འཆར་ཟླའི་ནང་ཨོ་སི་ཊི་རི་ཡའི་རྒྱལ་ས་ཝེ་ཡ་ནཱ་རུ་ཡུ་རོབ་གླིང་གི་བོད་རིགས་ཚོགས་པ་ཁག་མཉམ་འབྲེལ་ཐོག བོད་པ་དང་བོད་དོན་རྒྱབ་སྐྱོར་བའི་འདུ་འཛོམས་ཆེན་མོ་ཞིག་འཚོགས་རྒྱུ་ཡིན་འདུག
ཕྱི་ཟླ་ ༥ ཚེས་ ༢༦ ཉིན་ཨོ་སི་ཊི་རི་ཡའི་རྒྱལ་ས་ཝེ་ཡ་ནཱ་རུ་ཡུ་རོབ་གླིང་གི་བོད་རིགས་ཚོགས་པ་རྣམས་མཉམ་འབྲེལ་ཐོག བོད་པ་དང་བོད་དོན་རྒྱབ་སྐྱོར་བའི་འདུ་འཛོམས་ཆེན་མོ་ཞིག་ཚོགས་གཏན་འཁེལ་ཡོད་པ་དང་། ༸གོང་ས་མཆོག་ཀྱང་ཡུ་རོབ་ཀྱི་ཆིབས་སྒྱུར་དང་སྟབས་བསྟུན་འདུ་འཛོམས་ཀྱི་མཛད་སྒོར་ཕེབས་རྒྱུ་ཡིན་འདུག
གཞི་རྒྱ་ཆེ་བའི་འདུ་འཛོམས་དེ་འདྲ་ཞིག་འཚོག་དགོས་པའི་རྒྱུ་མཚན་དང་དམིགས་ཡུལ་གྱི་ཐད་ནས། སུད་བོད་མཛའ་འབྲེལ་མཐུན་ཚོགས་ཀྱི་རྒྱུན་ལས་བདེ་སྐྱིད་བཀྲས་མཐོང་ལགས་སུ་བཅར་འདྲི་ཞུས་པར། ཁོ་མོས་ “ད་ལྟའི་ཆར་བོད་ནང་གནས་སྟངས་ཧ་ཅང་ཛ་དྲག་པོ་དང་དཀའ་ངལ་ཆེན་པོ་ཞིག་གི་འོག་ཡོད་སྟབས། ང་ཚོ་ཡུ་རོབ་གླིང་དུ་ཡོད་པའི་བོད་པ་གང་མང་མང་ཞིག་འདུ་འཛོམས་ཐོག བོད་ནང་གི་གཞིས་སྡོད་སྤུན་ཟླ་རྣམས་ལ་ཁོང་ཚོས་མྱོང་བཞིན་པའི་དཀའ་ངལ་དེ་དག་ང་ཚོས་རྟོགས་བཞིན་ཡོད་ལ། ཁོང་ཚོར་དཀའ་ངལ་ཅི་ཙམ་ཡོད་པ་དེ་བཞིན་དུ། ང་ཚོའི་སེམས་ནང་དཀའ་སྡུག་དང་ཚོར་བ་གཅིག་མཚུངས་ཡོད་པའི་གདུང་སེམས་མཉམ་སྐྱེད་ཀྱི་རྣམ་པ་མཚོན་ཆེད་དང་། གཉིས། ད་ལྟ་བོད་ནང་དུ་རྒྱ་ནག་གཞུང་གིས་དྲག་གནོན་བྱེད་བཞིན་པ་དེར། ཡུ་རོབ་ཀྱི་རྒྱལ་ཁབ་ཚང་མའི་ངོས་ནས་ཁ་གཏད་གདོང་ལེན་གནང་རྒྱུར་འབོད་སྐུལ་ཞུ་ཆེད་ཡིན། དེར་བརྟེན། འདུ་འཛོམས་སྐབས་ཡུ་རོབ་ནང་བོད་པར་རྒྱབ་སྐྱོར་བྱེད་མཁན་གྱི་སྲིད་དོན་པ་དང་། སྒྱུ་རྩལ་བ། ཤེས་ཡོན་པ། དེ་བཞིན་ཡུ་རོབ་སྤྱི་ཚོགས་ནང་ཤུགས་རྐྱེན་ཆེ་བའི་མི་སྣ་གང་མང་ཞིག་གདན་འདྲེན་ཞུས་ཏེ། ཉིན་དེར་ཡོངས་ཁྱབ་ཐོག་ཡུ་རོབ་གླིང་གི་གཞུང་དམངས་ཚང་མར། རྒྱ་ནག་གཞུང་ནས་བོད་ཐོག་འཛིན་པའི་སྡུག་རྩུབ་ཅན་གྱི་དྲག་གནོན་དེ་ངེས་པར་མཚམས་འཇོག་བྱེད་འཇུག་དགོས་པ་ནན་སྐུལ་ཞུ་རྒྱུ་ཡིན།” ཞེས་བརྗོད་སོང་།
