ཝེ་ཊི་ནམ་མི་མང་གིས་༧གོང་ས་མཆོག་ཕེབས་ཐུབ་རྒྱུར་རེ་སྒུག་བྱས་འདུག

བཞུགས་སྒར་དུ་༸གོང་ས་མཆོག་གི་སྐུ་མདུན་ནས་གསུང་ཆོས་ཞུས་མྱོང་མཁན་གྱི་ཝེ་ཊི་ནམ་ནང་པའི་དགེ་འདུན་པའི་ཚོགས་པ་ཁག་ཅིག་གིས། ཉེ་ལམ་༸གོང་ས་མཆོག་ལ་གསོལ་འདེབས་ཞུས་ཏེ་རྣམ་རྒྱལ་གྲྭ་ཚང་གི་མཁན་པོ་མཆོག་ཝེ་ཊི་ནམ་དུ་ནང་ཆོས་ངོ་སྤྲོད་ཆེད་མངགས་གཏོང་ཡོང་བའི་རེ་འདུན་བཏོན་པ་ལྟར། ཟླ་འདིའི་ཕྱི་ཚེས་ ༧ ཉིན་རྣམ་གྲྭ་མཁན་པོ་ཁྲོམ་ཐོག་རིན་པོ་ཆེས་དབུ་ཁྲིད་པའི་གྲྭ་ཚང་གི་དགེ་འདུན་པ་ ༦ ཙམ་༸གོང་ས་མཆོག་གི་བཀའ་མངགས་བཞིན་ཝེ་ཊི་ནམ་དུ་ཆེད་སྐྱོད་ཀྱིས། ཡུལ་དེའི་དགོན་སྡེ་ཁག་གི་མཁན་པོ་ཚོར་ཐུག་འཕྲད་གནང་སྟེ། བོད་དང་ཝེ་ཊི་ནམ་བར་གྱི་ནང་ཆོས་ཀྱི་འབྲེལ་ལམ་གོང་མཐོར་གཏོང་ཐབས་སྐོར་གྲོས་བསྡུར་དང་། ས་གནས་སེར་སྐྱ་མང་ཚོགས་ལ་ནང་ཆོས་ངོ་སྤྲོད་དང་སྤྱན་རས་གཟིགས་ཀྱི་བཀའ་དབང་བཅས་བསྩལ་ཡོད་འདུག ཁོང་གི་མཛད་འཆར་ཁག་གྲུབ་སྟེ་ཕྱི་ཚེས་ ༢༥ ཉིན་ཕྱིར་བཞུགས་སྒར་དུ་འབྱོར་མཚམས་གསར་འགོད་པས་གནས་སྟངས་དེའི་ཐད་ཁྲོམ་ཐོག་རིན་པོ་ཆེ་མཆོག་ལ་བཅར་འདྲི་ཞུས་ཡོད།

 དྲི་བ། ཉེ་ཆར་མཁན་རིན་པོ་ཆེ་མཆོག་ཝེ་ཊི་ནམ་དུ་ཕེབས་སྐོར་ཐོས་པས། དེའི་སྐོར་མདོ་བསྡུས་ཤིག་ངོ་སྤྲོད་གནང་རོགས།

