དེ་རིང་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་ཀྱིས། གཞོན་ལྷན་གྱིས་བསྡུ་བཞིན་པའི་བོད་རང་བཙན་ཐེབས་རྩའི་མ་དངུལ་དེ་ཟླ་རྗེས་མའི་ནང་མཇུག་སྒྲིལ་འཆར་ཡོད་སྐོར་བརྗོད་ཡོད།
དབུས་བོད་ཀྱི་གཞོན་ནུ་ལྷན་ཚོགས་ཀྱི་བཀོད་ཁྱབ་འོག ད་ལོའི་ཕྱི་ཟླ་ ༢ ཚེས་ ༢༢ ཉིན་ཏེ་བོད་ཆུ་འབྲུག་ལོའི་ལོ་གསར་ཚེས་གཉིས་ཉིན་འཛམ་གླིང་རྒྱལ་ཁབ་འདྲ་མིན་གྱི་གཞོན་ལྷན་ས་གནས་ཁག་ ༨༦ ཙམ་གྱི་ནང་། བོད་རང་བཙན་སླར་གསོའི་ཆེད་ཐེབས་རྩའི་མ་དངུལ་བསྡུ་རུབ་གནང་ཡོད་པ་ལྟར། དེ་རིང་ཕྱི་ཚེས་ ༡༧ ཉིན་བར་གཞོན་ནུ་ལྷན་ཚོགས་ཀྱིས་ས་གནས་མང་ཚོགས་ཁྲོད་ཐེབས་རྩའི་མ་དངུལ་བསྡུ་རུབ་གནང་སྟེ་དུས་ཡུན་ཟླ་གཉིས་ཙམ་འགྲོ་བཞིན་ཡོད་པ་རེད།
ད་ནངས་འདི་གའི་གསར་འགོད་པས་གཞོན་ནུའི་ཚོགས་གཙོ་ཚེ་དབང་རིག་འཛིན་ལགས་སུ། བོད་རང་བཙན་སླར་གསོའི་ཆེད་བསྡུ་རུབ་གནང་བཞིན་པའི་ཐེབས་རྩའི་མ་དངུལ་སྐོར་བཀའ་འདྲི་ཞུས་པར་ཁོང་གིས། “ བོད་རང་བཙན་གྱི་ཐེབས་རྩའི་མ་དངུལ་ང་ཚོས་གང་མགྱོགས་བསྡུ་རུབ་བྱེད་བཞིན་ཡོད། མ་འོངས་པའི་ཟླ་གཅིག་ནང་ཚུད་ལ་བསྡུ་རུབ་གནང་ཚར་བའི་རེ་བ་བྱེད་ཀྱི་ཡོད། སྐབས་དེར་གཞོན་ནུ་ལྷན་ཚོགས་ཀྱིས་ཕྱི་གསལ་ནང་གསལ་ཐོག་གསར་འགོད་གསལ་བསྒྲགས་བསྐྱང་སྟེ། ཞལ་འདེབས་ཀྱི་ཡོང་ཁུངས་དང་དངུལ་རྩིས་ཀྱི་གྲངས་འབོར་སོགས་གཙང་བཟོ་བྱ་རྒྱུ་” ཡིན་ཞེས་བརྗོད་སོང་།
