུ་ལྷག་ཡོད་པ་མ་ཟད། གཞོན་སྐྱེས་མང་པོ་ཞིག་གིས་བག་མེད་ཀྱིས་མི་ཚེ་སྐྱེལ་བཞིན་ཡོད་སྟབས། ཁོང་གིས་ས་གནས་མི་མང་ཚོས་ཡིག་རྨོངས་སེལ་ཆེད་ཟབ་སྦྱོང་འཛིན་གྲྭ་དེ་བསྒྲུབས་པ་ཞིག་ཡིན་འདུག