ལན། གཞི་རྩའི་ཆ་ནས་ཝེ་ཊི་ནམ་གྱི་གཞུང་དེ་དམར་པོའི་གཞུང་ཞིག་ཡིན་ནའང་། རྒྱལ་ཁབ་དེ་ནང་པའི་རྒྱལ་ཁབ་ཅིག་ཆགས་ཡོད་པ་རེད། ལྷག་པར་དུ་ཝེ་ཊི་ནམ་ནང་ཐེག་ཆེན་གྱི་ཆོས་དང་གསང་སྔགས་ཀྱི་ཆོས་ཉམས་ལེན་བྱེད་མཁན་མང་པོ་ཡོད་ལ། འདས་པའི་ལོ་ཤས་གོང་ནས་ཝེ་ཊི་ནམ་ནས་ཚུར་ངྷ་རམ་ས་ལར་གསུང་ཆོས་ཞུ་རུ་ཡོང་མཁན་མང་དུ་འགྲོ་བཞིན་འདུག སྐུ་མདུན་གྱིས་གསུང་ཆོས་གནང་བའི་སྐབས་ཁོང་ཚོར་དམིགས་བསལ་གྱི་སེམས་འགུལ་ཆེན་པོ་ཐེབས་ཀྱི་ཡོད་ལ། ཕན་ཐོགས་ཀྱང་ཧ་ཅང་ཆེན་པོ་བྱུང་ཡོད། ཉེ་ལམ་༸རྒྱལ་བ་རིན་པོ་ཆེའི་མདུན་ནས་ཆོས་ཞུས་མྱོང་མཁན་ཝེ་ཊི་ནམ་གྱི་ནང་པའི་གོ་སྒྲིག་ཚོགས་པ་ཁག་གསུམ་གྱིས་སྐུ་མདུན་ལ་རྣམ་རྒྱལ་གྲྭ་ཚང་གི་མཁན་པོ་གཙོས་པའི་གྲྭ་པ་ཁ་ཤས་ཕར་གཏོང་རོགས་ཞེས་སྙན་སེང་ཞུས་པ་རེད། དེ་ནས་སྐུ་མདུན་གྱིས་ང་ཚོ་ཝེ་ཊི་ནམ་ལ་འགྲོ་ཐུབ་ན་ཕན་ཐོགས་ཆེན་པོ་ཡོང་ས་རེད་གསུངས་པ་ཡིན་སྟབས། ཟླ་འདིའི་ཚེས་ ༧ ཉིན་ང་ཚོ་མི་ ༦ དང་སྐད་སྒྱུར་ ༡ བཅས་ཁྱོན་བསྡོམས་མི་ ༧ ཝི་ཊི་ནམ་ལ་ཕྱིན་པ་ཡིན། ཐེངས་འདིར་འགྲོ་དགོས་དོན་གཙོ་བོ་ཝེ་ཊི་ནམ་གྱི་དགོན་སྡེ་ཁག་དང་མང་ཚོགས་ལ་ཆོས་འབྲེལ་འཇོག་རྒྱུ་དེ་རེད།

དྲི་བ། རིན་པོ་ཆེ་མཆོག་ཐེངས་འདིར་ཝེ་ཊི་ནམ་ནང་ཆོས་ཀྱི་མཛད་འཕྲིན་བསྐྱངས་པའི་སྤྱི་ཡོངས་ཀྱི་གཟིགས་ཚོར་ཅིག་གསུངས་རོགས།

