ཡུ་རོབ་བོད་མིའི་འདུ་འཛོམས།

འཆར་ཟླའི་ནང་ཨོ་སི་ཊི་རི་ཡའི་རྒྱལ་ས་ཝེ་ཡ་ནཱ་རུ་ཡུ་རོབ་གླིང་གི་བོད་རིགས་ཚོགས་པ་ཁག་མཉམ་འབྲེལ་ཐོག བོད་པ་དང་བོད་དོན་རྒྱབ་སྐྱོར་བའི་འདུ་འཛོམས་ཆེན་མོ་ཞིག་འཚོགས་རྒྱུ་ཡིན་འདུག

ཕྱི་ཟླ་ ༥ ཚེས་ ༢༦ ཉིན་ཨོ་སི་ཊི་རི་ཡའི་རྒྱལ་ས་ཝེ་ཡ་ནཱ་རུ་ཡུ་རོབ་གླིང་གི་བོད་རིགས་ཚོགས་པ་རྣམས་མཉམ་འབྲེལ་ཐོག བོད་པ་དང་བོད་དོན་རྒྱབ་སྐྱོར་བའི་འདུ་འཛོམས་ཆེན་མོ་ཞིག་ཚོགས་གཏན་འཁེལ་ཡོད་པ་དང་།  ༸གོང་ས་མཆོག་ཀྱང་ཡུ་རོབ་ཀྱི་ཆིབས་སྒྱུར་དང་སྟབས་བསྟུན་འདུ་འཛོམས་ཀྱི་མཛད་སྒོར་ཕེབས་རྒྱུ་ཡིན་འདུག

གཞི་རྒྱ་ཆེ་བའི་འདུ་འཛོམས་དེ་འདྲ་ཞིག་འཚོག་དགོས་པའི་རྒྱུ་མཚན་དང་དམིགས་ཡུལ་གྱི་ཐད་ནས། སུད་བོད་མཛའ་འབྲེལ་མཐུན་ཚོགས་ཀྱི་རྒྱུན་ལས་བདེ་སྐྱིད་བཀྲས་མཐོང་ལགས་སུ་བཅར་འདྲི་ཞུས་པར།  ཁོ་མོས་ “ད་ལྟའི་ཆར་བོད་ནང་གནས་སྟངས་ཧ་ཅང་ཛ་དྲག་པོ་དང་དཀའ་ངལ་ཆེན་པོ་ཞིག་གི་འོག་ཡོད་སྟབས། ང་ཚོ་ཡུ་རོབ་གླིང་དུ་ཡོད་པའི་བོད་པ་གང་མང་མང་ཞིག་འདུ་འཛོམས་ཐོག བོད་ནང་གི་གཞིས་སྡོད་སྤུན་ཟླ་རྣམས་ལ་ཁོང་ཚོས་མྱོང་བཞིན་པའི་དཀའ་ངལ་དེ་དག་ང་ཚོས་རྟོགས་བཞིན་ཡོད་ལ། ཁོང་ཚོར་དཀའ་ངལ་ཅི་ཙམ་ཡོད་པ་དེ་བཞིན་དུ། ང་ཚོའི་སེམས་ནང་དཀའ་སྡུག་དང་ཚོར་བ་གཅིག་མཚུངས་ཡོད་པའི་གདུང་སེམས་མཉམ་སྐྱེད་ཀྱི་རྣམ་པ་མཚོན་ཆེད་དང་། གཉིས། ད་ལྟ་བོད་ནང་དུ་རྒྱ་ནག་གཞུང་གིས་དྲག་གནོན་བྱེད་བཞིན་པ་དེར། ཡུ་རོབ་ཀྱི་རྒྱལ་ཁབ་ཚང་མའི་ངོས་ནས་ཁ་གཏད་གདོང་ལེན་གནང་རྒྱུར་འབོད་སྐུལ་ཞུ་ཆེད་ཡིན། དེར་བརྟེན། འདུ་འཛོམས་སྐབས་ཡུ་རོབ་ནང་བོད་པར་རྒྱབ་སྐྱོར་བྱེད་མཁན་གྱི་སྲིད་དོན་པ་དང་།  སྒྱུ་རྩལ་བ། ཤེས་ཡོན་པ། དེ་བཞིན་ཡུ་རོབ་སྤྱི་ཚོགས་ནང་ཤུགས་རྐྱེན་ཆེ་བའི་མི་སྣ་གང་མང་ཞིག་གདན་འདྲེན་ཞུས་ཏེ།  ཉིན་དེར་ཡོངས་ཁྱབ་ཐོག་ཡུ་རོབ་གླིང་གི་གཞུང་དམངས་ཚང་མར། རྒྱ་ནག་གཞུང་ནས་བོད་ཐོག་འཛིན་པའི་སྡུག་རྩུབ་ཅན་གྱི་དྲག་གནོན་དེ་ངེས་པར་མཚམས་འཇོག་བྱེད་འཇུག་དགོས་པ་ནན་སྐུལ་ཞུ་རྒྱུ་ཡིན།” ཞེས་བརྗོད་སོང་།  

