“ཏཱ་ལའི་བླ་མར་དྲི་བ་བདུན་བཏོན་པ་”ཞེས་པའི་རྩོམ་ཡིག་གི་ཉེན་ཁའི་ཕྱོགས་ལྷུང༌།

བཀའ་ཡིག་དྲུང་འཕར་བུ་རྫོང་ལྷ་མོ་ཚང་ཚེ་རིང་དབང་ཕྱུག་ལགས་ཀྱིས་བོད་ཡིག་ཏུ་བསྒྱུར།

རྒྱ་ནག་གི་བོད་ལྗོངས་དྲ་རྒྱ་ཞེས་པའི་ནང་དུ་ཕྱི་ལོ་ ༢༠༡༢ ཟླ་ ༣ ཚེས་ ༢༢ ཉིན་སྤེལ་བའི་རྩོམ་ཡིག་འགོ་བརྗོད་དུ་“ཏཱ་ལའི་བླ་མར་དྲི་བ་བདུན་བཏོན་པ” ཞེས་པའི་རྩོམ་ཡིག་ཅིག་བཀོད་འདུག་པ་དང༌། དེ་རྗེས་མི་དམངས་དྲ་རྒྱ་སོགས་རྒྱ་ནག་གཞུང་གཉེར་བརྒྱུད་ལམ་དང་དྲ་རྒྱ་ཁག་ནང་གཅིག་རྗེས་གཉིས་མཐུད་ཀྱིས་རྩོམ་ཡིག་དེ་བརྒྱུད་འགོད་བྱས་འདུག རྩོམ་ཡིག་དེ་ནི་རིག་གནས་གསར་བརྗེ་ལྟར་མི་ལ་རྒྱུགས་རྡུང་བཏང་བའི་སྐད་ཡིག་རྩུབ་པོ་སྤྱོད་མཁན་རྒྱ་ནག་གཞུང་གི་དྲིལ་བསྒྲགས་པ་ཞིག་གིས་ལག་རྗེས་རེད་འདུག རྩོམ་ཡིག་དེས་རྒྱ་ནག་གཞུང་གཉེར་བརྒྱུད་ལམ་ཁག་གིས་ཏཱ་ལའི་བླ་མ་དང་བཙན་བྱོལ་དུ་ཡོད་པའི་བོད་མི་ཚོར་གཞི་མེད་ཀྱི་སྐྱོན་འཛུགས་དང་དམའ་འབེབས་བྱེད་བཞིན་པ་དེ་རྒྱུན་མཐུད་པ་མ་ཟད། ཐ་ན་ཁུངས་ལུང་མེད་པར་ཏཱ་ལའི་བླ་མ་མཆོག་དང་འཛམ་གླིང་དམག་ཆེན་གཉིས་པའི་སྐབས་ཀྱི་ནཱ་ཛི་ཧི་ཏ་ལ་དང་འདྲ་མཚུངས་མཉམ་བསྲེས་ཀྱང་བྱས་འདུག

རྩོམ་ཡིག་དེའི་ནང༌། “ཏཱ་ལའི་བླ་མས་མི་རིགས་རང་སྐྱོང་གི་དར་ཆ་བསྒྲེངས་ནས་གདུང་སེམས་མཉམ་སྐྱེ་གཡོ་ཐབས་བྱས་ཏེ། ཉིན་མ་ཞིག་ཞིང་བྲན་ལམ་ལུགས་བསྐྱར་ལོག་བྱུང་རྗེས་མི་རིགས་གཙང་བཤེར་བྱ་རྒྱུར་ལམ་བཤངས་བརྒྱབ་ཅིང༌། མི་རིགས་ཀྱི་ཁྱད་ཆོས་རྒྱུན་གནས་བྱ་རྒྱུ་ཟེར་བའི་མིང་བྱང་འོག་ཏུ། བོད་རིགས་དང་མི་རིགས་གཞན་གྱི་དབར་མི་རིགས་དབྱེ་འབྱེད་དང་མི་རིགས་ཀྱི་འཁོན་འཛིན་བཟོ་བའི་”འབར་ལན་གྱི་རྩིག་པ་ཞིག་“ བརྩིགས་འདུག