ཁ་སང་དབུས་བོད་མིའི་སྒྲིག་འཛུགས་ཀྱི་བཀའ་ཤག་ཚོགས་ཁང་ནང་། བོད་མིའི་ཁྱད་ལས་དང་བླངས་ཞབས་ཞུའི་ལས་གཞི་མགོ་འཛུགས་དང་དྲ་རྒྱ་དབུ་འབྱེད་ཀྱི་གསར་འགོད་ལྷན་ཚོགས་ཤིག་བསྡུས་ཏེ། ཁྱད་ལས་པའི་དང་བླངས་ཞབས་ཞུའི་ས་མིག་ ༢༢ གསལ་བསྒྲགས་དང་ཚང་མས་མཉམ་རུབ་གནང་དགོས་པའི་འབོད་སྐུལ་གནང་སོང་།
ཁ་སང་ཉིན་རྒྱབ་ཚུ་ཚོད་ ༢ དང་ཕྱེད་ཀའི་སྟེང་། དབུས་བོད་མི་སྒྲིག་འཛུགས་ཀྱི་བཀའ་ཤག་ཚོགས་ཁང་ནང་། བོད་མིའི་ཁྱད་ལས་དང་བླངས་ཞབས་ཞུའི་ལས་གཞི་མགོ་འཛུགས་དང་དྲ་རྒྱ་དབུ་འབྱེད་ཀྱི་གསར་འགོད་ལྷན་ཚོགས་ཤིག་ཚོགས་སོང་། ཐེངས་འདིའི་ལྷན་ཚོགས་སྟེང་སྐུ་མགྲོན་གཙོ་བོར་ལས་བྱེད་འདེམས་སྐོ་ལྷན་ཁང་གི་འགན་འཛིན་འཇམ་དཔལ་ཆོས་བཟང་ལགས་དང་། དེ་བཞིན་བཀའ་དྲུང་གཡུ་ཐོག་ཀརྨ་དགེ་ལེགས་ཀྱིས་གཙོས། དབུས་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་དྲུང་ཆེ་རྣམས་མཉམ་ཞུགས་གནང་འདུག
བོད་མིའི་ཁྱད་ལས་དང་བླངས་ཞབས་ཞུའི་ལས་གཞི་འདིའི་དམིགས་ཡུལ་གཙོ་བོ་ནི། འཛམ་གླིང་ཡུལ་གྲུ་གང་སར་གནས་པའི་བོད་རིགས་ཁྱད་ལས་པ་དང་ཤེས་ཡོན་པ་རྣམས་ཀྱིས་དང་བླངས་ཐོག དབུས་བོད་མིའི་སྒྲིག་འཛུགས་ཀྱི་ལྷན་ཁང་ཁག་གཙོས་འབྲེལ་ཡོད་སྡེ་ཁག་སོ་སོའི་ནང་ཞབས་ཞུ་སྒྲུབ་ཐབས་སུ། དྲ་རྒྱ་བརྒྱུད་དེ་ལྷན་ཁང་ཁག་དང་སྡེ་ཚན་སོ་སོའི་ནང་མཁོ་གལ་ཡོད་པའི་དང་བླངས་ཁྱད་ལས་པའི་ས་མིག་གསལ་བསྒྲགས་དང་། དེ་བཞིན། དང་བླངས་ཞབས་ཞུ་སྒྲུབ་འདུན་ཡོད་མཁན་རྣམས་ཀྱིས་དྲ་རྒྱའི་སྟེང་ཐོ་འགོད་བརྒྱུད། ཁྱད་ལས་བ་རྣམས་འཚོལ་བསྡུ་བྱས་ཏེ་དང་བླངས་ས་མིག་གོ་སྒྲིག་གནང་རྒྱུ་དང་། ཕྱི་ནང་གང་སར་གནས་པའི་བོད་མི་ཁྱད་ལས་པ་དང་ཤེས་འཇོན་ཅན་དག་གིས་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་སྡེ་ཚན་སོ་སོའི་ནང་དང་བླངས་ཞབས་ཞུ་གནང་སྟེ་མཉམ་རུབ་ཀྱི་ནུས་པ་འདོན་ཐུབ་རྒྱུར་དམིགས་པ་ཞིག་ཡིན་པ་རེད།
ལས་འཆར་འདིའི་མགོ་འཛིན་དབུ་དཀར་ཚང་སྐལ་རྡོར་ལགས་ཀྱིས་ལས་གཞི་ངོ་སྤྲོད་སྐབས་བརྗོད་པ་ལྟར་ན། བོད་མི་ཁྱད་ལས་པ་དང་ཤེས་ཡོན་པའི་དང་བླངས་ཞབས་ཞུའི་ལས་གཞི་འདིར། ཁྱབ་ཁོངས་ཀྱི་ཆ་ནས་མཐོ་སློབ་སློབ་ཕྲུག་དང་ཁྱད་ལས་པ། ཁྱད་ལས་སློབ་སྟོན་པ་བཅས་ཁག་གསུམ་དུ་བགར་ཡོད་པ་དང་། དང་པོ། མཐོ་སློབ་སློབ་ཕྲུག་རྣམས་ལ་ཉམས་མྱོང་དང་ཤེས་ཚད་ཆེན་པོ་མེད་ཀྱང་སེམས་ཤུགས་ཡོད་སྟབས། ཁོ་ཚོ་སྔ་ས་ནས་ལས་གཞི་འདིའི་ནང་ཚུར་བསྡུ་ཐུབ་པ་གནང་སྟེ། གཞུང་གི་ལྷན་ཁང་ཁག་ནང་ཉམས་མྱོང་བསག་འཇུག་རྒྱུ་དང་། རྗེས་ཕྱོགས་བོད་མིའི་སྒྲིག་འཛུགས་ཀྱི་ལས་དོན་ཁག་ནང་མཉམ་ཞུགས་གནང་ཐུབ་པ་བྱ་རྒྱུ། གཉིས་པ། ཕྱི་ནང་གང་སར་ཡོད་པའི་བོད་མི་ཁྱད་ལས་པ་རྣམས་དབུས་བོད་མིའི་སྒྲིག་འཛུགས་ནང་ཕེབས་ཏེ་དང་བླངས་ཐོག་ཞབས་ཞུ་སྒྲུབ་ཐུབ་བྱ་རྒྱུ། གསུམ་པ། ཉམས་མྱོང་དང་ཁྱད་ལས་ཤེས་ཚད་མཐོན་པོ་ཡོད་མཁན་རྣམས་ལ་ཕར་འབྲེལ་བ་ཞུས་ཏེ། ཁོང་ཚོ་ལས་གཞི་འདིའི་ནང་ཕེབས་རྒྱུ་འབོད་སྐུལ་ཞུ་རྒྱུ་དང་། ཁོང་ཚོས་ཚུར་སློབ་སྟོན་དང་ཕར་བཀའ་འདྲི་ཞུ་སའི་གནས་བབ་ཅིག་སྐྲུན་རྒྱུ་བཅས་ཡིན་འདུག