ལན། ཟླ་འདིའི་ཕྱི་ཚེས་ ༩ ནས་ ༡༠ ཉིན་བར་ང་རང་གིས་ཝེ་ཊི་ནམ་གྱི་ངྷ་ཎང་ཞེས་པའི་གྲོང་ཁྱེར་ནང་། ས་གནས་མང་ཚོགས་ ༥༠༠༠ ཡས་མས་ལ་ནང་ཆོས་སྤྲོད་བྱས་པ་ཡིན། ཕྱི་ཚེས་ ༡༡ ཉིན་སྤྱན་རས་གཟིགས་ཀྱི་བཀའ་དབང་གནང་སྟེ་ཆོས་འབྲེལ་བཞག་པ་རེད། ཕྱི་ཚེས་ ༡༡ ཉིན་ཝེ་ཊི་ནམ་གྱི་ངྷ་ཎང་གྲོང་ཁྱེར་ནང་གཞུང་འབྲེལ་ཐོག་སྤྱན་རས་གཟིགས་ཀྱི་ལོ་འཁོར་དུས་ཆེན་ཞིག་ཚོགས་པ་རེད། མཛད་སྒོའི་ཐོག་ཝེ་ཊི་ནམ་ཆོས་དོན་ལས་ཁུངས་དང་ས་གནས་དཔོན་རིགས་མང་པོ་ཞིག་ཕེབས་འདུག་ལ། ང་ཚོ་ཡང་དམིགས་བསལ་སྐུ་མགྲོན་གྱི་མཚན་ཐོག་ནས་གདན་ཞུ་བྱས་སོང་། དུས་ཆེན་དེར་ཝེ་ཊི་ནམ་གྱི་ས་ཕྱོགས་འདྲ་མིན་ནས་མི་དམངས་ ༡༠༠༠༠ ལྷག་འཛོམས་ཡོད་པ་རེད། ཝེ་ཊི་ནམ་ནང་ང་ཚོའི་མཛད་རིམ་མང་ཆེ་བ་ས་གནས་ཆོས་དོན་ལས་ཁུངས་ཁག་བརྒྱུད་དེ་འགྲོ་དགོས་པ་ཞིག་རེད་ལ། ས་གནས་ཆོས་དོན་ལས་ཁུངས་ཁག་ནང་དགོན་པ་སོ་སོའི་བླ་མ་ཚོ་བཞུགས་ཡོད་པ་རེད། དེ་ཡིན་དུས། ང་ཚོས་བླ་མ་ཚོར་འབྲེལ་བ་བྱས་ཏེ་ནང་ཆོས་གོ་བསྡུར་ཞུ་དགོས་ས་ནས་གོ་བསྡུར་དང་། འགྲེལ་བཤད་རྒྱག་དགོས་ས་ནས་འགྲེལ་བཤད་བརྒྱབ་པ་ཡིན། དགོན་པ་ཁག་དང་དགོན་པའི་མཐོ་སློབ་ཁག་ནང་གྲྭ་བཙུན་དང་མང་ཚོགས་ལ་ནང་ཆོས་ངོ་སྤྲོད་བྱས་པ་ཡིན། ངའི་རོགས་པ་ཆོས་དཔོན་བཀྲ་ཤིས་དང་དབུ་མཛད་ཟུར་པ་ངག་དབང་སྟོབས་རྒྱལ་གཙོས་པའི་གྲྭ་ཚང་གི་གྲྭ་པ་ཚོས་ཆོས་ཕྱོགས་ཀྱི་ཆོ་ག་རྣམས་བསྒྲུབས་པ་རེད། ང་རང་གིས་མཐོང་ཚུལ་ལ་མང་ཚོགས་རྣམས་ཆོས་དད་ཆེན་པོ་དང་བོད་ཀྱི་གྲྭ་བ་ཚོར་བརྩི་མཐོང་ཆེན་པོ་བྱེད་ཀྱི་འདུག