བོད་ཨ་མདོ་རྔ་བ་གཙོས་པའི་དེ་རིང་ནི་བོད་ཕྱི་ནང་གི་རྟུལ་ཕོད་པ་དག་གིས་འབོད་སྒྲ་འདི་ (གོང་ས་མཆོག་བོད་ལ་གདན་འདྲེན་དགོས། བོད་ལ་རང་དབང་དགོས། མང་ཆེ་བ།)བསྒྲགས་ཏེ་བོད་མི་རིགས་ཀྱི་བདེ་སྡུག་གི་སླད་དུ་རང་ལུས་མཆོད་མེར་ཕུལ་ཐེངས་སོ་བཞི་པ་རེད། ཡིན་ཡང་མཚམས་འདི་ནས་འུ་ཚོའི་ལས་འགུལ་འདིའི་མཇུག་འབྲས་དང་ཚེ་སྲོག་གི་རིན་ཐང་ལ་བསམ་ནས་ལས་འགུལ་འདི་མཚམས་འཇོག་དགོས་མིན་གྱིི་བསམ་ཚུལ་ཤེས་དང་མི་ཤེས་ཀུན་ལ་ཡོང་གི་ཡོད་པས། ངས་ཀྱང་ཀློག་མཁན་དག་ལ་བསམ་ཚུལ་འགའ་དཔྱད་གཞིའི་ཚུལ་དུ་འབུལ་རྒྱུ་ཡིན།
༡༽ ཇི་ལྟར་བལྟས་པ། ཚེ་སྲོག་གི་རིན་ཐང་དེ་ཤི་གསོན་གང་ན་ཡོད་མེད་བལྟས་པ། (མང་པོ་ཞིག་གིས་ཚེ་སྲོག་གི་རིན་ཐང་གླེང་དུས་གསོན་པོ་ཁོ་ན་མ་གཏོགས་གཤིན་པོ་ལ་གླེང་ཐུབ་ཀི་མེད་པ་འདྲ།) ཚེ་སྲོག་ལ་ལ་ནི་གསོན་པ་ལས་ཀྱང་ཤི་བ་རླབས་ཆེ་བ་དང་སྟོབས་ཤུགས་ཐོན་གྱིན་ཡོད་པ། (ཚེ་སྲོག་གི་ངོ་བོ་ལ་རླབས་ཆེན་ཡིན་མིན་དང་སྟོབས་ཤུགས་ཡོད་མེད་ཀྱི་ཁྱད་བཀར་བ་མིན)
ངས་དཔེར་མཚོན་གྱི་ཚུལ་དུ་རྒྱང་རིང་ས་ཞིག་ནས་མང་པོ་ཞིག་བཤད་མི་དགོས་པར་ཉེ་བའི་ལོ་འདི་དག་གི་ནང་དུ་བོད་ཙམ་མིན་པར། མོ་ཧ་མ་ཊི་བྷོ་ཛི་ཛིའི་ཚེ་སྲོག་གཅིག་གིས་ཀྱང་ཨ་རབ་ཀྱི་དཔྱིད་ཀ་བསུ་ཐུབ་པ་ལྟ་བུའི་རང་དབང་དང་དམངས་གཙོའི་སླད་དུ་ཚེ་སྲོག་འབུལ་མཁན་དག་ལ་བལྟས་ཀྱང་གསལ་ལྷང་ངེ་རེད་འདུག