ཏཱ་ལའི་གཏམ་སྤྱོད་དེ་དག་གིས་མི་རྣམས་ལ་འཛམ་གླིང་དམག་ཆེན་གཉིས་པའི་སྐབས་སྨྱོ་ཧམ་ཅན་གྱི་ནཱ་ཛི་མ་དྲན་དཀའ་མེད་རེད། ཏཱ་ལའི་དབུ་མའི་ལམ་དང་ཆེས་མཐོའི་རང་སྐྱོང་ཞེས་པའི་རྒྱབ་ཏུ་དམར་དམར་རྗེན་རྗེན་གྱིས་མི་རིགས་ཕྱིར་འབུད་བྱེད་པ་དེ། དེ་སྔའི་ཧི་ཏ་ལས་འཇིའུ་མི་རིགས་གཙང་སེལ་བྱེད་པ་དང་འདྲ་བོ་ག་ཚོད་མི་འདུག་གམ” ཞེས་བྲིས་ཡོད་འོན་ཏེ། གཞི་མེད་ཀྱི་སྐྱོན་འཛུགས་དེར་དེ་ལྟ་བུའི་དགག་ལན་རྒྱག་ཐེངས་གཅིག་གིས་ཀྱང་མི་བཟོད་པར་རྫུན་རྐུབ་རྡོལ་བ་རེད། དེའི་རྒྱུ་མཚན་ནི་རྒྱ་ནག་གཞུང་གིས་སྐྱོན་འཛུགས་བྱེད་སའི་གཞི་རྩ་ཡོངས་རྫོགས་ནི་བཙན་བྱོལ་བོད་མིའི་ཕྱོགས་ནས་འདོན་སྤེལ་བྱས་པའི<བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་> ཞེས་པའི་ནང་མ་འོངས་པའི་བོད་ཀྱི་རང་སྐྱོང་མངའ་ཁུལ་ནང་“ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ས་ཁུལ་གཞན་དུ་ཡོད་པའི་སྤྱི་འབངས་རྣམས་བོད་དུ་གནས་སྡོད་བྱེད་པ་དང༌། གཞིས་ཆགས་པ། ལས་རིགས་དང་དཔལ་འབྱོར་གྱི་ལས་དོན་གཉེར་ཕྱོགས་བཅས་ཀྱི་སྲོལ་ཡིག་བཟོ་རྒྱུའི་དབང་ཚད་དགོས་རྒྱུ་གལ་ཆེན་པོ་ཡིན་”ཞེས་འཁོད་པའི་འདོད་ཚུལ་དེ་ལ་དམིགས་པ་གསལ་པོ་རེད། དེ་ལྟར་ན། འདོད་ཚུལ་འདི་གོང་གསལ་རྒྱ་ནག་གཞུང་གིས་དྲིལ་བསྒྲགས་བྱས་པས་བརྗོད་པ་ལྟར། མངོན་གསལ་དོད་པོས་བོད་མི་མ་ཡིན་པའི་གནས་སྡོད་གྲོང་མི་རྣམས་བོད་ནས་ཕྱིར་འབུད་བྱས་པ་ཞིག་རེད་དམ་ཞེ་ན། དངོས་ཡོད་གནས་སྟངས་ནི། < བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་>ཞེས་པའི་ཡིག་ཆ་དེའི་ནང་བཙན་བྱོལ་བོད་མིའི་ཕྱོགས་ནས། “བོད་ནང་གཏན་དུ་གཞིས་ཆགས་པ་དང༌། ཡུན་རིང་པོ་ནས་གནས་སྡོད་འཚར་ལོངས་བྱས་པ་རྣམས་ཕྱིར་འབུད་བྱ་རྒྱུ་ང་ཚོའི་སྐུལ་སློང་མིན། ང་ཚོའི་སེམས་འཚབ་བྱེད་གཞི་རྒྱ་རིགས་གཙོས་པའི་མི་རིགས་གཞན་འབོར་ཆེན་སྤོ་ཤུགས་བྱ་རྒྱུའི་སྐུལ་སློང་བྱས་པའི་དབང་གིས་ད་ཡོད་སྤྱི་ཚོགས་ལ་འཕོ་འགྱུར་དང༌། བོད་མི་རྣམས་གྲངས་ཉུང་ཆགས་པ། ཧ་ཅང་འཇིགས་སླ་བའི་བོད་ཀྱི་རང་བྱུང་ཁོར་ཡུག་ལ་ཉེན་ཚབས་བཟོ་གི་ཡོད་པ་དེ་དག་ཡིན” ཞེས་གསལ་པོ་བརྗོད་ཡོད།