ང་ཚོ་ལམ་ཁ་ནས་འགྲོ་སྐབས་ཀྱང་མང་ཚོགས་ཀྱིས་ང་ཚོའི་མགོ་ལ་ལག་པ་འཇོག་རོགས་ཞེས་ཞུ་བ་འཐེན་མཁན་མང་པོ་འདུག དེ་བཞིན་ཝེ་ཊི་ནམ་གྱི་ཁྲོམ་ལ་འགྲོ་སྐབས་བོད་ཡིག་གི་རླུང་རྟ་དང་མ་ཎི་ཡིག་དྲུག་སོགས་གང་སར་མཐོང་རྒྱུ་འདུག ང་ཚོ་ནང་པའི་ཆོས་བྱེད་མཁན་དང་ཐེག་པ་ཆེན་པོའི་ཆོས་བྱེད་མཁན་གཅིག་པ་ཡིན་པའི་ཆ་ནས། ཁོང་ཚོར་བོད་པའི་ཐོག་དམིགས་བསལ་གྱི་ཚོར་བ་ཆེན་པོ་ཡོད་པ་མ་ཟད། ཚང་མས་ཁ་གཅིག་གྲགས་ཀྱིས་བོད་པར་ཧ་ཅང་དགའ་པོ་བྱེད་ཀྱི་འདུག ཝེ་ཊི་ནམ་གྱི་གྲྭ་བཙུན་ཚོར་མཚོན་ན། སྤྱོད་ལམ་ཡག་པོ་ཡོད་པའི་ཐོག་དམར་ཟས་རིགས་མཆོད་མཁན་གཅིག་ཀྱང་མི་འདུག ཐེངས་འདིར་གཙོ་བོ་ཝེ་ཊི་ནམ་གྱི་ངྷ་ཎང་གྲོང་ཁྱེར་དང་། ཧེ་ཡུ་སེ་ཌེ། ཧོ་ཆི་མིན། ཧེ་ནེའུ་སི། ཧྥ་ཡོ་བྷེ་ཡེ་བཅས་གྲོང་ཁྱེར་ཁག་ ༥ ཡི་དགོན་པ་དང་ནང་པའི་མཐོ་སློབ་སོགས་ས་གནས་མི་འདྲ་བ་བཅུ་གྲངས་ཤིག་ནང་འགྲོ་རྒྱུའི་གོ་སྐབས་བྱུང་སོང་། ས་གནས་དེ་དག་ནང་ཉིན་ ༡༧ རིང་མང་ཚོགས་ལ་ནང་ཆོས་ངོ་སྤྲོད་དང་སྤྱན་རས་གཟིགས་ཀྱི་དབང་བཅས་གནང་བ་ཡིན། ས་གནས་དེ་དག་ནང་ནང་ཆོས་ངོ་སྤྲོད་གནང་སྐབས་ཉིན་ལྟར་མི་མང་ ༦༠༠ ནས་ ༥༠༠༠ བར་འཛོམས་ཀྱི་འདུག

