ཉེ་ལམ་ཨ་རིའི་གྲོས་ཚོཊ་གོང་མས་བོད་ནང་རང་ལུས་མེར་བསྲེཊ་ཀྱི་ཛ་དྲག་གནས་ཚུལ་འབྱུང་བཞིན་པའི་ཐད་གྲོས་ཆོད་ཁག་དྲུག་བཞག་འདུག
བོད་ནང་བོད་མི་ཚོས་གཅིག་རྗེས་གཉིས་མཐུད་ཀྱིས་རང་ལུས་མེར་བསྲེགས་གཏོང་བཞིན་པའི་ཛ་དྲག་གནས་སྟངས་ཐད། ཉེ་ལམ་ཨ་རིའི་གྲོས་ཚོགས་གོང་མའི་ (Senate) ནང་བོད་དོན་རྒྱབ་སྐྱོར་གྱི་གྲོས་ཆོད་དོན་ཚན་ཁག་ ༦ བཞག་ཡོད་འདུག་ཅིང་། དེ་དག་ནི། དང་པོ། བོད་ནང་རང་ལུས་མེར་སྲེག་གཏོང་བཞིན་པའི་བོད་མི་ཚོར་གདུང་སེམས་མཉམ་སྐྱེད་ཀྱི་མྱ་ངན་གུས་འདུད་ཞུ་རྒྱུ་དང་།རྒྱ་གཞུང་གིས་བོད་མིའི་ཐོག་དམ་བསྒྲགས་སྲིད་བྱུས་བསྟུད་མར་སྤེལ་བཞིན་པར་སེམས་འཚབ་ཡོད་པ། གཉིས་པ། རྒྱ་གཞུང་གིས་བོད་མིའི་ཆོས་ལུགས་ཀྱི་བྱེད་སྒོ་ཁག་ལ་དམ་བསྒྲགས་དང་ཐེ་བྱུས་བྱེད་བཞིན་པ་འཕྲལ་དུ་མཚམས་འཇོག་གིས། བོད་ཀྱི་ས་ཁུལ་ཁག་གི་ཆོས་དང་བདེ་འཇགས་སྲིད་བྱུས་ལ་བསྐྱར་ཞིབ་བྱས་ཏེ། ༸ཏཱ་ལའི་བླ་མ་མཆོག་དང་གྲོས་མོལ་བསྐྱར་གསོ་གནང་དགོས། གསུམ་པ། རྒྱ་གཞུང་གི་བཙོན་ཁང་དུ་ཡོད་པའི་བོད་ཀྱི་ཆབ་སྲིད་བཙོན་པ་རྣམས་གློད་གྲོལ་གཏོང་དགོས་རྒྱུ་དང་། ཞི་རྒོལ་ནང་ཞུགས་མཁན་བོད་མི་ཚོར་འཇིགས་སྐུལ་དང་སུན་གཙེར་བཟོ་རྒྱུར་མཚམས་འཇོག་བྱས་ཏེ། ཆ་རྐྱེན་གང་ཡང་མེད་པར་བོད་ནང་རྒྱལ་སྤྱིའི་གསར་འགོད་པ་དང་གཞུང་འབྲེལ་མི་སྣ། ཕྱི་རྒྱལ་སྐུ་ཚབ། རྒྱལ་སྤྱིའི་ཚོགས་པ་ཁག་གི་འཐུས་མི་བཅས་ཡོང་དུ་འཇུག་དགོས་རྒྱུ།
བཞི་བ། ༸ཏཱ་ལའི་བླ་མ་མཆོག་གིས་ཆབ་སྲིད་སྐུ་དབང་ཡོངས་རྫོགས་མི་མང་གིས་བདམས་པའི་མགོ་ཁྲིད་ལ་རྩིས་སྤྲོད་གནང་སྟེ། ད་ཆར་བོད་མི་རྣམས་ཡང་དག་པའི་མང་གཙོའི་ལམ་ལུགས་ཐོག་ཤར་སྐྱོད་བཞིན་པའི་མཛད་རྗེས་ལ་བསྔགས་བརྗོད་བྱ་རྒྱུ། ལྔ་པ། ༢༠༡༡ ཟླ་ ༣ ཚེས་ ༢༠ཉིན་བོད་མི་བཙན་བྱོལ་བ་ཚོས་དྲང་བདེན་དང་རྒྱལ་སྤྱིའི་གནས་བབ་ལྡན་པའི་མང་གཙོའི་འོས་ཤོག་འཕེན་རྒྱུའི་ལས་འགུལ་ཐོག་མཉམ་ཞུགས་གནང་བར་བསྔགས་བརྗོད་ཞུ་རྒྱུ། དྲུག་པ། བོད་མི་དམངས་དང་ཨ་རིའི་མི་དམངས་བར་གྱི་མཛའ་བརྩེའི་འབྲེལ་ལམ་སྔར་ལས་སྲ༌བརྟན་གོང་འཕེལ་གཏོང་རྒྱུ་བཅས་ཡིན་འདུག
གོང་ཞུས་དེ་དག་ཐམས་ཅད་ཕྱག་ལེན་ལ་ཐེབས་པར་ཅི་ནས་ཀྱང་བཀའ་དྲིན་སྐྱོང་བར་ཞུ།
དྲ་གྲོགས་ཚོས་གངས་ཟླའི་སྐད་ཆ་དེར་བགྲོ་གླེང་ཞིག་བྱས་ན་ཅི་འདྲ་འདུག ངས་ནི་འདི་ལ་དགེ་མཚན་ཆེ་བར་མཐོང་གི་འདུག
བོད་དོན་ཐད་གྲོས་ཆོད་འདི་འདྲ་གནང་བར་སྙིང་ནས་ཐུགས་རྗེ་ཆེ་ཞུ་འདོད་བྱུང་སོང་། སྤྱིར་བཤད་ན་ཨ་རི་ནི་འཛམ་གླིང་ནང་ཆེས་སྟོབས་ཆེན་རྒྱལ་ཁབ་ཞིག་ཡིན་པས། ཉམས་ཆུང་གི་མི་རིགས་ཁག་གིས་ཀྱང་ཨ་རི་ལྟ་བུའི་རྒྱལ་ཁབ་ཆེན་པོ་དག་ལ་རེ་བ་ཆེན་པོ་བཞག་ཡོད་པ་རེད།དེང་སང་རང་ལུས་མེར་བསྲེགས་ཀྱི་ཐད་ནས་གསར་ལམ་ཁག་ཏུ་ཧ་ཅང་བཟང་དང་ངན་གྱི་སྐད་ཆ་རྒྱུ་མཚན་ཡོད་མེད་སྣ་ཚོགས་ཤིག་བཤད་ཀྱིན་འདུག རྒྱ་ནག་ཕྱོགས་ནས་མཐའ་གཅིག་ཏུ་དོན་རྐྱེན་འདི་ཏཱ་ལའི་བླ་མར་འབྲེལ་བ་ཡོད་རབས་དང་། འདི་ནང་ཆོས་ཀྱི་དགོངས་དོན་དང་འགལ་ཡོད་རབས་ཀྱི་སྐད་ཆ་ཁུངས་མེད་ལུང་མེད་སྣ་ཚོགས་ཤིག་ཅི་འདོད་དུ་གསར་ལམ་ཁག་ཏུ་སྤེལ་བཞིན་པ་དང་། ཉེ་བའི་ཆར་མཚོ་སྔོན་བརྙན་འཕྲིན་ཁང་གིས་ཀྱང་དེང་བོད་ཁུལ་གྱི་གྲྭ་བཙུན་འགའ་ཞིག་གིས་འཆམ་མཐུན་གྱི་སྤྱི་ཚོགས་ལ་གཏོར་བརླག་བྱེད་ཀྱིན་འདུག་རབས་ཀྱི་སྐད་ཆ་ནང་ཆོས་ཀྱི་དགོངས་དོན་དང་མཐའ་གཅིག་ཏུ་རྒྱབ་འགལ་དུ་སོང་ཡོད་པ་ཞིག་ནང་ཆོས་ཀྱི་དགོངས་དོན་དུ་སྨྲ་བཞིན་མགོ་བོ་འཁོར་ནས་ཡོད་པའི་སྐབས་རེད། དེ་ནི་དོན་དངོས་ཀྱི་བདེན་པ་དེའི་ཆེད་དུ་སྐུ་ལུས་མཆོད་མེད་སྒྲོན་གྱིན་ཡོད་དཔའ་བོ་དཔའ་མོ་སྐོར་ཞིག་གི་ཕྱག་ལས་གནང་སྟངས་རྒྱ་དམར