ད་ལྟའི་ཆར་དྲ་ལམ་འདི་བརྒྱུད་དེ་དབུས་བོད་མིའི་སྒྲིག་འཛུགས་ཀྱི་ལྷན་ཁང་ཁག་ནང་མཁོ་གལ་ཅན་གྱི་དང་བླངས་ས་མིག་ ༢༢ གསལ་བསྒྲགས་བྱས་ཡོད་པ་དང་། དེ་དག་ནི་ཤེས་རིག་ལས་ཁུངས་ནང་ས་མིག་ ༣ དང་། ནང་སྲིད་ལས་ཁུངས་ནང་ས་མིག་ ༣ ། དཔལ་འབྱོར་ལས་ཁུངས་ནང་ས་མིག་ ༡ ། ཆོས་རིག་ལས་ཁུངས་ནང་ས་མིག་ ༡ ། ཕྱི་དྲིལ་ལས་ཁུངས་ནང་ས་མིག་ ༥ ། འཕྲོད་བསྟེན་ལས་ཁུངས་ནང་ས་མིག་ ༤ ། སྤྱི་འཐུས་ལྷན་ཁང་ནང་ས་མིག་ ༡ ། རྩིས་ཞིབ་ལས་ཁུངས་ནང་ས་མིག་ ༡ བཅས་ཡིན་པ་དང་། ཁྱད་ལས་པའི་ལས་རིགས་ཀྱི་ཐད་ནས་ཀྱང་ལས་གཞི་འཆར་འགོད་པ་དང་། བཟོ་འགོད་པ། སློབ་སྟོན་པ། སློབ་གསོ་ཆེད་མཁས་པ། བརྙན་རིས་དང་པར་གཞི་ཇུས་འགོད་པ། བརྒྱུད་ལམ་ལས་རིག་པ། ཞིང་ལས་ཆེད་མཁས་པ་སོགས་ཁྱད་ལས་རྣམ་གྲངས་ ༡༡ ཙམ་གྱི་ཐོག་ས་མིག་གོ་སྒྲིག་བྱས་ཡོད་འདུག
ལས་གཞི་དབུ་འབྱེད་ཀྱི་མཛད་སྒོའི་ཐོག་བཀའ་དྲུང་གཡུ་ཐོག་ཀརྨ་དགེ་ལེགས་མཆོག་གིས། ཐོག་མར་ལས་གཞི་འདི་བྱུང་སྟངས་ནི་རྩ་བའི་བོད་མིའི་སྒྲིག་འཛུགས་དང་བོད་པའི་སྤྱི་ཚོགས་ནང་ཁྱད་ལས་པ་མང་པོ་ཞིག་ཡོད་ཀྱང་། དེ་དག་སོ་སོའི་ཁྱད་ལས་ས་མིག་ཐོག་ཏག་ཏག་ཅིག་གོ་སྒྲིག་གནང་མ་ཐུབ་པ་དང་། དེ་བཞིན། རྒྱལ་ཁབ་འདྲ་མིན་ནང་ཁ་ཐོར་དུ་བསྡད་ཡོད་སྟབས་བོད་པའི་ཁྱད་ལས་པ་མང་པོ་ཞིག་ལ་ཞབས་ཞུ་སྒྲུབ་འདུན་ཡོད་ཀྱང་། ཞབས་ཞུ་གནང་ས་ཏག་ཏག་ཅིག་མ་རག་པ་སོགས་ཀྱི་གནས་སྟངས་ལ་གཞིགས་ཏེ། ཁྱད་ལས་པ་ཚང་མ་མཉམ་དུ་རུབ་རུབ་ཀྱིས་དང་བླངས་ཞབས་ཞུའི་གོ་སྐབས་ཕུལ་ཐུབ་རྒྱུ་དེ་བཀའ་ཤག་གི་དགོངས་གཞི་ཡིན་པ་ངོ་སྤྲོད་དང་སྦྲགས། ཁོང་གིས་ “ཐོག་མར་ལས་གཞི་འདི་མགོ་འཛུགས་དུས་ཀྱི་ལོ་གཅིག་གཉིས་རིང་ལ། འབྲེལ་ཡོད་ལས་ཁུངས་ཁག་ཁ་ཤས་ཤིག་གི་ཐོག་ལས་གཞི་སྒྲིག་ཡོད་པ་རེད། ལས་གཞི་དེ་དག་ཡག་པོ་ཆགས་པ་ཡིན་ན། རྗེས་སུ་སྤྱི་ཚོགས་ཁྱོན་ཡོངས་ལ་རྒྱ་ཆེ་རུ་བཏང་གཏོང་རྒྱུའི་དགོངས་གཞི་ཡོད་པར་བརྟེན། འབྲེལ་ཡོད་ལྷན་ཁང་དང་སྡེ་ཚན་ག་འདྲ་ཞིག་ཡིན་ཡང་། དེའི་ཐོག་མཉམ་རུབ་མཐུན་འགྱུར་གནང་རོགས་ཞུ་རྒྱུ་ཡིན།” ཞེས་གསུངས་སོང་།