དྲི་བ། ཝེ་ཊི་ནམ་དུ་༸གོང་ས་མཆོག་དང་བོད་ཀྱ་ཆོས་དང་རིག་གཞུང་ཐོག་དོ་སྣང་ཅི་ཙམ་འདུག

ལན། ༸གོང་ས་མཆོག་དང་བོད་ཀྱི་ནང་ཆོས་ལ་བརྩི་མཐོང་ཧ་ཅང་ཆེན་པོ་བྱེད་ཀྱི་འདུག བོད་ཀྱི་ནང་ཆོས་ཟེར་ན་གཏིང་ཟབ་པོ་དང་ཚད་གཞི་མཐོ་པོ། ཚན་རིག་པ་ཚོས་དོ་སྣང་ཆེན་པོ་བྱེད་ས་ཞིག་ཡིན་པར་ངོས་འཛིན་བྱེད་ཀྱི་འདུག་ལ།༸རྒྱལ་བ་རིན་པོ་ཆེ་མཆོག་འཛམ་གླིང་གང་སར་ཆིབས་བསྒྱུར་སྐྱོང་གི་ཡོད་པ་དེའི་ཐོག་ནས་ཤིན་ཏུ་རྩ་ཆེན་པོ་ཞིག་དང་དད་གུས་ཆེན་པོ་ཞུ་ཡི་འདུག མཁན་པོ་ཁ་ཤས་ཀྱིས་གསུངས་ན། ཝེ་ཊི་ནམ་ནང་བོད་ཀྱི་ནང་ཆོས་དར་ནས་ལོ་ ༢༠ ལྷག་ཕྱིན་ཡོད་པ་རེད་ཟེར་གྱི་འདུག བོད་པའི་བླ་མ་ཁ་ཤས་སྔོན་མ་ནས་ཝེ་ཊི་ནམ་ནང་ཕེབས་མྱོང་ཡོད་ས་རེད། དེ་བཞིན། ཨ་རི་དང་ཁེ་ཎ་ཌའི་བཅས་ཀྱི་ནང་ཝེ་ཊི་ནམ་གྱི་ནང་པ་ས་ཡ་ ༣ ཙམ་ཡོད་སྐོར་རྗོད་ཀྱི་འདུག ཁོང་ཚོར་ཕྱི་རྒྱལ་དུ་༸གོང་ས་མཆོག་གི་གསུང་ཆོས་ཞུ་རྒྱུའི་གོ་སྐབས་མང་པོ་ཐོབ་ཀྱི་ཡོད་སྟབས། འབྲེལ་བ་དེའི་ཐོག་ཝེ་ཊི་ནམ་ནང་༸རྒྱལ་བ་རིན་པོ་ཆེར་ཧ་ལས་པའི་བརྩི་མཐོང་དང་དད་གུས་བྱེད་ཀྱི་འདུག དེ་ཡིན་དུས་གལ་སྲིད་ཝེ་ཊི་ནམ་ནང་ཆོས་འགྲེལ་བཤད་རྒྱག་ཐུབ་མཁན་གྱི་བོད་པའི་དགེ་བཤེས་ཚད་ལྡན་ཞིག་ཡོད་ན། ཁོང་ཚོར་ཏན་ཏན་ཕན་ཐོགས་ཆེན་པོ་ཡོང་ས་རེད། ང་ཚོ་ཝེ་ཊི་ནམ་གྱི་དགོན་པ་ཁག་ལ་འགྲོ་སྐབས་ནང་པའི་སློབ་གྲྭ་རེ་ཟུང་མ་གཏོགས། ནང་ཆོས་ཐོག་བསླབ་པ་སློབ་གཉེར་གནང་སྟངས་ཐོག་བོད་པ་ནང་བཞིན་གཏིང་ཟབ་པོ་དང་ཞིབ་ཚགས་མོ་དེ་འདྲ་ཡོད་ཚོད་མི་འདུག ང་ཚོས་འབྲེལ་བ་བྱས་སྐབས་ཝེ་ཊི་ནམ་གྱི་བླ་མ་ཚོས་ཁོང་ཚོའི་ཆོས་ལུགས་དེ་བོད་པ་དང་གཅིག་པ་ཡིན་པར་ངོས་འཛིན་བྱེད་ཀྱི་འདུག་ལ། ལྷག་པར་དུ་དགོན་པ་ཁག་གི་བླ་མ་ཚོས་ཝེ་ཊི་ནམ་གྱི་གྲྭ་པ་ཚོ་ཚུར་ངྷ་སར་སློབ་གཉེར་དུ་གཏོང་འདོད་ཡོད་པ་དང་། ཕྱོགས་གཞན་ཞིག་ནས་༸གོང་ས་མཆོག་ཝེ་ཊི་ནམ་དུ་ཕེབས་རྒྱུར་རེ་བ་ཆེན་པོ་རྒྱག་གི་འདུག