གོ་འཛོལ་མི་འོང་བའི་ཆེད་དུ། བཙན་བྱོལ་བོད་མིའི་ཕྱོགས་ནས་གོང་གསལ་བསམ་འཆར་ཡིག་ཆ་དེའི་འགྲེལ་བརྗོད་ནང་འཁོད་པར་གཞིགས་ན། < བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་> དེས་མི་རིགས་ས་གནས་རང་སྐྱོང་གི་གཞུང་ལ་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ས་ཁུལ་གཞན་ནས་བོད་ནང་ཡོང་མཁན་ཚོ་གནས་སྡོད་བྱེད་པ་དང༌། གཞིས་ཆགས་པ། ལས་རིགས་དང་དཔལ་འབྱོར་གྱི་ལས་དོན་གཉེར་ཕྱོགས་བཅས་ཀྱི་སྲོལ་ཡིག་བཟོ་རྒྱུའི་དབང་ཚད་དགོས། འདི་ནི་རང་སྐྱོང་གི་སྤྱིར་བཏང་ཁྱད་ཆོས་ཤིག་ཡིན་པ་མ་ཟད། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ལའང་དེ་ལྟ་བུའི་དེ་སྔའི་དཔེ་མཚོན་མེད་པ་མ་ཡིན། རྒྱལ་ཁབ་མང་པོའི་ནང་རང་བཞིན་གྱིས་གདོད་མའི་མི་རིགས་དང་གྲངས་ཉུང་མི་རིགས་ཀྱི་ས་ཁུལ་ལ་སྲུང་སྐྱོབ་དང་ཡང་ན་ཧ་ཅང་འཇིགས་སླ་བའི་ཁོར་ཡུག་སྲུང་སྐྱོབ་ཁུལ་དུ་རྒྱལ་ཁབ་འདིའི་ས་གནས་གཞན་ནས་གནས་སྤོ་འཛུལ་ཞུགས་བྱ་ཐབས་ཀྱི་ལམ་ལུགས་དང་སྲོལ་ཡིག་གཏན་འབེབས་བྱས་ཡོད། ༼བསམ་འཆར་༽ནང་“བོད་ནང་གཏན་དུ་གཞིས་ཆགས་པ་དང་དུས་ཡུན་རིང་པོ་ནས་གནས་སྡོད་འཚར་ལོངས་བྱས་པ་རྣམས་ཕྱིར་འབུལ་བྱེད་རྒྱུ་མིན” ཞེས་ཁ་གསལ་འཁོད་ཡོད།

དེའི་སྐོར་འབྲེལ་མོལ་སྐུ་ཚབ་རྣམ་པས་འགྲེལ་བརྗོད་གནང་ཟིན་པ་བཞིན། ཏཱ་ལའི་བླ་མ་མཆོག་དང་བཀའ་ཤག་ནས་དེ་སྔའི་གསུང་བཤད་ཁག་ནང་དེའི་སྐོར་ཁ་གསལ་གསལ་བཤད་གནང་ཡོད། དཔེར་ན། ཕྱི་ལོ་ ༢༠༠༨ ཟླ་ ༡༢ ཚེས་ ༤ ཉིན་ཏཱ་ལའི་བླ་མ་མཆོག་གིས་ཡུ་རོབ་གྲོས་ཚོགས་ལ་གསུང་བཤད་གནང་སྐབས་མཛུབ་སྟོན་གནང་དོན། “ང་ཚོས་ང་ཚོའི་དམིགས་ཡུལ་གསལ་པོ་བྱས་ཏེ་བཤད་ཡོད། དེ་ཡང་བོད་མི་མ་ཡིན་པའི་མི་རིགས་གཞན་རྣམས་བོད་ནས་ཕྱིར་འབུད་བྱ་རྒྱུ་ང་ཚོའི་སྐུལ་སློང་མིན། ང་ཚོའི་སེམས་འཚབ་བྱེད་གཞི་རྒྱ་རིགས་གཙོས་པའི་མི་རིགས་གཞན་འབོར་ཆེན་སྤོ་ཤུགས་བྱ་རྒྱུའི་སྐུལ་སློང་བྱས་པའི་དབང་གིས་ད་ཡོད་སྤྱི་ཚོགས་ལ་འཕོ་འགྱུར་དང་བོད་མི་རྣམས་གྲངས་ཉུང་ཆགས་པ། ཧ་ཅང་འཇིགས་སླ་བའི་བོད་ཀྱི་རང་བྱུང་ཁོར་ཡུག་ལ་ཉེན་ཚབས་བཟོ་གི་ཡོད་པ་དེ་ཡིན།” ཞེས་གསུང་པ་དེས་གསལ་གསལ་ཐིང་ཐིང་གིས་བོད་རིགས་ཕུད་པའི་མི་རིགས་གཞན་ཕྱིར་འབུད་བྱས་པ་མ་ཡིན་པ་གསལ་པོ་མཚོན་ཡོད།

དེར་བརྟེན་འདི་ནི་བོད་ཀྱི་གདོད་མའི་མི་རིགས་རྩ་མེད་འགྲོ་ཉེའི་ཆེད་གནས་སྐབས་འགུལ་བསྐྱོད་མི་འབོར་དང༌། ལས་ཀ་འཚོལ་མཁན། གསར་དུ་གཞིས་ཆགས་མཁན་ཚོར་དམིགས་ཏེ་ཁྲིམས་སྲོལ་གཏན་འབེབས་བྱས་པའི་དོན་ཚན་ནང་ཐོབ་ཐང་ཆ་བགོས་ཀྱི་ནང་དོན་ཞིག་རེད། དེའི་སྐོར་འགྲེལ་བརྗོད་མང་པོ་དགོས་མེད།

འདོད་ཚུལ་དེ་དག་ནི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ད་ཡོད་རྩ་ཁྲིམས་ཀྱི་སྒྲོམ་གཞིའི་འོག་མི་རིགས་ས་གནས་རང་སྐྱོང་ངམ་རང་སྐྱོང་དོན་འཁྱོལ་ཡོང་བའི་ཆེད་དུ་བཏོན་པ་ཞིག་ཡིན། འདོད་ཚུལ་དེ་དག་ལ་བོད་རྒྱ་མི་རིགས་གཉིས་བར་གོ་བསྡུར་དང་བསམ་ཚུལ་བརྗེ་ལེན་བྱེད་ཆོག་པ་དང་། པེ་ཅིན་དང་རྡ་རམ་ས་ལ་གཉིས་དབར་གྲོས་མོལ་གྱི་བརྗོད་གཞི་ཡང་བྱེད་ཆོག དེ་ཙམ་མ་ཟད་མ་འོངས་པའི་རྒྱ་ནག་མང་གཙོའི་གཞུང་གིས་མི་རིགས་ས་གནས་ཁུལ་དུ་ལམ་ལུགས་གསར་འཛུགས་བྱ་རྒྱུའི་གང་འཚམ་གྱི་དཔྱད་གཞི་ཡང་བྱེད་ཆོག འོན་ཀྱང༌། ག་རེ་བཤད་ཀྱང་མ་བཤད་ཀྱང་འདོད་ཚུལ་དེ་དག་དང་རྒྱ་ནག་གཞུང་གི་དྲིལ་བསྒྲགས་པས་བཤད་པའི། “དམར་དམར་རྗེན་རྗེན་གྱིས་མི་རིགས་ཕྱིར་འབུད་བྱེད་པ་” ཟེར་བ་དང་འབྲེལ་བ་ཏིལ་འབྲུ་ཙམ་མེད་པ་དང༌། དེ་བས་“ཇར་མན་ནཱ་ཛི་ཧི་ཏ་ལའི་མི་རིགས་རྩ་མེད་བཏང་བ་” ཟེར་བ་དེ་དང་མི་མཐུན་རྟ་གཡག་མགོ་སྦྲེལ་ལྟ་བུ་མིན་པར་ཏན་ཏན་དེའི་ལྡོག་ཕྱོགས་སུ་གནས་ཡོད། དེར་བརྟེན་རྒྱལ་སྤྱིའི་འཇིའུ་མི་རིགས་ཀྱི་འགྲོ་བ་མིའི་ཐོབ་ཐང་སྒྲིག་འཛུགས་ཀྱི་སི་མོན་ཝེ་སིན་ཐལ་བསྟི་གནས་ཀྱིས་ (The Simon Wiesnthal Center) དྲ་རྒྱའི་ནང་གསར་འགོད་གསལ་བསྒྲགས་སྤེལ་ཏེ།

