བོད་
དྷ་སར་རྒྱུགས་ཆེ་བའི་ཐ་སྙད་འགའ་ཡོད་པའི་ནང་ནས། སྐད་གྲགས་ཆེ་ཤོས་དེ་ ‘ཟ་ལེ་རྒྱ’ ཡིན་ལ། སྙིང་འདར་ཚ་ཤོས་དེ་ ‘སྤྱང་པོ’ ཡིན། མ་གཞི་ཟ་ལེ་རྒྱ་ནི་སྔོན་ཆད་གསར་འབྱོར་ཚོ་དང་འགྲོགས་ཏེ་དྷ་སར་སླེབས་པར་བཤད་ལ། ད་སྐབས་གསར་འབྱོར་བའི་གྲིབ་མ་དང་ལྷན་དུ་དྷ་ས་ནས་ཡལ་བཞིན་ཡོད་པས། དམིགས་བསལ་གླེང་དགོས་པའི་སྙིང་པོ་ཆེར་མི་འདུག་སྟབས། ཟ་ལེ་རྒྱ་ཡི་ནག་ཉེས་དང་གསར་འབྱོར་བ་ཚོའི་ཁ་སྟབས་གླེང་གི་མིན།
དུས་རྒྱུན་དྷ་སའི་གཡས་གཡོན་གྱི་རྣམ་རིག་བཀྲ་བའི་བོད་པའི་བྱིས་པ་ཚོ་མཐོང་ཡོང་དུས། མི་ལོ་ལྔ་བཅུར་གཞན་ཡུལ་དུ་གྱར་དགོས་བྱུང་ཡང་སོ་སོའི་ཤ་རུས་ཁྲག་རྒྱུན་དང་། ཁ་མིག་གདོང་ལྤགས་མ་བོར་བའི་དགའ་སྣང་ཞིག་སླེབས་ཡོང་གི་འདུག དེ་ནི་མི་ཚོགས་བརྒྱ་འདུས་སྟོང་འདུས་དང་མི་རིགས་ཕར་འདྲེས་ཚུར་འདྲེས་ཀྱི་གཞན་ཡུལ་ལུང་པ་འདིར། དུས་དེ་རིང་ལ་ཐུག་གི་བར་དུ་བཙན་བྱོལ་དུ་འཚར་ལོངས་བྱུང་པའི་མི་རབས་འདིས། སོ་སོའི་མི་རིགས་ལ་བཅངས་པའི་འདང་བརྩེ་དང་། ཕྱིར་ཕ་ཡུལ་ལ་ལོག་འདོད་ཀྱི་འཁྲེང་ཞེན་དོར་མ་མྱོང་བའི་དན་རྟགས་ཉག་གཅིག་རེད། ཉམས་དགའ་བའི་གནས་སྟངས་འདིའི་སྐུ་དྲིན་དང་ངོ་སོ་ཡོད་ཚད། གནའ་མི་བོད་ཀྱི་གཏམ་ལ། “རྟ་རྒྱུད་ཕོ་ལ་ལྟོས། མི་རྒྱུད་མ་ལ་ལྟོས།” ཞེས་པ་ལྟར། རི་མགོའི་གནས་ཚང་འདི་ནས་བོད་པའི་ཐབ་ཀ་འཁྱགས་མ་བཅུག་པའི་བཙན་བྱོལ་མ་ཡུམ་ཚོར་སྤྲོད་དགོས།
ཡིན་ནའང་། ཚོན་མདོག་གཅིག་གིས་ལྷ་བཞེངས་མི་ཐུབ་པས། རྩི་གདན་དཀར་པའི་སྟེང་ལ་ཐིག་རྩ་ནག་པོ་རེ་ཅིས་ཀྱང་འཐེན་དགོས་པར་སེམས། དེ་ནི་མ་ཡུམ་ཚོའི་ངོ་སོ་བརྐུ་འདོད་ཀྱི་ཁྲམ་པའི་ལག་སྙོབ་མ་ཡིན་པར། དྲོད་ཁོལ་འཁྱིལ་བའི་བོད་པའི་ཐབ་ཀ་དེ་མ་ཡུམ་ཚོའི་ལག་ནས་འཁྱག་ལ་འབྱར་མི་ཡོང་བའི་ཆེད་དང་། ཉེ་ཆར་མ་ཡུམ་ཚོའི་ཚོགས་ཆེན་ཐེངས་བཅུ་པའང་དྷ་སར་འཚོགས་འཆར་ཡོད་སྐད། མགོ་གཟར་རྣ་ལ་ཀི་ཡི་ཚུལ་དུ་བྱིས་པ་ཚོ་སེམས་ཀྱིས་འཚོས་པའི་མིག་ཆུ་རྡོག་གཅིག་ཡིན་ལ། ‘སྤྱང་པོ’ ཞེས་པའི་ནང་གི་སློབ་གསོའི་ཐ་སྙད་དེའི་སྐུད་ཐག་ལ་བརྒྱུས་ཤིང་། སྤྱི་ཚོགས་ཧྲུལ་པོའི་གཏིང་རིམ་ན་ས་རྩིད་བཞིན་ཁུ་སིམ་མེར་རྐང་ལག་བརྐྱང་སྟེ་སླེབས་ཀྱིན་པའི་མི་གཤིས་ཀྱི་གས་ཁ་ཟབ་མོ་དག་གླེང་འདོད་པ་ཡིན།
ཆུང་བ་ཁྱིམ་ཚང་ནས་ཆེ་བ་སྤྱི་ཚོགས་བར། འགྲོ་བ་མིའི་མི་གཤིས་འཚར་ལོངས་ཀྱི་གོམ་ཁ་དང་པོ་དེ་མ་ཡུམ་ཚོའི་པང་ཁ་ནས་ཆས་དགོས་པར་བརྟེན། བོད་པའི་བུད་མེད་ཀྱི་ལྷན་ཚོགས་ཀྱིས་ཀྱང་ཆབ་སྲིད་ཀྱི་འཐབ་རྩོད་ཁོ་ན་ཞིག་དང་། ཐོབ་ཐང་གི་གླེང་མོལ་རྐྱང་རྐྱང་ལ་དབུ་མི་འཁོར་པར། འུ་ཅག་བཙན་བྱོལ་བའི་བྱིས་པ་ཚོའི་བོད་པའི་ཁ་ལྕེ་ལྐུག་བཞིན་པ་དང་། བྱིས་པ་ཚོའི་བོད་ཀྱི་མི་གཤིས་འབོར་གྱིན་པའི་མི་རིགས་འདིའི་རྐང་དང་རུས་པ་ལྟ་བུའི་གཏིང་རིམ་གྱི་གནད་དོན་དག སེམས་ཐོག་ལ་བླངས་ཏེ་ལག་ཐོག་ལ་བསྟར་ཐབས་སུ་ཁ་མིག་ཕྱོགས་དགོས་ལ། བོད་པའི་མི་ཁྱིམ་རེར་བརྩེ་སེམས་དང་ལྷག་བསམ་འཁྱིལ་བའི་མཁའ་དབུགས་ཤིག་རྔུབ་ཐུབ་རྒྱུར་མནོ་བསམ་བཏང་སྟེ། གཉུག་མར་གནས་པའི་བོད་པའི་བུད་མེད་ཀྱི་རང་གཤིས་དྲང་མོ་དེ་བླ་འགུགས་གནང་རོགས།
