འཇམ་དཔལ་གྱི་རང་སྲེག་ལས་འགུལ་དེ་༸གོང་ས་མཆོག་གིས་བརྒྱུད་སྐུལ་གནང་ཚུལ་བརྗོད་པ་ནི་རྒྱུ་མཚན་བྲལ་བའི་སྨྱོ་གཏམ་ཞིག་རེད།
ཨ་མ་ཐི་ཝ། སན་ཡལ་གྱིས་བརྩམས། སྐྱིད་བྱམས་བསྟན་འཛིན་དགའ་བས་བསྒྱུར།
ཕྱོགས་ཐམས་ཅད་ནས་འཇམ་དཔལ་ཡེ་ཤེས་ནི་མི་དཀྱུས་མ་ཞིག་རེད། ཁོང་གི་པ་ལགས་བོད་ཤར་ཕྱོགས་སི་ཁྲོན་ཞིང་ཆེན་ཁོངས་ཀྱི་ཞིང་པ་ཞིག་ཡིན་པ་དང་། ཁོང་གཤེགས་དུས་འཇམ་དཔལ་ཡེ་ཤེས་དགུང་ལོ་ཆུང་ཆུང་ཡིན་པ་རེད། འཇམ་དཔལ་ཡེ་ཤེས་ཀྱིས་རང་ལོ་ཉི་ཤུ་རྩ་གཉིས་ཐོག་ཨ་མའི་ཐུགས་འདོད་ལྟར་དངུལ་ཅུང་ཟད་ཡོད་པ་དག་རྒྱ་མའི་ལས་བྱེད་ལ་ལྐོག་རྔན་སྤྲད་དེ། སྤུན་མཆེད་བུ་གསུམ་དང་བུ་མོ་གཅིག་ཡོད་པ་དག་ཤུལ་དུ་བསྐྱུར་ནས་རྒྱ་གར་ལ་བྲོས་བྱོལ་དུ་ཡོང་བ་རེད།
ཁོང་གི་གྲོགས་པོ་དང་སྤུན་མཆེད་ཚོས་དྲན་པ་ལྟར་ན་ཁོང་རྒྱུན་པར་དེབ་གཅིག་པུར་མགོ་འཁོར་ནས་སྡོད་མཁན་ཞིག་ཡིན་སྟབས། བོད་ཀྱི་ནང་ཆོས་དང་རྒྱལ་རབས་ཐོག་ཁོང་གིས་རོགས་པ་ཚོ་ལས་འགྲེལ་བཤད་ཟབ་པ་སྐྱོན་རྒྱུ་ཡོད་པ་རེད་ཟེར། ད་དུང་ཁོ་ཚོས་བརྗོད་རྒྱུར་འཇལ་དཔལ་ཡེ་ཤེས་ལགས་གལ་སྲིད་རྩམ་པ་དང་ཀྲེང་མོག་ཟ་རྒྱུ་མེད་ན་ལྟད་མོ་དང་གཞས་སོགས་ལ་དོ་སྣང་དེ་ཙམ་བྱེད་ཀྱི་མ་རེད་ལ། ཁོང་གིས་དགའ་མོས་ཆེ་ཤོས་བྱ་ཡུལ་ནི་གྲོགས་པོ་ཚོའི་སྣང་བརྙན་རི་མོའི་ལམ་ནས་འབྲི་རྒྱུ་དང་། རྒྱུས་མངའ་ལྡན་པའི་ནང་ཆོས་དང་ཆབ་སྲིད་ཐོག་བགྲོ་གླེང་བྱ་རྒྱུ་དེ་རེད་ཟེར།
