དེ་རིང་ཤེས་རིག་བཀའ་བློན་ཟུར་བ་ཐུབ་བསྟན་ལུང་རིགས་ལགས་ཀྱིས་བཀའ་ཁྲི་མཆོག་ལ། བཀའ་ཤག་གསར་པའི་དུས་ཡུན་ནང་ཤེས་ཡོན་ཐོག་འཐུས་ཤོར་ཕྱིན་ཡོད་མེད་དང་། བཀའ་ཁྲིའི་ཕྱག་ལས་གང་གནང་བཅས་ལ་དྲི་བ་བཏོན་པའི་ལན་དུ། བཀའ་ཁྲི་མཆོག་གིས་ཕྱི་ཟླ་ ༤ ཚེས་ཤར་ཙམ་ལ་ཤེས་རིག་དྲུང་ཆེ་གསར་པ་ཕེབས་ཀྱི་ཡོད་ཚུལ་གསུངས་སོང་།
སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པ་མཇུག་བསྒྲིལ་ལ་ཉེ་བའི་སྐབས་འདིར། དེ་རིང་སྔ་དྲོར་གྲོས་ཚོགས་ནང་དེ་སྔའི་ཤེས་རིག་བཀའ་བློན་མདོ་སྨད་སྤྱི་འཐུས་ཐུབ་བསྟན་ལུང་རིགས་ལགས་ཀྱིས་ད་ལྟའི་ཤེས་རིག་བཀའ་བློན་དང་བཀའ་བློན་ཁྲི་པ་གཅིག་ལྕོགས་བློ་བཟང་སེང་གེ་མཆོག་ལ། ཤེས་རིག་ལས་ཁུངས་ཀྱི་ལས་དོན་སྤྱི་དང་། ལྷག་པར་དུ་ད་ཆར་ཤེས་རིག་ལས་ཁུངས་ལ་དྲུང་ཆེ་མེད་པ་བཅས་ཀྱི་ཐད་སྐར་རྟགས་ཅན་གྱི་དྲི་བ་དོན་ཚན་ ༣ ཅན་ཞིག་བཏོན་ཏེ། བཀའ་བློན་ཁྲི་པ་མཆོག་གིས་ལས་འཁུར་དམ་འབུལ་སྐབས་དང་། བསྟན་བདག་བླ་ཆེན་རྣམ་པའི་ཚོགས་ཆེན་སྟེང་། དེ་བཞིན། ཐེངས་སྔོན་མའི་གྲོས་ཚོགས་ནང་བཅས་སུ་ཤེས་རིག་གི་ལས་དོན་གལ་ཆེན་དོན་ཆེན་ཡིན་ཚུལ་གསུངས་སྟབས་ཤེས་རིག་ཐོག་ཐུགས་འགན་ཆེ་ཙམ་བཞེས་རྒྱུ་ཡིན་པའི་མཐོང་ཚུལ་བྱུང་ཡང་། ཉེ་ལམ་ཤེས་རིག་དྲུང་ཆེ་བཀའ་དྲུང་དུ་གནས་སྤོ་གནང་འདུག་པར་འཀའ་དྲི་ཞུ་རྒྱུར།
དང་པོ། ཤེས་རིག་ལས་ཁུངས་ཀྱི་ལས་ཀ་དེ་བཞིན་ཞུམ་བུ་གཉིད་དུ་སོང་ཡང་། བྱི་བ་ཡིད་ལ་ཤར་ཤར་ཟེར་བ་ལྟར་སྡོད་དགོས་པའི་ཚོར་བ་རྣོ་བའི་གནས་སྐབས་ལ། ཤེས་རིག་བཀའ་བློན་བཞུགས་ཁོམ་མེད་ཁར། ཨ་མ་ལྟ་བུར་འགན་འཁུར་མཁན་ལས་ཁུངས་ཀྱི་དྲུང་ཆེའང་མེད་པར་ལྷག་ཡོད་པ་འདིས་ཤེས་ཡོན་ཡར་རྒྱས་ལ་ཕན་གནོད་གང་འདྲ་ཞིག་འབྱུང་ངམ། གཉིས་པ། བཀའ་ཁྲི་མཆོག་གིས་དམ་འབུལ་ཞུས་ཏེ་ཟླ་འདིའི་ཚེས་ ༡༤ བར་ཉིན་གྲངས་ ༢༢༣ ཕྱིན་པའི་རིང་། ངྷ་སར་བཞུགས་ག་ཚོད་བཞུགས་ཡོད་པ་དང་། དེའི་ཁྲོད་ཤེས་རིག་ལས་ཁུངས་ནང་ཤེས་ཡོན་ཡར་རྒྱས་གཏོང་ཕྱོགས་ཐད་གོ་བསྡུར་དང་ལས་འཆར་གང་ཞིག་ཡོད། གསུམ་པ། ཤེས་རིག་དྲུང་ཆེ་ག་དུས་བསྐོ་རྒྱུ་ཡིན་བཅས་དྲི་བ་བཏོན་སོང་།