རྒྱ་ནག་གཞུང་འབྲེལ་དྲ་རྒྱའི་ཐོག་ནས་ཏཱ་ལའི་བླ་མ་མཆོག་ལ་གཞི་མེད་སྐྱོན་འཛུགས་དང་དམའ་འབེབས་ཞུས་པར་ཧ་ལས་ཏེ་སྐྱོན་འཛུགས་དེར་ངོས་ལེན་རྩ་བ་ནས་མེད་པ་མ་ཟད། དེས་ནཱ་ཛི་ཡིས་དམར་གསོད་བཏང་བའི་གནོད་འཚེ་ཕོག་མཁན་རྣམས་ལ་དམའ་འབེབས་བཏང་འདུག ཏཱ་ལའི་བླ་མ་མཆོག་ལོ་བཅུ་གྲངས་འགའི་རིང་འཛམ་གླིང་གིས་གུས་བརྩི་ཞུ་ཡུལ་དུ་གྱུར་ཡོད། ད་ཆ་ཁོང་གིས་གནང་བཞིན་པའི་མཛད་འགན་གསུམ་ནང་གི་གཅིག་ནི་ཞི་བའི་གྲོས་མོལ་ཐོག་འབད་བརྩོན་གནང་གི་ཡོད། དོན་དངོས་ཐོག་ཏཱ་ལའི་བླ་མ་མཆོག་གིས་དར་སྤེལ་མཛད་པའི་འགྲོ་བ་མིའི་བྱམས་བརྩེའི་རིན་ཐང་སྐོར་གྱི་ལྟ་གྲུབ་འདི་ནཱ་ཛི་པ་ཚོས་གཏོར་བཤིག་བཏང་བ་ལྟར་མིན་པས། གསར་འགོད་གསལ་བསྒྲགས་ཀྱི་མཇུག་ཏུ་རྒྱ་ནག་གཞུང་འབྲེལ་གྱི་དྲ་རྒྱ་གཙོ་བོ་མི་དམངས་དྲ་རྒྱ་དང༌། ཤིན་ཧྭ་དྲ་རྒྱ། རྒྱ་ནག་གི་བོད་ལྗོངས་གསར་འགྱུར་དྲ་རྒྱ་བཅས་ཀྱིས་འཕྲལ་དུ་ཁོང་ལ་དགོངས་སེལ་ཞུ་དགོས་ཞེས་འཁོད་ཡོད།  ཁོ་བོའི་བསམ་པར། རྩོམ་པ་པོའི་མིང་ཡང་བཀོད་མ་ནུས་པའི་རྩུབ་སྤྱོད་རྒྱུགས་རྡུང་གི་རྩོམ་འཆལ་དེ་གལ་ཏེ་རྒྱ་ནག་གཞུང་གི་བཀོད་བྱུས་འོག་ཡོད་པའི་དྲིལ་བསྒྲགས་པ་ཞིག་གིས་ཕེར་ཤ་ལངས་ཏེ་བྲིས་པ་ཞིག་ཡིན་ན། དེར་ཡ་ལན་དང་ལན་རྒྱག་རིན་གང་ཡང་མེད། གནད་འགག་ཐུག་ས་ནི་རྩོམ་འཆལ་དེ་ཐོན་མ་ཐག་རྒྱ་ནག་གཞུང་འབྲེལ་གྱི་བརྒྱུད་ལམ་དྲ་རྒྱའི་ཐོག་བརྒྱུད་འགོད་བྱས་ཏེ། ཧ་ལམ་ཡོང་ཁུངས་མཐོ་ས་ཞིག་ནས་ཡིན་པའི་རྣམ་པ་སྟོན་གྱི་ཡོད་པ་དེ་གནས་ཚུལ་ཆུང་ཆུང་ཞིག་མ་རེད། ཀུན་གྱི་ཤེས་གསལ་ལྟར་རྒྱ་ནག་གཞུང་གིས་དྲ་རྒྱའི་ཐོག་ལྟ་རྟོགས་ཚོད་འཛིན་ནན་པོ་ཡོད་པའི་ལམ་ལུགས་དེའི་འོག་མི་དམངས་དྲ་རྒྱ་དང༌། ཤིན་ཧཱ་དྲ་རྒྱ་སོགས་རྒྱ་ནག་གཞུང་གཉེར་གྱི་དྲ་རྒྱ་དེ་དག་ཚང་མས་མི་དྲན་དགུ་དྲན་དང་དཀར་ནག་གོ་ལྡོག་གིས་ཁ་ནས་གང་ཐོན་བཤད་རྐྱང་བྱེད་པའི་རྩོམ་འཆལ་དེར་གློག་བཞུ་ལྗང་གུ་སྤར་ཏེ་གུ་ཡངས་གཏོང་རྐྱང་བྱེད་པ་དེས་ཡང་སྙིང་གོ་བརྡ་ག་རེ་སྤྲོད་པ་དང༌། བསམ་ཕྱོགས་གང་འདྲ་ཞིག་བརྒྱུད་བསྒྲགས་བྱེད་ཀྱི་ཡོད་དམ།