རྒྱབ་ལྗོངས་དེ་དག་གཞི་ལ་བཞག་ནས་རང་ལུས་མེར་སྲེག་གི་ལས་འགུལ་འདི་ཆེན་པོ་སུ་ཞིག་གིས་སྐུལ་སློང་བྱས་པའི་སྒོ་ནས་མཚམས་འཇོག་བྱ་མི་ཉན་པའི་ལྟ་ཚུལ་བརྗོད་རྒྱུ་ཡིན་ཏེ། རྒྱུ་མཚན། ཚེ་སྲོག་ལ་ལ་ཞིག་ནི་གསོན་པ་ལས་ཀྱང་ཤི་བ་རླབས་ཆེན་དང་ནུས་ཤུགས་ཐོན་གྱིན་ཡོད་པའི་ཕྱིར་ཞེས་གཏན་ཚིག་འགོད་རྒྱུ་ཡིན། ངས་རང་ཉིད་ཀྱི་ལྟ་ཚུལ་དེ་འུ་ཚོའི་སྲོལ་རྒྱུན་གཏན་ཚིག་གི་འགྲོ་ལུགས་གཞིར་བཞག་སྟེ་གསལ་བོ་བཟོས་ན་འདི་ལྟར། བོད་མི་རིགས་ཀྱི་བདེ་སྡུག་གི་སླད་དུ་རང་ལུས་མེར་སྲེག་པ་དེ་ཆོས་ཅན། ཆེན་པོ་སུ་ཞིག་གིས་སྐུལ་སློང་གི་སྒོ་ནས་མཚམས་འཇོག་བྱ་མི་ཉན་ཏེ། ཚེ་སྲོག་ལ་ལ་ཞིག་གསོན་པ་ལས་ཀྱང་ཤི་བ་རླབས་ཆེན་དང་ནུས་ཤུགས་ཐོན་གྱིན་ཡོད་པའི་ཕྱིར་ཞེས་པ་དེ་རེད།
༢༽ ཇི་ལྟར་བལྟས་པ། མེར་སྲེག་གིས་མཇུག་འབྲས་ཐོན་གྱིན་ཡོད་མེད་བལྟས་པ།
གཞན་རྟེན་བསམ་བློ་བ་དང་མགོ་འདོག་རིང་ལུགས་པས་ནམ་རྒྱུན་ལག་ཟུང་གཞན་ལ་བསྐྱངས་རྐྱང་དང་། རང་གི་མགོ་བོ་སྨད་དེ་འདུག་པ་ལས་བོད་མི་རིགས་རང་ཉིད་ལ་བོད་དོན་འཐབ་རྩོད་ཀྱི་སྟོབས་ཤུགས་རླབས་ཆེན་ཡོད་པ་ངོས་མི་ཟིན་པ་དང་ཡིད་ཆེས་བྱེད་ཀྱིན་མེད་པ་འདྲ་སྟེ། རྒྱུ་མཚན། ཁོ་བ་ཚོས་མེར་སྲེག་དོན་རྐྱེན་འདིས་ཀྱང་མཇུག་འབྲས་མཐོང་མི་ཐུབ་པ་ནི་རྒྱལ་སྤྱིས་རོགས་རམ་ལ་རྟེན་ནས་རང་དབང་དང་དམངས་གཙོ་ཟེར་བ་དེ་འུ་ཚོའི་ལག་ལ་བཞག་ཡོང་རྒྱུ་འདྲ་བོ་ཞིག་ལ་བསམ་བློ་བཏང་ཡོད་པའི་ལན་ཁོ་ན་རེད་པས། དེ་ནི་རྦད་དེ་ནོར་འཁྲུལ་གྱི་ལྟ་ཚུལ་ཞིག་ཏུ་ངོས་ཟིན་དགོས། རྒྱུ་མཚན། བོད་དོན་འཐབ་རྩོད་ཀྱི་སྟོབས་ཤུགས་རླབས་ཆེན་ཡོད་ས་ཨང་དང་པོ་བོད་མི་རིགས་རང་ཉིད་ཡིན་པས་ལས་གཞན་སུ་གང་ཡང་མིན་པས་སོ། གནས་ལུགས་དེ་གཞིར་བཞག་ནས་བཤད་ན་མེར་སྲེག་དོན་རྐྱེན་གཙོས་བོད་ཕྱི་ནང་གི་ལས་འགུལ་འདི་ཚོས་བོད་མི་རིགས་རང་ཉིད་ལ་བོད་དོན་འཐབ་རྩོད་ཀྱི་ནུས་ཤུགས