གོང་གསལ་དྲི་བར་བཀའ་ཁྲི་མཆོག་གིས་ཡིག་ཐོག་གི་ལན་འདེབས་གནང་བའི་ནང་། དང་པོ། བཀའ་བློན་ཁྲི་པས་ཤེས་རིག་བཀའ་བློན་གྱི་ལས་འགན་གཅིག་ལྕོགས་དང་། བཀའ་དྲུང་གིས་ཟླ་གཅིག་ལྷག་ཙམ་རིང་ཤེས་རིག་དྲུང་ཆེའི་ལས་འགན་གཅིག་ལྕོགས་ཞུ་བཞིན་ཡོད་པ་བདེན་པ་ཡིན་ཡང་། ཤེས་རིག་ལས་ཁུངས་ཀྱི་ལས་དོན་ཐོག་འཐུས་ཤོར་སོང་མེད་ལ། ཤིན་ཏུ་གལ་གནད་ཆེ་བའི་ཤེས་ཡོན་གྱི་ལས་དོན་ཐོག བྱི་ལ་གཉིད་དུ་ཡུར་ཡང་ཙི་ཙི་ཡིད་ལ་འཁོར་བའི་དཔེ་ལྟར། མ་བརྗེད་པར་ཡིད་ལ་འཆང་ཡོད། གཉིས་པ། ཕྲན་ནས་བཀའ་ཁྲིའི་དམ་འབུལ་ཞུས་ཏེ་ད་ལྟའི་བར་གྱི་བརྒྱ་ཆ་ ༦༠ མན་ཙམ་ངྷ་སར་བསྡད་པ་དང་། གཞན་ལྡི་ལི་གཙོས་པའི་རྒྱ་གར་ནང་ཁུལ་དང་། ཨ་རི་དང་ཡུ་རོབ་ཁུལ་དུ་གཞུང་དོན་ཕྱོགས་སྐྱོད་ཞུས་འདུག ཤེས་རིག་ལས་ཁུངས་ནང་དངོས་སུ་བཅར་རྒྱུའི་དུས་ཚོད་མང་པོ་བྱུང་མེད་ཀྱང་། ཤེས་ཡོན་ཡར་རྒྱས་ཐོག་གྲོས་བསྡུར་དང་། འཆར་འགོད། ལམ་སྟོན། དངོས་སུ་ལག་ལེན་བཅས་ཞུས་ཡོད། གསུམ་པ། ཤེས་རིག་དྲུང་ལ་ཤེས་ཡོན་ཐོག་ཉམས་མྱོང་ཡོད་མཁན་ཞིག་ཕྱི་ཟླ་ ༢ པའི་ཟླ་མགོར་བསྐོ་བཞག་ཟིན་ཞིང་། རིང་མིན་ཕྱི་ཟླ་ ༤ པའི་ཚེས་ཤར་ལ་ལས་བཅར་ཐུབ་པའི་རེ་བ་ཡོད་ཅེས་བཀོད་འདུག
སྤྱི་འཐུས་ཐུབ་བསྟན་ལུང་རིགས་ལགས་ཀྱིས་འཕྲོས་དོན་དྲི་བའི་ཚུལ་དུ། ཤེས་རིག་དྲུང་ཆེ་བཀའ་དྲུང་དུ་བསྐོ་བཞག་བྱས་པ་དེས་ཤེས་ཡོན་ལས་དོན་ཐོག་ཕན་གནོད་གང་འདྲ་བྱུང་ཡོད་མེད་དང་། གལ་སྲིད་བྱི་ལ་གཉིད་དུ་ཡུར་ཡང་ཙི་ཙི་ཡིད་ལ་འཁོར་བའི་དཔེ་དོན་ལ་གནས་བཞིན་ཡོད་ན། ད་བར་ཤེས་ཡོན་ཐོག་ལས་དོན་གང་བྱས་དང་འཆར་འགོད་གང་ཡོད་ཁ་གསལ་གསུང་རྒྱུ་ཡོད་མེད་བཅས་བསྐྱར་འདྲི་ཞུས་པའི་ལན་དུ། བཀའ་ཁྲི་མཆོག་གིས་“ ད་ལྟའི་བར་ངས་བཀའ་བློན་ཁྲི་པ་དང་མཉམ་དུ་ཤེས་རིག་བཀའ་བློན་གྱི་འགན་བཞེས་པ་དང་། བཀའ་དྲུང་གིས་ཀྱང་བཀའ་དྲུང་དང་མཉམ་དུ་ཤེས་རིག་དྲུང་ཆེའི་ལས་འགན་བཅས་མཉམ་འཁུར་ཞུ་བཞིན་ཡོད། ད་ལྟའི་བར་ང་ལས་ཁུངས་དུ་བཅར་མེད་ནའང་། ལས་དོན་ཐོག་ད་བར་འཐུས་ཤོར་ཕྱིན་མེད་ལ། མ་འོངས་པར་ཡང་འགྲོ་བ་མ་རེད་ཞུ་རྒྱུ་ཡིན། བཀའ་ཁྲི་སྔོན་མས་ཀྱང་ལས་ཁུངས་གཉིས་དང་གསུམ་གྱི་ཕྱག་ལས་གནང་ཡོད་ལ། ཟླ་ ༦ ཙམ་མ་ཟད། ལོ་ ༡ རིང་ཕེབས་ཐུབ་མེད་པ་བྱུང་ཡོད་ཀྱང་། ལས་ཁུངས་དེ་དག་གི་ལས་དོན་འཐུས་ཤོར་ཕྱིན་མེད། ཤེས་རིག་ལས་ཁུང་དང་བཀའ་ཤག་ཐག་ཉེ་ཡིན་སྟབས་ཕྱག་ལས་མཉམ་དུ་གནང་ཆོག་གི་རེད” ཅེས་ལན་འདེབས་གནང་སོང་།
བཀའ་ཁྲི་མཆོག་གིས་མུ་མཐུད་དོན། “ ད་བར་ཕྱག་ལས་ག་རེ་གནང་ཡོད་ཅེ་ན། སྔར་ལོ་དམ་འབུལ་བྱས་རྗེས་ཐོག་མར་སློབ་སྤྱི་རྣམ་དང་ལྷན་དུ་ཚོགས་འདུ་དང་། སློབ་གྲྭའི་འགན་འཛིན་ཚང་མ་མཉམ་རུབ་ཀྱི་ཚོགས་འདུ་བཅས་ད་ལྟའི་བར་ཚོགས་མ་མྱོང་བའི་ཚོགས་འདུ་ཚོགས་པ་དང་། འཆར་ཟླའི་ནང་རྒྱ་གར་གྱི་སློབ་སྤྱི་དང་འགན་འཛིན་རྣམ་པའི་མཉམ་དུ་ཚོགས་འདུ་སྐོང་རྒྱུའི་ལས་རིམ་བསྒྲིགས་ཡོད། འདས་པའི་ལོ་ ༣༠ ལྷག་གི་རིང་བཀའ་བློན་དང་དྲུང་ཆེ་རྣམ་པའི་སྐུ་ངལ་སྐྱོན་པའི་འབྲས་བུ་དེར། ད་ལན་ང་ཤེས་རིག་བཀའ་བློན་བྱས་ཏེ་ཟླ་ ༦ འགོར་བའི་ནང་དུའང་འབྲས་བུ་མི་དམན་པ་བྱུང་ཡོད་ཅེས་ཡིག་ཐོག་ནས་གསལ་བཤད་བྱས་ཡོད་ལ། གཏན་སློབ་ CTS བརྒྱུད་དེ་སློབ་གྲྭ་རྩིས་སྤྲོད་སྟངས་སོགས་ཀྱི་ཐོག་ནས་ཀྱང་། འདས་པའི་ཟླ་ཤས་རིང་བཀའ་བློན་གྱི་འགན་འཁུར་བའི་ཐོག་ནས་དཀའ་ལས་བརྒྱབ་སྟབས། མི་རབས་རྒན་པ་མང་པོས་བཀའ་དྲིན་ལ་བརྟེན་ནས་འབྲས་བུ་མི་དམན་པ་སྟོན་གྱི་ཡོད། ཤེས་རིག་དྲུང་ཆེ་ལ་མཚོན་ན། ཟླ་འདིའི་ཕྱི་ཚེས་ ༢༨ ཉིན་ལྡི་ལི་འབྱོར་གྱི་ཡོད་ལ། ཕྱི་ཟླ་ ༤ བའི་ཚེས་ ༡ ཉིན་འདིར་འབྱོར་གྱི་ཡོད། ཁོང་འདིར་འབྱོར་རྗེས་དྲུང་ཆེའི་ལས་འགན་བཞེས་རྒྱུ་ཡིན”ཞེས་གསུངས་བྱུང་།
གསར་འགོད་པ། དོན་གོ