དྲི་བ། ད་ཆར་ཝེ་ཊི་ནམ་གྱི་ཡུལ་དུ་ནང་པའི་དགོན་པ་དང་གྲྭ་བ་ག་ཚོད་འདུག་གམ།

ལན། ཝེ་ཊི་ནམ་དུ་ནང་པའི་དགོན་པ་ཧ་ཅང་མང་པོ་འདུག གྲོང་ཁྱེར་རེ་རེའི་ནང་དགོན་པ་ ༣༠༠ ནས་ ༤༠༠ བར་ཡོད་པ་མཐོང་ཐོས་བྱུང་ཡང་། དགོན་པའི་ནང་སྡོད་མཁན་གྲྭ་བ་ཉུང་ཉུང་ཞིག་ལས་མི་འདུག ང་ཚོ་འགྲོ་སའི་དགོན་པ་ཁ་ཤས་ནང་གྲྭ་པ་ ༥ ནས་ ༧། ༡༠ ཡས་མས་ཙམ་ལས་སྡོད་མཁན་མི་འདུག དགོན་པ་ཁག་གི་ཡོང་སྒོ་གཙོ་བོ་དེ་མང་ཚོགས་ཀྱི་རོགས་རམ་ལ་བརྟེན་ནས་བསྡད་ཡོད་པ་ཞིག་རེད། དེའི་ཐོག་སྲིད་གཞུང་གིས་ཀྱང་རོགས་དངུལ་གང་འཚམ་རེ་སྤྲོད་ཀྱི་ཡོད་ས་རེད། མ་གཞི། ཝེ་ཊི་ནམ་གྱི་གཞུང་དེ་དམར་ཤོག་གི་གཞུང་ཞིག་ཆགས་ཡོད་ཀྱང་། རྒྱ་ནག་གཞུང་ལྟ་བུའི་དམ་དྲག་ཆེན་པོ་དེ་འདྲ་གང་ཡང་མི་འདུག་ལ། ཝེ་ཊི་ནམ་སྲིད་གཞུང་གིས་ནང་པའི་ཆོས་ལ་ཡེ་ཤུ་དང་ཆོས་ལུགས་གཞན་པ་ལས་ལྷག་པའི་མཐོང་དང་ཆ་འཇོག་བྱེད་ཀྱི་འདུག དེ་ཚོའི་གྲས་ཡག་པོ་ཞེ་དྲག་མཐོང་སོང་། དགོན་པ་ཁག་ན་གྲྭ་བཙུན་མང་པོ་མི་འདུག་ཀྱང་། མཐོ་རིམ་སློབ་གྲྭ་ཁག་ནང་གྲྭ་བཙུན་སློབ་མ་མང་པོ་མཐོང་རྒྱུ་འདུག་ལ། ཁོང་ཚོའི་སློབ་གཉེར་དེའང་དགོན་པ་ལས་ཅུང་ཡག་པོ་འདུག་བསམ་པ་ཞིག་བྱུང་སོང་། ཝེ་ཊི་ནམ་གྱི་མི་རིགས་དེ་འདས་པོའི་ལོ་རྒྱུས་ནང་དཀའ་ངལ་མང་པོ་འཕྲད་མྱོང་མཁན་ཞིག་རེད་འདུག་ལ། རྒྱལ་ཁབ་དེ་རྒྱ་ནག་གི་བཙན་འཛུལ་འོག་ལོ་ ༡༠༠༠ ཙམ་བསྡད་ཡོད་རབས་ཤོད་ཀྱི་འདུག དེ་བཞིན་ཧྥ་རན་སིའི་འོག་ལོ་ ༡༠༠ དང་། ཨ་རིའི་འོག་ལོ་ ༣༠ བཅས་བསྡད་མྱོང་ཡོད་སྟབས། ཁོང་ཚོར་རང་བཙན་ཐོབ་སྟེ་ལོ་ ༣༠ མ་གཏོགས་ཕྱིན་ཡོད་པ་མ་རེད། དེ་ལྟར་ཡང་ཝེ་ཊི་ནམ་གྱི་མི་དམངས་ཀྱིས་དུས་ནས་དུས་སུ་རང་གི་ཆོས་ཀྱི་ཆེད་དཀའ་ལས་ཆེན་པོ་བརྒྱབ་པ་དེའི་ཐོག་ནས་ཝེ་ཊི་ནམ་ནང་ནང་ཆོས་གསོན་གནས་ཐུབ་པ་བྱུང་འདུག

 དྲི་བ། ༡༩༦༣ ལོར་ཝེ་ཊི་ནམ་ནང་ནང་པའི་དགེ་སློང་ཞིག་གིས་ཨ་རིའི་བཙན་འཛུལ་ལ་ངོ་རྒོལ་ཆེད་རང་ལུས་མེར་བསྲེགས་བཏང་ཡོད་སྟབས། བོད་ནང་རང་ལུས་མེར་བསྲེགས་གཏོང་བཞིན་པའི་གནས་སྟངས་ཐད་ཝེ་ཊི་ནམ་མི་མང་ལ་བལྟ་སྟངས་གང་འདྲ་འདུག

