བོད་མི་ ༤ འཛིན་བཟུང་།

རྒྱ་གར་ལྷོ་ཕྱོགས་སེར་བྱེས་གྲྭ་ཚང་ཏྲེ་ཧོར་ཁམས་ཚན་གྱི་གྲྭ་པདྨ་ཚེ་དབང་ལགས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཕྱི་ཚེས་ ༡༠ ཉིན་དཀར་མཛེས་རྫོང་སྲིད་གཞུང་གིས་བོད་མི་ཚོང་པ་བསོད་ནམས་མགོན་པོ་ལགས་ཀྱི་སྒེར་ལ་དབང་བའི་ས་ཐོག་ཏུ། བཙན་དབང་གིས་ཁང་པ་གསར་རྒྱག་བྱེད་མགོ་བརྩམས་ཡོད་འདུག སྐབས་དེར་བོད་མི་བསོད་ནམས་མགོན་པོ་ལགས་ཀྱིས་རྫོང་སྲིད་གཞུང་གི་དཔོན་རིགས་དང་འབྲེལ་ཡོད་ལས་བྱེད་ལ་ཞུ་བ་་དང་རེ་སྐུལ་བྱས་ཀྱང༌། ས་གནས་དཔོན་རིགས་ཚོས་བཟང་ཕྱོགས་ཀྱི་ཐག་གཅོད་བྱས་མེད་པར་མ་ཟད། ཉིན་དེར་དྲག་ཆས་ཉེན་རྟོག་པ་བཏང་སྟེ་ཁོང་དང་ཀ་བྲག་གྲོང་ཚོའི་མཁས་གྲུབ་གཉིས་འཛིན་བཟུང་བཙན་འཁྲིད་བྱས་ཡོད་འདུག

གནས་ཚུལ་དེ་བྱུང་མ་ཐག་ས་གནས་བོད་མི་མང་པོ་ཞིག་འཛོམས་ཡོད་པ་མ་ཟད། སྐབས་དེར་བསོད་ནམས་མགོན་པོའི་ནང་མི་ས་ཐོག་ཏུ་ཡོང་སྟེ་སྲིད་གཞུང་གི་ལས་བྱེད་ཚོར། “ ང་ཚོ་ནང་མི་རྣམས་ལ་འཚོ་རྟེན་གྱི་ས་ཞིང་འདི་ལས་ལྷག་མེད། ཁྱེད་ཚོས་ས་ཆ་འདི་ཡང་བཙན་འཕྲོག་བྱེད་པ་ཡིན་ན། ང་ཚོ་གསོན་པོར་བསྡད་མ་བསྡད་ཀྱི་ཁྱད་པར་གང་ཡང་མི་འདུག དེ་ལས་ང་ཚོ་ད་ལྟ་རང་གསོད་རོགས། ”ཞེས་ངུ་འབོད་བྱེད་བཞིན་རྫོང་སྲིད་གཞུང་གི་གོ་སྒྲིག་བྱས་པའི་ས་བསྔོག་བྱེད་ཀྱི་འཕྲུལ་ཆས་སོགས་ཀྱི་གམ་དུ་ཉལ་བསྡད་སྟབས། ཉེན་རྟོག་པ་དང་དམག་མིས་བསོད་ནམས་མགོན་པོའི་བཟའ་ཟླ་དང་ལྷོ་པ་གཤོང་གཉེར་གྲོང་ཚོའི་སངས་རྒྱས་སྐལ་བཟང་གཉིས་ཉིན་དེར་འཛིན་བཟུང་བཙན་འཁྲིད་བྱས་ཡོད་པ་མ་ཟད། ས་གནས་མང་ཚོགས་ལ་འཇིགས་སྐུལ་བྱས་ཡོད་འདུག

རང་ལོ་ ༤༨ ཡས་མས་ཡིན་པ་བསོད་ནམས་མགོན་པོ་ནི། དཀར་མཛས་རྫོང་ལྷོ་པ་ཤང་ཕུག་ཡུལ་ནང་རྩག་ལེགས་གྲོང་སྡེའི་ཕ་རྡོ་རྗེ་བཀྲ་ཤིས་དང་མ་ཚེ་འདས་ཆོས་སྒྲོན་གཉིས་ཀྱིོ་བུ་ཡིན་པ་དང༌། ༢༠༠༩ ཟླ་ ༣ ཚེས་ ༡༩ ཉིན་དཀར་མཛེས་རྫོང་གི་ཇ་ཁང་ཞིག་ཏུ་སྡོད་སྐབས་གློ་བུར་འཛིན་བཟུང་བྱས་ཏེ། ཁྲིམས་འགལ་སྐད་ཆ་བཤད་ཡོད་པའི་ཉེས་འཛུགས་འོག་ཟླ་ ༤ ཡས་མས་ཤིག་ལ་བཙོན་འཇུག་གིས་ཉེས་རྡུང་ཚད་མེད་བཏང་སྟེ་དཀར་མཛེས་རྫོང་གི་སྨན་ཁང་དུ་བསྐྱལ་ཡོད་པ་མ་ཟད། སྐབས་དེར་རྒྱ་སྒོར་ཁྲི་ ༡༥ ཡིན་པའི་རླངས་འཁོར་དང་དབྱར་རྩ་དགུན་འབུ་བཅས་བཙན་འཕྲོག་བྱས་ཡོད་འདུག   སྔར་ལོའི་ཕྱི་ཟླ་ ༣ ཚེས་ ༣༡ ཉིན་དཀར་མཛེས་རྩིས་ཚང་དགོན་གྱི་ ཆབ་སྲིད་བཙོན་པ་གྲྭ་བསྟན་འཛིན་དངོས་གྲུབ་དང་བློ་དབྱངས་གཉིས་ཀློད་གྲོལ་སྐབས་ས་གནས་མང་ཚོགས་ཀྱི་ཕེབས་བསུ་བྱས་རྗེས། ཁོང་གཙོས་བོད་མི་ ༧ ལ་ཕེབས་བསུ་གོ་སྒྲིག་བྱེད་མཁན་གྱིས་ཉེས་མིང་འོག་ཟླ་ ༡ རིང་བཀག་ཉར་བྱས་རྗེས་ཀློད་ཡོད་ཀྱང༌། ཉིན་ཤས་རྗེས་སུ་ཡང་བསྐྱར་ནག་ཉེས་ཅི་ཡིན་གསལ་ཁ་མེད་པའི་ཐོག་འཛིན་བཟུང་བྱས་ཏེ་དཀར་མཛེས་རྫོང་གི་བཙོན་ཁང་ཞིག་ཏུ་ལོ་ ༡ མ་ཟིན་ཙམ་གྱི་རིང་འདུག་དགོས་བྱུང་ཡོད་འདུག