ཐེངས་འདིའི་འདུ་འཛོམས་ཐོག་མཉམ་ཞུགས་གནང་ཆེད། ཡོ་རོབ་རྒྱལ་ཁབ་ཁག་ཚང་མའི་ནང་ཁྱོན་བསྡོམས་བོད་རིགས་ཚོགས་པ་ ༢༤ ལྷག་ཡོད་པ་ཚང་མར་བརྡ་སྦྱོར་ཕུལ་ཏེ་ཚོགས་པ་ཚང་མས་ཆ་ཤས་ལེན་ཐུབ་རྒྱུ་དང་། ཉུང་མཐར་བོད་པ་དང་བོད་དོན་རྒྱབ་སྐྱོར་བ་མི་ཆིག་ཁྲི་ལྷག་འཛོམས་ཐུབ་པའི་རེ་བ་བྱེད་བཞིན་ཡོད་འདུག
འདུ་འཛོམས་དེའི་ཐོག་ད་ལྟའི་ཆར་ཡོང་གཏན་འཁེལ་བའི་གནད་ཡོད་སྐུ་མགྲོན་ག་ཚོད་མེད་དྲིས་པར། བདེ སྐྱིད་བཀྲས་མཐོང་ལགས་ཀྱིས། “ འཆར་གཞི་བང་རིམ་སྒྲིག་བཞིན་པའི་སྒང་ཡིན། སྤྱིར་ད་ལོའི་གསུམ་བཅུའི་དུས་དྲན་སྐབས་ལ་འདི་འདྲའི་ལས་འགུལ་ཞིག་སྤེལ་ཐུབ་ན་བསམ་པ་རེད་དེ། གྲ་སྒྲིག་བྱེད་པའི་དུས་ཚོད་སོགས་ཀྱི་རྐྱེན་པས་བྱུང་མ་སོང་། ཉེ་འཆར་༧གོང་ས་མཆོག་ཡུ་རོབ་ནང་ཆིབས་བསྒྱུར་བསྐྱངས་གཏན་ཁེལ་ཡོད་སྟབས། སྐུ་སྒེར་ཡིག་ཚང་བརྒྱུད་ཐེངས་འདིའི་བོད་རིགས་འདུ་འཛོམས་ཐོག་༸གོང་ས་མཆོག་ཕེབས་གནང་ཡོང་བའི་སྐྱབས་འཇུག་ཞུས་པ་ལྟར་ཞལ་བཞེས་ཀྱང་ཐོབ་སོང་། ད་ལྟ་འདུ་འཛོམས་ཀྱི་སྐོར་ལ་ཚོགས་འདུ་འཚོགས་བཞིན་ཡོད། མི་འགྱངས་པར་དྲ་རྒྱ་བརྒྱུད་གདན་ཞུའི་མི་སྣ་དང་མཛད་རིམ་སོགས་རིམ་བཞིན་གསལ་བསྒྲགས་ཞུ་རྒྱུ་ཡིན།” ཞེས་བརྗོད་བྱུང་།
ཐེངས་འདིའི་བོད་པ་དང་བོད་དོན་རྒྱབ་སྐྱོར་བའི་འདུ་འཛོམས་འདི་ནི་ཡུ་རོབ་བོད་རིགས་ཚོགས་པ་ཁག་ཉི་ཤུ་ལྷག་གིས་མཉམ་འབྲེལ་ཐོག་གོ་སྒྲིག་གནང་བ་ཞིག་ཡིན་ལ། ཡོ་རོབ་གླིང་གི་འདུ་འཛོམས་ཆེན་མོ་ཐེངས་གསུམ་པ་དེ་ཆགས་ཡོད་པ་དང་། འདུ་འཛོམས་ཐེངས་དང་པོ་ ༢༠༠༨ལོར་འཇར་མན་རྒྱལ་ས་བྷར་ལེན་དང་། ཐེངས་གཉིས་པ་ ༢༠༡༠ ལོར་སུད་སུའི་གྲོང་ཁྱེར་ཛོ་རེ་ཁི་ནས་འཚོགས་ཡོད་པ་རེད།
ས་གནས་འགོད་པ་ནམ་མཁའ་བསྟན་འཛིན།
དྲྭ་གྲོགས་ཡོ་རོབ་བོད་དོན་ཕེབས་ཡོང་གི་ད། དོ་སྣང་གནང་ཤོག་ད། མཆན་འགྲེལ་དགོས་ཡ། མཆན་འགྲེལ་དགོས་ཡ། ཡོ་རོབ་བོད་དོན་ལ་ཞེས་་་་་་སྐུལ་ལོ།།།།
ཡུ་རོབ་བོད་མའི་འདུ་མཛོམས་ལ་དགའ་སུ་ཡོད། གང་མང་མང་ཞིག་མཛོམས་པའི་རེ་བ་ཆེ། ང་ཚོའི་བོད་ནང་ཧ་ཅང་ཛ་དྲག་ཞིག་རེད་འདུག་པའི་ཡུ་རོབ་བོད་མི་རྣམས་ཀྱི་གལ་ཆེ་ཞིག་ཏུ་རྩིས་ཏེ་ལས་དོན་ཡག་པོ་ཞིག་སྒྲུབ་ཐུབ་པའི་རེ་བ་ཞུ།