་གཞུང་གི་སྣང་བར་མ་སོང་བ་རེད། སྐད་ཆ་དེ་དག་ཡི་གེར་འབྲི་མཁན་ནི་མགོ་ལོག་ཁུལ་གྱི་བླ་མ་ཞིག་བྲིས་པ་ཡིན་རབས་ཤིག་བརྙན་འཕྲིན་ཁང་རང་གི་གསར་འགྱུར་སྒྲོག་འདོན་བྱེད་མཁན་དག་གིས་བཤད་ཀྱིན་འདུག་ལ། བོད་ཁུལ་གྱི་རོང་འབྲོག་མང་ཚོགས་མགོ་རྨོངས་མི་ཉན་རབས་ཀྱི་སློབས་གསོ་འཇིགས་སུ་རུང་བ་ཞིག་སྤེལ་གྱིན་འདུག་པས། ང་ཚོས་སློབ་གསོ་འདི་དག་གི་ཁ་གཏད་དུ་བོད་ཕྱི་ཕྱོགས་ཀྱི་གསར་ལམ་ཁག་ཨ་རིའི་རླུང་འཕྲིན་ཁང་དང་ཨེ་ཤ་ཡ་རང་དབང་རླུང་འཕྲིན་ཁང་སོགས་གཙོ་བྱས་ནས་རླུང་འཕྲིན་དང་བརྙན་འཕྲིན་གྱི་གསར་ལམ་ཁག་ནས་བོད་ནང་གི་རོང་འབྲོག་མང་ཚོགས་ཚོར་ཡང་ཁྱེད་ཅག་མགོ་མི་རྨོངས་བར་བོད་ཕྱི་ཕྱོགས་ཀྱི་གསར་ལམ་ཁག་ལ་ཉན་ཅི་ཐུབ་ཀྱི་སྐུལ་མ་དང་། གསར་ལམ་ཁག་གིས་ཀྱང་བོད་ནང་གི་ཁུངས་མེད་ལུང་མེད་ཀྱི་སྐད་ཆ་རོང་འབྲོག་མང་ཚོགས་ཀྱི་མགོ་བོ་རྨོངས་སུ་འཇུག་བྱེད་ཀྱི་གསར་འགྱུར་རྫུན་མ་དག་གི་ཁ་གཏད་དུ་ལས་འགུལ་གསར་བ་ཞིག་གྲ་སྒྲིག་བྱེད་ཐུབ་ན་དགེ་མཚན་ཧ་ཅང་ཆེ་བར་འདོད། སྐད་ཆ་འདི་ནི་ཆེད་དུ་བོད་ཕྱི་ཕྱོགས་ཀྱི་གསར་ལམ་ཁག་ཏུ་ཕྱག་ལས་གནང་མཁན་ཚོར་གསལ་འདེབས་ཤིག་གི་ཚུལ་དུ་གངས་ཟླས་བྲིས་པ་ཡིན།
མེ་མཆོད་སོ་གཅིག་གི་མཚམས་སུ་འདི་ལྟར་གཞུང་འབྲེལ་བཀའ་བསྡུར་གནང་བར་ཐུགས་རྗེ་ཆེ།
དྲུག་པ་མཛའ་འབྲེལ་ཆེད་སླར་ཡང་བོད་མི་ཆིག་སྟོང་ཞིག་གཞིས་ཆགས་སུ་བླང་རོག
བོད་ལ་མིང་དོན་མཚུངས་པའི་རང་སྲིད་རང་སྐྱོར་སྐོར་གྲོས་ཆོད་འཇོག་ཕོད་མི་འདུག གོང་ས་མཆོག་དང་ཆོས་དད་རང་མོས་གཅིག་པུས་བོད་མི་རིགས་ཀྱི་རྩ་དོན་དང་བདེན་འཇག་སོགས་ལ་མི་འགྲིགས་པར་སེམས།
གྲོས་ཆོད་དེའི་ནང་སྙིང་དང་ལས་འགུལ་བའི་གནས་སྐབས་ཀྱི་བསམ་འདུན་གཉིས་མཐུན་ཡོད་ནའང་གྲོས་ཆོད་དེ་ཤོག་བུའི་སྟེང་གི་ཡི་གེ་ཙམ་ཏུ་མི་འགྱུར་བར་ཤོག