![FILE - Venezuelan opposition leader Maria Corina Machado gestures at a protest ahead of the Friday inauguration of President Nicolas Maduro for his third term, in Caracas, Venezuela January 9, 2025. [File photo: Reuters/Maxwell Briceno]](https://tibettimes.net/wp-content/uploads/2025/10/Maria-Corina-Machado--360x180.jpg)
![Hungary's Laszlo Krasznahorkai poses for photographers in London [File: Matt Dunham/AP]](https://tibettimes.net/wp-content/uploads/2025/10/Screenshot-2025-10-10-at-2.23.17-PM-360x180.png)
http://feminamissindia.indiatimes.com/photoshow/11777780.cms?curpg=16 སྒང་ཏོག་བུ་མོ་བསོད་ནམས་དཔལ་ཆོས་ལ་འོས་བླུགས་རོགས།
རྒྱ་གར་གྱི་སློབ་གྲྭ་ཁག་གི་སློབ་སྤྱི་སོགས་ལ་གྲོས་བསྡུར་བྱ་རྒྱུ་དེ་གཙོ་ཆེ་མིན་མི་ཤེས། ཁོང་ཅག་ནི་རྒྱ་གར་བའི་སློབ་གསོ་དང་རིག་གནས་སྐོར་ནས་སློབ་སྤྱིའི་གོ་གནས་ལ་ཐོན་པ་རེད། བོད་ཀྱི་རིག་གནས་ལ་རྒྱུས་མངའ་ཅུང་ཙམ་ཡང་ཡོད་རྒྱུ་མ་རེད་འདོད་ཀི། བོད་ཀྱི་རིག་གནས་ལ་བརྩེ་བ་ཅུང་ཙམ་ཡང་ཡོད་རྒྱུ་མ་རེད་འདོད་ཀི། དེ་ནི་ཁོང་གིས་གྲོས་བསྡུར་བྱ་ས་དག་ནོར་ཡོད་པ་འདྲ། མི་རིགས་རང་གི་རིག་གནས་འདི་རིག་གནས་གཞན་པ་དག་དང་གཅིག་མཚུངས་སུ་བལྟས་ན་ནོར་བ་རེད་ལ། རང་གི་རིག་གནས་ལ་གོམས་པ་མེད་ན་གཅིག་མཚུངས་སུ་ལྟ་རྒྱུ་རེད་འདོད་ཀི། དེ་བཀའ་ཁྲི་མཆོག་གིས་མཚོན་ཐུབ་པ་འདྲ། དངོས་གནས་བཤད་ན། བཀའ་ཁྲི་བཆོག་གིས་གྲོས་བསྡུར་བྱ་དགོས་ས་དག་གི་བོད་རང་གི་སྐད་ཡིག་རིག་གནས་ལ་མཁས་ཤིང་བྱང་བའི་མི་སྣ་དག་ཡིན་དགོས་པ་རེད་འདོད། དེ་མ་གཏོགས་གཞན་ཉམས་མྱོང་མེད་མཁན་དག་དང་ལྷན་དུ་གྲོས་བསྡུར་བྱས་ན་ཁོང་ཚོས་ནི་མུན་ནག་མདའ་འཕེན་གྱི་དཔེ་སྐྱོང་རྒྱུ་རེད་འདོད་ཀི།
དཔལ་ལྡན་བོད་ཀྱི་དུས་བབ་གསར་འགོད་པ་དོན་ཁོ་ལགས། ཁྱོད་ཀྱིས་གསར་འགྱུར་བྲིས་པ་ཡག་པོ་ཆགས་ཡོང་བཞིན་འདུག སྔོན་མ་ཁྱོད་ཀྱི་གསར་འགྱུར་མང་ཆེ་བར་གོ་རྒྱུ་ཚོར་རྒྱུ་གང་ཡང་མེད་ཀྱང་སེམས་ཤུགས་ཆག་གི་རེད་བསམས་ཏེ་སྐྱོན་བརྗོད་བྱས་མྱོང་མེད། ད་དུང་ཆབ་སྲིད་ཁོ་ན་མ་ཡིན་པར་སྤྱི་ཚོགས་ནང་འཛུལ་ནས་གནས་ཚུལ་བསྔོག་འདོན་བྱ་དགོས་པ་གལ་ཆེན་རེད་འདུག་དྲན་ཡོད།
ཐུབ་བསྟན་ལུང་རིགས་ཁོ་རང་དེ་སྔ་ཤེས་རིག་བཀའ་བློན་ལས་ཐོགས་ཡིན་སྐབས་ཤེས་ཡོན་ཐད་མཐུས་ཤོར་མ་གཏོག་ཡར་རྒྱས་གང་ཡང་བཏང་ཐུབ་མེད། སོ་སོའི་ལག་པར་ཡོད་དུས་ད་ལན་གྱི་དྲི་བ་དེ་ཡིད་ལ་དྲན་མྱོང་མེད་ལ་ལག་ལེན་དངོས་ལ་ཞུགས་རྒྱུ་ནི་ཕ་རིའི་སྤང་རྒྱན་རང་རེད། ད་ལན་དྲི་བ་དེ་ག་པར་ནས་ཐོན་པ་རེད། ཡ་མཚན་མ་རེད་པས། ཅིག་ན་ཉམས་མྱོང་ཡིན་ཡིན་ཁུལ་ཡིན་པ་འདྲ། ཡང་ཅིག་མིན་ན་རང་ཉིད་ཀྱིས་མཐུས་ཤོར་དེ་གཞན་གྱིས་ཡར་རྒྱས་བཏང་ཙང་ངོ་གནོང་བ་དང་ཁ་སྐྱེངས་བ་མིན་དྲོ། མི་ལ་དེ་འདྲའི་རྣམ་འགྱུར་མང་པོ་བཏོན་རྒྱུ་འདུག་ག། ཧ་ཧ་ཧ།
བཀུར་འོས་དཔལ་ལྡན་བཀའ་ཁྲི་མཆོག་གིས། འཆར་ཟླའི་ནང་རྒྱ་གར་གྱི་སློབ་སྤྱི་དང་འགན་འཛིན་རྣམ་པའི་མཉམ་དུ་ཚོགས་འདུ་སྐོང་རྒྱུའི་ལས་རིམ་བསྒྲིགས་ཡོད། ཅེས་གསུངས་འདུག སློབ་སྤྱི་དང་འགན་འཛིན་རྣམས་བསྐངས་ནས་འཚོགས་རྒྱུ་དེ་ལེགས་ཀྱང་། ཁོང་ཚོ་ཕལ་ཆེ་བ་འཛིན་སྐྱོང་རང་གི་ནང་མགོ་འཐོམས་ནས་ཤེས་ཡོན་ཐོག་ཞིབ་ཕྲ་ཤེས་རྟོགས་དེ་ཙམ་མེད། ཁོང་ཚོ་དང་མཉམ་དུ་སློབ་གྲྭ་རེ་ནས་དགེ་རྒན་ཤེས་ཡོན་ཅན་རེ་ངེས་པར་ལྷན་ཚོགས་དེ་ནང་ཞུགས་རྒྱུའི་ཆ་བསྐྲུན་ན། ཤེས་ཡོན་ལེགས་བཅོས་ཐོག་ཏན་ཏན་ཕན་ཐོགས་ཆེན་པ་ོ་ཡོང་ལ། ཚོགས་འདུ་དེ་དོན་སྙིང་ལྡན་པ་ཞིག་ཡོང་རྒྱུ་ཡིན།
གོང་ནས་དྲ་མཆན་པ་ཞིག་གིས། དགེ་རྒན་གྱི་གད་སྙིགས་ཡོད་ཚུལ་བཤད་བྱུང་། གལ་སྲིད་གད་སྙིགས་ཡོད་ན། གད་སྙིགས་དེ་ཚོ་བཟོ་བསྐྲུན་བྱེད་ས་ལ་ཡང་བསམ་བློ་ཞིག་མི་གཏོང་ཐབས་མེད་རེད། སྔོན་མ་མཚན་ཉིད་དགེ་རྒན་དམ་པ་དེ་ཉིད་ཞལ་བཞུགས་སྐབས་ཀྱི་དགེ་འོས་སྐབས་དང་པོ་དང་གཉིས་པ། གསུམ་པ་རྣམས་ཤིན་ཏུ་ཡག་པོ་ཡོད་ཚུལ་སྤྱི་ཚོགས་ནང་སྦིར་གྲགས་ཅིག་ཡོད། ད་ལྟ་དགེ་འོས་སྐབས་དང་པོ་དང་གཉིས་པ། གསུམ་པའི་ཁྲོད་དགེ་རྒན་ཅི་ཙམ་ཞིག་དགེ་རྒན་གྱི་ལས་གནས་ཐོག་བཞུགས་ཡོད་པ་དང་། ཅི་ཙམ་ཞིག་མེད་པ། གང་ལ་ཕྱིན་པ། ཅི་ཕྱིར་ཕྱིན་པའི་སྐོར་ལའང་ཞིབ་འཇུག་བཅུག་བྱ་འདོད་བྱུང་། ཤེས་མཁན་ཚོས་མཆན་ཞིག་འདེབས་རོགས་ཐུགས་རྗེ་གཟིགས།