ཡོ་རོབ་མཉམ་འབྲེལ་གྱི་ཁོངས་སུ་རྒྱལ་ཁབ་ཉེར་དྲུག་ཡོད་པའི་ནང་ད་ལྟའི་ཆར་ཡོ་རོབ་གླིང་དུ་བོད་རིགས་ཚོགས་པ་ཉེར་བཞི་ལྷག་འདུག འོན་ཀྱང་ད་བར་བོད་རིགས་ཚོགས་པ་ཕན་ཚུན་བར་དམིགས་གསལ་གྱི་འབྲེལ་ལམ་དང་མཉམ་འབྲེལ་གྱི་བྱེད་སྒོ་ཅི་ཡང་སྤེལ་ཐུབ་མི་འདུག སྤྱི་འཐུས་ཚོགས་གཙོ་མཆོག་གིས་ལོ་སྔོན་མའི་ནང་གཞུང་འབྲེལ་གཏམ་བཤད་ཅིག་ཏུ་མི་འགྱངས་བར་འཛམ་གླིང་ཤར་ནུབ་གང་སར་ཁྱབ་ཡོད་པའི་བོད་མིའི་སྐྱིད་སྡུག་ཚོགས་པ་ཁག་ཕན་ཚུན་བར་དང་གཞུང་གི་བར་འབྲེལ་བ་དམ་ཟབ་དུ་གཏོང་རྒྱུའི་ལས་འཆར་ཡོད་སྐོར་གསུངས་སོང་མོད། གལ་སྲིད་གཞུང་གིས་སྲིད་ཅུས་དེ་འདྲ་ཞིག་བཏངས་ཚར་ཡོད་ན་དོན་གཅོད་ཁག་འདེད་ཤར་གཏོང་དགོས་ཀྱི་འདུག་མ་གཏོགས། ཡོ་རོབ་གླིང་ལ་འདི་འདྲའི་སྐོར་བ་འཐུས་ཤོར་གྱི་ཆ་ཆེན་པོ་འདུག
ཆིག་སྒྲིལ་་་་་་་་་ཆིག་སྒྲིལ་་་་་་རྒྱལ་ཁབ་ཀྱི་རྨང་གཞི། ལས་འགུལ་གྱི་སྲོག་རྩ། ཆིག་སྒྲིལ་་་་ཆིག་སྒྲིལ་་་ཁྱོད་ཡོད་ན་འགྱེལ་ས་ནས་ལངས་། ཕམ་ས་ནས་རྒྱལ་ཐུབ། ཆིག་སྒྲིལ་་་ཨ་་་ཆིག་སྒྲིལ། ཁྱོད་ཡོད་པས་ང་རང་མུ་འཐུད་ནས་ཚོ་ན་འདོད།
འདུ་འཛོམ་ཆེན་མོ་འདིའི་སྐབས་དང་བསྟུན་ནས. བོད་བརྒྱུད་ཆོས་ལུགས་པ་གཙོས་ཆོས་ལུགས་པ་ཡོངས་དང་། སྒྱུ་རྩལ་བ་དེས་གཙོས་སྒྱུ་རྩལ་བ་ཡོངས་ལྟ་བུ་སྟེ། ལས་རིགས་ཀྱི་ཁོངས་སོ་སོས་མ་འོང་བ་ན། བོད་དོན་དེ་རྒྱལ་ཁབ་སོ་སོའི་གཞུང་འབྲེལ་ལས་དོན་དུ་ཆགས་ཆེད། སྲིད་འཛིན་དང་ས་གནས་གྲོས་ཚོགས་འོས་ཤོག་གང་འཕེན་ལ་ཁ་ཕྱོགས་ངེས་གཏན་ཅན་ཞིག་ཡོང་བར། འདུ་འཛོམ་པ་སོ་སོར་འབོད་སྐུལ་ནན་ཏན་ཞུ་རྒྱུ་གལ་ཆེའོ་བསྙམས་སོ།།
གསར་འགོད་པ་ལགས། ཐུགས་རྗེ་ཆེ། འདི་ལ་དུས་ཐོག་གསར་བསྒྱུར་ཟེར། དེ་མིན་བདེ་སྐྱིད་བཀྲས་མཐོང་ལགས་སུ་བཀའ་དྲིན་ཆེ་ཞེས་ཞུ། ད་ངོས་རྣམས་དངུལ་གཅིག་པུར་མགོ་འཁོར་ན་འགྲིག་ལེ་མི་འདུག་ཨེ་རེད་ལས་དོན་མང་ཙམ་སྤེལ་ཨང་ཉིན་ཞིག་ངས་མེ་མཆོད་་་་་་་་་་་་་་་་་་་་་་་་་་་།