་རླབས་ཆེན་སྐྲུན་གྱིན་ཡོད་པ། ཉེ་བའི་ལོ་ཁ་ཤས་ཀྱི་ནང་དུ། མི་རིགས་གཅིག་གྱུར་གྱི་བསམ་བློ། བདག་དབང་འཐབ་རྩོད་ཀྱི་ངར་ཤུགས་སོགས་ཆེས་རླབས་ཆེན་གྱི་སྟོབས་ཤུགས་དག་བསྐྲུན་དང་སྐྲུན་བཞིན་བོད་དོན་འཐབ་རྩོད་ཀྱི་གོམ་པ་ཆེན་པོ་འགའ་མདུན་ནས་མདུན་དུ་སྤོ་བཞིན་ཡོད་པ་ནི་རྒྱལ་ཁབ་ཁ་ཤས་ཀྱི་གསར་འགོད་སྒྲག་གཏམ་དང་གྲོས་ཆོད་འགའ་བཞག་པ་ལས་མཇུག་འབྲས་རླབས་ཆེན་དང་སྟོབས་ཤུགས་བརྟན་པོ་ཡིན་པ་རེད། རང་རེའི་གཏན་ཚིག་གི་འགྲོས་ལྟར་བརྗོད་ན། བོད་མི་རིགས་ཀྱི་བདེ་སྡུག་གི་སླད་དུ་རང་ལུས་མེར་སྲེག་པ་དེ་ཆོས་ཅན། མཇུག་འབྲས་རླབས་ཆེན་ཡོད་དེ། མི་རིགས་གཅིག་གྱུར་གྱི་བསམ་བློ། བདག་དབང་འཐབ་རྩོད་ཀྱི་ངར་ཤུགས་སྐྲུན་གྱིན་ཡོད་པའི་ཕྱིར།
མི་རིགས་ཤིག་གི་འཐབ་རྩོད་ལ་ཚེ་སྲོག་གི་འགྲོ་གྲོན་མ་བཏང་བ་ལོ་རྒྱུས་ཡིག་ཚང་ན་ཡོད་ཚོད་མི་འདུག་ལ། ད་ལྟ་ཡང་མེད་ལ། མ་འོངས་པ་ནའང་ཡོད་མི་སྲིད་པ་ཞིག་རེད་པས། འུ་ཚོའི་ཚེ་སྲོག་གིས་འཐབ་རྩོད་བྱེད་མཁན་ཚོས་ཚེ་སྲོག་གིས་འཐབ་རྩོད་བྱོས། རྒྱལ་སྤྱི་ལ་རོགས་རམ་སློང་མཁན་ཚོས་རྒྱལ་སྤྱི་ལ་རོགས་རམ་སློངས། རྒྱ་ནག་ལ་གདོང་གཏོད་མཁན་ཚོས་རྒྱ་ནག་ལ་གདོང་གཏོད། ཆོས་རིག་སྲུང་སྐྱོབ་ལ་འབད་མཁན་ཚོས་ཆོས་རིག་སྲུང་སྐྱོབ་ལ་འབོད། ཕྱོགས་ཡོངས་ནས་ཧུར་ཐག་བྱེད་དགོས་པ་ལས་ཕྱོགས་རེའི་མིག་ཅན་ལ་ལྷུང་མི་ཉན་པར་སེམས།
དྲང་ལྡོག་ཅི་རིགས་ཀྱིས་སྒོ་ནས་བསམ་ཚུལ་འདོན་མཁན་ཡོངས་ལ་གུས་བརྩི་བཀུར་བྱེད་རྒྱུ་ཡིན། ཡིན་ནའང་། སྐབས་སྐབས་སུ་དོན་ཚན་རེ་འགའ་ལ་གསེད་བཀྲོལ་བྱས་པའི་སྒོ་ནས་བསྡུར་ཆོག་པར་གྱིས།
