ཟླ་འདིའི་ཕྱི་ཚེས་ ༡༦ ཉིན་མདོ་སྨད་རྔ་པ་ཀིརྟི་དགོན་པའི་རྒྱུད་པ་གྲྭ་ཚང་གི་རང་ལོ་ ༢༠ ཡིན་པའི་གྲྭ་བློ་བཟང་ཚུལ་ཁྲིམས་ལགས་ཀྱིས་རང་ལུས་མེར་བསྲེགས་བཏང་སྟེ་རྒྱ་གཞུང་ལ་ངོ་རྒོལ་གནང་ཡོད་ཅིང་། དེ་མ་ཐག་རྒྱ་གཞུང་གི་ཉེན་རྟོག་པས་བཙན་ཁྲིད་བྱས་ཡོད་ཀྱང་ཁ་སང་རྔ་པ་ཁུལ་འབར་ཁམས་ནས་སྐུ་གྲོངས་ཡོད་འདུག་ལ། ཉིན་དེ་རང་རྒྱ་གཞུང་གིས་ཁོང་གི་ཕུང་པོ་འབར་ཁམས་ནས་མེར་བསྲེགས་བཏང་སྟེ། རུས་ཐལ་ཞིག་ནང་མིར་སྤྲད་དེ་ཚེས་ ༡༩ ཉིན་གྱི་མཚན་མོ་རྔ་པ་ཀིརྟི་དགོན་པའི་ཉེ་འགྲམ་གྱི་དུར་སའི་ནང་བསྐྱལ་དགོས་བྱུང་ཡོད་འདུག
གཞན། འདས་པོ་བློ་བཟང་ཚུལ་ཁྲིམས་ལགས་ནི་ ༢༠༡༡ ཟླ་ ༡༠ ཚེས་ ༡༥ ཉིན་རང་ལུས་མེར་བསྲེགས་བཏང་སྟེ་ ༢༠༡༢ ཟླ་ ༡ ཚེས་ ༥ ཉིན་རྔ་པ་ཁུལ་འབར་ཁམས་ནས་སྐུ་གྲོངས་པ་རྒྱལ་གཅེས་དཔའ་བོ་ནོར་བུ་དགྲ་འདུལ་དང་ཕ་མ་མིང་སྲིང་གི་བུ་སྤུན་ཡིན་འདུག
བློ་བཟང་ཚུལ་ཁྲིམས་ཀྱིས་རང་ལུས་མེར་བསྲེགས་བཏང་རྗེས་ཀྱི་ཉིན་གསུམ་རིང་རྔ་པ་མི་མང་གིས་བོད་པའི་ཟ་ཁང་དང་ཚོང་ཁང་ཡོངས་རྫོགས་སྒོ་བརྒྱབ་ནས་མྱ་ངན་གྱི་རྣམ་པ་ཤུགས་ཆེན་བསྟན་ཡོད་པ་དང་། ཕྱི་ཚེས་ ༡༩ ཉིན་རྔ་པ་ཀིརྟི་དགོན་པའི་གྲྭ་མང་གིས་དང་བླངས་སྒོས་གཞུང་ཆེན་ཁག་སྐྱོར་སྦྱོང་གནང་སྟེ་མཚན་ཕུད་བྱས་ཡོད་འདུག
འདི་ནི་རྔ་པའི་ནང་གཅིག་པོར་བྱུང་བའི་རང་ལུས་མེ་བསྲེགས་ཀྱི་ལས་འགུལ་ཐེངས་ ༡༩ པ་དང་། དེའི་ཁྲོད་ནས་སྐུ་སྲོག་ཤོར་བ་ ༡༤ པ་དེ་ཆགས་ཡོད།
གནས་ཚུལ་གཏོང་མཁན། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།
འདི་ནས་ཤི་འཕོས་གྱུར་ཙམ་ནས།།
རང་དབང་ལྡན་པའི་གནས་ཐོབ་སྟེ།།
མ་འོངས་བོད་ཀྱི་བདེན་དོན་ལ།།
ཕྱག་རྗེས་འཇོག་པའི་སྨོན་ལམ་འདེབས།།