ལན། ཝེ་ཊི་ནམ་ནི་དམར་ཤོག་གི་ལུང་པ་ཞིག་ཆགས་ཡོད་ལ། ཐེངས་འདིར་ང་ཚོ་ཝེ་ཊི་ནམ་ལ་འགྲོ་དོན་གཙོ་བོ་ཆོས་ལུགས་ཁོ་ནའི་ཆེད་ཡིན་སྟབས། ང་ཚོས་འབྲེལ་ཡོད་རྣམ་པ་ཚོར་ཆབ་སྲིད་དང་འབྲེལ་བའི་སྐད་ཆ་གང་ཡང་བཤད་ཡོད་པ་མ་རེད། ཉིན་ཞིག་ང་ཚོ་ཝེ་ཊི་ནམ་གྱི་གྲྭ་པ་ཞིག་གིས་མེར་བསྲེགས་བཏང་བའི་དགོན་པ་དེར་ལྟ་སྐོར་ལ་ཕྱིན་པ་ཡིན། གྲྭ་བ་དེའི་མོ་ཊ་འགྲེམས་སྟོན་ཁང་ཞིག་གི་ནང་བཞག་འདུག་ལ། ཁོང་ཚོས་སྐབས་དེའི་གནས་ཚུལ་རྣམས་རེ་རེ་བཞིན་འགྲེལ་བཤད་རྒྱག་གི་འདུག གཅིག་བྱས་ན། ཁོང་ཚོས་བོད་ནང་རང་ལུས་མེར་བསྲེགས་གཏོང་བཞིན་པའི་གནས་ཚུལ་ཤེས་ཀྱི་ཡོད་ཀྱང་། ཚུར་གནས་ཚུལ་དེའི་རིགས་གླེང་སློང་གང་ཡང་མ་བྱས་སྟབས། ང་ཚོས་ཀྱང་ཕར་འགྲེལ་བཤད་རྒྱག་རྒྱུའི་གོ་སྐབས་དེ་འདྲ་བྱུང་མ་སོང་། ང་ཚོར་ཐོག་མའི་ཆར་ཆབ་སྲིད་སྐོར་འགྲེལ་བཤད་རྒྱག་རྒྱུའི་འཆར་གཞི་ཡོད་པ་མ་རེད།

དྲི་བ།  ཝེ་ཊི་ནམ་གྱི་ནང་པོ་ཆོས་པ་ཚོ་དང་མི་མང་གི་ངོས་ནས་༧གོང་ས་མཆོག་ཡུལ་དེར་ཕེབས་ཐུབ་རྒྱུར་རེ་བ་དེ་འདྲ་གནང་གི་འདུག་གམ།

ལན། ཝེ་ཊི་ནམ་སྲིད་གཞུང་གི་ཆོག་མཆན་སྤྲོད་མིན་གྱི་དཀའ་ངལ་རེད་མ་གཏོགས། ༸རྒྱལ་བ་རིན་པོ་ཆེ་ཝེ་ཊི་ནམ་ལ་ཆིབས་བསྒྱུར་བསྐྱངས་རྒྱུར་དགོན་པ་ཁག་གི་བླ་མ་མཁན་པོ་ཡིན་ན་རེད། ས་གནས་མང་ཚོགས་ཡིན་ན་རེད། སློབ་ཕྲུག་ཡིན་ན་རེད། ཚང་མས་བསམ་པ་གཅིག་མཐུན་གྱིས་རེ་བ་ཆེན་པོ་རྒྱག་གི་འདུག་ལ། ཁོང་ཚོས་མ་འོངས་པར་མུ་མཐུད་ནས་གཞུང་དང་འབྲེལ་བ་བྱས་ཏེ་ཆོག་མཆན་རག་ཐབས་ལ་འབད་བརྩོན་གནང་རྒྱུ་ཡིན་གསུང་གི་འདུག ང་ཚོའི་ངོས་ནས་ཀྱང་༸གོང་ས་མཆོག་ཝེ་ཊི་ནམ་དུ་ཕེབས་ཐུབ་རྒྱུར་རེ་བ་ཡོད་ཅེས་ཞུས་པ་ཡིན། ཝེ་ཊི་ནམ་གྱི་གཞུང་དེ་དམར་ཤོག་ཡིན་ཡང་ནང་ཆོས་ལ་གདེང་འཇོག་ཆེན་པོ་བྱེད་པ་དང་། ལྷག་པར་དུ་མང་ཚོགས་ཀྱིས་༸གོང་ས་མཆོག་ཝེ་ཊི་ནམ་ལ་ཕེབས་ཐུབ་རྒྱུར་རེ་བ་ཆེན་པོ་རྒྱག་བཞིན་ཡོད་སྟབས། གཅིག་བྱས་ན་༸གོང་ས་མཆོག་ཡུལ་དེར་ཕེབས་ཐུབ་པར་གོ་སྐབས་ཤར་སྲིད་ཀྱི་རེད།