༡. བོད་རྒྱའི་འཐབ་རྩོད་ཀྱི་གནས་སྟངས་སྒོ་ཀུན་ནས་མཚུངས་ཞེས་སུ་ཞིག་གིས་ཀྱང་སྨྲས་མེད་པ་དེ་གཅིག་ཡིན། གཉིས་ནས་རྩ་བ་ཉིད་ནས་བསྡུར་མི་རུང་བ་གཏན་ནས་མིན་ཏེ་འཐབ་རྩོད་ཀྱི་ཐབས་ལམ་འཚེ་མེད་ཞི་བ་ཡིན་པ་སོགས་མང་དག་བསྡུར་དགོས་ལ།
༢. ངས་ཆེན་པོ་སུ་ཞིག་གིས་སྐུལ་སློང་གི་སྒོ་ནས་མཚམས་འཇོག་མི་ཉན་པའི་ལྟ་ཚུལ་བརྗོད་པ་ལས་རང་འགུལ་གྱིས་མཚམས་འཇོག་མི་ཉན་པ་དང་མེར་སྲེག་མུ་འཐུད་དགོས་པའི་སྐུལ་སློང་གང་ཡང་བྱས་མེད་པ་ཚུལ་གསུམ་ལ་གསེད་བཀྲོལ་བྱོས་དང་ཤེས་ཡོང།
༣. མ་གཞི་བོད་ནང་གི་ལས་འགུལ་ལ་བཙན་བྱོལ་གྱིས་སྐུལ་སློང་མི་ཉན་པ་དང་མི་ཆོག་གཏན་ནས་མིན། བཙན་བྱོལ་གྱིས་འཆར་གཞི་དང་སྒྲིག་འཛུགས་ཡོད་པའི་སྒོ་ནས་བོད་ནང་ལ་ཡོངས་གྲགས་ཀྱིས་ལས་འགུལ་ལ་སྐུལ་སློང་དགོས་ངེས་ཡིན་ཏེ། རྒྱུ་མཚན། བོད་ནང་གི་བོད་མི་ཚོས་འཆར་གཞི་དང་སྒྲིག་འཛུགས་ཡོངས་གྲགས་ཀྱི་སྒོ་ནས་ལས་འགུལ་སྤེལ་ཐུབ་ཀི་མེད་པའི་རྒྱུ་མཚན་གྱིས་མེར་སྲེག་ལས་འགུལ་དང་སྐད་འབོད་ཁྲོམ་སྐོར་སོགས། རྒྱལ་སྤྱི་ཡི་མིག་གིས་ལས་འགུལ་ཚད་ལྡན་ཞིག་ཏུ་མཐོང་མ་ཐུབ་པ་རེད། དེ་བརྟེན། བྷོ་ཛི་ཛིས་རང་སྲོག་གཅིག་གིས་ཀྱང་ཨ་རབ་ཀྱི་དཔྱིད་ཀའི་གསར་བརྗེ་སློང་ཐུབ་སོང་བ་ཡིན་ལ། བོད་མིའི་ཚེ་སྲོག་སུམ་བཅུ་ལྷག་གིས་ཀྱང”གངས་ལྷ་མེ་ཏོག་གི་གསར་བརྗེ”སློང་མ་ཐུབ་པའི་རྒྱུ་མཚན་གཙོ་གྲས་ཤིག་ངེས་པར་འདི་ཡིན་པར་སེམས་སོ།
སྔོན་རྒྱ་གར་གྱི་གནས་སྟངས་དང་ད་ལྟ་བོད་ཀྱི་གནས་བབ་གཉིས་རྩ་བ་ཉིད་ནས་བསྡུར་མི་རུང་། དབྱིན་འོག་ནས་རྒྱ་གར་ལ་རང་བཙན་ཐོབ་པའི་རྒྱུ་རྐྱེན་མང་པོ་ཡོད། གཅིག་ནི་དབང་བསྒྱུར་མཁན་གྱི་མི་འབོར་ལས་དབང་བསྒྱུར