ཉེ་ཆར་བཞུཊ་སྒར་ངྷ་རམ་ས་ལར་ཧྥ་རན་སིའི་ཡུལ་མི་ཞིག་གིས་༼ནང་བསྟན་སྲི་ཞུ་ཁང་༽ཞེས་པའི་ལས་ཁུངས་ཤིག་གསར་འཛུགས་བྱས་ཏེ། ལས་ཁུངས་དེའི་དགེ་རྒན་༨ ཀྱིས་རྒྱལ་ཁབ་ཁག་ ༡༥ ནས་ཡིན་པའི་སློབ་མ་ ༣༩ ཙམ་ལ། དྲ་ཐོག་ནས་བོད་ཆོལ་ཁ་གསུམ་གྱི་ཁ་སྐད་དང་སུམ་རྟགས། སྙན་ངག ནང་ཆོས་སོགས་སློབ་ཁྲིད་བྱེད་ཀྱིན་ཡོད་འདུག
ཧྥ་རན་སིའི་ལྷོ་ཕྱོགས་ཁུལ་གྱི་བོད་པའི་ཆོས་ཚོགས་ཤིག་ཏུ་སྐྱེས་ཤིང་། རྒྱ་གར་བཙན་བྱོལ་བོད་མིའི་དགོན་སྡེ་ཁག་ཏུ་ནང་པའི་གཞུང་ཆེན་ཁག་དང་སྐར་རྩིས་རིག་པར་སློབ་གཉེར་ཡུན་རིང་གནང་སྟེ། སྦིར་དཔལ་སྤུངས་ཤེས་རབ་གླིང་དུ་སྐར་རྩིས་དགེ་རྒན་གྱི་ཕྱག་ལས་གནང་མྱོང་ཡོད་པའི་ཧྥ་རན་སིའི་ཡུལ་མི་སྐུ་ཞབས་ངག་དབང་འཕྲིན་ལས་ལགས་ཀྱིས། ཉེ་ཆར་བཞུགས་སྒར་ངྷ་རམ་ས་ལའི་པདྨ་ཐང་མགྲོན་ཁང་གི་ཉེ་འདབས་སུ། བོད་ཀྱི་ཆོས་དང་རིག་གཞུང་། སྐད་ཡིག་སྲུང་སྐྱོབ་བཅས་ཀྱི་ཆེད་༼ནང་བསྟན་སྲི་ཞུ་ཁང་༽ཞེས་པའི་ལས་ཁུངས་ཤིག་གསར་འཛུགས་གནང་ཡོད་ཅིང་། ལས་ཁུངས་དེ་ནི་ནུབ་ཕྱོགས་རྒྱལ་ཁབ་ཁག་གི་ནང་བོད་ཀྱི་རིག་གཞུང་ལ་དོ་སྣང་ཡོད་མཁན་དང་། བོད་རིཊ་གཞོན་སྐྱེས་བོད་སྐད་བོད་ཡིག་མི་ཤེས་མཁན་དག་ལ། དྲ་རྒྱ་བརྒྱུད་བོད་སྐད་བོད་ཡིག་ཁོ་ནའི་ཐོག་སློབ་ཁྲིད་བྱེད་པའི་ལས་ཁུངས་ཤིག་ཡིན་འདུག
ངྷ་ས་མེག་གྷན་དུ་གསར་འཛུགས་བྱས་པའི་ནང་བསྟན་སྲི་ཞུ་ཁང་དེའི་འགན་འཛིན་ངག་དབང་འཕྲིན་ལས་ལགས་ཀྱིས་ངོ་སྤྲོད་གནང་དོན་ལྟར་ན། ནང་བསྟན་སྲི་ཞུ་ཁང་ཞེས་པའི་ལས་ཁུངས་དེ་ནི་ཧྥ་རན་སིར་གནས་བཞུགས་བླ་མ་མཁྱེན་བརྩེ་རིན་པོ་མཆོག་གིས་ཧིན་སྒོར་འབུམ་གཉིས་ཀྱི་རོགས་དངུལ་གནང་བ་ལྟར། ༢༠༡༡ ལོའི་ཕྱི་ཟླ་ ༤ པའི་ནང་ ཁ་པར་འབྲེལ་མཐུད་ལྟེ་གནས་ (CALL CENTER) ལ་དཔེ་བལྟས་ཏེ་བཞུགས་སྒར་ངྷ་སར་ཚོད་ལྟའི་ངོ་བོའི་ཐོག་བཙུགས་པ་ཞིག་ཡིན་ཞིང་། ལོ་དེའི་ཕྱི་ཟླ་ ༡༠ པའི་ནང་ལས་ཁུངས་དེ་རྒྱ་གར་དབུས་གཞུང་ལ་ཁྲིམས་མཐུན་དེབ་སྐྱེལ་བྱས་ཏེ་དངོས་སུ་གསར་འཛུགས་གནང་ཡོད་པ་རེད། ད་ཆར་ལས་ཁུངས་འདིར་ཁྱོན་གཏན་འཇགས་ལས་བྱེད་ ༨ དང་། ཨ་རི་དང་ཡུ་རོབ། མཱ་ལེ་ཤི་ཡཱ་དང་སང་གྷི་ཕོར། ཐའེ་ཝན་གཙོས་འཛམ་གླིང་རྒྱལ་ཁབ་ ༡༥ ཙམ་གྱི་ནང་། ཕྱི་རྒྱལ་སློབ་མ་ ༣༥ དང་བོད་རིཊ་རང་ལོ་ ༡༠ ཡས་མས་ཅན་གྱི་སློབ་མ་ ༤ བཅས་ཡོད་འདུག
ལས་ཁུངས་དེའི་དམིགས་ཡུལ་གཙོ་བོ་ནི་བོད་ཡིག་ནང་ཡོད་པའི་ནང་པའི་རིག་གཞུང་རྣམས་ཡུན་གནས་དར་སྤེལ་གཏོང་ཆེད་དང་། ནུབ་ཕྱོགས་ཡུལ་གྲུ་ཁག་གི་བོད་ཀྱི་བླ་མ་དགེ་བཤེས་རྣམ་པའི་སྐད་སྒྱུར་ཚོས་ཁ་སྐད་མི་ཤེས་པའི་དཀའ་ངལ་སེལ་ཐབས། དེ་བཞིན་ཕྱི་རྒྱལ་གནས་སྡོད་བོད་རིགས་གཞོན་སྐྱེས་ཚོར་བོད་སྐད་བོད་ཡིག་སློབ་སྦྱོང་གི་མཐུན་རྐྱེན་སྤྲོད་ཆེད་དུ་ཡིན་འདུག དེའི་ཐད་ངག་དབང་འཕྲིན་ལས་ལགས་ཀྱིས། “ ང་ཚོའི་ཕུགས་ཀྱི་དམིགས་ཡུལ་དེ་ནང་པའི་བསྟན་པ་ཡུན་རིང་གནང་རྒྱུ་དེ་རེད། ད་ཆར་ནང་ཆོས་ཀྱི་བརྟེན་ས་གཙོ་བོ་བོད་པའི་སྐད་དང་ཡི་གེ་ཆགས་ཡོད། བོད་པའི་ཡིག་སྐད་ཡག་པོ་ཤེས་དགོས་ན།ཐོག་མར་བོད་པའི་ཁ་སྐད་ཡག་པོ་ཤེས་དགོས། བོད་པའི་ཁ་སྐད་རྒྱུན་འཛིན་བྱེད་དགོས་ན། ཁ་སྐད་རྒྱག་མཁན་མི་མང་པོ་དགོས་པ་རེད། མི་ག་ཚོད་ཀྱིས་མང་ན་བོད་ཀྱི་ནང་བསྟན་ཡུན་རིང་གནས་ཐུབ་ཀྱི་རེད།” ཅེས་བརྗོད་བྱུང་།
ནང་བསྟན་སྲི་ཞུ་ལས་ཁུངས་འདིས་གཏན་འབེབས་བྱས་པའི་དྲ་ཐོག་གི་ཁྲིད་གཞིའི་རྣམ་གྲངས་ནི། ཁ་སྐད་དང་ཡི་གེ་སྦྱོར་ཀློག སུམ་བཅུ་པ། རྟགས་འཇུག སྙན་ངག་གི་རྨང་གཞིའི་ཤེས་བྱ། རྒྱུན་སྤྱོད་ཐ་སྙད། བོད་ཡིག་ཚགས་ཤོག་དང་བོད་ཡིག་དྲ་རྒྱ་ཁག་གི་ཚིག་འགྲོས། བོད་སྐད་རླུང་འཕྲིན་དང་བརྙན་འཕྲིན། གློག་བརྙན་གཟིགས་འབུལ། ༸གོང་ས་མཆོག་གི་བཀའ་སློབ། ནང་ཆོས་ངོ་སྤྲོད། ཨམ་སྐད་དང་ཁམས་སྐད་ཀྱི་སྦྱོར་ཀློག བོད་ཡིག་གི་རི་མོ་བཅས་བོད་སྐད་བོད་ཡིག་སློབ་ཁྲིད་བྱེད་བཞིན་ཡོད་འདུག