ཤེས་ཚད་དང་ལག་ཁྱེར་འདྲ་མཉམ་མིན་ཡང་། འདྲ་མཉམ་མེད་པ་གཉིས་ལས་འདེམས་དགོས་པ་དེ་ཤེས་ཚད་འདེམས་དགོས་མོད། ད་ལྟ་ལག་ཁྱེར་འདེམས་ནས་དགེ་རྒན་ཤེས་ཚད་ཅན་ཇི་སྙེད་ཅིག་བློ་ཕམ་གྱི་གནས་དེ་དངོས་བདེན་རེད། གྱོང་རྒུད་དེ་དགེ་རྒན་གྱི་དཀའ་ངལ་གཅིག་པོ་མ་ཡིན་པར་ཚབས་ཆེ་ས་དེ་མི་རིགས་ཤིག་ལོང་བ་ཆགས་རྒྱུའི་ཉེན་ཁའི་དཀའ་ངལ་ཞིག་ཡིན། འདི་ཐད་བཀའ་ཤག་དང་ཤེས་རིག་ལས་ཁུངས་ཀྱིས་བྱེད་ཐུབ་པ་དང་བྱེད་དགོས་པའི་གནད་དོན་གཅིག་ནི། སློབ་གྲྭ་ཁག་ནང་སྐོར་སྐྱོད་ཀྱིས་དགེ་རྒན་ཤེས་ཡོན་ཅན་དང་ལྷག་བསམ་ཅན་གང་
ཡིན་ལ་ ཞིབ་འཇུག་བྱས་ཏེ། ཁོང་ཚོར་ཤེས་ཚད་ཀྱི་གནས་སྟངས་དང་འཚམས་པའི་འཛིན་རིམ་བཀོད་སྒྲིག་དང་། ལག་ཁྱེར་གྱི་གནད་དོན་ཡིན་ན་ལག་ཁྱེར་ཇི་འདྲ་ཞིག་གི་ཤེས་ཚད་དགོས་པའི་ཐད་འདྲ་མཉམ་གྱི་ཡིག་རྒྱུགས་བཏང་སྟེ། རྒྱུགས་འཕྲོད་བྱུང་ན། ལག་ཁྱེར་གྱི་དོད་ཅིག་སྤྲད་དེ་གང་ལྟར་མ་འོངས་བོད་ཀྱི་གསོན་རྩ་གསོ་སྐྱོང་བྱེད་མཁན་གྱི་དགེ་རྒན་ཤེས་ཡོན་དང་ལྷག་བསམ་ཡོད་མཁན་དེ་ཚོ་མ་ཤོར་བའི་ཐབས་ཤིག་རང་གཞུང་ཤེས་རིག་ལ་ངེས་པར་དགོས་པ་ཡིན།
ཁག་ཅིག་གི་བསམ་ཚུལ་འདི་ཚོ་བདེན་པ་རེད། ཉིན་ཤས་སྔོན་ལ་ངེད་ཀྱི་གྲོགས་པོ་ལྷག་བསམ་ཡོད་མཁན། བོད་ཡིག་གི་ཤེས་ཚད་མཐོ་བོ་ཡོད་པའི་དམའ་རིམ་དགེ་རྒན་ཞིག་ཀྱང་སློབ་གྲྭ་ནས་ཐོན་རྒྱུ་ཡིན་སྐོར་བཤད་བྱུང་། རྒྱུ་མཚན་ད་བར་སྤྱི་སེམས་ཞིག་བཟུང་ནས་བོད་པའི་སྤྱི་ཚོགས་ནང་དགེ་རྒན་གྱི་ལས་ཀ་བྱས་ནས་ལོ་བཅུ་གཉིས་སོང་ན་ཡང་། དེང་སྐབས་མི་སྐོར་ཞིག་གིས་ལག་ཁྱེར་མཐོ་བོ་རེ་ཁྱེར་ཡོང་། སློབ་ཚན་ཡག་པོ་ཁྲིད་ཐུབ་པའི་ཤེས་ཚད་མེད་པར་གླ་ཆ་མཐོ་བོ་ཟ་བ་འདི་ཚོ་འགྲིག་མེད་པས། ད་ལྟ་མུ་མཐུད་དགེ་རྒན་བྱེད་འདོད་མི་འདུག་ཟེར།