ཀུན་གྱི་ཤེས་གསལ་ལྟར། རྒྱ་ནག་གི་ཆབ་སྲིད་ཐད་འགྱུར་བ་འགྲོ་རྒྱུའི་འགག་སྒོ་གལ་གནད་ཆེ་བ་ཞིག་གི་ཉེ་འཁྲིས་སུ་སླེབས་ཡོད། ཉེ་ཆར་བྷོ་ཤི་ལའི་དང་ཝང་སླིད་ཅུན་གྱི་དོན་རྐྱེན་བྱུང་སྟེ་རྒྱ་ནག་གི་རྙིང་ཞེན་བག་འཁུམས་དང་གཡོན་ཐལ་ཆེ་བའི་སྟོབས་ཤུགས་ལ་བར་ཆད་བྱུང་ཡོད། སྲིད་བློན་ཝུན་ཅཱ་བའོ་ཡིས་ས་ཕྱོགས་མང་པོ་ཞིག་ཏུ་བསྐྱར་དུ་ཆབ་སྲིད་ལམ་ལུགས་ཐོག་བསྒྱུར་བཅོས་བྱེད་དགོས་པའི་རེ་འབོད་བྱས་ཏེ། དམངས་ཁྲོད་དུ་མང་གཙོ་ཅན་དུ་བསྒྱུར་རྒྱུ་རེ་བའི་མཐོ་རླབས་ཤིག་ཕྱུར་ཡོད། མ་འོངས་པའི་རྒྱ་ནག་གི་ངོས་ནས་གླེང་ན། འདི་ནི་རྙེད་དཀའ་བའི་གོ་སྐབས་ཤིག་ཡིན། སྲིད་དབང་བཟུང་མཁན་ཡིན་ནའང་འདྲ། ངོ་རྒོལ་བྱེད་མཁན་གྱི་ཤོག་ཁག་ཡིན་ནའང་། ཚང་མས་བསྐྱར་དུ་དུས་སྐབས་ལ་ལྟ་ཞིབ་དང་གནས་ཚུལ་ལ་ཚོད་དཔག་བྱེད་ཀྱི་ཡོད། ཁོ་བོའི་ལྟ་ཚུལ་ལ། རྒྱ་ནག་གི་ཆབ་སྲིད་ཐད་འགྱུར་བ་འགྲོ་ཕྱོགས་དང་དུས་བབ་གསར་པ་ཞིག་བསྐྲུན་འདོད་ཡོད་པའི་ད་ལྟའི་ལམ་སྲོལ་ནང་གི་བསྒྱུར་བཅོས་བྱེད་མཁན་དང་དམངས་ཁྲོད་ཀྱི་ངོ་རྒོལ་མི་སྣའི་ངོས་ནས་བཤད་ན། ལུགས་དང་མཐུན་ཞིང་ལག་བསྟར་བྱེད་ཆོག་པའི་འགྱུར་ལྡོག་གཏོང་རྒྱུའི་ལམ་ཐིག་གཅིག་གཏན་འབེབས་བྱ་རྒྱུ་གལ་འགངས་ཆེན་པོ་རེད། ལམ་ཐིག་རི་མོ་དེའི་ནང༌། ངེས་པར་དམག་འཐབ་ཀྱི་དམིགས་ཚད་ལག་བསྟར་གྱི་གོམ་འགྲོས་དང་གལ་ཆེ་ཆུང་དང་ལྗིད་ཡང་མ་ལྡོག་པར་མི་རིགས་ཀྱི་གནད་དོན་ནི་ལམ་ཐིག་རི་མོ་དེའི་ནང་ནས་ངེས་པར་དུ་ཐག་གཅོད་བྱེད་དགོས་པའི་དམིགས་ཚད་ཀྱི་གྲས་ཤིག་ལ་འཇོག་དགོས།