 དྲི་བ། ཐེངས་འདིར་རིན་པོ་ཆེ་མཆོག་ཝེ་ཊི་ནམ་དུ་མཛད་འཕྲིན་བསྐྱངས་ཏེ། ཆོས་ཕྱོགས་ཀྱི་འབྲེལ་ལམ་ཞིག་འཛུགས་ཐུབ་པ་དེར་ངོས་འཛིན་གང་འདྲ་གནང་གི་ཡོད་དམ།

ལན། ༸རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་ལ་བརྟེན་ནས་ང་ཚོ་ཕར་བཅར་ཐུབ་བྱུང་བ་རེད། ཡུལ་དེའི་དགོན་སྡེ་ཁག་གི་སྣེ་ལེན་བྱེད་སྟངས་དང་མང་ཚོགས་ཀྱིས་ནང་ཆོས་ལ་དོ་སྣང་བྱེད་སྟངས་ཧ་ཅང་ཡག་པོ་འདུག ལྷག་པར་དུ་ཝེ་ཊི་ནམ་གྱི་ནང་པ་ཚོ་འཕགས་པ་སྤྱན་རས་གཟིགས་དང་འབྲེལ་བ་ཆེན་པོ་ཆགས་ཡོད་དུས། རང་བཞིན་གྱིས་བོད་ལུང་པ་དང་འབྲེལ་བ་ཆེན་པོ་ཡོད་པ་རེད་བསམ་གྱི་འདུག དེའི་ཐོག་ནས་ཕན་ཚུན་བར་ཚོར་བ་མི་འདྲ་བ་ཞིག་ཡོང་གི་འདུག ད་ལོ་ང་ཚོ་ཝེ་ཊི་ནམ་ལ་འགྲོ་ཐུབ་དེའི་ཐོག་ནས་ལོ་རྗེས་མ་ནས་བཞུགས་སྒར་ངྷ་རམ་ས་ལར་གསུང་ཆོས་ཞུ་རུ་ཡོང་མཁན་ཏན་ཏན་མང་དུ་འགྲོ་སྲིད་ཀྱི་རེད། ད་ལྟའི་ཆ་ལ་སཱ་ར་མཐོ་སློབ་དང་མཚན་ཉིད་གྲྭ་ཚང་བཅས་ཀྱི་ནང་ཝེ་ཊི་ནམ་ནས་ཕེབས་པའི་སློབ་གཉེར་བ་ ༡༢ ཙམ་ཡོད་པ་རེད། ཐེངས་འདིར་ང་ཚོ་ཝེ་ཊི་ནམ་གྱི་མཁན་པོ་ཚོར་ཐུག་སྐབས། ང་རང་གིས་མཁན་པོ་ཚོར་ཝེ་ཊི་ནམ་ནས་ཚུར་ངྷ་སར་ནང་ཆོས་སློབ་གཉེར་དུ་ཕེབས་མཁན་ཚོར། རྣམ་རྒྱལ་གྲྭ་ཚང་གི་ངོས་ནས་གང་ཅིའི་ཐད་མཐུན་འགྱུར་རོགས་རམ་ཞུ་རྒྱུའི་འཆར་གཞི་ཡོད། ཝེ་ཊི་ནམ་གྱི་ཕྱོགས་ནས་ཚུར་སློབ་གཉེར་ལ་ཕེབས་མཁན་མང་པོ་བྱུང་ན། མ་འོངས་པར་ཝེ་ཊི་ནམ་ནང་བོད་ཀྱི་ནང་ཆོས་གཏིང་ཟབ་པོ་དེ་ཤེས་རྟོགས་ཡོང་རྒྱུར་ཕན་ཐོགས་ཆེན་པོ་ཡོང་ས་རེད་ཅེས་ཞུ་རྒྱུ་བྱུང་།

གསར་འགོད་པ། དཔལ་ལྡན།