ཤེས་རིག་གིས་འཐུས་ཤོར་ཆེ་ཤོས་གཅིག་འདི་རེད། ཤེས་ཡོན་གྱི་གནས་ཚད་ལ་བལྟས་ནས་གླ་ཕོགས་མ་སྤྲད་པར། ལག་འཁྱེར་ལ་བལྟས་ནས་གླ་ཕོགས་སྤྲོད་ཀྱི་ཡོད། ཤེས་ཡོན་གྱི་ཚད་གཞི་ངེས་ཅན་ཡོད་ཀྱང་ལག་ཁྱེར་མཐོ་བོ་འཁྱེར་རྒྱུ་མེད་པའི་དགེ་རྒན་ཚད་ལྡན་དེ་འདྲ་སློབ་གྲྭར་སྡོད་འདོད་མེད་པར་ཕྱིན་པ་ཡང་གང་འཚམས་ཡོད། བདེན་མི་བདེན་ཞིབ་འཇུག་བྱས་ན་ཤེས། དེང་སྐབས་སློབ་གྲྭ་ཁག་མང་པོར་ལག་ཁྱེར་མཐོ་པོ་ལ་བརྟེན་གླ་ཕོགས་མཐོ་བོ་ཟ་བ་དང་། སློབ་ཕྲུག་ལ་སློབ་ཚན་ཏག་ཏག་སློབ་ཁྲིད་ཐུབ་ཀྱི་མེད་པ་དང་། ལྷག་བསམ་མེད་པའི་གད་སྙིགས་དེ་འདྲ་མང་པོ་ཡོད་པས་འདིའི་སྐོར་ལ་ཤེས་རིག་གིས་ངེས་པར་གཟབ་ནན་གྱིས་ཉམས་ཞིབ་བྱ་དགོས་པར་མཐོང་།
ངས་གོ་ཐོས་ལ་ཤེས་ཡོན་སྲིད་ཇུས་གསར་བའི་ནང་དུ། དགེ་རྒན་སྤུས་དག་གོ་སྒྲིགས་བྱེད་ནས། དགེ་རྒན་གྱི་གླ་ཕོག་སྤར་གྱི་རེད་ཟེར་བ་ཞིག་ཐོས་སོང་། བཀའ་ཁྲི་མཆོག་ཤེས་ཡོན་ཡོད་པ་ནང་བཞིན། རྩ་བ་ནས་གཏན་པོ་དང་ཡར་རྒྱས་གཏོང་ཐུབ་པའི་ཡིད་ཆེས་ཡོད། ད་ལྟར་སློབ་གྲྭ་ཁག་ལ་རྒྱུས་ལོན་བྱས་ན། དགེ་རྒན་མང་ཆེ་བ་ཤེས་ཚད་སྐྱོ་བོ་རེད་ལ། ལྷག་པར་བློ་སྟོབ་སྤེལ་བའི་སློབ་གསོ་གཏོང་མཁན་ཞི་དྲག་གིས་ཉུང་ཉུང་རེད་ཤག སྡོད་སའི་ཁང་པ་དང་། གྱོན་པའི་སྒྲིག་ཆས་རྣམས་རྗེས་ལུས་ཐེབས་མེད་རུང་། ཤེས་ཡོན་ཐོག་ནས་འཛམ་གླིང་གི་སློབ་གྲྭ་གཞན་དང་བསྡུར་ན་རང་རེའི་སློབ་གྲྭ་ནས་ཐོན་པ་རྣམས་ཤེས་ཚད་སྐྱོ་བོ་རེད། དེའི་རྒྱུ་མཚན་གཙོ་བོ་ནི། སློབ་སྦྱོང་དང་ཉམས་མྱོང་ཅན་གྱི་དགེ་རྒན་རྣམས་བོད་གཞུང་སློབ་གྲྭས་བདག་པོ་ཕོག་གི་མེད། དེའི་རྒྱུ་མཚན། སློབ་གྲྭའི་དགེ་རྒན་རྣམས་ཀྱི་ཟླ་རེའི་གསོལ་ཕོག་གིས་སོ་སོས་གཟའ་ཚང་ལ་གནས་སྐབས་ཀྱི་ལྟོ་གོས་འགྲིགས་ཙམ་ལས་མི་སྤྱི་འགྲོས་ལ་དགོས་པའི་ཅ་དངོས་ཉོ་བྱེད་ཀྱང་འདངས་ཀྱི་མེད། དེར་བརྟེན་སློབ་ཕྲུག་ཞིག་གི་ངོས་ནས་བཤད་ན། བོད་གཞུང་གི་སློབ་གྲྭའི་དགེ་རྒན་བྱེད་པ་ལས་ནད་གཡོག་བྱེད་པ་གདེམས་མཁན་མང་པ་མངོན་གསལ་རེད། བྱས་ཙང་རྩ་བ་ནས་གཏན་རླིང་བྱེད་ཅིང་ཡར་རྒྱས་གཏོང་དགོས་འདུག