བོད་མི་ ༡༦ ལ་ཁྲིམས་ཐག་བཅད་འདུག

ཟླ་འདིའི་ཕྱི་ཚེས་ ༢༦ ཉིན་ཁམས་བྲག་མགོ་ས་ཁུལ་གྱི་བོད་མི་ ༡༦ ལ་རྒྱ་གཞུང་གིས་ཉེས་ཆད་ཁྲིམས་ཐག་བཅད་ཡོད་པ་དང་། དེའི་ཁྲོད་བོད་གཅིག་ལ་ཚེ་བཙོན་གྱི་ཁྲིམས་ཆད་བཅད་འདུག

འདི་ལོའི་ཕྱི་ཟླ་ ༡ ཚེས་ ༢༣ ཉིན་ཁམས་བྲག་མགོ་རྫོང་དུ་བོད་མིས་ཞི་བའི་ངོ་རྒོལ་བྱས་སྐབས། རྒྱ་གཞུང་གིས་དྲག་གནོན་བྱས་ཏེ་རྒྱལ་གཅེས་དཔའ་བོ་ཡོན་ཏན་གཙོས་བོད་མི་མང་པོ་དམར་གསོད་དང་། ཞི་རྒོལ་བ་མང་པོ་འཇུ་བཟུང་བཙན་འཁྲིད་བྱས་ཡོད་པ་ལྟར། ཟླ་འདིའི་ཕྱི་ཚེས་ ༢༦ ཉིན་ཁམས་བྲག་མགོ་རྫོང་དུ་བོད་མི་ ༡༦ ལ་བཙོན་འཇུག་ཁྲིམས་ཐག་བཅད་ཡོད་པ་དང་། དེའི་ཁྲོད་བོད་མི་གཅིག་ལ་ཚེ་བཙོན་དང་གཞན་རྣམས་ལ་ལོ་ ༡ ནས་ ༡༣ བར་གྱི་ཁྲིམས་ཐག་བཅད་འདུག 

རྒྱ་གར་ལྷོ་ཕྱོགས་སུ་གནས་སྡོད་བསོད་ནམས་ཚེ་རིང་ལགས་ཀྱིས་གསར་ལམ་ཏུ་བརྗོད་པ་ལྟར་ན། ཁམས་བྲག་མགོ་རྫོང་དུ་བོད་མི་ ༡༦ ལ་བཙོན་འཇུག་ཁྲིམས་ཐག་བཅད་ཡོད་པའི་ཁྲོད་ནས། བོད་མི་ ༡༠ མིང་དང་ཁྲིམས་ཆད་གནས་སྟངས་ཤེས་རྟོགས་བྱུང་ཡོད་པ་དང་། དེ་དག་ནི་རང་ལོ་ ༣༠ ཡིན་པའི་བསོད་ནམས་ལྷུན་འགྲུབ་ལ་ཚེ་བཙོན་དང་། རང་ལོ་ ༣༠ ཡིན་པའི་དབང་ཆེན་ཚེ་རིང་ལ་བཙོན་འཇུག་ཁྲིམས་ཆད་ལོ་ ༩ ། རང་ལོ་ ༢༥ ཉིན་པའི་ཆོས་རྣམ་ལ་ལོ་ ༣ ། རང་ལོ་ ༥༠ ཡིན་པའི་ཨ་འཛེ་བཟོད་པ་ལ་ལོ་ ༣ ། རང་ལོ་ ༣༠ ཡིན་པའི་ལྕགས་བྷེ་ལ་ལོ་ ༡༢ ། རང་ལོ་ ༢༠ ཡིན་པའི་ཀུན་ཐོག་ལ་ལོ་ ༡༣ ། རང་ལོ་ ༣༠ ཡིན་པའི་ཀུན་གྲུབ་ལ་ལོ་ ༡༡། རང་ལོ་ ༣༠ ཡིན་པའི་ཕུར་བུ་ཚེ་རིང་ལ་ལོ་ ༢ ། རང་ལོ་ ༢༠ ཡིན་པའི་དབང་ཚེ་ལ་ལོ་ ༡ དང་ཟླ་བ་ ༩ ། རང་ལོ་ ༣༠ ཡིན་པའི་སྙན་གྲགས་ལ་ལོ་ ༡ དང་ཟླ་བ་ ༨ བཅས་ཀྱི་བཙོན་འཇུག་ཁྲིམས་ཆད་བཅད་ཡོད་འདུག

གནས་ཚུལ་མཁོ་སྤྲོད་པས་བརྗོད་པ་ལྟར་ན། ཉེ་སྔོན་རྒྱ་གཞུང་གིས་གཞན་པའི་བོད་མི་ ༧ ལའང་ལོ་ ༥ ནས་ ༡༣ བར་གྱི་བཙོན་འཇུག་ཁྲིམས་ཆད་བཅད་ཡོད་པ་དང་། དེའི་ཁྲོད་བོད་མི་བསོད་ནམས་དར་རྒྱས་ལ་ལོ་ ༡༠ ་དང་པདྨ་འོད་ཟེར་ལ་ལོ་ ༥ ཁྲིམས་ཆད་བཅད་འདུག གཞན་ཡང་། ཉེ་སྔོན་རྒྱ་གཞུང་གིས་ངོ་ལོག་ཟིང་ཆ་སློང་མཁན་གྱི་ཉེས་མིང་འོག བྲག་མགོ་དགོན་པའི་གྲྭ་བཀྲ་ཤིས་དར་རྒྱས་དང་རྣམ་རྒྱལ། མིང་ཤེས་རྟོག་བྱུང་མེད་པའི་གྲྭ་པ་གཞན་གཅིག་བཅས་མི་གསུམ་འཇུ་བཟུང་བྱས་ཡོད་པ་དང་། གྲྭ་བཀྲ་ཤིས་དར་རྒྱས་ད་ལྟ་སྨར་ཁམས་རྫོང་གི་བཙོན་ཁང་ནང་བཀག་ཉར་བྱས་ཡོད་འདུག དེ་བཞིན། བྲག་མགོ་དགོན་པའི་གྲྭ་བ་ ༣༠ དགོན་པ་ནས་ཕྱིར་ཕུད་བཏང་ཡོད་པ་མ་ཟད། རང་ལོ་ ༡༤ སོན་མེད་པའི་གྲྭ་པ་གཅིག་ཀྱང་དགོན་པའི་ནང་ཉར་མི་ཆོག་པའི་བཀའ་རྒྱ་བཏང་ཡོད་འདུག