འདས་པའི་ལོ་ ༦༠ ནང་གཞུང་འཛིན་པ་ཚོས་མི་རིགས་ཀྱི་སྲིད་བྱུས་ཁྱབ་ཁོངས་ནང་ནོར་འཁྲུལ་གྱི་ལས་ཀ་མང་པོ་བྱས་ཡོད་པ་མ་ཟད། ཐ་ན་ལས་ངན་བྱས་ཏེ་རྫུན་གཏམ་ཡང་མང་པོ་བཤད་དེ་ཉེས་པ་ཡང་མང་པོ་བསགས་ཡོད། དེ་དག་གིས་འགྱུར་ལྡོག་གཏོང་རྒྱུར་ཕན་ཐོགས་མེད། མི་རིགས་ཀྱི་གནད་དོན་ཐག་གཅོད་བྱེད་པའི་དཀའ་ངལ་ཆུང་དུ་གཏོང་རྒྱུ་དང༌། ལམ་ལུགས་ལུགས་མཐུན་མེད་པའི་དབང་གིས་མི་རིགས་ཀྱི་འཁོན་འགྲས་བཟོས་པ་རྣམས་མེད་པ་བཟོ་རྒྱུའི་ཆེད་དོན་དམ་གྱི་འགྱུར་ལྡོག་གཏོང་རྒྱུའི་སྔོན་དུ་མི་རིགས་འཆམ་མཐུན་གྱི་རྣམ་པ་བསྐྲུན་ནས་དོན་དངོས་དང་མ་མཐུན་པའི་རྫུན་གཏམ་མ་ཤོད་པ་དང༌། དམའ་མཐར་ཡང་ད་ནས་བཟུང་རྫུན་གཏམ་གསར་པ་མི་བཟོ་བ་དང་མི་བཤད་པ། སོ་སོའི་གྲོས་མོལ་གྱི་ཁ་གཏད་ལ་གདོན་འདྲེ་བཞིན་དམའ་འབེབས་མི་གཏོང་བ་བྱ་རྒྱུ་དེ་ནི་ད་ལྟའི་གཞུང་འཛིན་མི་སྣས་ངེས་པར་དུ་བྱེད་དགོས་པའི་ལས་དོན་གཅིག་ཡིན། དོན་དངོས་དང་དངོས་ཡོད་གནས་སྟངས་ནི་རྒྱ་ནག་ཏུ་ཧ་ལམ་མེད་པའམ་མཐོང་དཀོན་པའི་ཁྱབ་ཁོངས་ཤིག་ཆགས་ཡོད། འདི་ནི་དམར་ཤོག་ཚོགས་པས་ལོ་མང་རིང་དྲིལ་བསྒྲགས་ཀྱི་ཡོ་ཆས་གསར་འགྱུར་བརྒྱུད་ལམ་ཁག་ཏུ་དངོས་ཡོད་གནས་ཚུལ་དང་དེའི་འབྱུང་ཁུངས་ཆེད་མངགས་བཀག་སྡོམ་བྱས་ཏེ་མང་ཚོགས་རྨོངས་བཅུག་པའི་མཇུག་འབྲས་ཤིག་རེད།

རྒྱ་ནག་གི་མི་མང་ཆེ་བས་༼དེའི་ནང་དམར་ཤོག་ཚོགས་པའི་དཔོན་རིགས་ཀྱང་ཚུད་ཡོད་༽ག་དུས་ཡིན་ནའང་སྣང་མེད་ཟོམ་འཇོག་ཏུ་བཞག་པའི་རྒྱུ་རྐྱེན་ཞིག་ཀྱང་རེད། དཔེར་ན། གལ་ཏེ་གསར་འགྱུར་བརྒྱུད་ལམ་ཁག་ནང་དམ་བསྒྲགས་བྱས་མེད་ན། གལ་ཏེ་སྤྱིར་བཏང་གི་མང་ཚོགས་དང་ལྷག་པར་དུ་རྒྱ་རིགས་མང་ཚོགས་རྣམས་ཀྱིས་བོད་རིགས་སྤུན་ཟླའི་ཆབ་སྲིད་དང༌། རིག་གནས། སྐད་ཡིག ཆོས་ལུགས་དད་མོས་ཀྱི་དབང་ཆའམ་ཐོབ་ཐང་བཙན་གནོན་བྱས་པའི་དངོས་ཡོད་གནས་ཚུལ་དང༌། དེ་བཞིན་ཏཱ་ལའི་བླ་མ་མཆོག་གི་དབུས་པའི་བཙན་བྱོལ་བོད་མི་ཚོ་ལོ་ངོ་བཅུ་གྲངས་འགའ་ཤས་རིང་བཙན་བྱོལ་གྱི་སྤྱི་ཚོགས་མང་གཙོའི་ལམ་སྲོལ་དུ་གོང་འཕེལ་དང་འཛུགས་གཉེར་བྱས་པའི་དངོས་དོན་དང་དེའི་ཐོག་ཁོང་ཚོས་རང་དབང་རྩོད་པ་ལས་རང་བཙན་རྩོད་ཀྱི་མེད་པའི་འདོད་ཚུལ་རྣམས་ཤེས་རྟོགས་བྱུང་བ་ཡིན་ན། “དྲི་བ་བདུན་བཏོན་