སུས་ཀྱང་ཟེར་རྒྱུ་མེད་པ་ཞིག་ནམ་ཡང་མི་ཐོན། རེ་བ་ཡང་མ་རྒྱེབ། གོང་ས་མཆོག་ལ་ཡང་དོལ་རྒྱལ་ཚོགས་པས་ངན་རྒུ་སྨྲ་བའི་སྒང་རེད། དེ་དག་ཧང་སངས་དགོས་པ་དང་། བློ་ཕམས་དགོས་པའི་གནས་དོན་གང་ཡང་མ་རེད། ཤུགས་རྒྱོབ། བཀའ་བློན་ལགས་ཁྱེད་བཀའ་བློན་དུ་གདེམས་མཁན་ངེད་དབུ་ནག་བོད་པ་ཡིན་ལ། ངེད་ཅག་གིས་ཁྱེད་ཀྱིས་རྗེས་སུ་ཤར་བསྐྱོད་ཆོག་བསམ་ནས་ཁྱེད་གདེམས་པ་ཡིན། ཁྱེད་ཀྱིས་སྣེ་ཁྲིད། བོད་གཞིས་བྱེས་གཉིས་ལ་ཡོད་པའི་ཁ་ཞེ་གཉིས་མེད་ཀྱི་བོད་སྤྱི་བའི་དོན་དུ་ལྷག་བསམ་དང་། ཤེས་ཡོན་ཅན་ཡོངས་རྗེས་སུ་འབྲངས་ངེས་རེད་ལ། བོད་པ་རྣམས་ཀྱིས་སྔོན་ཁྱེད་ལ་འོས་ཤོག་བླུག་པའི་སྐབས་ལས་ཀྱང་བརྡབ་གཅིག་གིས་རྒྱབ་སྐྱོར་མང་གིན་འདུག བོད་རྒྱལ་ལོ།
བཀའ་ཟུར་ཐུབ་ལུང་ལགས་ཀྱི་བཀའ་འདྲི་འདི་དག་ཉམས་མྱོང་དང་ཐུགས་ཚགས་རང་བཞིན་ཅན་གྱི་བཀའ་འདྲི་ཞིག་ཡིན་ནའང་། བཀའ་ཁྲི་ལགས་ཀྱིས་ལྗགས་ལན་དེ་གནད་འགྲོ་ཞིག་རེད་མི་འདུག་ལ། རྒྱ་གར་གྱི་སློབ་སྤྱི་སོགས་དང་གྲོས་བསྡུར་གནང་རྒྱུར་བལྟས་ན་སློབ་གྲྭ་ཁག་ལ་ཡོད་ཡིག་གི་ཤེས་ཚད་སྐྱོ་བ་ནི་གཟིགས་ཀྱི་མེད་པ་འདྲ། དངོས་གནས་བྱས་ན་བོད་ཡིག་མཁས་པ་དང་དབྱིན་ཧིན་མཁས་པ་སོགས་ཁྲིད་ནས་སློབ་གྲྭ་ཡོངས་ལ་གཟིགས་སྐོར་དང་། ཚོད་ལྟ་གནང་ན་རྟོགས་ཐུབ་རྒྱུ་རེད་མ་གཏོགས། མིང་ཙམ་བཟུང་ནས་ཧམ་བཤད་གནང་ནས་བཞུགས་ན་འཐུས་ཤོར་དང་། གྱོང་གུད་ཟེར་བ་དངོས་སུ་བསྟན་སོང་བ་རེད།
ངས་ནི་འདི་འཐུས་ཤོར་ཆེན་པོ་ཞིག་ལ་ངོས་འཛིན་གྱིན་ཡོད། ཤེས་རིག་སྐོར་གྱི་ཕྱག་ལས་རེ་མེད་ན། དེ་ལ་དྲུང་ཆེ་ཞིག་དགོས་དོན་ཡང་ཡོད་རྒྱུ་མ་རེད། ད་བར་དུ་ལྷག་སོང་བ་ནི་བཀའ་ཁྲི་ཁོང་ལ་འདིའི་ཕྱོགས་ནས་ཕྱག་ལས་ཅང་མེད་སོང་བ་ཡིན་རྒྱུ་རེད་འདོད་ཀི། འདི་ནི་དངོས་གནས་དོ་སྣང་བྱ་དགོས་ས་ཞིག་ཅི་ལ་མིན།