ངག་དབང་འཕྲིན་ལས་ལགས་ཀྱིས་བརྗོད་ན། ལས་ཁུངས་འདིས་དྲ་ཐོག་གི་སློབ་མ་ཚོར་ཉིན་ལྟར་མི་རེར་ཆུ་ཚོད་ ༡ ཙམ་རིང་སློབ་མའི་གནས་ཚད་དང་བསྟུན་ཏེ་བོད་ཡིག་སློབ་ཁྲིད་བྱེད་ཀྱིན་ཡོད་ལ། ཡུ་རོབ་ཏུ་གནས་སྡོད་བྱེད་མཁན་སློབ་མ་ཚོས་ཆུ་ཚོད་རེར་སློབ་ཡོན་ཡུ་སྒོར་ ༢།༥ རེ་སྤྲོད་དགོས་པ་དང་། བྱང་ཨ་རི་དང་དེ་མིན་ས་གནས་གཞན་ནང་ཆུ་ཚོད་རེར་ཨ་སྒོར་ ༣ རེ་སྤྲོད་དགོས་ཀྱི་ཡོད། ཕྱི་རྒྱལ་དུ་སྡོད་མཁན་བོད་པ་ཚོར་རིན་མེད་ཐོག་སོ་སོའི་དགོས་མཁོ་དང་འཚམ་པའི་སློབ་ཁྲིད་བྱེད་ཀྱི་ཡོད་འདུག་ལ། ད་ཆར་ལས་ཁུངས་འདིས་དྲ་ཐོག་གི་སློབ་མ་ཚོའི་སློབ་ཡོན་བསྡུ་རུབ་གནང་སྟེ། དགེ་རྒན་ཚོར་ཟླ་རེར་ཟླ་ཕོགས་ཧིན་སྒོར་ ༡༠༠༠༠ རེ་སྤྲོད་ཀྱི་ཡོད་ལ། ལས་ཁུངས་ཀྱི་དགེ་རྒན་མང་ཆེ་བ་སཱ་ར་མཐོ་སློིབ་དང་ངྷ་སར་གནས་སྡོད་གཞོན་སྐྱེས་ཁག་ཡིན་འདུག
ངག་དབང་འཕྲིན་ལས་ལགས་སུ་ལས་གཞིའི་དེའི་ཐོག་དམིགས་བསལ་དཀའ་ངལ་འཕྲད་ཡོད་མེད་དྲིས་པར། “ ད་ལྟའི་དཀའ་ངལ་གཙོ་བོ་དཔལ་འབྱོར་གྱི་དཀའ་ངལ་དང་། སློབ་ཁྲིད་བྱེད་སྟངས་མ་ཤེས་པ། ཀློག་དེབ་ཚད་ལྡན་མེད་པ། དགེ་རྒན་རྣམ་པའི་ཚིག་གྲུབ་འགྲོ་སྟངས། བྱ་ཚིག་བེད་སྤྱོད་གཏོང་ཕྱོགས་བཅས་རེད། མ་འོངས་པར་ལས་གཞི་རྒྱ་ཆེ་རུ་གཏོང་ཆེད་སྦྱིན་བདག་འཚོལ་བཞིན་ཡོད་ཀྱང་། སྤྱི་ཚོགས་སྟེང་ལས་གཞིར་དོ་སྣང་དང་གདེང་འཇོག་མ་ཐོབ་ན། ལས་ཁུངས་འདི་ཡུན་གནས་ཐུབ་ཀྱི་ཁག་པོ་རེད། ” ཅེས་བརྗོད་བྱུང་།
གསར་འགོད་པས་ནང་བསྟན་སྲི་ཞུ་ཁང་གི་ཁ་སྐད་དགེ་རྒན་བསྟན་འཛིན་རྣམ་དག་ལགས་སུ་སློབ་ཁྲིད་ཀྱི་གནས་སྟངས་དྲིས་སྐབས། “ འདས་པའི་ཟླ་གཅིག་ནང་དྲ་རྒྱའི་སྐུད་ལམ་དེ་ཙམ་ཡག་པོ་མེད་སྟབས། སློབ་ཕྲུག་ཚོར་འདོད་པ་ཁེངས་པའི་སློབ་ཁྲིད་བྱེད་ཐུབ་མ་སོང་། སློབ་ཁྲིད་སྐབས་སིང་གྷ་ཕོར་དང་མཱ་ལེ་ཤི་ཡཱའི་སློབ་ཕྲུག་ཚོར་སྒྲ་གདངས་ཀྱི་དཀའ་ངལ་མི་འདུག་ཀྱང་། ནུབ་ཕྱོགས་པ་ཚོར་བོད་སྐད་ཀྱི་སྒྲ་གདངས་ཏག་ཏག་མ་ཡོང་བའི་དཀལ་ངལ་འཕྲད་ཀྱི་འདུག དཀའ་ངལ་ཆེ་ཤོས་སློབ་མའི་ཤེས་ཚད་དང་མཐུན་པའི་ཀློག་དེབ་མེད་པ་དེ་རེད། སློབ་མ་ཚོར་བོད་ཡིག་སྦྱང་འདོད་ཆེན་པོ་ཡོད་པ་དེས་སློབ་ཁྲིད་ལ་ཉོབ་སྣང་ཡོང་གི་མི་འདུག ” ཅེས་བརྗོད་སོང་།