པ” ཟེར་བའི་ངོ་ཚ་མེད་པའི་རྩོམ་འཆལ་དེ་རིགས་ལ་ཁྲོམ་ས་ཡོད་པ་མ་རེད། མི་རིགས་ཞི་མཐུན་ཕྱོགས་སུ་ཁ་ཕྱོགས་རྒྱུ་འདི་ནི་རྒྱ་ནག་གི་ཆབ་སྲིད་འགྱུར་བ་འགྲོ་རྒྱུའི་དམིགས་ཚད་ཀྱི་གྲས་ཤིག་ཡིན་ལ་ཞི་བའི་ངང་ཆབ་སྲིད་ཀྱི་ཁ་ཕྱོགས་བསྒྱུར་རྒྱུ་སྐུལ་མ་གཏོང་རྒྱུའི་སྔོན་འགྲོ་ཞིག་ཡིན། མི་རིགས་འཆམ་མཐུན་གྱི་སྔོན་འགྲོ་དེ་ཡང་རྫུན་གཏམ་དང་ཉུང་མཐར་ཡང་བསྐྱར་དུ་རྫུན་གཏམ་གསར་པ་མེད་པ་བཟོ་རྒྱུ་དེ་རེད།

རྒྱུ་མཚན་དེ་དག་ལ་བརྟེན་ང་ཚོས་ཁུངས་ལུངས་མེད་པའི་“དྲི་བ་བདུན་”ཞེས་པའི་ཡིག་འཁྱམ་དེ་རིགས་རྒྱ་ནག་གཞུང་གཉེར་བརྒྱུད་ལམ་གཙོ་གྲས་ཐོག་འཁོན་འཁོན་ཐོག་ཐོག་མེད་པར་བརྒྱུད་སྤེལ་བྱས་པ་དེ་ནི་རྩོམ་འཆལ་དེས་ཉེན་ཚབས་ཆེ་བའི་ཕྱོགས་ལྷུང་ཞིག་གི་ཚབ་བྱས་ཏེ། ཁོས་རྒྱ་ནག་གི་ཆབ་སྲིད་ཀྱི་ཁ་ཕྱོགས་འགྱུར་བ་གཏོང་རྒྱུར་དགོས་ངེས་ཆ་རྐྱེན་བསྐྲུན་རྒྱུའི་ཚབ་ཏུ་ཆེད་མངགས་དུས་བབ་རྙོག་ཟིང་བསླངས་ཏེ་འགྱུར་བ་འགྲོ་རྒྱུ་ཆེད་དུ་འགོག་རྐྱེན་བཟོ་ཡི་ཡོད་པ་རེད། དེའི་རྒྱབ་ཏུ་ཕལ་ཆེར་རྒྱ་ནག་གི་ཆབ་སྲིད་ཀྱི་ཁ་ཕྱོགས་འགྱུར་བ་གཏོང་རྒྱུར་བཀག་འགོག་བྱེད་མཁན་ཀླད་རྙིང་མཁྲེགས་བཟུང་ཅན་ཉུང་ཤས་ཤིག་གི་གྲིབ་ནག་བསྡད་ཡོད། དེར་བརྟེན་མ་འོངས་པའི་རྒྱ་ནག་ལ་དོ་སྣང་བྱེད་མཁན་གྱི་མི་ཚོས་དོན་གནད་དེར་རྟོགས་ཞིབ་མ་བྱེད་དཀའ་མེད་དུ་གྱུར་ཡོད་དོ།། །།

༼རྩོམ་ཡིག་འདི་སྤེལ་མཁན་སྐུ་ཞབས་ཀྲང་བྷོ་ཧྲུའུ་ནི་རྒྱ་ནག་པེ་ཅིང་གི་མི་ཡིན་ཞིང་རྒྱ་ནག་མི་དམངས་དཔལ་འབྱོར་སློབ་ཆེན་གྱི་མཁས་པའི་ཕྱག་འཁྱེར་དང་རྒྱ་ནག་སྤྱི་ཚོགས་ཚན་རིག་ཞིབ་འཇུག་ཁང་གི་མཚན་ཉིད་རིག་པ་ནས་རབ་འབྱམས་པ་དང་འབུམ་རམ་པ་ཐོབ་པའི་གྲགས་ཅན་ཞིབ་འཇུག་པ་ཞིག་ཡིན་འདུག ཁོང་གིས་ལོ་མང་རིང་འབྲི་རྩོམ་གནང་བའི་< དེང་རབས་ཅན་དང་ལམ་ལུགས་དེང་རབས་ཅན་>སོགས་མཚོན་པའི་རྩོམ་ཡིག་མང་དག་ཅིག་སྤེལ་མྱོང་ཡོད་མཁན་གྱི་རྒྱ་རིགས་མཁྱེན་ལྡན་པ་ཞིག་ཡིན་འདུག༽