ཐེངས་འདིའི་འདུ་འཛོམས་ཐོག་མཉམ་ཞུགས་གནང་ཆེད། ཡོ་རོབ་རྒྱལ་ཁབ་ཁག་ཚང་མའི་ནང་ཁྱོན་བསྡོམས་བོད་རིགས་ཚོགས་པ་ ༢༤ ལྷག་ཡོད་པ་ཚང་མར་བརྡ་སྦྱོར་ཕུལ་ཏེ་ཚོགས་པ་ཚང་མས་ཆ་ཤས་ལེན་ཐུབ་རྒྱུ་དང་། ཉུང་མཐར་བོད་པ་དང་བོད་དོན་རྒྱབ་སྐྱོར་བ་མི་ཆིག་ཁྲི་ལྷག་འཛོམས་ཐུབ་པའི་རེ་བ་བྱེད་བཞིན་ཡོད་འདུག  

འདུ་འཛོམས་དེའི་ཐོག་ད་ལྟའི་ཆར་ཡོང་གཏན་འཁེལ་བའི་གནད་ཡོད་སྐུ་མགྲོན་ག་ཚོད་མེད་དྲིས་པར། བདེ སྐྱིད་བཀྲས་མཐོང་ལགས་ཀྱིས། “ འཆར་གཞི་བང་རིམ་སྒྲིག་བཞིན་པའི་སྒང་ཡིན།  སྤྱིར་ད་ལོའི་གསུམ་བཅུའི་དུས་དྲན་སྐབས་ལ་འདི་འདྲའི་ལས་འགུལ་ཞིག་སྤེལ་ཐུབ་ན་བསམ་པ་རེད་དེ། གྲ་སྒྲིག་བྱེད་པའི་དུས་ཚོད་སོགས་ཀྱི་རྐྱེན་པས་བྱུང་མ་སོང་། ཉེ་འཆར་༧གོང་ས་མཆོག་ཡུ་རོབ་ནང་ཆིབས་བསྒྱུར་བསྐྱངས་གཏན་ཁེལ་ཡོད་སྟབས། སྐུ་སྒེར་ཡིག་ཚང་བརྒྱུད་ཐེངས་འདིའི་བོད་རིགས་འདུ་འཛོམས་ཐོག་༸གོང་ས་མཆོག་ཕེབས་གནང་ཡོང་བའི་སྐྱབས་འཇུག་ཞུས་པ་ལྟར་ཞལ་བཞེས་ཀྱང་ཐོབ་སོང་། ད་ལྟ་འདུ་འཛོམས་ཀྱི་སྐོར་ལ་ཚོགས་འདུ་འཚོགས་བཞིན་ཡོད། མི་འགྱངས་པར་དྲ་རྒྱ་བརྒྱུད་གདན་ཞུའི་མི་སྣ་དང་མཛད་རིམ་སོགས་རིམ་བཞིན་གསལ་བསྒྲགས་ཞུ་རྒྱུ་ཡིན།” ཞེས་བརྗོད་བྱུང་།