སྐུ་མགྲོན་གཙོ་བོ་དབུས་བོད་མིའི་སྒྲིག་འཛུགས་ཀྱི་ལས་བྱེད་འདེམས་སྐོ་ལྷན་ཁང་གི་འགན་འཛིན་འཇམ་དཔལ་ཆོས་བཟང་ལགས་ཀྱིས་ཀྱང་། “དེ་རིང་དྲུང་ཆེ་རྣམ་པ་ཚོ་ཡང་འདིར་ཕེབས་ཡོད་པ་རེད། མི་གཅིག་ལ་སེམས་ཤུགས་དང་འཇོན་ཐང་ག་ཚོད་ཡོད་ཀྱང་། ཚང་མས་མཐུན་འགྱུར་མ་གནང་ན་འགྲུབ་རྒྱུ་དཀའ་ལས་ཁག་པོ་རེད།” ཅེས་ཕྱོགས་ཡོངས་ནས་མཉམ་རུབ་གནང་དགོས་པའི་འབོད་སྐུལ་གནང་པར་མ་ཟད། འགན་བཞེས་མཁན་གྱི་ངོས་ནས་ཀྱང་དགོངས་པ་བཞེས་དགོས་པ་ཞིག་ནི། ལས་ཀ་འདི་རིགས་ག་ཚོད་ཅིག་ང་ཚོའི་སྤྱི་ཚོགས་དང་མཐུན་པར་ལག་ལེན་བསྟར་ཐུབ་ཀྱི་ཡོད་མེད་དང་། ལག་ལེན་བསྟར་མ་ཐུབ་པའི་རིགས་ངེས་པར་དུ་བསྟར་དགོས་ཀྱི་ཡོད་ཚེ། དེའི་ཐོག་ལ་སོ་སོའི་ངོས་ནས་ག་རེ་གནང་དགོས་མིན། ཕར་ཕྱོགས་ལས་ཀ་བྱ་ཡུལ་གྱི་ངོས་ནས་ཚུར་མཐུན་འགྱུར་ག་རེ་གནང་དགོས་ཀྱི་ཡོད་མེད་སོགས་ཀྱི་ཐད། ཕན་ཚུན་མཛའ་གྲོགས་དང་མཉམ་འབྲེལ་གཞི་ལ་བཞག་སྟེ་འབད་བརྩོན་གནང་དགོས་པའི་སྐོར་གསུངས་སོང་།
བོད་མིའི་ཁྱད་ལས་དང་བླངས་ཞབས་ཞུའི་དྲ་ཐག་ནི་ www.tibetcorps.org ཡིན་པ་དང་། རྒྱལ་ཁབ་ཕྱི་ནང་གང་སར་ཡོད་པའི་ཁྱད་ལས་པ་དང་ཤེས་ལྡན་པ་དག་གིས་རང་དབང་ཐོག དྲ་རྒྱ་བརྒྱུད་དང་བླངས་ཞབས་ཞུ་བའི་ཁྲོད་ཐོ་འགོད་གནང་ཆོག་གི་ཡོད་པ་དང་། ད་ལྟའི་ཆར་ཐོ་འགོད་གནང་ཟིན་པའི་དང་ཞབས་མི་སྣ་ ༣༠ ལྷག་བྱུང་ཡོད་འདུག དང་བླངས་ཞབས་ཞུའི་ས་མིག་ཐོག་གོ་སྒྲིག་བྱུང་སྐབས་དང་ཞབས་པ་རྣམས་ཀྱིས་མ་མཐའ་ཡང་དུས་ཡུན་ཟླ་གསུམ་རིང་ཞབས་ཞུ་སྒྲུབ་དགོས་ཀྱི་ཡོད་འདུག