་བྱ་ཡུལ་གྱི་མི་འབོར་ལས་རྦད་དེ་མང་བ་ཡོད་པ་མ་ཟད། རྒྱ་གར་ནང་གི་དབྱིན་ཀི་བ་རྒྱ་གར་གྱི་མི་འབོར་ལས་བརྒྱ་ཆའི་གཉིས་ནས་གསུམ་ལས་ཟིན་གྱི་མེད། གཉིས་ནི། དབྱིན་གཞུང་གདུག་རྩུབ་ཇི་ལྟར་ཆེ་ཡང་རྒྱ་གཞུང་བཞིན་རྩ་བ་ནས་མེད། གསུམ་ནི། རྒྱ་གར་ནང་ཞི་དྲག་གཉིས་ཀྱི་སྣེ་ཁྲིད་ཡོད་པས་མ་ཚད་རྣོ་ངར་ལྡན་པའི་ལས་འགུལ་བསྟུད་མར་སྤེལ་བཞིན་ཡོད། བཞི་ནི། དབྱིན་ཡུལ་ལ། འཇར་མན་གྱི་དམག་དང་། ཉི་ཧོང་གི་དམག་གིས་བཙན་འཛུལ་བྱས་ཏེ་འ་ཆད་འུ་ཐུག་གི་གནས་ལ་ལྷུང་ཡོད། ལྔ་བ་ནི། སྐབས་དེར་ད་ལྟ་རྒྱ་ནག་གི་སྟོབས་ཤུགས་རྒྱལ་སྤྱིའི་སྒང་ལ་སླེབས་པ་བཞིན་དབྱིན་ཇིར་མེད། དྲུག་པ། དུས་རབས་ཀྱི་གནས་བབ་རྦད་དེ་ཐ་དད་རེད། ད་དུང་ཡང་རང་ལུས་མེ་སྲེག་ཉིས་སྟོང་ལས་བརྒལ་བར་གཏོང་དགོས་པའི་བསམ་ཚུལ་སྟོན་མཁན་དག་ལ་གདེང་ཚོད་ངེས་ཅན་ཞིག་མེད་ན། མིག་ཚ་བའི་ཐོག་ཏུ་ཁུ་ཚུར། ཟེར་བ་ལྟར། གྲངས་ཉུང་ཡིན་པའི་ཐོག་ཏུ་སྟོང་ཕྲག་མང་པོ་རང་སྲེག་དགོས་ཟེར་བ་དེ་སྡིག་པ་མིག་བཙུམ་ལས་མ་འདས། མེར་སྲེག་མི་གཏོང་བའི་འབོད་སྐུལ་མ་ཞུས་ནའང་། མེ་སྲེག་གཏོང་བར་ཀུན་སློང་བཅོས་མི་རུང་། དེ་བས་གཏང་སྙོམས་ལ་བཞག་ན་བཟང་། བོད་མི་རིགས་ཀྱི་བདེ་སྡུག་གི་སླད་དུ་རང་ལུས་མེར་སྲེག་གཏོང་ན། མཇུག་འབྲས་རླབས་ཆེན་དང་། མི་རིགས་གཅིག་གྱུར་གྱི་བསམ་བློ། བདག་དབང་འཐབ་རྩོད་ཀྱི་ངར་ཤུགས་སྐྲུན་གྱིན་ཡོད་ནའང་། གྲངས་ཀའི་ཁྱད་པར་ཨེ་ཡོད། གལ་སྲིད་གྲངས་ཀའི་ཁྱད་པར་ཡོད་ན ༥༩ ཡར་སྔོན་ནས་ད་བར་སྡུག་གྱོང་མནར་གཅོད་དང་། ཚེ་བཙོན་དམར་གསོད་དང་། རྐྱེན་ལམ་ལ་ཇི་ཙམ་བཏང་ཡོད་པ་ཚང་མས་མཁྱེན་གསལ་རེད། བློས་གཏོང་མང་དྲགས་མེད་ན་ཉུང་དྲགས་མེད། ཡིན་ཡང་། ངས་བློས་གཏོང་མཚམས་འཇོག་དགོས་ཞེས་བརྗོད་ཀྱི་མེད། འབྲས་བུ་ཐོབ་པའི་གདེང་མེད་ན་མིའི་ཚེ་སྲོག་ལ་འོལ་ཚོད་ཀྱི་འདི་བྱེད་འདི་བྱེད་མི་རུང་ཞེས་བརྗོད་མི་རུང་ཟེར་གྱི་ཡོད། ཡིན་ཡང་ཨེ་ཤ་ཡའི་རང་དབང་རླུང་འཕྲིན་ལས་༧ གོང་ས་མཆོག་ལ་མེ་སྲེག་སྐོར་གྱི་བཅར་འདྲིའི་ལན་ལ་གསན་ན་མེ་སྲེག་གི་ལས་འགུལ་ལ་ཕན་འབྲས་ཇི་ཙམ་ཐོན་མིན་རགས་ཙམ་རྟོགས་ཐུབ་ངེས་སོ།།
རྩོམ་པ་པོ་རྟུལ་ཕོད་ལགས་ལ་རྒྱབ་སྐྱོར་ཡོད། དངོས་གནས་རྩོམ་ཟེར་ནོ་བྲིས་འདུག
རིག་པ་འདོན་མཁན་ཚོས་༼་མི་ཆུང་སོགས༽ཀྱིས་རྩོམ་པ་པོས་༼ཕྱོགས་རེའི་མིག་ཅན་ལ་ལྷུང་མི་ཉན་པར་སེམས།༽ཟེར་བའི་རྩ་དོན་དེ་ལ་མཉམ་འཇོག་བྱེད་རོགས།
རྟུལ་ཕོད་ལགས། བྲིས་ནོ་ཧ་ཅང་བཟང་གི། གནས་ལུགས་དང་རྒྱུ་མཚན་ཡང་དག་ཡོད་ཁུ། ང་ལ་མཐའ་གཅིག་ཏུ་རྒྱབ་སྐྱོར་་ཡོད། མོས་མཐུན་ར་ཡོད། འདི་འདྲ་བྲིས་པར་ཐུགས་རྗེ་ཆེ་ཞུ།
གང་ལྟར་ཡང་ཆབ་སྲིད་ཀྱི་ལས་འགུལ་ལ་ཐབས་ཇུས་ཀྱིས་འཕོངས་མི་ཉན། ང་ཚོས་རང་ཉིད་གཅིག་པུས་ཇི་ཙམ་ཐོན་ཡང་རྒྱལ་སྤྱི་དང་། རྒྱལ་ཁབ་གཞན་གྱི་རྒྱབ་སྐྱོར་མེད་སོང་ན། རྒྱ་ཕྱོགས་ནས་བཏུབ་རྐྱང་དང་གསོད་རྐྱང་བྱེད་ཀྱི་རེད།
རྒྱབ་སྐྱོར་མི་དགོས་པར་སོ་སོ་གཅིག་པུ་འཐོན་པར་རང་ཉིད་ལ་དཔལ་འབྱོར་དང་མི་འབོར་སོགས་ཀྱི་སྟོབས་ཤུགས་དགོས་ཀྱི་ཡོད།
གཏན་ཚིག་ཚེ་སྲོག་ལ་ལ་ཞིག་ནི་ཞེས་པའི་ཚབ་དུ་ཚེ་སྲོག་ཕལ་ཆེ་བ་ཞིག་ནི་ཞེས་སྦྱར་ན་འོས་པར་སེམས། གང་ལག་ཞེ་ན་ཚེ་སྲོག་ཕལ་ཆེ་བ་ཞིག་ནི་འདི་ལྟ་བུའི་ལས་དོན་བརླབ་ཆེན་བཞག་ནས། སྤྱི་དོན་ཆུང་ངུ་ཙམ་ཡང་མི་འགྲུབ་པར་རང་གི་འཚོ་གོས་ཁོ་ནའི་ཆེད་དུ་འདུར་ནས་འཇུག་རྫོགས་བཞིན་པ་མིན་ནམ། དེ་འདྲའི་ཚེ་སྲོག་སྟོང་ཕྲག་ལས་ཀྱང་སྤྱི་དོན་དུ་མཆོད་མེར་ཕུལ་བའི་ཚེ་སྲོག་ཅིག་རིན་ཐང་ཆེ་བར་འདོད།