ཕྱི་ཟླ་ ༣ པའི་ཚེས་ ༢༥ དགོང་དྲོར་ཁོང་གིས་རང་གི་གྲོགས་པ་རྙིང་པ་ཞིག་ལ་སང་ཉིན་ཧུའུ་ཅིང་ཐའོ་ལ་ངོ་རྒོལ་སྐད་འབོད་བྱེད་དུས་ལག་ཐོག་ཁ་པར་སྒོ་རྒྱག་རྒྱུ་ཡིན་ཚུལ་བརྗོད་འདུག་ལ། རེས་གཟའ་ཟླ་བའི་ཉིན་རྒྱབ་ཙམ་ལ་ཁོང་གིས་ས་སྣུམ་རང་ལུས་ལ་བྱུགས་ཏེ་མི་གཞན་རྣམས་རང་གི་ཉེ་འཁྲིས་སུ་མ་སླེབས་ཙམ་ལ་རང་སྲེག་གནང་ཞིང་། ཁོང་གིས་སྐུ་གཟུགས་ཧྲིལ་བོ་འཚིགས་ནས་ས་སྟེང་དུ་མ་འགྱེལ་བར་མི་ཌར་བརྒྱ་ཙམ་ཞུགས་མེ་འབར་བཞིན་དུ་རྒྱུགས་པ་རེད།
བརྒྱ་ཆ་དགུ་བཅུ་གོ་བརྒྱད་ཙམ་ཡོངས་སུ་འཚིགས་པའི་ཁོང་གི་སྐུ་ཕུང་དེ་སྨན་ཁང་དུ་ཁྱེར་རུང་། རེས་གཟའ་ལྷག་པའི་སྔ་དྲོའི་ཆུ་ཚོད་བདུན་དང་ཕྱེད་ཀའི་ཐོག་ཁོང་དགོངས་པ་གཞན་དོན་དུ་གཤེགས་པ་རེད། ཡིད་སྐྱོ་ཞིང་ཕུལ་དུ་བྱུང་བའི་མཛད་སྤྱོད་དེས་ཁོང་ཕྱི་ལོ་ ༢༠༠༩ ཟླ་ ༢ ཚེས་ ༢༧ ནས་དེ་རིང་བར་བོད་ནང་རྒྱ་ནག་སྲིད་གཞུང་གིས་སྤེལ་བཞིན་པའི་སྲིད་བྱུས་དག་ལ་རང་སྲེག་གི་ངོ་རྒོལ་གནང་བ་ཐེངས་སུམ་ཅུ་སོ་གཅིག་པ་དེ་ཆགས་ཀྱི་ཡོད། དེར་བརྟེན་ཁོང་མི་དཀྱུས་མའི་ངོ་བོར་རྒྱུན་རིང་གནས་ཀྱི་མ་རེད། ཁོང་གིས་འཛམ་གླིང་གི་མདུན་སར་རང་དབང་འཐབ་རྩོད་ཀྱི་གཟུགས་བརྙན་དེ་འབུར་དུ་བཏོན་ཐུབ་པ་བྱུང་བ་རེད།
ཕྱི་ཟླ་ ༣ ཚེས་ ༡༦ ཉིན་བྲིས་ཤིང་ཁ་བྱང་དུ་“ཆོལ་གསུམ་བོད་རིགས་སྤུན་ཟླ་”ཞེས་བཏགས་པའི་ཡི་གེ་ཞིག་ཁོང་གི་ཉལ་ཁང་ནས་རྙེད་སོན་བྱུང་ཡོད། ཡི་གེ་དེའི་ནང་“རང་དབང་མེད་ན་ས་ཡ་དྲུག་གི་བོད་རིགས་རྣམས་ཁ་ཕྱོགས་བྲལ་བའི་རླུང་ཁྲོད་ཀྱི་མར་མེ་བཞིན་”རེད་ཅེས་སོགས་འཁོད་ཡོད།
ང་ཚོས་ངེས་པར་དུ་དྲན་དགོས་པ་ཞིག་ལ་ཕྱི་ལོ་༢༠༡༠ཟླ་བ་ ༡༢ པའི་ནང་རང་ལོ་ཉེར་དྲུག་ལ་སོན་པའི་ཨ་རབ་པ་ཞིག་གིས་ཀྲུ་ན་ཤི་ཡའི་ཧའོ་ཁར་མོ་ཧ་མི་ཌི་བོ་ཨ་ཛི་ཛི་སྲང་ལམ་དུ་རང་སྲེག་བཏང་བ་དེས་ཨ་རབ་དཔྱིད་ཀ་ཞེས་པའི་ཡར་ལངས་དེའི་སྣེ་འཁྲིད་བརྩམས་ཡོད། འཇམ་དཔལ་ཡེ་ཤེས་ཀྱང་ཝི་ཐི་ནམ་སས་གྷོན་ནས་ཡིན་པའི་རང་ལོ་སུམ་ཅུ་སོ་བཞིར་ཕེབས་པའི་ནང་པའི་གྲྭ་པ་ན་ཐི་ཆི་མ་འོས་ཕྱི་ལོ་ ༡༩༦༧ ལོར་རང་སྲེག་བཏང་བ་དེས་ནུབ་ཕྱོགས་ཡུལ་གྲུའི་ནང་ཝི་ཐི་ནམ་གྱི་སྲིད་བྱུས་ཐོག་ལ་གླེང་སློང་ཤུགས་ཆེར་བཟོས་པ་བཞིན་ཕུལ་བྱུང་གི་མི་སྣའི་གྲས་སུ་ཚུད་པ་རེད།
ལོ་རྒྱུས་ཀྱི་དོན་དངོས་འདིས་གཞན་དག་སུ་ཞིག་ལའང་གནོད་སྐྱོན་གཏོང་འདོད་མེད་པའི་མི་སྣ་མང་པོ་ཞིག་ལ་རང་ཉིད་གཅིག་པུས་བྱ་སྤྱོད་འདི་ལྟར་སྤེལ་རྒྱུར་སྙིང་སྟོབས་སྐྱེ་བཞིན་ཡོད། འདི་ནི་ཁོ་ཚོས་གཞན་གྱིས་དེ་ལྟ་བུའི་སྡུག་སྦྱོང་མནར་གཅོད་གཏོང་བའི་རྒྱུ་རྐྱེན་ལ་དོ་སྣང་འདྲེན་ཕྱིར་དུ་གློ་བུར་རང་སྲེག་ངོ་རྒོལ་གནང་བ་ཞིག་རེད། དེ་ལྟ་ནའང་འཇམ་དཔལ་ཡེ་ཤེས་ཀྱིས་རང་སྲེག་ལས་འགུལ་དེ་ནི་༸གོང་ས་མཆོག་གིས་ཐད་ཀར་བརྒྱུད་སྐུལ་གནང་བ་ཞིག་ཡིན་པར་རྒྱ་ནག་སྲིད་གཞུང་གི་ལས་བྱེད་འགའ་ཞིག་གིས་བརྗོད་ཡོད། དེ་ནི་རྒྱུ་མཚན་བྲལ་བའི་སྨྱོ་གཏམ་ཞིག་རེད།
དེ་ནི་སུ་ཞིག་གིས་ཀྱང་དེ་ལྟར་བྱ་དགོས་པའི་བརྒྱུད་སྐུལ་གནང་ཡོད་པ་མ་རེད། གནས་སྐབས་རིང་༸གོང་ས་མཆོག་གི་ཡིག་ཚང་ནས་རང་སྲེག་ལས་འགུལ་ལ་འགག་བྱ་གནང་མིན་སྐོར་བཞག་ནས། ༸རྒྱལ་བ་བསྟན་འཛིན་རྒྱ་མཚོར་ཐུགས་བསམ་ཞིག་བཞེས་དང་། ཁོང་ད་ལྟ་༸གོང་ས་ཏཱ་ལའི་བླ་མ་རེད། ཁོང་དགོད་སྤྲོ་བོ་ཞིག་ཡོད་པ་ཚང་མས་ཤེས་ཀྱི་ཡོད་པ་རེད། མ་ཟད་ཁོང་ནི་སྐུ་ཚེ་ཧྲིལ་པོར་འཛམ་གླིང་ཞི་བདེའི་ཆེད་དུ་ཐུགས་སྨོན་སྐྱོན་ནས་བཞུགས་མཁན་གྱི་ནང་པའི་གྲྭ་པ་ཞིག་རེད།
(བུ་རྩོམ་ཐོག་དོགས་གནས་ཡོད་ཚེ་རེས་གཟའ་ཕུར་བུའི་ཉིན་གྱི་རྒྱ་གར་དུས་བབ་ཐོག་བཀོད་གནང་བའི་མ་རྩོམ་དེར་གཟིགས་ཞིབ་གནང་སྐྱོང་ཡོང་བ་ཞུ།)