དོན་ཕན་ལྡན་པའི་བགྱི་བ་འདི་ལ་ཡི་རང་བསྔགས་བརྗོད་ཞུ། འབྲས་བུ་སྨིན་པར་ཤོག
བོད་ཀྱི་དུས་བབ་དྲྭ་བདག་ལ་རེ་བ་ཞིག་ཞུ་རྒྱུ་ཡོད།འདིར་མཆན་བྲིས་ཚར་དུས་སོ་སོས་བྲིས་པའི་མཆན་ལའང་སོ་སོས་བཟོ་རྒྱག་ཐུབ་ཀྱི་མི་འདུག་པས་གལ་ཏེ་དུས་ཚོད་ཡོད་དེའི་སྐོར་སློབ་སྟོན་ཞིག་གནང་རོགས།གཞན་གྱིས་བྲིས་པའི་མཆན་ལ་ལག་པ་འཆང་མི་ཆོག་པ་ནི་རྒྱུ་མཚན་དང་ལྡན་པ་ཞིག་ཡིན་ནའང་རང་གིས་བྲིས་པའི་མཆན་ལ་བཟོ་བཅོས་རྒྱག་པའི་དབང་ཆ་དང་ཐོབ་ཐང་ནི་ངེས་པར་དགོས་པར་སེམས་སོ།།
རང་གིས་བྲིས་པའི་མཆན་ལ་བཟོ་བཅོས་ཇི་ལྟར་རྒྱག་དགོས་མིན་གྱི་ལན་ཞིག་གང་མགྱོགས་ཡོད་པར་མཁྱེན།དྲ་གྲོགས་རྣམས་ལའང་གོང་མཚུངས་ཀྱི་རེ་སྐུལ་ཞུ་གི་ཡོད།
བསྟན་འཛིན་ཆོས་རྒྱལ་ལགས། ཤེས་རིག་ལས་ཁུང་ལ་ས་མིག་༣ཟེར་བ་མ་གཟིགས་སམ། སྐལ་རྡོར་ལགས་ནི་བོད་མིའི་ཁྱད་ལས་དང་བླངས་ཞབས་ཞུའི་ལས་གཞིའི་འགོ་འཛིན་དང་དེ་བཞིན་བཀའ་ཁྲིའི་སློབ་སྟོན་པ་ཡིན་པ་གོ་ཐོས་བྱུང་ཡང་ཆབ་སྲིད་དམ་ཡང་ན་གང་གིའི་སློབ་སྟོན་པ་ཡིན་པ་ཆ་མ་འཚལ། དབྱིན་ཡིག་གི་གནས་ཚད་ཕུལ་དུ་ཕྱིན་ཞིང་ལས་དོན་གང་བརྩམས་ཀྱང་མཐར་སྐྱེལ་རྒྱུའི་ངང་ཚུལ་ཡོད་པའི་མི་ཞིག་ཡིན་པ་གོ་ཐོས་བྱུང་།
དུས་བབ་ཚང་ལ་གསར་འགོད་པ་མང་པོ་ཡོད་པ་ཞིག་མཐོང་མ་སོང་། གསར་འགྱུར་གལ་ཆེན་ཡིན་ན་དུས་ཐོག་ལ་སྤེལ་གྱི་འདུག ཡིག་ནོར་གྱི་ཐད་ནས་ཀྱང་ལོ་གཅིག་སྔོན་དང་བསྡུར་ན་ཡིག་ནོར་ཇེ་ཉུང་ལ་སོང་འདུག