ཐེབས་རྩའི་མ་དངུལ་དེ་བོད་མིའི་སྒྲིག་འཛུགས་ལ་ཇི་ལྟར་འབུལ་འཆར་ཡོད་མེད་སྐོར་དྲིས་པར། “ཐོག་མའི་ཆར་ང་ཚོས་གསལ་བསྒྲགས་སྤེལ་སྐབས་ཐེབས་རྩའི་མ་དངུལ་དེ་བོད་རྒྱལ་ཁབ་འཛུགས་བསྐྲུན་ཆེད་ཡིན་སྟབས། བོད་གཞུང་ལ་འབུལ་རྒྱུ་ཡིན་ཞེས་བཤད་ཡོད་པ་རེད། གལ་སྲིད་བོད་གཞུང་གིས་ངོས་ལེན་མ་གནང་པ་ཡིན་ན། ཐེབས་རྩའི་མ་དངུལ་དེ་གཞོན་ལྷན་གྱིས་བོད་རྒྱལ་ཁབ་སླར་གསོ་བྱུང་སྐབས་ཕུལ་ན་མ་འགྲིག་པ་གང་ཡང་ཡོད་པ་མ་རེད ”ཅེས་ལན་འདེབས་གནང་སོང་།
གནས་སྟངས་དེའི་ཐད་གཞོན་ནུའི་དྲུང་ཆེ་བསྟན་འཛིན་ཆོས་སྐྱིད་ལགས་ཀྱིས་བརྗོད་ན། བོད་རང་བཙན་སླར་ཆེད་བསྡུ་རུབ་གནང་བཞིན་པའི་ཐེབས་རྩའི་མ་དངུལ་དེ། ད་སྔ་ཨ་རི་དང་ཕྱིའི་རྒྱལ་ཁབ་རེ་ཟུང་མ་གཏོགས་གྲུབ་ཚར་ཡོད་ལུགས་དང་། ད་བར་གཞོན་ལྷན་གྱིས་ས་གནས་བརྒྱ་ཆ་ ༧༠ ནང་མ་དངུལ་བསྡུ་རུབ་གནང་ཐུབ་བྱུང་ཡོད་སྐོར་བརྗོད་ཡོད།
གསར་འགོད་པ། དཔལ་ལྡན།
འདི་གཞོན་ནུའི་ཆབ་སྲིད་ཀྱི་མདའ་ཁ་ནང་དུ་ཕྱོགས་པ་ཞིག་རེད།
ཐུགས་རྗེ་གཟིགས། ཡང་དངུལ་དེ་བུ་མེད་ཚོགས་པའི་མ་དངུལ་ཇི་བཞིན་མི་འབྱུང་བའི་རེ་བ་དང་སྨོན་ལམ་ཞུ་བཞིན་ཡོད། བོད་ཀྱི་གནས་སྟངས་ཡ་ང་བ་འདི་ལ་གཏོགས་ཙམ་གཟིགས་རོགས་གནང་དང་།
བོད་ཀྱི་རྩ་དོན་འདི་མི་རབས་རྒན་པ་ནས་གཞོན་པའི་ཕྲག་སྟེང་དུ་རང་བཞིན་གྱིས་བབས་ཡོང་བ་ནི་ཆོས་ཉིད་ལ་སོང་བས། གཞོན་ནུ་ལྷན་ཚོགས་ནི་བོད་ཀྱི་མ་འོང་རྩ་དོན་བསྒྲུབ་མཁན་གལ་ཆེ་ཤོས་ཞིག་ཆགས་ཡོད། བྱས་ཙང་རྒྱལ་ཁབ་ཀྱི་རྩ་དོན་བསྒྲུབ་པར་མ་དངུལ་འབོར་ཆེན་དགོས་པ་རེད་ལ་ཞལ་འདེབས་བསྡུ་རུབ་གཅིག་པུ་མ་ཡིན་པར་ཁེ་ལས་གཉེར་དགོས་པ་གལ་ཆེའི་ནང་གི་དོན་ཆེན་ལ་རྩིས་དགོས་པར་འདོད། མ་ཟད་ལྐོགས་ཟའི་གནད་དོན་ལ་ངེས་པར་དུ་དྭོགས་ཟོན་གནང་དགོས་པ་རེད།
