རྒྱ་གཞུང་གིས་ལྷ་ལྡན་གཙུག་ལག་ཁང་གི་མདུན་དུ་ངོ་རྒོལ་སྐད་འབོད་བྱས་སྐབས་འཛིན་བཟུང་བྱས་པའི་བསམ་འགྲུབ་རྒྱ་མཚོ་ལགས་ལ་ལོ་ལྔའི་ཁྲིམས་ཐག་བཅད་འདུག
ལྷ་ས་གནས་སྡོད་བསྟན་པ་དར་རྒྱས་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་ནག་གཞུང་གིས། ༢༠༡༠ ལོར་ལྷ་ལྡན་གཙུག་ལག་ཁང་གི་མདུན་དུ་ངོ་རྒོལ་སྐད་འབོད་བྱས་མཁན་བསམ་འགྲུབ་རྒྱ་མཚོ་ལགས་ཀྱི་ནང་མིར་ལྷ་སའི་གྲྭ་བཞི་བཙོན་ཁང་གིས་བརྡ་ཡིག་ཅིག་འབྱོར་བའི་ནང་ཁོང་ལ་ལོ་ ༥ ཁྲིམས་ཐག་བཅད་ཡོད་པའི་པའི་སྐོར་བཀོད་འདུག དེ་ནི་བསམ་འགྲུབ་རྒྱ་མཚོ་ལགས་ཀྱིས། ༢༠༡༠ ལོའི་ཕྱི་ཟླ་ ༥ བའི་ཚེས་ ༢ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༣ དང་སྐར་མ་ ༢༠ ཡས་མས་སུ་ལྷ་སའི་ལྷ་ལྡན་གཙུག་ལག་ཁང་གི་མདུན་ཐང་དུ་ལག་ལ་རྒྱ་དར་འཕྱར་བ་དང་རྒྱབ་ལ་རྒྱ་དར་ཆེན་པོ་ཞིག་འཁུར་ཏེ་༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་པ་དང་།པཎ་ཆེན་ཆུང་སྲིད་རིན་པོ་ཆེ་མྱུར་ཏུ་གློད་གྲོལ་གཏོང་དགོས། རྒྱ་ནག་གིས་ཡུལ་ཤུལ་སྐྱེ་རྒུ་མདོའི་ས་ཡོམ་གོད་ཆག་བྱུང་ཡུལ་དུ་བོད་མི་ཚོ་ས་གནས་ས་ཐོག་ཏུ་ངོ་བསྐྱོད་ཀྱིས་རོགས་རམ་བྱེད་དུ་འཇུག་དགོས་ཞེས་དུས་ཡུན་སྐར་མ་ ༥ རིང་ངོ་རྒོལ་སྐད་འབོད་བྱས་སྐབས། ཉེན་རྟོག་མི་སྣ་ ༧ ལྷག་འབྱོར་ཏེ་ཁོང་འཛིན་བཙན་འཁྲིད་བྱས་ཡོད་པ་ལྟར། ལོ་སྔོན་མའི་ལོ་མཇུག་ཏུ་ཁོང་གི་ཨ་མ་དང་ནང་མི་གཉེན་འབྲེལ་འགའ་ལྷ་སར་ཁོང་ལ་ཐུག་འཕྲད་བྱེད་ཆེད་ཐེངས་གཉིས་ཕྱིན་ཀྱང་། ལྷ་སའི་ཉེན་རྟོག་མི་སྣས་ཐུག་འཕྲད་བྱེད་བཅུག་མེད་པར་མ་ཟད། ཉེ་ལམ་ལྷ་སའི་གྲྭ་བཞི་བཙོན་ཁང་གིས་ཁོང་གི་ནང་མིར་བརྡ་ཡིག་ཅིག་བཏང་ཡོད་པའི་ནང་། བསམ་འགྲུབ་རྒྱ་མཚོ་ལགས་ལ་ལོ་ ༥ དུས་བཀག་བཙོན་འཇུག་གི་ཁྲིམས་ཐག་བཅད་ཡོད་པའི་སྐོར་བཀོད་ཡོད་འདུག རང་ལོ་ ༢༨ ཡིན་པའི་བསམ་འགྲུབ་རྒྱ་མཚོ་ལགས་ནི། མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་མདའ་བཞི་གསེར་ཐང་གྲོང་རྡལ་ནས་སྐྱེས་ཤིང། ༡༩༩༦ ལོར་མདའ་བཞི་རྫོང་ལཱ་མོ་ཞབས་དྲུང་སྒར་ཐོག་དགོན་དུ་ཞུགས་ཏེ་ལོ་ ༤ རིང་སློབ་གཉེར་གནང་ཡོད། ༢༠༠༧ ལོའི་ཕྱི་ཟླ་ ༡༡ པའི་ནང་བཙན་བྱོལ་ཏུ་འབྱོར་ཏེ་ཤེས་རབ་དགའ་ཚལ་སློབ་གླིང་དུ་ལོ་ ༡ མ་ཟིན་ཙམ་དུ་སློབ་གཉེར་གནང་འདུག་ལ། ༢༠༠༩ ལོའི་ཕྱི་ཟླ་ ༣ པའི་ནང་ཕྱིར་རང་ཡུལ་ཏུ་ལོག་སྐབས་རྒྱ་གཞུང་གིས་རྒྱ་གར་ནང་གནས་སྡོད་བྱས་པ་དང་༧གོང་ས་མཆོག་གི་བཀའ་སློབ་ཀྱི་དཔེ་ཆ་བོད་ནང་ཁུར་ཡོང་བའི་ཉེས་མིང་འོག་ཟླ་ ༧ རིང་གྲྭ་བཞི་བཙོན་དུ་དུས་བཀག་བཙོན་འཇུག་བྱས་འདུག ཀློད་གྲོལ་བཏང་སྟེ་མདའ་བཞི་རྫོང་དུ་ལོག་ཡོད་ཀྱང་ས་གནས་སུ་ཉིན་ ༣ རིང་བཀག་ཉར་འདྲི་གཅོད་བྱས་ཡོད་པ་མ་ཟད། ཁོང་ལ་རྒྱ་སྒོར་ཁྲི་ ༡ ལྷག་གི་ཉེས་ཆད་བཅད་དེ་དམ་དྲག་སྟངས་འཛིན་འོག་གནས་དགོས་བྱུང་ཡོད་ཀྱང་། ཁོང་གིས་རྒྱ་གར་དུ་ཡོད་པའི་ནུ་བོ་བསྟན་པ་དར་རྒྱས་འབྲེལ་བ་བྱས་ཏེ་༸གོང་ས་མཆོག་གི་བཀའ་སློབ་ཁག་བཀྲམས་ཡོད་པ་མ་ཟད། ཟོག་ལུག་ཚེ་ཐར་གཏོང་རྒྱུ་དང་པཎ་ཆེན་ཆུ་སྲིད་རིན་པོ་ཆེ་ཀློད་གྲོལ་ཆེད་ས་ཡིག་བསྡུ་རུབ་ཀྱི་ལས་འགུལ་སོགས་སྤེལ་ཡོད་འདུག
གསར་འགོད་པ། དོན་གོ
ལོ་ལྔའི་དུས་ཡུན་ནང་བོད་ལ་དངོས་ཡོད་ཀྱི་འཕོ་འགྱུར་བྱུང་སྟེ་སྐུ་ཉིད་ལ་བོད་གཞུང་དམངས་གཉིས་ནས་འཚམས་འདྲི་བྱེད་ཐུབ་ངེས་རེད། དུས་ཡུན་ནང་སྡུག་བསྔལ་ཡང་བར་ཤོག
གསར་འགོད་པ་ལགས་གོང་གི་གུས་པས་ཞུས་པ་ལ་དོ་སྣང་གི་ཡག་པོ་བཟོ་འདུག ཡང་ཞུས་རྒྱུ་ཞིག་ལ་གོང་གི་ཟླ་ ༧ རིང་གྲྭ་བཞི་བཙོན་ཁང་དུ་དུས་བཀག་བཙོན་འཇུག་བྱས་འདུག་ཞེས་བ་འདི་ཡང་དོན་དངོས་མ་རེད་གྲྭ་བཞི་བཙོན་ཁང་ཟེར་བ་དེ་ཁྲིམས་ཐག་བཅད་ཚར་བའི་རྗེས་ནས་བཙོན་འཇུག་བྱེད་ས་ཞིག་ཡིན་པ་ལས་བཀག་གཉེར་བྱེད་ས་ཞིག་མ་རེད། རེ་བ་ལ་ད་དུང་ཁྱེད་ཀྱི་འབྲེལ་ཡོད་གྲ་བཞི་བཙོན་ཁང་ནང་དངོས་སུ་བཞུགས་མྱོང་ཡོད་པ་ཞིག་ལ་བཀའ་འདྲི་ཞུས་ན་གསལ་བོ་མཁྱེན་གྱི་རེད་བསམ། དགོངས་དག་ངས་ཁྱེད་རྣམ་པ་ལ་དགག་པ་བྱས་བ་མིན་བློ་དཀར་ཞིག་གི་འདི་ལྟར་ཞུས་དགོས་བྱུང།
དེ་བཞིན་༢༠༠༥ ནས་བཟུང་བོད་ཀྱི་ཆབ་བཙོན་ཚང་མ་ཆུ་ཤུར་བཙོན་ཁང་ཏུ་འཇུག་བཞིན་ཡོད་པ་ལས་དེ་སྔོན་ལྟར་གྲྭ་བཞི་བཙོན་ཁང་ཏུ་འཇུག་གི་ཡོད་པ་མ་རེད་ཟེར།
ངོ་མ་རྒྱ་དམར་གྱིས་ཅི་བྱས་བྱས་རེད་འདུག