ཡིག་ནོར་ནི་དུས་བབ་ལ་མ་གཏོགས་མེད་པ་མ་རེད། རྩོམ་འབྲི་བ་ཚང་མ་ཡིག་ནོར་འབྲི་མཁན་རེད། གཞུང་སྒེར་ཚོགས་པ་ཚང་མ་ཡིག་ནོར་སྤེལ་མཁན་རེད། འདི་བོད་བཙན་བྱོལ་གཞུང་མང་གི་བོད་ཡིག་གནས་ཚད་རེད་མ་གཏོགས། དུས་བབ་ཚང་གི་སྒེར་གྱི་ན་ཚ་འདྲ་པོ་གང་ཡང་མ་རེད། ཡིག་ནོར་རྩ་མེད་ཀྱི་འབོད་སྐུལ་ཞུ་ན། བོད་སྤྱི་ཚོགས་ལ་ཞུས། མཁས་པ་དང་ཤེས་ཡོན་པ་ཚོར་ཞུས། རྩོམ་པ་པོ་ཚོར་ཞུས། ཚང་མར་ཚོར་བ་སླེབས་སླེབས་བར་ཞུ་རྒྱུ་བྱེད།
དེང་སྐབས་དུས་བབ་ཚང་གི་གསར་འགྱུར་མཚམས་ཆད་གྲབས་བྱེད་ཀྱི་ཡོད་པ་དེ་ག་རེ་ཡིན་ནམ། བོད་ནང་ཧ་ཅང་ཛ་དྲག་ཆགས་ཡོང་སྐབས། གསར་འགོད་པ་ཚོས་ཀྱང་ཧ་རོ་པ་རོ་བྱེད་དགོས་པ་རེད། མི་ཚང་མས་གསར་འགྱུར་བརྒྱུད་ལམ་ཁག་ལ་དོ་སྣང་གནང་བསྡད་ཡོད་པ་རེད། དུས་བབ་ཚང་ལ་གསར་འགོད་པ་མང་པོ་ཡོད་ནའང་ཆུ་ཚོད་ཉེར་བཞིའི་ནང་ལ་གསར་འགྱུར་གཅིག་རེ་གཏོང་ཐུབ་ལ་མ་ཐུབ་ལ་བྱེད་ཀྱི་འདུག གསར་འགྱུར་ནང་ཡིག་ནོར་མང་པོ་སྤེལ་ཡོང་གི་འདུག
ཤེས་ལྷན་དུ་དྭང་ལངས་ཡོད་ཚེ།ཤེས་འཇོན་ཅན་གྱི་དགེ་ལས་མང་པོ་ཞིག་གི་ཡང་ལྗིད་མཐོང་ཡོང་ཚེ་ཤེས་ལྷན་ནས་འབྲེལ་བཤད་རྫོགས་མཐའ་མེད་མེད་པས་ལྷག་བསམ་ཅན་རྣམས་ལ་ས་མིག་འཇོག་ག་ལ་ཆོག
ལས་གཞི་འདི་ངོ་མ་ཡག་པོ་འདུག སྐལ་རྡོར་ལགས་ལ་ཐུགས་རྗེ་ཆེ་ཞུ་རྒྱུ་ཡིན། སྐལ་རྡོར་ལགས་ད་ལྟ་གནས་རིམ་གང་གི་སྟེང་ཡོད་པ་ཡིན་ནམ།
རྒྱལ་ཁབ་ཕྱི་ནང་གང་སར་ཡོད་པའི་ཁྱད་ལས་པ་དང་ཤེས་ལྡན་པ་དག་གིས་རང་དབང་ཐོག དང་བླངས་ཞབས་ཞུ་བྱེད་པ་ལ་རྗེས་སུ་ཡི་རང་ཡོད།
འཕྲོད་སྟན་ལས་ཁུངས་ནང་ས་མིག་༣ཞེས་དང་བོར་བྲིས་འདུག་ཀྱང་། བར་དེར་ཡང་འཕྲོད་སྟན་ལས་ཁུངས་སུ་ས་མིག་༤ཞེས་པ་ཞིག་བྲིས་འདུག མ་ཟད་ཤེས་ལྷན་ལ་མི་འདུག་པས་ཡང་སྙིང་གང་ཡིན་ནམ།
ཡག་པོ་རེད། ངོ་མ་དགོས་རྒྱུ་རྐྱང་རེད།