བོད་ནང་གི་རྩོམ་པ་པོས། “དེ་སྔོན་བོད་མི་རེ་འགས་མི་ ༡༥ ཙམ་གྱིས་རང་ལུས་མེར་བསྲེགས་བཏང་ཚེ། མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཐོག་དོ་སྣང་དང་འགན་ལེན་གྱི་ནུས་པ་ཞིག་ཡོང་ཐུབ་པའི་ཚོད་རྩིས་གནང་གི་ཡོད་པ་རེད། དེ་རྗེས་མི་ ༢༠ རང་ལུས་མེར་བསྲེགས་བཏང་རྗེས་རྒྱལ་སྤྱིའི་རྣམ་འགྱུར་ཅིག་ཡོང་རྒྱུར་རེ་བ་བཅངས་པ་རེད། ད་ལྟ་རང་ལུས་མེར་བསྲེགས་གཏོང་མཁན་ ༣༠ བརྒལ་ཚར་བ་རེད། ཡིན་ནའང་། ད་དུང་རྒྱལ་སྤྱིའི་སྤྱི་ཚོགས་ཀྱིས་འགན་ལེན་གྱི་རྣམ་འགྱུར་གསལ་བོ་ཞིག་བསྟན་ཡོད་པ་མ་རེད། ད་ལྟ་བོད་ནང་མི་རེ་འགས་རྒྱ་གར་གྱི་བླ་ན་མེད་པའི་རྒྱལ་གཅེས་དཔའ་བོ་གྷན་དྷི་མཆོག་གི་འཐབ་རྩོད་ཀྱི་ཉམས་མྱོང་ལོ་རྒྱུས་གཞིར་བཞག་ཐོག བོད་མི་རང་ལུས་མེར་བསྲེགས་གཏོང་མཁན་སྟོང་ཕྲག་ ༢ བརྒལ་བ་ཡིན་ན། ད་གཟོད་རྒྱལ་སྤྱིའི་ཐོག་བོད་མིའི་ལས་འགུལ་འདིར་ནུས་པ་ཞིག་འཐོན་སྲིད་པར་གླེང་གི་ཡོད་པ་རེད།”
གྷན་དྷི་མཆོག་གིས་ཐེངས་བཞི་ལ་ལས་འགུལ་སྤེལ་ཡོད་པ་རེད། ཐེངས་ཕྱི་མ་གསུམ་ནང་མི་གྲངས་འབུམ་གཅིག་དང་ཁྲི་གཉིས་བཙོན་དུ་བཅུག་ཡོད་པ་དང་། དེར་བརྟེན་ནས་རྒྱ་གར་ལ་རང་བཙན་རེག་པ་རེད། བོད་ནང་དུ་ཧ་ལམ་འདིར་གཞིར་བཅོལ་གྱི་ཡོད་པས། བོད་མི་རང་གིས་རང་ཉིད་སྐྱོབ་པའི་ལམ་ནང་ཞུགས་ཟིན་པ་འདི་གཟི་བརྗིད་ཀྱི་ལེའུ་ཞིག་རེད།
མཀོན་མཆོག་ཁྱེན། ད་དུང་མེ་སྲེག་ཇི་ཙམ་གཏོང་དགོས་རེད།