གསར་འགོད་པ། དཔལ་ལྡན།
ནམ་མཁའ་བསྟན་འཛིན་ལགས་ཐུགས་རྗེ་ཆེ། བསམ་ཚུལ་ཧ་ཅང་ཡག་པོའདུག། ་བོད་ཡིག་མ་ཕྱི་རྩ་བར་བཞག་ནས་རིག་གསར་བཟོ་སྐྲུན་བྱས་ན་ལེགས་པོ་རེད་དྲན་གྱི་འདུག། དེ་མིན་ཁུངས་བསྡུར་ས་མེད་པ་གང་དྲན་གསར་བཟོ་བྱས་ན་གང་ཞིག་ཡོང་མིན་བཤད་ཚོད་དཀའ་བོད་བཙན་འོག་ཏུ་གནས་མཁན་ཚོས་ཚིག་གསར་དེ་ཚོ་ཧ་ཅང་ལེགས་པོ་འདུག། དེ་ཁུངས་བརྡ་གསར་རྙིང་གཞུང་ནང་གཞི་འཛིན་པ་ཧ་ཅང་གསར་པོ་འདུག། དེ་ལྟར་ལགས་སོ།
དྲ་ལམ་ནས་སློབ་ཁྲིད་བྱེད་ན་དྲ་རྒྱའི་ཁ་བྱང་མི་འདུག་གམ ན་ནིང་ད་ལོ་ཕྱི་རྒྱལ་གྱི་བོད་ཕྲུག་ཚོའི་ནང་བོད་ཡིག་སྦྱངས་འདོད་ཡོད་མཁན་མང་པོ་འདུག འོན་ཀྱང་དཀའ་ངལ་གཅིག་ཤེས་རིག་ནས་དཔར་སྐྲུན་བྱས་བའི་སློབ་དེབ་ཚང་མ་དབུ་མེད་རྐྱང་ཡིན་ཙང་བྱིས་པ་ཚོས་སློབ་དེབ་སྟེང་ནས་གང་འཚམ་ཀློག་ཤེས་ཀྱང་རང་ངོས་ནས་དྲ་རྒྱ་དང་དཔེ་དེབ་གཞན་ཀློག་སྐབས་དབུ་ཅན་ཡིན་སྟབས་དཀའ་ངལ་འཕར་མ་ཞིག་ཕྲད་གྱིན་འདུག གཞན་ཤེས་རིག་གི་སློབ་དེབ་ནང་སྒྲ་དང་ཅ་ལག་གི་མིང་སོགས་ཚིག་མཛོད་གང་དུ་ཡང་མེད་པའི་ཚིག་དེ་འདྲ་གསར་བཟོའི་ཚུལ་དུ་མང་པོ་བཀོད་འདུག ད་དུང་བྱེད་འབྲེལ་ལས་ཚིག་དང་བྱེད་མེད་ལ་ཁྱད་པར་གང་ཡང་མེད་པར། དཔེར་ན་ལྷམ་གྱིས་ཐྲིག་ཐྲིག་ཟེར་གྱིན་འདུག་ཟེར་བ་ལྟ་བུ།
སྤྱིར་རང་ལྟ་མཆོག་འཛིན་གྱི་བསམ་བློ་མིན་ན་བྱིས་པའི་སློབ་དེབ་དབུ་ཅན་ཡིན་ན་བྱིས་པ་རང་ངོས་ནས་དཔེ་དེབ་གཞན་ཀློག་པར་ཕན་ཐོགས་ཆེན་པོ་འདུག འོན་ཀྱང་འདི་སྐུ་ངོ་སུ་ཞིག་གི་བཀའ་དབང་ཡིན་མིན་མི་ཤེས། རྐང་བཙུགས་ནས་བོད་ཡིག་གོམ་པ་དང་པོ་སྦྱངས་མཁན་ཚོར་ཡར་རྒྱས་མི་ཡོང་ཆེད་བཟོས་བ་ལྟ་བུ་ཞིག་འདུག ཁྱོད་ཚོས་མཐོང་མེད་ན་ཐེངས་གཅིག་གཟིགས་རོགས་གནང་།
དུས་རབས་དང་མཐུན་པའི་ཀླད་ཁམས་རིག་པའི་དམག་ཟེར་ན་འདི་རེད་ད། མིག་དཔེ་བཟང་སར་བལྟ་ན་འདི་ན་འདུག་བོད་རིགས་ཚོ་གོ་ཐོས་བྱུང་བ་ཧ་ཅང་དགའ་ལ་བཀྲིན་བླ་མེད་དུ་ཆེ་ཞུ།།