འོན་ཀྱང་མ་དངུལ་དབུས་བོད་མིའི་སྒྲིག་འཛུགས་ལ་འབུལ་འཆར་ཞེས་པ་དེ་རྒྱུ་མཚན་ག་རེ་ཡིན་ནམ། དབུས་སྒྲིག་འཛུགས་གཞུང་གི་བཞེངས་ཕྱོགས་ཏང་ཀྲུང་དབྱང་སྲིད་གཞུང་གིས་གཞིས་འགུག་གནང་ན་མེས་རྒྱལ་ཁྱིམ་ཚང་ཆེན་མོའི་ནང་ལོག་འདོད་ཡོད་པ་རེད་ལ་ཏང་གི་དྲོ་སྐྱིད་ལ་རེ་ཡོད་པ་རེད། འོན་ཀྱང་གཞོན་ལྷན་གྱི་བཞེངས་ཕྱོགས་རང་བཙན་གཙང་མ་ཡིན་པ་རེད་མ་གཏོག་ཏང་གིས་གཞིས་འགུག་ལ་རེ་ཡོད་པ་ཡིན་རྒྱུ་མ་རེད་པ། འདི་གཉིས་འགལ་ཟླ་མ་རེད་པས།
བོད་རང་བཙན་མྱུར་ཏུ་ཐོབ་པར་ཚང་མས་འབད་བརྩོན་བྱེད་རོགས་ཞུ་རྒྱུ་ཡིན། འདི་ནི་ང་ཚོ་བོད་ཅེས་པའི་མིང་བྱང་འོག་འཇིག་རྟེན་འདིར་གསོན་ཐུབ་ཚེ་སྲོག་གི་རྒྱུ་བ་ཉག་ཅིག་ཡིན། བོད་རྒྱལ་ལོ།།
བོད་ཀྱི་གཞོན་ནུ་ལྷན་ཚོགས་འདི། དུས་ཀྱི་གཉེན་འཕྲང་གི་ཁུག་སོ་ལ་ངེས་པར་དུ་འཁོ་གལ་ཆེ་བ་མ་ཟད། མེད་དུ་མི་རུང་བའི་ཚོགས་པ་གལ་ཆེན་ཞིག་ཡིན་པ་རང་ངོས་ནས་ངོས་འཛིན་བྱེད་ཀྱི་ཡོད། ང་ཚོ་དབུས་གཞུང་ནས་བྱེད་དུ་མི་གཏུབ་པའི་བྱ་བ་གལ་འགང་ཆེ་བའི་རིགས་ཚོགས་པ་འདི་རྒྱུད་ནས་བྱེད་ཕོད་པའི་སྙིང་སྟོབས་འདུག་ལ། ཕྱིས་འབྱུང་ལ་ཡང་མུ་མཐུད་ནས་བྱེད་པར་འགྱུར་བའི་ཡིད་ཆེས་གཙང་མ་ཡོད། ང་ཚོའི་འཐབ་རྩོད་ངར་པོ་འདི་མི་རིགས་ཀྱི་འཕོ་འགྱུར་ཡ་ང་བ་ཞིག་གི་རྗེས་གནོན་ཡིན་པ་བཞིན་གཞོན་ནུ་ཡོད་ཚད་སེམས་ཤུག་འཕར་བའི་ལས་འགུལ་ལ་ཤུག་སྣོད་རྒྱག་དགོས། འགྲན་ཟླས་ག་ཚོད་ཙམ་ཀྱི་གནོན་ཤུག་ཡོད་ན་ཡང་དཔའ་མི་ཉམས་པའི་ལྷག་བསམ་དང་ལ་རྒྱ་གོང་མཐོར་བཏང་བའི་ལས་འགུལ་ལ་མི་རྒྱུ་གཉིས་ཐད་ནས་འགྲོ་གྲོན་བཏང་ཐུབ་པའི་མ་དངུལ་དགོས་པ་ཡིན་ཙང་། དབུས་གཞུང་ལ་སྤྲོད་དགོས་པའི་རྒྱུ་མཚན་ཡང་དག་གཏན་ནས་མི་འདུག་སྙམས